1. ¿Ima sumaj imastaj kanqa Cristo waranqa watasta kamachishajtin?

 CRISTO waranqa watasta kamachishajtin wañusqas kay jallpʼapi kausarimuyta qallarisqanku pʼunchayqa, may kusiypuni kanqa. Munasqa wañupoj familiaresninchejtaqa, tukuypis maytapuni watejmanta rikukapuyta munashanchej. Jehovapis paykunata rikukapuyta munashallantaj (Job 14:15). Tukuypis manchay kusisqachá kay jallpʼapi kashanqanku munasqa familiaresninku kausarinpojtinku. Ñaupaj yachaqanapi yachakorqanchej jina, kausay libropi sutisninku qhelqasqa kashan chay ‘cheqan runasqa’, “wiñay kausayta japʼinankupaj” kausarimonqanku (Hech. 24:15; Juan 5:29). Ichapis munasqa familiaresninchejmanta ashkhasqa, kay jallpʼapi ñaupajta kausarimojkunamanta kanqanku. * ‘Mana cheqan runastaj’, pikunachus niraj wañupushaspa mana Jehovata rejsiyta aterqankuchu chayri mana payta sirviyta aterqankuchu chaykunaqa, “juzgasqa kanankupaj” kausarimonqanku.

2, 3. 1) Isaías 11:9, 10 nisqanman jina, ¿pikunamantaj ni jaykʼaj jina yachachikonqa? 2) ¿Imatataj kay yachaqanapi yachakusun?

² Tukuy chay kausarimojkunaqa ashkhataraj yachakunanku kanqa (Isa. 26:9; 61:11). Chayrayku tukuy runasman ni jaykʼaj jina yachachikunan kanqa (Isaías 11:9, 10 leey). Mana cheqan runasqa yachakunanku kanqa Jesucristomanta, Diospa  Gobiernonmanta, Jesuspa wañuyninmanta, Jehovaj sutin, chantá paylla kamachej kasqanpis may importante kasqanmanta. Cheqan runaspis yachakunallankutaj kanqa imatachus Jehová munayninmanta pisimanta pisi llajtanman sutʼinchasqanta. Paykunamanta wakenqa Biblia qhelqayta tukukunanpaj ashkha watas faltashajtinraj wañuporqanku. Chayrayku mana cheqan runaspis cheqan runaspis ashkhataraj yachakunanku kanqa.

³ Kay yachaqanapeqa kay tapuykunaman kutichisun: ¿Imaynatá runasman ni jaykʼaj jina yachachikonqa? Chay yachachikusqanta imaynatachus japʼikusqanku, ¿imaynatá yanapanqa sutisninku kausay libropi wiñaypaj qhelqasqa kananpaj chayri mana qhelqasqa kananpaj? Chay tapuykunaj kutichiynintaqa kunanña sutʼita yachananchej tiyan. Yachakusun jina, Daniel libromanta, Apocalipsis libromantawan wakin profecías yanapawasun, wañusqas kausarichisqas kajtinku imachus kananta entiendenapaj. Ñaupajta qhawarina Daniel 12:1, 2 versiculospi, ima sumaj imas kananmantachus parlasqanta.

4, 5. Daniel 12:1 versiculopi, ¿tukukuy tiempopi ima kanantataj nin?

⁴ (Daniel 12:1 leey). Daniel libropeqa niwanchej tukukuy tiempopi imaschus ñaupajta kananta, chaypa qhepantataj imaschus kananta. Daniel 12:1 versiculopeqa nin Miguel, nisunman Jesucristo Diospa ‘llajtanman kutikuspa sayashasqanta’. Chaytaj 1914 watamantapacha juntʼakuyta qallarerqa. Chay watapeqa Jesús Diospa Gobiernonmanta Rey jina churasqa karqa.

⁵ Chantapis Danielman nisqallataj karqa Jesusqa ‘llakiy tiempopi jatarinanta’, “mayqenchus naciones rikhurisqankumantapacha chay tiempokama mana karqachu” chay tiempopi. Chay ‘llakiy tiempoqa’ Mateo 24:21 versiculopi “manchay ñakʼariy” tiempomanta parlan chay tiempollataj. Jesusqa jatarikun chayri Diospa llajtanta jarkʼakun, chay llakiy tiempo tukukuyta, nisunman Armagedonpi. Apocalipsis libroqa chay runasllamantataj parlaspa nin “manchay ñakʼariymanta” may chhika runas llojsimusqankuta (Apo. 7:9, 14).

6. ¿Imataj kanqa may chhika runas manchay ñakʼariy tiempota kausashaj pasasqankutawan, chanta imaraykutaj chayta ninchej? (Kay revistapi “Leejkunaj tapuyninku” nisqa yachaqanata leerillawajtaj. Chaypi sutʼinchashan kay jallpʼapi kausarichisqa kanqanku chaykunamanta).

⁶ (Daniel 12:2 leey). ¿Imataj kanqa may chhika runas llakiy tiempota kausashaj pasasqankutawan? Kay profeciaqa kausarimuy kananmanta parlan. Ñaupajtaqa yuyaj kanchej Daniel 12:2 versiculopeqa cieloman ripunankupaj kausarimojkunamanta parlashasqanta, chayri 1918 watapi churanakojkuna predicacionta casi sayachisqankutawan astawan predicakusqanmanta parlashasqanta. * Kunantaj entiendenchej mosoj jallpʼapi kausarimuy kananmanta parlashasqanta. ¿Imajtín chayta ninchej? Job 17:16 versiculopipis ‘jallpʼallamantataj’ parlan. Jallpʼa nispataj ‘Sepulturamanta’ parlashan. Chaytaj reparachiwanchej Daniel 12:2 versiculoqa wañusqas kausarimunankumantapuni parlashasqanta. Chay kausarimuytaj qhepa pʼunchaykuna tukukojtin kanqa, Armagedón guerra pasayta.

7. 1) ¿Ima niytá munan Daniel 12:2 versiculopi “wakenqa wiñaypaj kausanankupaj” kausarimunankuta nisqan? 2) ¿Imajtintaj chay ‘aswan sumaj kausarimuy’ kanqa?

⁷ Chantá, ¿ima niytá munan Daniel 12:2  versiculopi “wakenqa wiñaypaj kausanankupaj” kausarimunankuta nisqan? Chayqa niyta munan kausarimojkuna 1.000 wataspi Jehovata rejsejtinku, chayri rejsillajtinkupuni, chantá Jehovatawan Jesustawan kasukojtinku, wiñay kausayta japʼinankuta (Juan 17:3). Chay kausarimoyqa ‘aswan sumaj kausarimuy’ kanqa ñaupa tiempopi wakin kausarimojkunamanta nisqaqa (Heb. 11:35). ¿Imajtín chayta ninchej? Ñaupa tiempopi kausarimojkunaqa watejmanta wañupullarqankutaj.

8. ¿Ima niytá munan wakin “wiñaypaj kʼumuykachachisqa, chejnisqastaj kanankupaj” kausarimunanku?

⁸ Jinapis mana tukuy kausarimojkunachu Jehovaj yachachiyninta japʼikuyta munanqanku. Danielpa profecianpeqa nin wakenqa “wiñaypaj kʼumuykachachisqa, chejnisqastaj kanankupaj” kausarimunankuta. Mana kasukuyta munasqankurayku sutisninkoqa mana kausay libropichu qhelqasqa kanqa, nitaj wiñay kausayta japʼenqankuchu. Paykunaqa ‘wiñaypaj chejnisqas’ kanqanku, nisunman chinkarparichisqas. Chayrayku Daniel 12:2 versiculoqa, tukuy kausarimojkuna kausarimuytawan imatachus ruwanqanku, chayman jina imachus paykunawan kananmanta parlashan (Apo. 20:12). * Wakenqa wiñay kausayta japʼenqanku, wakintaj mana.

9, 10. ¿Imawantaj kanqa manchay ñakʼariy tiempo pasayta, chanta pikunataj “cielo jina kʼancharenqanku”?

⁹ (Daniel 12:3 leey). ¿Imawantaj kanqa qayllamushanña chay “llakiy tiempo” pasayta? Mana Daniel 12:2 versiculopi imachus kananta nisqallanchu kanqa. Versículo 3 nillawanchejtaj imawanchus manchay ñakʼariy tiempo pasayta kananta.

¹⁰ ¿Pikunataj kanku “cielo jina kʼancharenqanku” chaykuna? Imatachus Jesús Mateo 13:43 versiculopi nisqan chayta yachanapaj yanapawanchej. Pay nerqa: “Chaypacha cheqanta ruwajkunaqa, Tatankoj Gobiernonpi inti jina lliphipirenqanku”, nispa. Chayta nispa Jesusqa parlasharqa ‘Gobiernoj wawasninmanta’, nisunman Diospa Gobiernonpi paywan khuska kamachimonqanku chay ajllasqa hermanosninmanta (Mat. 13:38). Chayrayku Daniel 12:3 versiculopeqa parlashan ajllasqa cristianosmanta, waranqa watasta kamachishajtinku imatachus ruwanankumantawan.

11, 12. ¿Imatá 144.000 ajllasqas ruwanqanku waranqa wataspi?

¹¹ Ajllasqa cristianosqa “cheqan kajta ruwanankupaj ashkhasta” yanapanqanku. ¿Imaynatá chayta ruwanqanku? Jesuswan khuska encargakonqanku chay waranqa wataspi kay jallpʼapi sumajta yachachikunanpaj. 144.000 ajllasqasqa mana reyesllachu kanqanku, manachayqa sacerdotes ima (Apo. 1:6; 5:10; 20:6). Chayrayku paykunaqa yanapakonqanku ‘nacionesta jampiypi’, runasta pisimanta pisi mana juchayoj runasman tukuchispa (Apo. 22:1, 2; Eze. 47:12). Maytachá ajllasqa cristianos kusikonqanku chayta ruwaspa.

¹² Chanta “cheqan kajta ruwanankupaj ashkhasta” yanapakonqa nispa, ¿pikunamantataj parlashan? Kausarimojkunamanta, Armagedonta kausashaj pasajkunamanta, mosoj jallpʼapi nacekoj wawasmanta ima. Waranqa watas tukukuyta, tukuy kay jallpʼapi kausakojkunaqa manaña pantaj runaschu kanqanku. Chanta, ¿maykʼajtaj sutisninku kausay libropi tintawan qhelqasqa kanqa, manataj lapizllawanchu?

13, 14. ¿Imatataj kay jallpʼapi kausakoj tukuy mana pantaj runas ruwananku kanqa niraj wiñay kausayta japʼishaspa?

¹³ Yachanchej jina pipis mana pantaj runa kasqanqa, mana niyta munanchu wiñay kausayta japʼinanqa seguroña kasqanta. Adanpiwan Evapiwan piensarina. Paykunaqa mana pantaj runas karqanku. Jinapis wiñay kausayta japʼinankupajqa Jehovata kasukusqankuta rikuchinanku karqa. Llakikunapaj jinataj mana kasukorqankuchu (Rom. 5:12).

¹⁴ Yachakunchej jina, 1.000 watas tukukuytaqa tukuy kay jallpʼapi kausajkuna manaña pantaj runaschu kanqanku. ¿Tukuy chay mana pantaj runaschu Jehovaj Gobiernonta wiñaypaj apoyanqanku chayri Adanwan Evawan jinachu wakin kanqanku? Paykunaqa mana pantaj runas kaspapis mana Jehovata kasukorqankuchu. Imaynachus chay kananta qhawarina.

15, 16. 1) ¿Maykʼajtaj tukuy runas Jehovatachus manachus kasukusqankuta rikuchinanku kanqa? 2) ¿Imataj kanqa chay prueba pasayta kasukojkunawan mana kasukojkunawan ima?

¹⁵ Satanasqa 1.000 watasta wisqʼasqa kanqa. Chay wataspitaj mana pitapis engañayta atenqachu. Chay 1.000 watas tukukuytataj kacharisqa kanqa, mana pantaj runastataj engañayta munanqa. Chay pruebapeqa tukuy rikuchinanku kanqa, Jehovaj sutinta respetasqankutachus manachus, kamachiynintapis apoyasqankutachus manachus (Apo. 20:7-10). Imatachus chaypacha ruwasqankumanta kanqa,  sutisninku kausay libropi wiñaypaj qhelqasqachus manachus kanan.

¹⁶ Wakenqa Adanwan Evawan jina mana Jehovaj Gobiernonta apoyanqankuchu, nitaj yachakunchu mashkhachus paykuna kanankuta. ¿Imataj paykunawan kanqa? Apocalipsis 20:15 niwanchej: “Pikunachus kausay libropi mana qhelqasqa kajkunaqa nina qochaman wijchʼuykusqa karqanku”, nispa. Arí, chay mana kasukojkunaqa wiñaypaj chinkasqata chinkarparichisqa kanqanku. Jinapis chay mana pantaj runasmanta mayoriaqa, chay qhepa kaj pruebata atipanqanku. Sutisninkutaj kausay libropi wiñaypaj qhelqasqa kanqa.

17. ¿Kay tiemponchejpi ima kanantataj uj ángel Danielman nerqa? (Daniel 12:4, 8-10).

¹⁷ Maytapuni kusikunchej tukuy chay imas qhepaman kananpi piensarispa. Jinapis uj angelqa Danielman uj sumaj willayta willallarqataj, imachus kay ‘tukukuy tiempopi’ kananmanta, nisunman kay tiemponchejpi kananmanta (Daniel 12:4, 8-10 leey; 2 Tim. 3:1-5). Chay ángel nerqa: “Cheqa yachaytaj astawan ashkhayanqa”, nispa. Chaywanqa nisharqa Diospa llajtanqa Daniel libromanta profeciasta aswan sumajta entiendenanta. Chay angelqa imawanchus kay tukukuy tiempopi kananmanta  nillarqataj: “Sajra runasqa sajra imasta ruwanqanku, chayrayku ni mayqen sajra runapis kay imasta entiendenqachu”, nispa.

18. ¿Imataj sajra runaswan kanqa tumpamantawan?

¹⁸ Kay tiemponchejpeqa sajra imasta ruwajkuna mana castigota japʼispa jinankuchu (Mal. 3:14, 15). Jinapis tumpamantawan Jesusqa cabraswan ninakoj runasta juzganqa, tʼaqanqataj ovejaswan ninakoj runasmanta (Mat. 25:31-33). Chay sajra runasqa mana manchay ñakʼariy tiempota pasanqankuchu, nitaj kausarimonqankuchu mosoj jallpʼapi kausakunankupaj. Malaquías 3:16 versiculopi nisqanman jinataj, sutisninkoqa mana qhelqasqachu kanqa ‘yuyarisqa kanapaj’ libropi.

19. ¿Imatataj kunan ruwananchej tiyan chanta imaraykutaj? (Malaquías 3:16-18).

¹⁹ Kunan tiempo kashan rikuchinapaj mana sajra runas partechu kasqanchejta (Malaquías 3:16-18 leey). Jehovaqa paypata kajkunata tantashan ‘sumaj llajtan’ kanankupaj. Noqanchejpis paykuna ukhupi kayta munanchej.

20. ¿Imatataj Jehová Danielman nerqa, chanta imajtintaj munanchej chay nisqan juntʼakunallantaña?

²⁰ Kay tiempopeqa tʼukuna imasta rikushanchej, aswan qhepamantaj aswan tʼukuna imasraj kanqa. Tukuy sajra imas chinkachisqa kanqa chay pʼunchay qayllaykamushanña. Chay pasaytataj rikusunchej imaynatachus juntʼakonqa imatachus Jehová Danielman nisqan. Pay nerqa: “Tukukuy pʼunchaykunapi sayarimunki imachus chayasusqanta japʼinaykipaj”, nispa (Dan. 12:13). Maytachá munashanchej Danielwan, wañuporqanku chay munasqa familiaresninchejwan kausarimonqanku chay pʼunchay chayamunallantaña, ¿icharí? Jina kajtenqa tukuy atisqanchejta kallpachakuna Jehovata kasukunallapajpuni. Ajinamanta sutinchejqa Jehovaj kausay libronpi qhelqasqa qhepakonqa.