1. ¿Imaynataj de confianza runa?

 DE CONFIANZA runaqa kallpachakun imatachus nisqanta juntʼananpaj, cheqa kajtapunitaj parlananpaj (Sal. 15:4). Wajkunataj yachanku paypi confiayta atisqankuta. Noqanchejpis munanchej hermanosninchej, hermanasninchejpis noqanchejpi confianankuta. ¿Imataj chaypaj yanapawasunman?

2. ¿Imaynatá rikuchisunman de confianza runas kasqanchejta?

² Mana wajkunata obligasunmanchu noqanchejpi confianankupaj. Noqanchej rikuchinanchej tiyan de confianza kasqanchejta. De confianza kayqa qolqe jina, mana ganakuyta atillanchejchu, jinapis chay rato wayrarpachinchej. Jehovaqa sutʼita rikuchiwanchej confianapaj jina kasqanta. Paypeqa tukuy imapi atienekuyta atinchej, imaraykuchus “payqa atienekunapaj jina, tukuy ima ruwasqanpis may sumajpuni” (Sal. 33:4). Jehovaqa munan noqanchejpis pay jinallataj kananchejta (Efe. 5:1). Kay yachaqanapeqa parlarisun Jehovaj ñaupa tiempo kamachisninmanta. Paykunaqa Tatanku Jehová jina de confianza kasqankuta rikucherqanku. Parlarillasuntaj phishqa imasmanta. Chaytaj yanapawasun de confianza kanapaj.

3, 4. 1) ¿Imata ruwaspataj Daniel rikucherqa de confianza kasqanta? 2) ¿Ima tapuykunapitaj piensarinanchej tiyan?

³ Profeta Danielmantaqa mayta yachakusunman. Babiloniaman apajtinku, runasqa pisi tiempollapi de confianza runata jina qhawarqanku. Astawanraj paypi confiarqanku rey Nabucodonosorpa mosqoykunasninta Jehovaj yanapanwan sutʼinchasqanrayku.  Uj pacha reyman willarqa Jehovaqa payta mana allinpajchu qhawasqanta. Chay jina willayqa ni pi reypajpis allinchu kanman. Nabucodonosorqa manchay phiña runa karqa. Chayrayku Danielqa maytachá kallpachakorqa payman chayta willananpaj (Dan. 2:12; 4:20-22, 25). Ashkha watasninmantaj Danielqa watejmanta rikucherqa de confianza runa kasqanta. Payqa Babiloniamanta reypa kamachina wasinpa perqanpi rikhurej qhelqasqata, maychus kajsituta suntʼincharqa (Dan. 5:5, 25-29). Aswan qhepamanpis Media nacionmanta rey Darío, kuraj autoridadesninpis reparallarqankutaj Danielqa aswan yachayniyoj kasqanta. Paykunaqa repararqanku de confianza kasqanta, “nitaj juchachayta aterqankuchu imatapis mana allinta apaykachasqanmanta, nitaj mana allin imasta ruwasqanmantapis” (Dan. 6:3, 4). Reparanchej jina, Jehovata mana yupaychaj kamachejkunapis repararqanku Danielqa de confianza kasqanta.

⁴ Danielpi tʼukurispa kay tapuykunapi piensarisunman: “¿Imatataj noqamanta ninku mana testigo kajkuna? ¿De confianza runata jinachu, ruwanasninta juntʼaj runata jinachu qhawawanku?”. Chay tapuykunapeqa piensarinanchejpuni tiyan, imajtinchus de confianza runas kaspaqa Jehovata jatunchanchej.

5. ¿Imataj Hananiasta yanaparqa de confianza runa kananpaj?

⁵ Kamachej Nehemiasqa Jerusalenpa perqasninta allinchayta tukusqankutawan, 455 watapi Jesús niraj jamushajtin, de confianza runasta churarqa llajtamanta cargoyoj kanankupaj. Chay runasmanta ujnintaj Hananías  karqa, payqa “soldadospa wasinmanta capitán karqa”. Bibliaqa Hananiasmanta nin: “De confianza runa karqa, wajkunamanta nisqataj cheqa Diosta astawan manchachikoj”, nispa (Neh. 7:2). Hananiasqa Jehovata munakusqanrayku, paypa sonqontataj nanachiyta manchachikusqanrayku, ima ruwanastachus qosqankuta sumajta juntʼaj. Noqanchejtapis chay imasllataj yanapawasun de confianza cristianos kanapaj.

6. ¿Imaynatataj Tíquico rikucherqa Pabloj de confianza amigon kasqanta?

⁶ Pabloj de confianza amigon Tiquicomantañataj parlarina. Pablotaqa alquilakusqan wasipi presochasqa kashajtin, Tíquico yanaparqa. Pablotaj paymanta nerqa “Señorpa sumaj kamachin” kasqanta (Efe. 6:21, 22). Pabloqa Tiquicopi confiasqanrayku Efesomanta, Colosasmanta hermanosman cartasta paywan apacherqa. Jinapis mana cartasllatachu apacherqa. Manachayqa Tiquicota kacharqa hermanosta kallpachananpaj, sonqochananpaj ima. Kay tiempopipis, Tíquico jina Jehovata tukuy sonqo sirvej de confianza cristianos tiyallantaj. Paykunataj Diospa qayllallanpipuni kanapaj yanapawanchej (Col. 4:7-9).

7. ¿Imatataj yachakusunman ancianos, siervos ministerialespis de confianza runas kasqankumanta?

⁷ Kay tiempopipis mayta agradecekunchej ancianos, siervos ministeriales de confianza hermanos kasqankumanta. Paykunaqa Daniel, Hananías, Tíquico jina, ima ruwaykunatachus japʼisqankuta sumajta ruwanku. Chaupi semanapi reunionman rispaqa, yachanchej tukuynin partes asignasqaña kasqanta. Ancianostaj mayta agradecekunku hermanos, hermanaspis asignacionesninkuta sumajta wakichikusqankumanta, sumajtataj ruwasqankumanta. Semana tukukuypaj reunionesninchejman estudiosninchejta wajyarispapis, yachanchej uj discursante kanantapuni. Chantapis yachallanchejtaj predicananchejpaj publicaciones kanantapuni. Sutʼita reparanchej chay hermanosninchejqa sumajta cuidawasqanchejta. Chayta ruwasqankumantataj Jehovaman agradecekunchej. Jinapis, ¿imaynatá noqanchej rikuchisunman de confianza kasqanchejta?

8. Hermanosninchejmanta llakikuspapis, ¿imatataj mana ruwananchejchu tiyan? (Proverbios 11:13).

⁸ Hermanosninchejtaqa munakunchej, llakikunchejtaj imachus paykunata pasashasqanmanta. Jinapis sumajta qhawarikuna tiyan kausayninkuman mana anchata satʼikunapaj. Ñaupa tiempo congregacionmanta wakenqa cuento qʼepis kaj kanku, wajkunaj kausayninkuman satʼikoj kanku, mana parlananku imasmantataj parlaj kanku (1 Tim. 5:13). Manapuni paykuna jina kayta munasunmanchu. Ichá pipis kausayninmanta imata willariwasunman, niwasunmantaj noqallanchejman willarishawasqanchejta. Ichapis uj hermana niwasunman onqosqa kashasqanta chayri uj pruebapi rikukushasqanta, niwasunmantaj ni piman chayta willananchejta. Noqanchejtaj niwasqanchejman jina ni piman willananchejchu tiyan (Proverbios 11:13 leey). * Qhawarina ima kutispiwanchus imatapis mana pimanpis willarqonallachu kasqanta.

9. Uj familiapi kajkuna, ¿imaynatataj rikuchinkuman tukuyninku de confianza kasqankuta?

⁹ Familiapi. Familiamanta sapa ujqa, yachananku tiyan imachus paykuna ukhupi kasqanta mana pimanpis willarayta. Ichapis uj qosaqa yuyanman señoranpa ujnin mañitan asikunapaj jina kasqanta. Chaytaqa mana wajkunaman willarallanmanchu, ¿icharí? Munakusqanrayku  ni imarayku munanmanchu pʼenqachiyta chayri sonqonta nanachiyta (Efe. 5:33). Tataspis yuyarikunanku tiyan jovencitosqa respetasqa kayta munasqankuta. Chayrayku mana munankumanchu pantasqasninkumanta wajkunaman willaspa pisipaj qhawachiyta (Col. 3:21). Wawastajrí chʼin kakuyta yachananku tiyan, nitaj familiankumanta pillatapis pʼenqaypi rikhurichinankupaj jina imatapis willarqonankuchu tiyan (Deu. 5:16). Familiamanta tukuyninku imachus paykuna ukhupi kasqanta mana pimanpis willarqonankupaj kallpachakonqanku chayqa, aswan ujchasqa kanqanku.

10. ¿Imaynataj uj sumaj amigo? (Proverbios 17:17).

¹⁰ Amigosninchejwan. Maykʼajllapis imapis pasashawasqanchejmanta uj sumaj amigonchejman willarikuyta necesitanchejpuni. Chayta ruwaytaj wakin kutisqa mana atikullanmanchu. Ichapis imaynapunichus kashasqanchejta mana wajkunaman willariyta yachanchejchu, mana chayta ruwayman yachasqachu kasqanchejrayku. Wakin kutitaj ichá uj amigonchejman imatapis willarerqanchej. Chayta wajkunaman willarasqanta yachaspataj, mayta llakikorqanchej. Sumaj de confianza amigos kapuwajtinchejtaj mayta agradecekunchej. Paykunaqa imatapis willarejtinchej mana wajkunaman willarqonkuchu. Chaymá “sumaj amigoqa” (Proverbios 17:17 leey).

11. 1) ¿Imaynatá ancianospis señorasninkupis de confianza runas kasqankuta rikuchinku? 2) ¿Imatá uj hermanawan parlarej ancianomanta yachakunchej? (Fotosta qhawariy).

¹¹ Congregacionpi. Wajkunaman mana imatapis willarqoj ancianosqa, “wayramanta pakakunapaj jina” kanku (Isa. 32:2). Chay jina ancianosmanqa imatapis willakuyta atillanchej. Imaraykuchus yachanchej ni piman willanankuta. Paykunataqa mana matʼinchejchu imatapis willarqonawanchejpaj. Ancianospa señorasninkutapis mayta agradecekunchej. Imajtinchus paykunaqa mana qosasninkuta tapuykachankuchu imastachus hermanosmanta yachasqankuta. Chantapis ancianos imatachus hermanospa kausayninkumanta yachasqankuta mana señorasninkuman willasqankoqa, uj bendicionpuni. Uj ancianoj señoran nerqa: “Qosay hermanosta visitarejtin imatachus  hermanos nisqankuta, chayri pikunachus ancianospa yanapanta necesitasqankuta mana willawasqanmanta mayta agradecekuni. Payqa ni sutisnillankutapis willawanchu. Mayta agradecekuni mana yachanay imasta mana willawasqanmanta. Willawanmanchus chayqa, ni imaynamanta yanapakuyta atispa llakikullayman. Mana willawasqanrayku tukuy hermanoswan parlariyta atillani. Chantapis yachani qosayman ima llakiyniytapis chayri imaynachus kashasqayta willarejteyqa, ni piman willananta”, nispa. Tukuypis munanchej wajkuna de confianza runasta jina qhawanawanchejta. Chaypajqa phishqa kʼacha kaykuna yanapawasunman. Chayta qhawarina.

12. ¿Imajtintaj munakuy uj cimiento jina de confianza kanapaj?

¹² Munakoyqa uj cimiento jina de confianza kanapaj. Jesusqa nerqa aswan kuraj kamachiykunaqa iskay kasqankuta: Jehovata munakuy, runa masinchejta munakuy ima (Mat. 22:37-39). Jehovata munakusqanchejrayku pay jina kayta munanchej. Jehová jinaqa ni pi aswan de confianza kanchu. Hermanosninchejta munakusqanchejraykutaj, imatachus willariwasqanchejta mana wajkunaman willaranchejchu. Amapuni paykunamanta imatapis wajkunaman willaranachu sonqonkuta nanachinapaj jina kajtin, chayri pʼenqachinapaj jina kajtin (Juan 15:12).

13. ¿Imaynatá kʼumuykukoj sonqo kay de confianza kanapaj yanapawanchej?

¹³ Kʼumuykukoj sonqo kayqa de confianza kanapaj yanapawasun. Kʼumuykukoj sonqo cristianoqa mana imatapis payrajpuni ñaupajta willarqoyta munanqachu wajkunawan allinpaj qhawachikunanrayku (Fili. 2:3). Manallataj wajkunata yuyachenqachu pay tukuy imata yachasqanta, nitaj chayta wajkunaman willayta atisqanta. Bibliapi, publicacionesninchejpipis wakin imasmantaqa mana parlanchu. Kʼumuykukoj sonqo kanchej chaytaj, imastachus chaykunamanta yuyasqanchejta mana wajkunawan parlasunchu.

14. ¿Imaynatá tanteayta yachay de confianza kanapaj yanapawanchej?

¹⁴ Tanteayta yachaspaqa reparasun maykʼajchus ‘tiempo kasqanta chʼin kanapaj’, maykʼajtajchus ‘tiempo kasqanta parlanapaj’ (Ecl. 3:7). Wakin lugarespeqa niyta yachanku: “Parlayqa qolqe jina, chʼinlla kaytaj oro jina”, nispa. Chaytaj niyta munan wakin kutisqa parlanamanta nisqa chʼin kananchej aswan allin kasqanta. Chayraykuchá Proverbios 11:12 nin: ‘Allinta tanteayta yachaj runaqa chʼinlla kakun’, nispa. Uj experienciayoj ancianomanta parlarina. Paytaqa wajyarinkupuni waj congregacionespi mana allinchay atina imaspi yanaparinanpaj. Waj anciano paymanta nin: “Payqa sumajtapuni qhawarikun, manataj waj congregacionesmanta imatachus yachasqanta parlallanchu”, nispa. Ajinata tanteayta yachasqanrayku chay ancianotaqa congregacionninmanta waj ancianos respetanku. Paykunaqa yachanku mana willana imasta mana wajkunaman willarqonanta.

15. ¿Imaynatá mana llullakuspa parlay de confianza kanapaj yanapawanchej?

¹⁵ Mana llullakuspa parlayqa de confianza kanapaj yanapawanchej. Ajina runaspeqa confiayta atillanchej cheqa kajtapuni parlasqankurayku (Efe. 4:25; Heb. 13:18). Kaypi piensarina: Uj hermano aswan sumaj discursota qoyta munanman. Chayraykutaj waj hermanota ninman uyarinanta, imapichus mejoranantataj yuyaycharinanta. Mana allin kashajtinpis, ¿“allillan kashan” nej hermanotachu tapukunman, chayri mana llullakuspa imapichus mejorananta kʼachallamanta nej hermanotachu?  Yachanchej pitachus tapukunanta, ¿icharí? Biblia nin: “Aswan allin sutʼinta kʼameyqa, munakuyniyoj kashaspa ni imata ninamantaqa. Uj allin amigoqa nanachinawanchej kajtinpis kʼamiwanchej”, nispa (Pro. 27:5, 6). Amigonchej mana llullakuspa imatachus yuyaychariwasqanchejtaqa, qallariypi ichapis mana japʼikuyta atillasunmanchu. Jinapis tiempowanqa mayta yanapawasun.

16. Proverbios 10:19 nisqanman jina, ¿imata ruwaytaj may allinpuni?

¹⁶ Wajkuna noqanchejpi confianankuta munanchej chayqa, parlasqanchejta midirikunanchej tiyan. Chayta ruwayqa yanapawasun mana willananchej imasta willanapaj jina kashajtinchej, qallunchejta khaniykukunapaj (Proverbios 10:19 leey). Redes socialesman yaykuspa, mana chayta ruwayta atillasunmanchu. Mana allinta qhawarikuspaqa, mana willananchej imasta ashkhasman aparachisunman. Apachispañataj mana niyta atisunmanchu wajkuna imaynatachus apaykachanankuta. Chay apachisqanchej wajkunaj sonqonkuta nanachejtintaj, niña allinchayta atisunmanchu. Chantapis ichá enemigosninchejqa, engañaspa imatapis hermanosninchejmanta parlachiyta munawasunman. Parlasqanchejta midirikuyta yachanchej chaytaj, mana imatapis willasunchu hermanosninchejta llakiypi rikhurichinapaj jinaqa. Chayqa kanman ima suyupichus testigos prohibisqa kanku chaypi policías tapuykachawajtinchej. Chay kutispi, waj kutispipis Bibliaj kay yuyaychasqan yanapawasunman: ‘Simiyman yukumata chayri ñukuta churakusaj’ (Sal. 39:1). De confianza runas kananchej tiyan familianchejpaj, amigosninchejpaj, hermanosninchejpaj, waj runaspajpis. Chaypajtaj parlasqanchejta midirikuyta yachananchejpuni tiyan.

17. ¿Imatá tukuy ruwasunman congregacionpi confianza kananpaj?

¹⁷ Maytapuni agradecekunchej Jehová familianman pusaykamuwasqanchejmanta. Chay familianpi kaj hermanosqa munanakunku, confianapaj jinataj kanku. Sapa ujninchej kallpachakunallanchejpuni tiyan hermanosninchej noqanchejpi confianankupaj. Sichus sapa ujninchej kallpachakusun munakuyniyoj kanapaj, kʼumuykukoj sonqo kanapaj, tanteayta yachanapaj, mana llullakuspa parlanapaj, parlasqanchejta midirikunapaj chayqa, congregacionpi confianza kananpaj yanapakusun. Chayrayku tatanchej Jehová jina de confianza kasqanchejta rikuchinallapuni.