1. ¿Imajtintaj mana tʼukunchejchu runas mana confianapaj jinachu kasqankumanta?

 KAY mundomanta runasqa mana yachankuchu pipichus confianankuta. Comerciantes, políticos, religionta kamachejkunapis kutin kutita runasta chʼaukiyanku. Chayrayku runasqa niña anchata paykunapi confiankuchu. Wakintaj amigosninkupi, vecinosninkupi, familiankupipis mana confiayta atillankutajchu. Chaytaj mana tʼukuchinawanchejchu tiyan, imajtinchus Bibliaqa nerqaña: ‘Qhepa pʼunchaykunapi runasqa wasanchajkuna kanqanku, wajkunamanta llullakuspa parlanqanku, amigosninkoj contranpi sayaykonqanku’, nispa. Runasqa kay mundoj diosninman rijchʼakunanku karqa. Paytaj manapuni confianapaj jinachu (2 Tim. 3:1-4; 2 Cor. 4:4).

2. 1) ¿Pikunapitaj mana iskayrayaspa atienekuyta atisunman? 2) ¿Imatá wakin ninkuman?

² Cristianostajrí yachanchej mana iskayrayaspa Jehovapi atienekuyta atisqanchejta (Jer. 17:7, 8). Yachanchej Jehová munakuwasqanchejta, nitaj jaykʼajpis amigosninta saqerparinanta (Sal. 9:10). Jesucristopipis atienekuyta atillasunmantaj, imajtinchus payqa noqanchejrayku kausayninta qorqa (1 Ped. 3:18). Chantapis kausayninchejpi rikunchej Bibliaj yuyaychaykunasnenqa atienekunapaj jinapuni kasqanta (2 Tim. 3:16, 17). Mana iskayrayaspa nisunman Jehovapi, Jesuspi, Bibliapi ima atienekuyta atisqanchejta. Jinapis ichá wakin hermanosqa ninkuman: “¿Tukuy imapajpunichu congregacionmanta hermanos confianapaj jina kankuman?”, nispa. ¿Imajtintaj paykunapi confiayta atisqanchejta nisunman?

3. ¿Imataj may sumajpuni? (Marcos 10:29, 30).

³ Jehovaqa jallpʼantinpi kaj familianman yaykunapaj ajllawarqanchej. Chaytaj may sumajpuni, ashkha bendicionestataj apamuwanchej  (Marcos 10:29, 30 leey). Jallpʼantinmanta hermanosninchejqa noqanchej jinallataj Jehovata munakunku, kamachiykunasninman jina kausakunankupajtaj kallpachakunku. Parlayninchej, maymantachus kasqanchej, imaynatachus vistikusqanchej mana kikinchu kajtinpis, paykunataqa primera vez rejsisqanchejmantapacha munakunchej. Paykunawan khuska Tatanchej Jehovata jatunchaspa, yupaychaspaqa astawanraj kusikunchej (Sal. 133:1).

4. ¿Imajtintaj hermanosninchejta necesitanchej?

⁴ Kay tiempopeqa ni jaykʼaj jina hermanosninchejwan ujchasqas kananchej tiyan. Llakiykunapi kashajtinchej paykunaqa yanapariwanchejpuni (Rom. 15:1; Gál. 6:2). Chantapis yanapallawanchejtaj Jehovata sirvinallapajpuni, paypa qayllallanpipunitaj kanapaj (1 Tes. 5:11; Heb. 10:23-25). Congregacionmanta hermanosninchejqa Satanaspa contranpi, sajra mundonpa contranpi sinchʼita sayaykunapaj yanapawanchej. Imachus noqanchejwan kanmanpis mana paykuna yanapawajtinchejqa. Satanaswan, pikunatachus pay apaykachan chaykunawanqa, tumpamantawan Diospa kamachisninpa contranpi oqharikonqanku. Chaypachaqa maytapuni agradecekusun hermanosninchej yanapawasqanchejmanta.

5. ¿Imajtintaj wakin mana hermanospi confiayta atillankuchu?

⁵ Wakenqa mana hermanospi confiayta atillankumanchu. Ichapis uj hermanoman imata willakorqanku, chay hermanotaj wajkunaman willararqa, chayri chay hermano mana nisqanta juntʼarqachu. Manachayrí ichapis congregacionmanta uj hermanoj nisqan chayri ruwasqan paykunaj sonqonkuta mayta nanacherqa. ¿Imataj yanapawasunman hermanosninchejpi confianapaj?

6. ¿Imaynatataj munakuy yanapawanchej hermanosninchejpi astawan confianapaj? (1 Corintios 13:4-8).

⁶ Wajkunapi atienekunapajqa paykunata munakunanchej tiyan. 1 Corintios 13 capitulopeqa nin imaynachus munakuyniyoj runa kasqanta. Ajina runas kasun chaytaj wajkunapi astawan atienekusun, pipipis niña atienekunchejchu chaytaj watejmanta atienekuyta atisun  (1 Corintios 13:4-8 leey). 4 versiculopeqa nin “munakuyniyoj runaqa pacienciayoj, kʼachataj” kasqanta. Jehovaqa contranta juchallikojtinchejpis noqanchejwan pacienciakun. Chayrayku noqanchejpis hermanosninchejwan pacienciakuna tiyan, imatapis nisqankuwan ruwasqankuwan phiñachiwajtinchej chayri sonqonchejta nanachiwajtinchej. 5 versiculopitaj nin: ‘Munakuyniyoj runaqa mana usqhayllata phiñakunchu, nitaj yuyarikullanpunichu contranpi ima sajrata ruwasqankumantapis’, nispa. Mana munasunmanchu hermanosninchej ima sajratapis contranchejpi ruwasqankumanta yuyarikuyllatapuni. Eclesiastés 7:9 niwanchej: “Ama imamantapis phiñakullaychu”, nispa. Aswan allin kanman imatachus Efesios 4:26 yuyaychasqanta ruway. Chaypi nin: “Ama inti yaykunankama phiñasqallapuni kaychejchu”, nispa.

7. ¿Imaynatá Mateo 7:1-5 versiculospi nisqan yanapawanchej hermanospi confianapaj?

⁷ ¿Imataj yanapallawasunmantaj hermanosninchejpi astawan confianapaj? Jehová jina paykunata qhawana. Diosqa paykunata munakun, nitaj pantasqasnillankutachu qhawan. Noqanchejpis nillataj chayta ruwananchejchu tiyan (Sal. 130:3). Pantasqasnillankuta qhawanamantaqa kallpachakuna allin imasta ruwasqankuta qhawanapaj, piensarinataj ima sumaj imastachus ruwayta atisqankupi (Mateo 7:1-5 leey). ‘Munakuyniyoj runaqa tukuy imata creen’. Chayrayku mana yuyanchejchu hermanosninchej ima sajratapis ruwayta munawasqanchejta (1 Cor. 13:7). Chayqa mana niyta munanchu Jehová pipipis confianallanchejta munasqanta, astawanpis de confianza kasqankuta rikuchisqankurayku hermanosninchejpi confiananchejta munan. *

8. ¿Imatá ruwasunman hermanosninchejpi astawan confianapaj?

⁸ Pitapis tiempowanraj astawan respetanchej, ajinallatataj pipipis tiempowanraj atienekunchej. ¿Imatá ruwasunman hermanosninchejpi astawan confianapaj? Paykunata sumajta rejsina, reunionespi paykunawan parlarina, paykunawan khuska predicana. Ama chay rato ninachu mana atienekunapaj jinachu kasqankuta. Manaqa paykunawan pacienciakuna. Pitapis mana allinta rejsispaqa, ichá qallariypeqa mana imatapis willayta munallasunchu. Astawan rejsisqanchejman jinataj willayta atillasunña imaynachus kashasqanchejta (Luc. 16:10). Jinapis, ¿imatá ruwasunman uj hermano payman imatachus confiasqanchejta wajkunaman willarqosqanta yachaspa? Ama chay hermanomanta karunchakunapachachu. Astawanqa tiempo pasananta saqena. Uj mashkha hermanos mana de confianzachu kajtinku, ama yuyanachu tukuynin hermanos kikillantaj kasqankuta. Chaypaj qhawarina Jehovaj ñaupa tiempo wakin kamachisninmanta. Paykunaqa wakin mana confianapaj jinachu kajtinkupis, wajkunapi atienekullarqankupuni.

9. 1) ¿Imatataj Ana ruwallarqapuni Diosta yupaychaymanta cargoyojkuna mana allinta ruwajtinkupis? 2) ¿Imatá Anamanta yachakusunman? (Dibujosta qhawariy).

⁹ Congregacionta ñaupajman apaj ujnin hermanopi ichapis niña confianchejchu imatapis ruwawasqanchejrayku. Jina kajtenqa Anamanta yachakuy mayta yanapawasunman. Chay tiempopeqa kuraj kaj sacerdote Elí Diosta yupaychayta Israelpi ñaupajman apaj, familiantaj Diospa ñaupaqenpi mana allintachu ruwasharqanku. Wawasnenqa sacerdotes kaspapis pʼenqay imasta ruwaj kanku, paykunaqa khuchichakusharqanku. Tatanku Elitajrí chay ruwasqankuta qhawallaj. Jehovaqa mana chay ratochu  Elita cargonmanta orqhorqa. Jinapis Anaqa Diosta yupaychana toldoman rillajpuni Diosta yupaychaj, Elí kuraj kaj sacerdote jinallapuni kashajtinpis. Uj kuti Anaqa manchay llakisqa Diosmanta mañakusharqa, Elitajrí chayta rikuytawan machasqa kashasqanta yuyarqa, nitaj kʼachamantachu parlapayarqa (1 Sam. 1:12-16). Jinapis Anaqa jurarqa wawitayoj kajtin Diosta yupaychana toldoman apananta, chaypitaj Elí cuidanan karqa (1 Sam. 1:11). Elij wawasnintaj cheqanchasqa kananku karqa, Jehovataj maychus tiemponpi chayta ruwarqa (1 Sam. 4:17). Chaykamataj Jehovaqa Anaman wawitan Samuelta qospa bendicerqa (1 Sam. 1:17-20).

10. ¿Imatataj rey David ruwallarqapuni wajkuna wasanchajtinkupis?

¹⁰ ¿Maykʼajllapis uj amigonchej wasanchawarqanchejchu? Jina kajtenqa rey Davidmanta mayta yachakusunman. Ujnin amigonqa Ahitofel sutikorqa. Davidpa wawan Absalón tatanpa cuentanmanta rey yaykunanpaj oqharikushajtin, Ahitofelqa payman ujchaykukorqa. Maytachá Davidpa sonqon nanarqa kikin wawallantaj, kikin amigollantaj contranpi oqharikusqankumanta. Chaywanpis Davidqa mana nerqachu: “Niña pipipis confiasajchu”, nispa. Payqa confiallarqapuni Husái sutiyoj amigonpi. Husaiqa mana chay ujkuna oqharikusqankuman ujchaykukorqachu. Davidqa sutʼita yacharqa Husái confianapaj jinapuni kasqanta. Husaitaj sumaj amigopuni karqa. Payqa Davidta yanapananpaj kausaynintapis wañuy pataman churarqa (2 Sam. 17:1-16).

11. ¿Imaynamantataj Nabalpa ujnin kamachin wajkunapi atienekusqanta rikucherqa?

¹¹ Nabalpa ujnin kamachinmantañataj parlarina. Nabalqa israelita karqa, manchay qhapaj runataj. Davidwan soldadosninwantaj paypa kamachisninta yanapaspa paykunawan kʼachas karqanku. Tiemponmantaj Davidqa Nabalmanta soldadosninpaj mikhunata mañakorqa. Ima mikhunitallatapis qorinanta nerqa. Nabaltaj mana qoyta munarqachu. Chayrayku Davidqa phiñarikuspa Nabalpa tukuynin kamachisninta wañurachinanta nerqa. Nabalpa ujnin kamachintaj Nabalpa señoran Abigailman chayta willamorqa. Payqa Nabalpa wasinmanta kasqanrayku yacharqa Abigaíl salvayta atisqanta. Yachallarqataj Abigailta tukuypis sumaj yachayniyoj warmita jina rejsisqankuta.  Chayrayku ayqenanmantaqa atienekorqa Abigaíl chayta allinchayta atinanpi. Ajinapunitaj karqa. Abigailqa mana manchachikuspa David imatachus ruwanan kasharqa chayta saqecherqa (1 Sam. 25:2-35). Abigailpis David imatapis allin yuyaywan ruwananpi atienekorqa.

12. ¿Imaynatá Jesús rikucherqa discipulosninpi atienekusqanta?

¹² Jesusqa discipulosnin pantajtinkupis paykunapi confiarqa (Juan 15:15, 16). Santiagowan Juanwanqa Jesusmanta mañakorqanku Gobiernonpi ujninkuta pañanman, ujninkutataj lloqʼenman tiyaykuchinanta. Jesustajrí mana yuyarqachu chayraykulla Jehovata sirvishasqankuta, nitaj nerqachu niña apostolesninchu kanankuta (Mar. 10:35-40). Aswan qhepamantaj Jesusta japʼerqanku chay chʼisi, tukuynin discipulosnin payta saqerparqanku (Mat. 26:56). Jinapis Jesusqa paykunapi atienekullarqapuni. Payqa discipulosnin pantaj runas kasqankuta yachaspapis, tukukuykama munakullarqapuni (Juan 13:1). Kausarimuytawantaj 11 cheqa sonqo apostolesninman kay sumaj ruwaykunata qorqa: Runasta discipulosninman tukuchimunankuta, munasqa ovejitasnintataj cuidapunankuta (Mat. 28:19, 20; Juan 21:15-17). Jesusqa paykunapi confiaspa mana pantarqachu. Tukuyninku wañupunankukama Diosta sirvillarqankupuni. Anamanta, Davidmanta, Nabalpa kamachinmanta, Abigailmanta, Jesusmanta imaqa, mayta yachakusunman wajkunapi confiayta pantaj runas kajtinkupis.

13. ¿Imajtintaj mana wajkunapi confiayta atillasunmanchu?

¹³ Ichá maykʼajllapis uj hermanoman imatapis willarikorqanchej, chaymantataj wajman willarqosqanta yacharqanchej. Ajinapi rikukoyqa nipuni allinchu. Uj pacha uj hermana kausayninmanta uj ancianoman willarikusqa. Qʼayantintaj chay ancianoj señoranqa hermanitata kallpacharinanpaj wajyarisqa, imatachus qosanman willakusqanta yachasqanrayku. Chayrayku hermanaqa niña chay ancianopi confiayta aterqachu. Jinapis hermanaqa mana jinallachu qhepakorqa, yanapata maskʼarqa. Chay hermanitaqa waj ancianoman qayllaykorqa, paytaj yanaparqa watejmanta ancianospi confiayta atinanpaj.

14. ¿Imataj uj hermanota yanaparqa hermanospi watejmanta atienekunanpaj?

¹⁴ Uj hermanoqa unayña iskay ancianoswan phiñasqa kasharqa, yuyarqataj mana confianapaj jinachu kasqankuta. Jinapis payqa uj hermanoj nisqanpi piensarerqa, chay hermanotaqa mayta respetaj. Chay hermano nerqa: “Satanás enemigonchejqa, mana hermanosninchejchu”, nispa. Chay nisqan uj mashkha palabraslla kajtinpis, tʼukunapaj jinapuni karqa. Hermanoqa chaypi tʼukurerqa, Jehovamantataj mañakorqa. Tiempowantaj chay iskay ancianoswan allinyakaporqa.

15. ¿Imajtintaj wajkunapi watejmanta confianapaj tiempota necesitasunman? Gretemanta parlariy.

¹⁵ ¿Maykʼajllapis congregacionpi uj ruwayta saqenanchejchu karqa? Jina kajtenqa maytachá sonqonchej nanarqa. Alemaniapi 1930 watas chaynejpi, Jehovaj testigosnin prohibisqa kashajtinku, Gretewan mamanwanqa Jehovata mana wasanchaspa sirverqanku. Greteqa Torremanta Qhawaj revistata hermanospaj copiaj. Hermanostaj tatan Jehovaj testigosninpa contranpi kasqanta yachaspa manaña chayta ruwajta saqerqankuchu. Hermanosqa manchachikoj kanku tatan enemigosninkuman congregacionmanta imatapis willamunanta. Jinapis Gretej llakiynenqa mana chayllachu karqa. Segunda Guerra Mundial kashajtenqa, mana revistaj copiasninta paykunaman jaywajchu kanku, callepi tinkuspapis mana paykunawan parlajchu kanku. Chayqa maytapuni Gretej sonqonta nanacherqa. Chayrayku nerqa unayninmanraj  chay hermanosta perdonasqanta, paykunapitaj watejmanta confiayta atisqanta. Watasninman repararqa Jehová chay hermanosta perdonasqantaña, chayrayku paypis perdonanallantaj kasqanta. *

16. ¿Imaraykutaj kallpachakunanchej tiyan hermanosninchejpi confianapaj?

¹⁶ Noqanchejpis ajinapi rikukorqanchej chayqa, kallpachakuna wajkunapi watejmanta confianapaj. Chaytaqa ichá mana uj ratopichu ruwayta atisun. Jinapis kallpachakusqanchejqa mana qhasichu kanqa. Kaypi piensarina: Ima mikhunapis wijsanchejta nanarpachiwasunman chayqa, qhepanpeqa allinta qhawarikusunman imatachus mikhusqanchejta. Jinapis mana chayraykuchu mikhuyta saqesun. Kikillantataj pipis mana de confianzachu kasqanta rikuspaqa, ama yuyanachu tukuynin hermanosninchej mana de confianzachu kasqankuta. Imajtinchus yachanchej pantaj runas kasqankuta. Hermanosninchejpi watejmanta confiayta yachakusun chayqa, aswan kusisqa kasun, hermanos ukhupi confianza kananpajtaj yanapakuyta maskʼasun.

17. 1) ¿Imajtintaj wajkunapi confiananchej tiyan? 2) ¿Imatá qhepan yachaqanapi yachakusun?

¹⁷ Satanaspa mundonpeqa mana pipipis confiayta atikullanchu. Hermanosninchejpitajrí confiayta atillanchej purajmanta munanakusqanchejrayku. Chayraykutaj kusisqas, ujchasqastaj kanchej. Qhepamanpis llakiy tiempospi kashajtinchej, chayqa mayta yanapawasun. Mayqen hermanopipis niña confianchejchu chayrí, ¿imatá ruwasunman paypi watejmanta confianapaj? Kallpachakuna Jehová jina yuyanapaj, Bibliaj yuyaychaykunasninman jina ruwanapaj, hermanosninchejta astawan munakunapaj, Diospa ñaupa tiempo kamachisninmantataj yachakunapaj. Chayta ruwasun chayqa aswan ashkha amigosniyoj kasun. Paykunataj “hermanonchejmantapis aswan munakuyniyoj kanku” (Pro. 18:24). Jinapis mana noqallanchejchu wajkunapi confiananchej tiyan, noqanchejpis confianapaj jinallataj kananchej tiyan. Qhepan yachaqanapi yachakusun imaynatachus de confianza kasqanchejta rikuchiyta atisqanchejta.