1 Corintios 15:8 versiculopi Pablo nerqa: “Tukuymanta qhepatataj noqamanpis rikhurillawarqataj. Chayrayku manaraj nacekunanpi nacesqa wawa jina kani”, nispa. Ñaupajtaqa sutʼinchaj kanchej Pabloqa Jesusta cielopi jatunchasqata rikusqanmanta parlashasqanta. Chaytaj kanman karqa manarajpis tiemponpichu nacekunman jina, chayri mana rikukoj cuerpopipis kausarichisqa kanman jina, cieloman ripojkuna kausarimunankupaj ashkha watasraj faltashajtin. Jinapis kay versiculota sumajta ukhunchaytawan waj jinamantasina sutʼinchananchej kanqa.

Pabloqa Jesuspa discipulonman tukushajtin imachus kasqanmantapuni parlasharqapis. Jinapis, ¿ima niytá munarqa “manaraj nacekunan tiempopi wawa jina nacekuni” nispa? Ichapis kay imasta niyta munasharqa:

Pablo Jesuspa yachachisqanman tukusqanqa kaymanta jinalla, mancharinapaj jinataj karqa. Manaraj nacekunanpi nacesqa wawaqa, mana suyashajtillanchej nacekun. Sauloqa aswan qhepaman Pablo sutiwan rejsisqa karqa. Payqa Damascoman cristianosta qhatiykachaj rishaspa, mana suyarqachu kausarichisqa Jesusta rikunanta. Pablo Jesuspa discipulonman tukusqanqa paypajpis, Damascomanta cristianospajpis mana yuyasqallamanta karqa. Pablota imachus pasasqanqa mancharinapaj jinapuni karqa. Payqa uj mashkha diasta ni imata rikuyta aterqachu (Hech. 9:1-9, 17-19).

Jesuspa discipulonman tukusqanqa ‘mana tiemponpichu’ karqa. Griego parlaypeqa “manaraj nacekunanpi nacesqa” nispa, traducicullanmantaj “mana tiemponpi nacej” nispa. Mosoj Testamento Bibliapi kay jinata nin: “Riqhuriwarka, mana tiemponpi nacej jinaman”, nispa. Pablo Jesuspa discipulonman tukushajtin, Jesusqa cielopiña kasharqa. Pabloqa ñaupaj versiculospi Jesusta kausarichisqata rikojkunamanta parlarqa. Jinapis mana paykuna jinachu Jesusta niraj cieloman ripushajtin rikorqa (1 Cor. 15:4-8). Pabloqa Jesusta rikuyta aterqa mana suyasqallamanta rikhurisqanrayku, ‘mana tiemponpichu’ kaspa jinajtinpis.

Paymanta mana jatunchakuspalla parlasharqa. Wakin yachayniyoj runas nisqankuman jina, Pabloqa chayta nispa pay kikinmanta mana allintachu parlashanman karqa. Sichus Pablo chay yuyaywan parlashanman karqa chayqa, nishanman karqa mana apóstol kananpaj jinachu kasqanta. Chayraykuchá kaytawan nerqa: “Noqaqa apóstoles ukhupi aswan juchʼuypaj qhawakuni. Manataj apóstol nisqa kanaypaj jinachu kani, Diospa congregacionninta qhatiykachasqayrayku. Chaywanpis kunanqa, Diospa jatun khuyakuyninrayku apóstol kani”, nispa (1 Cor. 15:9, 10).

Chayrayku Pabloqa kaykunamantasina parlashanman karqa: Jesús kaymanta jinalla, mancharinapaj jinataj rikhurisqanmanta, mana suyashajtillan Jesuspa discipulonman tukusqan tiempomanta, chayri mana chayta rikunanpaj jinachu kasqanmanta. Imayna kajtinpis chay rikusqanqa may importantepuni paypaj karqa. Chaywanqa sutʼita yacharqa Jesús kausarichisqapuni kasqanta. Chayraykuchá Jesús kausarimusqanmanta wajkunaman willaspa, chay kutipi Jesusta rikusqanmanta parlajpuni (Hech. 22:6-11; 26:13-18).