1. Malaquías 3:16 nisqanman jina, ¿ima libropitaj Jehová unaymantaña qhelqashan, chanta imataj chay libropi qhelqasqa kashan?

 JEHOVAQA may chhika watastaña uj libropi sutista qhelqashan. Chay listaqa Abelwan qallarin. Payqa atienekunapaj jina ñaupaj kaj testigo (Luc. 11:50, 51). * Tiempo pasasqanman jina Jehovaqa chay libroman sutista yapashallanpuni, kunankamataj may chhika sutisña tiyan. Bibliapeqa chay libromanta parlananpaj kay sutista oqharin: ‘yuyarisqa kanankupaj libro’, ‘kausay libro’, ‘kausay kʼuyuna libro’. Kay yachaqanapitaj chay libromanta parlanapaj, ‘kausay libro’ sutita oqharisun (Malaquías 3:16 leey; Apo. 3:5; 17:8).

2. 1) ¿Pikunaj sutisninkutaj kausay libropi qhelqasqa kashan? 2) ¿Imatá ruwasunman sutinchej chay libropi qhelqasqa kananpaj?

² Chay sumaj libropeqa tukuy Jehovata yupaychajkunaj sutisninku qhelqasqa kashan, pikunachus payta manchachikunku chayri jatunpaj qhawanku, sutintapis munakunku chaykunaj sutisninku. Paykunaqa suyakushanku wiñay kausayta japʼiyta, cielopi chayri kay jallpʼapi. Sutinchejpis chay libropi qhelqasqa kayta atillanmantaj Jehovaman astawan qayllaykojtinchej. Paymantaj astawan qayllaykuyta atinchej Wawan Jesucristoj wañuyninnejta (Juan 3:16, 36). Tukuy munanchej chay libropi sutinchej qhelqasqa kananta, ¿icharí?

3, 4. 1) Kausay libropi sutinchej qhelqasqaña kasqan, ¿niyta munanchu wiñaypaj kausananchejta? 2) ¿Ima tapuykunamantaj kay yachaqanapi, qhepan yachaqanapiwan kutichisun?

³ Kausay libropi sutinchej qhelqasqa kasqan, ¿niyta munanchu wiñay kausayta japʼinanchej seguroña kasqanta? Éxodo  32:33 versiculopi chayta sutʼinchawanchej. Chaypi Jehovaqa Moisesta nerqa: “Pichus contraypi juchallikojpa sutinta libroymanta orqhosaj”, nispa. Chayqa niyta munan chay libropi qhelqasqa sutisqa chaymanta orqhosqa kayta atisqanta. Jehovaqa sutisninchejta lapizllawanrajpis qhelqanman jina kashan (Apo. 3:5). Kallpachakunanchej tiyan sutinchej chay libropi qhelqasqallapuni kananpaj, Jehová wiñaypaj qhelqaykunankama, tintawanpis qhelqaykunman jina.

⁴ Ichapis kaykunata tapukusunman: ¿Imatá Biblia nin kausay libropi sutisninku qhelqasqa kashan chaykunamanta, mana sutisninku qhelqasqachu kashan chaykunamantapis? ¿Maykʼajtaj wiñay kausayta japʼenqanku sutisninku kausay libropi qhelqasqa kashan chaykuna? Mana Jehovata rejsiyta atispalla wañupojkunawanrí, ¿imataj kanqa? ¿Paykunaj sutisninkupis chay libropi qhelqasqallatajchu kashanman? Chay tapuykunamanqa kay yachaqanapi, qhepan yachaqanapiwan kutichisun.

¿PIKUNAJ SUTISNINKUTAJ KAUSAY LIBROPI QHELQASQA KASHAN?

5, 6. 1) Filipenses 4:3 nisqanman jina, ¿pikunaj sutisninkutaj kausay libropi qhelqasqa kashan? 2) ¿Maykʼajtaj sutisninku wiñaypaj qhelqasqa kanqa?

⁵ ¿Pikunaj sutisninkutaj kausay libropi qhelqasqa kashan? Chay tapuyta kutichinapajqa phishqa grupo runasmanta parlarisun. Wakin grupospi kajkunaj sutisninkoqa kausay libropi qhelqasqa kashan, wakin grupospi kajkunajtataj mana.

⁶ Ñaupaj kaj grupopeqa kashanku pikunachus cielomantapacha Cristowan khuska kamachimunankupaj ajllasqa kanku chaykuna. Paykunaj sutisninku kausay libropi, ¿qhelqasqañachu kashan? Arí. Apóstol Pablo Filiposmanta paywan khuska llankʼajkunaman nisqanman jinaqa, ajllasqa cristianospa sutisninkoqa, nisunman Cristowan khuska kamachimunankupaj wajyasqa kajkunaj sutisninkoqa, kausay libropi qhelqasqaña kashan (Filipenses 4:3 leey). Jinapis sutisninku chay  libromanta mana orqhosqa kananpajqa, Jehovata kasukunallankupuni tiyan. Niraj wañupushajtinku chayri niraj manchay ñakʼariy tiempo qallarishajtin wiñaypaj sellasqaña kajtinkutaj, sutisninku wiñaypaj chay libropi qhelqasqa kanqa (Apo. 7:3).

7. ¿Maykʼajtaj waj ovejasmanta kaj may chhika runaspa sutisninku kausay libropi wiñaypaj qhelqasqa kanqa? (Apocalipsis 7:16, 17).

⁷ Iskay kaj grupopitaj kashanku waj ovejasmanta kaj may chhika runas. Paykunaj sutisninku kausay libropi, ¿qhelqasqañachu kashan? Arí. Armagedonta kausashaj pasajtinku, ¿sutisninku qhelqasqallapunichu kashanqa? Arí (Apo. 7:14). Jesusqa nerqa chay runasqa, pikunachus ovejas jina kanku chaykunaqa, ‘wiñay kausayta japʼinankuta’ (Mat. 25:46). Jinapis Armagedonta kausashaj pasajkunaqa, mana chay ratochu wiñay kausayta japʼenqanku. Paykunaj sutisninkoqa kausay libropi lapizllawanrajpis qhelqasqa kashanman jina kanqa. Jesusqa waranqa watasta kamachishajtin paykunata “michenqa, kausay yaku juturismantaj pusanqa”. Pikunachus Cristota kasukonqanku, qhepa kaj juiciopitaj Jehovata kasukojkuna jina qhawasqa kanqanku chaykunaj sutisninkoqa, wiñaypaj qhelqasqa kanqa kausay libropi (Apocalipsis 7:16, 17 leey).

8. ¿Pikunaj sutisninkutaj mana kausay libropi qhelqasqachu kashan, chanta imataj paykunawan kanqa?

⁸ Kinsa kaj grupopeqa kashanku cabraswan ninakoj runas, pikunachus Armagedonpi chinkarparichisqa kanqanku chaykuna. Sutisninkoqa mana kausay libropi qhelqasqachu kashan. Jesusqa nerqa paykunaqa ‘wiñaypaj wañunankuta’ (Mat. 25:46). Pabloqa Dios yuyaychasqanman jina nerqa, chay runasqa ‘juchachasqa kanankuta, wiñay wiñaypajtaj chinkachisqa kanankuta’ (2 Tes. 1:9; 2 Ped. 2:9). Ajinallataj kanqa pikunachus unaymantapacha espíritu santoj contranta yachashaspa juchallikorqanku chaykunawanpis. Paykunaqa mana wiñay kausayta japʼenqankuchu, manaqa wiñaypaj chinkachisqa kanqanku. Chayrayku nisunman mana kausarichisqachu kanankuta (Mat. 12:32; Mar. 3:28, 29; Heb. 6:4-6). Qhepan parrafospi iskay gruposmanta sumajta ukhuncharisun. Paykunaqa kay jallpʼapi kausarichisqa kanqanku.

KAUSARIMOJKUNA

9. ¿Pikunataj kay jallpʼapi kausarichisqa kanqanku, chanta imapitaj chay iskay grupos mana kikinchu kanku? (Hechos 24:15).

⁹ Bibliaqa iskay grupos kausarichisqas kanankumanta parlan. Paykunaqa kay jallpʼapi wiñaypaj kausakuyta atenqanku. Chaykuna kanku ‘cheqan runas’, ‘mana cheqan runas’ (Hechos 24:15 leey). ‘Cheqan runasqa’ wañupunankukama Jehovata sirverqanku chaykuna kanku. ‘Mana cheqan runastaj’ Jehovata mana sirverqankuchu chaykuna kanku. Paykunamanta ashkhasqa manapuni Jehovaj cheqan kamachiykunasninman jinachu kausarqanku. Chay iskay grupos kausarimunanku, ¿ninayanchu sutisninku kausay libropi qhelqasqa kashasqanta? Chay tapuyman kutichinapajqa sapa grupomanta astawan parlarina.

10. ¿Imaraykutaj ‘cheqan runas’ kausarimonqanku, chanta imata ruwanankupajtaj wakinninku churasqa kanqanku? (Kay revistapi “Leejkunaj tapuyninku” nisqa yachaqanata leerillawajtaj. Chaypi sutʼinchashan kay jallpʼapi kausarichisqa kanqanku chaykunamanta).

¹⁰ Tawa kaj grupopeqa kashanku ‘cheqan runas’. Paykunaj sutisninkoqa niraj wañupushajtinku kausay libropi qhelqasqaña karqa. Wañupojtinkurí, ¿chay libromanta sutisninku borrakorqachu? Mana. Paykunaqa Jehovaj yuyayninpi ‘kausakushallankupuni’. Diosqa “mana wañusqaspa Diosninchu, manachayqa kausajkunajta. Paypajqa tukuyninku kausashanku” (Luc. 20:38). Chayqa niyta munan cheqan runas kay jallpʼapi kausarichisqa kajtinku,  sutisninkoqa kausay libropi qhelqasqallapuni kashananta. Jinapis qallariypeqa lapizllawanrajpis qhelqasqa kanman jina kanqa (Luc. 14:14). Chay kausarimojkunamanta wakenqa ‘tukuy jallpʼantinta kamachinankupajchá churasqa’ kanqanku (Sal. 45:16).

11. ¿Imatataj ‘mana cheqan runas’ yachakunanku kanqa sutisninku kausay libropi qhelqasqa kananpaj?

¹¹ Phishqa kaj grupopitaj kashanku ‘mana cheqan runas’. Ichapis Jehovaj leyesninta mana rejsisqankurayku, paykunaqa niraj wañupushaspa mana Jehovaj munayninman jinachu kausarqanku. Chayrayku sutisninkoqa mana kausay libropi qhelqasqachu kashan. Jinapis Dios paykunata kausarichimonqa, ajinamanta sutisninku kausay libropi qhelqasqa kayta atinanpaj. Chay kausarimoj ‘mana cheqan runasqa’ ashkha yanapata necesitanqanku. Paykunamanta wakenqa niraj wañupushaspa millay imastapuni ruwarqanku. Chayrayku yachakunanku kanqa Jehovaj cheqan kamachiykunasninman jina kausakuyta. Diospa Gobiernontaj tukuy chay runasman yachachikunanpaj encargakonqa. Chay jina ruwaytaj ni jaykʼaj kay jallpʼapi ruwakorqarajchu.

12. 1) ¿Pikunataj mana cheqan runasta yachachenqanku? 2) ¿Imataj kanqa yachakusqankuman jina mana kausakuyta munajkunawan?

¹² ¿Pikunataj yachachenqanku mana cheqan runasman? May chhika runasmanta kajkuna, kausarimoj cheqan runas ima. ¿Imatataj mana cheqan runas ruwananku kanqa sutisninku kausay libropi qhelqasqa kananpaj? Jehovaj amigonman tukunanku kanqa, kausayninkutapis payman qopunanku kanqa. Jesucristowan ajllasqa cristianoswanqa, cielomantapacha sumajta qhawamonqanku chay mana cheqan runas yachakushasqankuta japʼikushasqankutachus manachus (Apo. 20:4). Sichus mayqenninkupis chay yachakusqankuta mana japʼikonqankuchu chayqa, pachaj watasniyoj kaspapis chinkachisqa kanqanku (Isa. 65:20). Jehovawan Jesuswanqa runaspa sonqonkuta qhawasqankurayku, mana saqenqankuchu ni pi mosoj jallpʼapi ima sajratapis ruwananta (Isa. 11:9; 60:18; 65:25; Juan 2:25).

 WIÑAY KAUSAYTA JAPʼINAPAJWAN JUZGASQA KANAPAJWAN KAUSARIMUY

13, 14. 1) ¿Imaynatataj Juan 5:29 versiculopi Jesuspa nisqanta entiendej kanchej? 2) ¿Imajtintaj ninchej Jesús kausarimojkuna imatachus ruwasqankumantaña parlashasqanta?

¹³ Jesusqa kay jallpʼapi kausarimojkunamantapis parlallarqataj. Pay nerqa: “Hora chayamonqa, chaypachataj sepulturaspi tukuy kajkunaqa wajyasqayta uyarenqanku, kausarimonqankutaj: Allin imasta ruwajkunaqa wiñay kausayta japʼinankupaj, sajra imasta ruwajkunataj juzgasqa kanankupaj”, nispa (Juan 5:28, 29). ¿Imatá Jesús chaywan niyta munasharqa?

¹⁴ Ñaupajtaqa kayta entiendej kanchej: Jesusqa kausarimojkuna imatachus kausarimuytawan ruwanankumanta parlashasqanta. Yuyaj kanchej wakenqa kausarimuytawan allin imasta ruwanankuta, wakintaj sajra imasta. Jinapis Jesusqa mana nerqachu sepulturasmanta kausarimojkuna “allin imasta ruwanqanku”, chayri “sajra imasta ruwanqanku” nispa. Manaqa imastachus ruwasqankumantaña parlarqa. Payqa nerqa “allin imasta ruwajkunaqa”, chantá “sajra imasta ruwajkunataj” nispa. Chayta nispaqa imastachus niraj wañupushaspa ruwarqanku chaymanta parlasharqa. Chaywanqa kajllata nisharqa, ¿icharí? Imajtinchus mosoj jallpʼapeqa mana pitapis saqekonqachu sajra imasta ruwananta. Mana cheqan runasqa, chay sajra imasta niraj wañushaspaña ruwarqanku. Jina kajtin, ¿imatá Jesús niyta munasharqa “wiñay kausayta japʼinankupaj” chayri “juzgasqa kanankupaj” kausarimuymanta parlaspa?

15. ¿Pikunataj “wiñay kausayta japʼinankupaj” kausarimonqanku chanta imaraykutaj?

¹⁵ Cheqan runasqa, nisunman niraj wañupushaspa allin imasta ruwajkunaqa, “wiñay kausayta japʼinankupaj” kausarimonqanku, sutisninku kausay libropi qhelqasqaña kasqanrayku. Chayqa niyta munan Juan 5:29 versiculopi ‘allin imasta ruwajkuna’ kausarimunankumanta parlasqanqa, kikillantaj kasqanta Hechos 24:15 versiculopi ‘cheqan runas’ kausarimunankumanta parlasqanwan. Chaytaj Romanos 6:7 versiculopi nisqanman jinapuni kashan. Chaypi nin: “Wañoj runaqa juchanmanta perdonasqaña”, nispa. Cheqan runas wañojtinku Jehovaqa juchasninkuta perdonapun. Jinapis mana qonqakonqachu kausashaspa payta tukuy sonqo sirvisqankuta (Heb. 6:10). Chaywanpis cheqan runasqa kausarimuytawan Jehovata tukuy sonqo sirvinallankupuni tiyan, sutisninku kausay libromanta mana orqhosqa kananpaj.

16. “Juzgasqa kanankupaj” kausarichisqa kanqanku nispa Jesús nisqan, ¿ima niytá munan?

¹⁶ Niraj wañupushaspa sajra imasta ruwajkunawanrí, ¿imataj kanqa? Wañupojtinku juchasninku perdonasqa kajtinpis, paykunaqa kausashaspa mana Jehovata sirverqankuchu. Sutisninkoqa mana kausay libropi qhelqasqachu kashan. Chayrayku ‘mana allin imasta ruwajkuna’ kausarimunankuta nispa, chantá Hechos 24:15 versiculopi ‘mana cheqan runas’ kausarimunankuta nispa, uj kausarimuyllamanta parlashan. Paykunaqa “juzgasqa kanankupaj” kausarichisqa kanqanku. * Chayqa niyta munan Jesús mana cheqan runasta sumajta qhawaykunanta (Luc. 22:30). Pikunaj sutisninkuchus kausay libropi qhelqakunanta Jesús yachananpajqa, tiempo pasananraj kanqa. Chaypajtaj mana cheqan runasqa sajra imasta  ruwayta qonqananku kanqa, kausayninkutataj Jehovaman qopunanku kanqa.

17, 18. 1) ¿Imatá ruwananku kanqa kay jallpʼapi kausarimojkuna? 2) Apocalipsis 20:12, 13 versiculospi ‘ruwasqasninku’ nispa, ¿ima ‘ruwasqasninkumantataj’ parlashan?

¹⁷ Kausarimojkunaqa niraj wañupushaspa cheqan runas kaspapis chayri mana cheqan runas kaspapis, mosoj kʼuyuna librosmanta kamachiykunata kasukunanku kanqa, chaykunataj chay 1.000 wataspi kicharikonqanku. Apóstol Juanqa mosqoypi jina rikusqanmanta nerqa: “Rikorqanitaj wañusqasta, pikunachus kanku jatunpaj qhawasqa kajkuna, pisipaj qhawasqa kajkunapis chaykunata, kamachina tiyanaj ñaupaqenpi sayashajta, kʼuyuna librostaj kicharikorqanku. Waj kʼuyuna libropis kicharikullarqataj: Kausay kʼuyuna libro. Kʼuyuna librospi qhelqasqa kasqanman jinataj, wañusqasqa juzgasqa karqanku ruwasqasninkuman jina”, nispa (Apo. 20:12, 13).

¹⁸ ¿Ima ‘ruwasqasninkumantataj’ kausarimojkuna juzgasqa kanqanku? ¿Niraj wañupushaspa imastachus ruwasqasninkumantachu? Mana. Nerqanchej jina, juchasninkoqa wañupojtinku perdonasqaña karqa. Chayrayku chay versiculopi ‘ruwasqasninkumanta’ nispaqa, mana niraj wañupushaspa ruwasqasninkumantachu parlashanman. Astawanpis kaypi parlashaspa jinan, mosoj jallpʼapi yachachisqa kasqankutawanña imastachus ruwanankumanta. Noé, Samuel, David, Daniel, Jehovata kasukoj waj kamachisninpis, Jesucristomanta yachakunanku kanqa, wañusqanpitaj creenanku kanqa. Paykunachus chayta ruwananku kanqa chayqa, astawanrajchá mana cheqan runasqa.

19. ¿Imataj kanqa manapuni kasukuyta munajkunawan?

¹⁹ ¿Imataj kanqa manapuni kasukuyta munajkunawan? Apocalipsis 20:15 nin: “Pikunachus kausay libropi mana qhelqasqa kajkunaqa nina qochaman wijchʼuykusqa karqanku”, nispa. Arí, paykunaqa wiñaypaj chinkasqata chinkachisqa kanqanku. Chayrayku mayta kallpachakunanchej tiyan kausay libropi sutinchej qhelqasqa kananpaj, qhelqasqallapunitaj qhepakunanpaj.

20. ¿Ima sumaj ruwaytaj Jesús 1.000 watasta kamachishajtin ruwakonqa? (Kay revistaj tapanpi dibujota qhawariy).

²⁰ Jesús 1.000 watasta kamachishajtenqa may kusiy tiempopuni kanqa. Chay tiempopeqa runasman yachachikonqa, chay jina ruwaytaj ni jaykʼaj kay jallpʼapi ruwakorqarajchu. Chantapis chay tiempopeqa sumajta qhawaykukonqa cheqan runaspa ruwasqankuta, mana cheqan runaspa ruwasqankutapis (Isa. 26:9; Hech. 17:31). ¿Imaynatataj chay jina sumaj yachachiy ruwakonqa? Chaytaqa qhepan yachaqanapi sutʼinchakonqa, yanapawasuntaj chaymanta agradecekunapaj.