1. Efesios 6:10-13 nisqanman jina, ¿imatataj Jehová Dios munakuwasqanchejrayku qowanchej?

CRISTIANOSQA Satanaswan supaykunasninwan ima, maqanakupi jina kashanchej. Jehová Diostaj munakuwasqanchejrayku, mana sapanchejtachu saqerpariwanchej. Payqa willawanchej supaykuna atiyniyoj kasqankuta. Paykunaman sinchʼita sayaykunapajtaj, imatachus necesitasqanchejta qowanchej (Efesios 6:10-13 leey). Jehovawan yanapachikuspa, tukuy sonqotaj paypi atienekuspaqa, Diabloj contranpi sinchʼita sayasun. Noqanchejqa apóstol Pablo jina ninchej: “Dios noqanchejman kutisqa kashan chayqa, ¿pitaj contranchejpi sayayta atinmanri?”, nispa (Rom. 8:31).

2. ¿Imatá kay yachaqanapi yachakusunchej?

² Cristianosqa mana wañurishanchejchu Satanasmanta demoniosninmantawan yachaymanta. Imajtinchus Jehová Diosta sirviyta munasqanchejrayku, paymanta astawan yachakuyta munanchej (Sal. 25:5). Jinapis Satanaswan mana engañachikunapajqa, imastachus ruwasqanta yachananchej tiyan (2 Cor. 2:11). Kay yachaqanapi yachakusun, imawanchus Satanás ashkha runasta engañasqanta. Chantá yachakullasuntaj, imaynatachus Supayta sajra angelesnintawan atipananchejta.

3. Layqeríos nispa, ¿imasmantataj parlashanchej?

³ Satanaswan supaykunasninwanqa, ashkha runasta layqerioswan  engañashanku. Layqeriosta * ruwajkuna ukhupi kashanku: adivinos, estrellaspi suerteta qhawajkuna, animota wajyaj aysiris, yatiris, layqas, jampiris, chamanes, magiata ruwajkuna ima. Chay runasqa imatapis yachanankupaj chayri ruwanankupaj, atiyniyoj kasqankuta ninku. Jinapis chay ateyqa mana Diosmantachu jamun.

4. ¿Mashkha runastaj layqeriospi creej kasqanku?

⁴ Tukuy ladomanta runas layqeriospi creenku. Latinoamérica, Caribe nisqapi, 18 suyusmanta runasta tapusqanku. Chay tapusqankuman jina, sapa kinsa runasmanta uj runa magiapi, yatirispi, layqaspi ima creesqanta nisqa. Chay chhika runasllataj, wañusqaswan parlayta atisqankuta nisqanku. Africapipis 18 suyusmanta runasta tapurillasqankutaj. Chay tapurisqanku runasmanta khuskan kurajpuni, yatirispi creesqankuta nisqanku. Maypi tiyakojtinchejpis, layqerío ruwaykunamanta sumajta qhawarikunanchej tiyan. Imaraykuchus Kuraj Supayqa, chaywan “jallpʼapi kaj tukuy runasta pantachishan” (Apo. 12:9).

5. ¿Imatá Jehová Dios layqerío ruwaykunamanta nin?

⁵ Jehová Diosninchejqa “cheqa Señor” (Sal. 31:5). Payqa layqerío ruwaykunata chejnikun. Chayrayku israelitasman kamacherqa: “Amapuni ni mayqenniykichej wawasniykichejta jaywanata jina qonkichejchu ninapi qʼolachispa. Amapuni ni mayqenniykichej adivino kaychejchu, nitaj qhepaman imachus kananmantapis yachaj tukunkichejchu. Ama layqapis kankichejchu, ama mayqentapis layqachinkichejchu, ama adivinosta tapukunkichejchu, amallataj aysirista tapukunkichejchu. Tata Diosqa millachikun chaykunata ruwajkunamantaqa” (Deu. 18:10-12). Chay kamachiykuna israelitaspaj karqa chaypis, Jehová Diosqa kikillantapuni yuyan. Payqa layqerío ruwaykunata millachikullanpuni (Mal. 3:6).

6. 1) ¿Imaraykutaj Jehová Diosninchej layqerío ruwaykunamanta qhawakunanchejta niwanchej? 2) Eclesiastés 9:5 nisqanman jina, ¿imaynataj wañusqas kashanku?

⁶ ¿Imaraykutaj Jehová Diosninchej layqerío ruwaykunamanta qhawakunanchejta niwanchej? Imaraykuchus Satanasqa runasta chaywan pantachishan. Diabloqa layqeriosnejta runata creechin, wañusqaj alman kausashallasqantapuni (Eclesiastés 9:5 leey). Chantapis runasta layqeriospi creechispa manchachin, Jehová Diosmantataj karunchachin. Satanasqa runas paypi atienekunankuta munan, manataj Jehová Diospichu.

7. ¿Imatataj Jehová willawanchej?

⁷ Qallariypi ninchej jina, Jehová Diosqa Supaywan sajra angelesninwan ima mana engañachikunapaj yanapawanchej. Jehovaqa paykunawan maqanakunapaj, imastachus ruwananchejta willawanchej. Qhepan parrafospi chayta yachakusun.

8. 1) ¿Imatá ruwana kasqa supaykunamanta jamoj creenciasta qhesachanapaj? 2) ¿Imatataj Salmo 146:4 wañusqasmanta sutʼita nin?

⁸ Diospa Palabranta leena, chaypitaj tʼukurina. Chayta ruwayqa, supaykunamanta jamoj creenciasta qhesachanapaj yanapawasun. Diospa Palabranqa sumaj filochasqa espada jina, Supaypa llulla yachachiykunasninta tukuchinapaj (Efe. 6:17). Bibliaqa sutʼita nin, wañusqasqa jallpʼallaña kasqankuta, nitaj paykunawan parlayta atisqanchejtapis  (Salmo 146:4 leey). Diospa Palabranqa nillawanchejtaj, Jehová Dioslla imachus qhepaman kananta sumajta yachasqanta (Isa. 45:21; 46:10). Bibliata sapa día leespa, leesqanchejtataj sonqonchejman churaspaqa, demoniospa yachachiykunasninkuta mana creesunchu, chejnikusuntaj.

9. ¿Imatataj cristianos mana ruwanchejchu?

⁹ Layqerío ruwaykunaman ni imaynamanta chhapukunachu. Cristianosqa layqerío ruwaykunaman ni imaynamanta satʼikunchejchu. Mana tapukamunchejchu aysirista, yatirista, ni jampiristapis. Nillataj wañusqaswan parlayta maskʼanchejchu. Pasaj semanapi yachakorqanchej jina, mana ima costumbretapis almapaj nispa ruwanchejchu. Manallataj adivinosta chayri estrellaspi suerteta qhawajkunata tapukamunchejchu (Isa. 8:19). Chay imasta ruwaspaqa, imaymana llakiykunapi rikukusunman. Chantapis Supaypa, sajra angelesninpa makisninkuman ima churakushasunman.

10, 11. 1) Éfeso llajtamanta runas Diosmanta yachakuspa, ¿imatataj ruwasqanku? 2) ¿Imatá Éfeso llajtapi cristianosmanta yachakusunman? 3) 1 Corintios 10:21 nisqanman jina, ¿imaraykutaj Efesomanta cristianos jina ruwananchej tiyan?

¹⁰ Layqerioswan chajrusqa imasninchejta chinkachina. Ñaupa tiempopi, Éfeso llajtamanta wakin runasqa, layqas karqanku. Jinapis Diosmanta yachakusqankutawan, chay tukuy layqerío imasninkuta chinkacherqanku. Bibliaqa nin: “Pikunachus layqeriosta ruwaj kanku chaykunamanta ashkhas, librosninkuta tantaykuspa tukuypa ñaupaqenpi ruphaykucherqanku”, nispa (Hech. 19:19). Rikunchej jina, chay cristianosqa supaykunaj contranpi sinchʼita sayarqanku. Paykunaqa yatiri librosninku mayta valejtinpis, mana regalarqankuchu, nitaj venderqankuchu. Astawanpis tukuyninta ninaman enqhaykorqanku. Paykunapajqa qolqeta pierdeymanta nisqa, Jehová Diosta kusichiy aswan valorniyoj karqa.

¹¹ ¿Imatá Éfeso llajtapi cristianosmanta yachakusunman?  Wakin runasqa suertepaj nispa chayri sajramanta jarkʼakunankupaj, imallatapis apaykachakunku. Chay imas kapuwanchej chayqa, chinkachinanchej tiyan. Imaraykuchus chaykunapis layqerioswan chajrusqa kashan (1 Corintios 10:21 leey).

12. ¿Imaswantaj mana kusirikuyta munasunmanchu?

¹² Imaswanchus kusirikusqanchejta allinta qhawarikuna. Wakin libros, revistas, chayri Internetpi churakusqanqa, layqerioswan chajrusqa kashanku. Wakin peliculaspi, programaspi, videojuegospipis, rikuchikamun vampirosmanta, condenadosmanta, chayman rijchʼakoj imasmanta ima. Wakin takiykunapis chaykunallawantaj chajrusqa kashan. Chaykunaqa magiata, layqa ruwaykunatawan manapis sajrachu kanman jinata qhawachinku. ¿Allinchu kanman cristianos chay imaswan kusirikunanchej? Mana. Cristianosqa imawanchus kusirikusqanchejta allinta qhawarikunanchej tiyan. Mana tukuy cuentoschu layqerioswan chajrusqa kashan chaypis, imastachus Diosninchej chejnikusqanta chejnikunallanchejtaj tiyan. Noqanchejqa Diosta llimphu sonqowan yupaychayta munanchej (Hech. 24:16). *

13. ¿Imatataj mana ruwananchejchu kasqa?

¹³ Ama supaykunamanta parlaspa purinachu. Jesusmanta mayta yachakusunman (1 Ped. 2:21). Payqa cielopi kashaspa, Satanaswan supaykunawan imastachus ruwasqankuta rikorqa. Jinapis jallpʼapi kashaspa, mana supaykunamanta cuentakuspachu purerqa. Jesusqa Tatan Jehovamanta astawan parlarqa, nitaj Satanaspajchu propagandata ruwarqa.  Noqanchejpis Jesús jina ruwasunman, supaykunamanta cuentosta mana wajkunaman cuentaspa. Astawanqa parlasqanchejpi rikuchiyta munanchej, sonqonchej “kʼacha palabraswan”, nisunman cheqa kajwan juntʼa kasqanta (Sal. 45:1).

14. ¿Imaraykutaj supaykunata mana manchachikunachu kasqa?

¹⁴ Supaykunata ama manchachikunachu. Kay tiempopeqa tukuyninchej ima llakiypipis rikukusunman. Ichapis mana suyashajtillanchej accidentakusunman, onqoykusunman, chayri wañuy chayamuwasunman. Jinapi rikukuspa, mana yuyananchejchu tiyan demonios juchayoj kasqankuta. Biblia niwanchej, llakiykuna “kaymanta jinalla” chayamuyta atiwasqanchejta (Ecl. 9:12). Jehová Diosninchejqa, supaykunamanta nisqa aswan atiyniyoj. Jehovaqa mana saqerqachu Jobta Satanás wañuchinanta (Job 2:6). Moisespa tiemponpipis, Jehová Diosqa Egiptopi yatirismanta nisqa aswan atiyniyoj kasqanta rikucherqa (Éxo. 8:18; 9:11). Jesuspis cieloman kutiytawan Jehová Diosmanta atiyta japʼerqa. Chay atiywantaj Satanasta supaykunasnintawan cielomanta wijchʼumorqa. Tumpamantawantaj, Jesusqa paykunata chinkay ukhuman wijchʼuykonqa, manañataj ni pitapis pantachenqankuchu (Apo. 12:9; 20:2, 3).

15. ¿Jehová Diosninchej kay tiempopi llajtanta jarkʼashanchu?

¹⁵ Jehová Diosninchejqa, kay tiempopi llajtanta sumajta jarkʼashan. Chaytaj sutʼi rikukun, mundontinpi runasman cheqa kajmanta predicashasqanchejpi, yachachishasqanchejpitaj (Mat. 28:19, 20). Chayta ruwaspaqa, Satanaspa ruwaykunasninta sutʼiman orqhonchej. Satanasqa mana Diosmanta willasqanchejta sayachiyta atinchu. Sayachiyta atinman chayqa, sayachinmanñachá karqa. Chayrayku supaykunata mana manchachikunachu tiyan. Jehová “Diosqa sumajta qhawamushan tukuy kay pachata, kallpachanampaj tukuy sonqowan payllapi atienekunku, chaykunata” (2 Cró. 16:9). Jehová Diosmanta mana karunchakusunchu chayqa, supaykunaj ruwasqankoqa mana wiñaypajchu ñakʼarichiwasun.

16, 17. ¿Imaynatá hermananchej Erica supaykunaj contranpi sinchʼita sayasqa?

¹⁶ Supaykunawan maqanakunapajqa, wapus kananchej tiyan. Amigosninchej chayri familiaresninchej costumbresta ruwachiyta munawajtinchejqa, sinchʼita sayanapaj kallpata necesitanchej. Chay kutispi Jehovata kasukusun chayqa, pay bendeciwasun. Hermananchej Ericamanta parlarina. Payqa Ghana suyupi tiyakun. Hermananchejqa 21 watasniyoj kashajtin, Bibliamanta yachakuyta qallarerqa. Tatan yatiri kasqanrayku, familiaresnenqa uj costumbrenkuta ruwachiyta munarqanku. Chay costumbreman jina, Ericaqa ñaupa tatasninkoj almankuman qarasqa aychata mikhunan karqa. Hermananchejqa mana chayta ruwayta munarqachu. Familiaresnintaj almas paykunaman castigota apachinanta yuyarqanku. Creerqankutaj onqoykunankuta, locoyapunankuta ima.

¹⁷ Familiaresnin obligajtinkupis, wasinmanta ripunan kajtinpis, Ericaqa mana chay costumbreta ruwarqachu. Wakin hermanostaj, payta wasinkupi japʼikorqanku. Ajinamanta Jehová Diosninchejqa, hermananchejta mundontinpi kʼacha familiawan bendicerqa (Mar. 10:29, 30). Ericataqa familiaresnin chejnikorqanku, tukuy cosasnintapis ruphaykucherqanku. Ajinapi rikukuspapis, payqa Jehová Diosta kasukorqa, bautizakorqataj. Kunantaj precursora regular jina yanapakushan. Ericaqa supaykunata mana manchachikunchu, familiaresninmantataj nin: “Sapa día orakuni, familiaresniy munakuyniyoj Tatanchej Jehovata rejsinankupaj, niñataj imatapis manchachikunankupaj”, nispa.

18. Tatanchej Jehovamanta mana kacharikojtinchej, ¿ima bendicionestataj japʼisunchej?

¹⁸ Ichapis mana tukuychu, hermananchej Erica jina pruebapi rikukusun. Jinapis tukuyninchej supaykunawan guerrapi jina kashanchej. Chayrayku Tatanchej Jehovamanta mana kacharikunachu tiyan. Chayta ruwaspaqa ashkha bendicionesta japʼisunchej. Satanasqa mana engañawasunchu, supaykunatataj mana manchachikusunchu. Astawanpis Jehová Diosta sirvillasunpuni, paymantaj astawan kʼaskaykusun. Santiago nerqa: “Diosta kasukuychej. Kuraj Supaypa contranpitaj sayaykuychej, paytaj qankunamanta ayqenqa. Diosman qayllaykuychej, paytaj qankunaman qayllaykamusonqachej”, nispa (Sant. 4:7, 8).