1, 2. 1) ¿Imaynatá Satanás runasta engañashan? 2) ¿Imatá kay yachaqanapi yachakusun?

SATANASQA ‘llullakojkunaj tatan’. Payqa kay mundoj qallariyninmantapacha runasta engañashan (Juan 8:44). ¿Imaynamantá? Runasta creechin, uj runa wañupojtin alman waj lugarpi kausashallasqantapuni. Chayta creespa, runasqa imaymana costumbresta, cuentostawan rikhurichinku. Chayrayku ashkha hermanos, familiarninku chayri llajta masinku wañupojtin, “creeyrayku sinchʼita” maqanakunanku tiyan (Jud. 3).

² ¿Imatá ruwasunman pipis Diospa chejnisqan costumbresta ruwachiyta munawajtinchej? (Efe. 6:11). Uj hermano ajinapi kashan chayrí, ¿imaynatá sonqochasunman, kallpachasunmantaj? Kay yachaqanapi yachakusun, imaynatachus Jehová yanapawasqanchejta. Jinapis ñaupajtaqa, imatachus Biblia wañusqasmanta nisqanta yachakusun.

3. Adanwan Evawan Supayta creesqankurayku, ¿imapitaj runas rikukunchej?

³ Diosninchejqa runata wiñaypaj kausananpaj ruwarqa, manataj wañunanpajchu. Jehová Diosqa Adanman nerqa: “Allin kajta mana allin kajta yachanamanta sachʼaj poqoynillanta amapuni mikhunkichu. Chay sachʼaj poqoynintachus mikhunki chayqa, wañunki”, nispa. Evamanpis chayllatataj nerqa. Adanwan Evawanqa chay kamachiyllata kasukunanku karqa (Gén. 2:16, 17). Jinapis Satanasqa, uj katarinejta Evaman nerqa: “Chayqa mana jinachu; mana wañunkichejchu”, nispa. Evatajrí Satanasta creespa sachʼaj poqoyninta mikhuykorqa, Adanmanpis jaywarqa. Chantá paypis mikhuykullarqataj (Gén. 3:4, 6). Ajinamanta juchawan wañuywan “tukuy runasman chayarqa” (Rom. 5:12).

4, 5. ¿Ima yachachiywantaj Satanás runasta engañashallanpuni?

 ⁴ Diospa nisqanman jinapuni, Adanwan Evawanqa wañorqanku. Supaytaj chaymantapacha llullakushallanpuni, wañusqasmanta imaymana llulla yachachiykunata rikhurichispa. ¿Mayqentaj ujnin yachachiynin? Pay nin, runa wañupojtin alman chayri espiritun llojsipusqanta, waj lugarpitaj kausashasqanta. Satanasqa chay llulla yachachiywan, may chhika runasta engañashallanpuni (1 Tim. 4:1).

⁵ ¿Imaraykutaj ashkha runas Satanasta creenku? Imajtinchus ni pipis wañuyta munanchu. Satanastaj chaymanta aprovechakuspa runasta engañan. Diosninchej sonqonchejman wiñay kausayta churasqanrayku, mana wañuyta munanchejchu (Ecl. 3:11). Chayrayku wañoyqa enemigonchej (1 Cor. 15:26).

6. 1) ¿Tukuytachu Satanás llulla yachachiykunasninwan engañashan? 2) Wañusqas maypichus kasqankuta sutʼita yachasqanchej, ¿yanapawanchejchu?

⁶ Satanás, ¿tukuy runastachu llulla yachachiykunasninwan engañan? Mana. Ashkha runasqa, imatachus Biblia wañusqasmanta nisqanta sutʼita yachanku, yachallankutaj wañusqas kausarimunankutapis. Chaytataj tukuyman yachachinku (Ecl. 9:5, 10; Hech. 24:15). Noqanchejqa wañusqas maypichus kashasqankuta sutʼita yachanchej. Chaytaj sonqochawanchej, niñataj ima cuentotapis creenchejchu. Yachanchej wañusqasqa jallpʼallaña kasqankuta, nitaj sufrishasqankuta, niñataj imatapis ruwayta atisqankuta. Chayrayku mana alma castigopi creenchejchu. Wañusqasqa puñusqa jinalla kashanku (Juan 11:11-14). Paykunaqa mashkha unaytachus wañusqa kasqankutapis, mana yachankuchu. Chayrayku may chhika unayta wañusqa kajpis, kausarimuytawan uj ratitollapis pasanman jinata yuyanqa. Wañusqasqa uj ñawi chʼirmiymanta jinalla rijchʼarimonqanku.

7. ¿Imaraykutaj Supaypa yachachiykunasnin manapuni walejchu?

⁷ Biblia imatachus wañusqasmanta yachachisqanqa, sutʼisitu, entiendenapaj jinataj. Satanaspa llulla yachachiykunasninrí, qʼala pejtu kanku, mana entiendey atinataj. Payqa chay yachachiykunawan, runaspa umankuta muyuchin, Diosninchejtataj sajrapaj qhawachin. ¿Imaraykutaj Supaypa yachachiykunasnin manapuni walejchu? Imaraykuchus Jehová Diosninchejpa sutinta chʼichichan, Jesucristo kausayninta qosqan qhasilla kasqanta yuyachin, runastataj astawan llakichin. Qhepan parrafospi chaymanta yachakusun.

8. 1) ¿Imaynatá Supaypa llulla yachachiynin Jehová Diosninchejta qhawachin? 2) Jeremías 19:5 nisqanman jina, ¿Jehová Dios runasta nina lauraypi ruphachinmanchu?

⁸ Supayqa Jehová Diospa sutinta chʼichichan. Ujnin llulla yachachiynenqa, sajra runas wañuspa infiernopi ñakʼarishasqankuta nisqan. Chay yachachiywan, munakuyniyoj Jehová Diosninchejta, pay jina sajrapis kanman jinata qhawachin (1 Juan 4:8). Tatanchej Jehovamanta ajinata parlajta uyarispa, rabiakunchej. Jehová Diosninchejpa sonqonpis nananchá. Payqa runasta sufrichiyta millaypaj qhawan (Jeremías 19:5 leey).

9. 1) Juan 3:16; 15:13 nisqanman jina, ¿imaraykutaj Jesús kausayninta qorqa? 2) ¿Imatataj Supay Jesuspa wañuyninmanta yuyachin?

⁹ Supayqa Jesucristo qhasillata kausayninta qosqanta yuyachin (Mat. 20:28). Supayqa wañojtinchej almanchej kausakushasqanta nin. Cierto kanman chayqa, wiñay kausayniyojña kanchej, niñataj wiñay kausayta japʼinapaj Cristo noqanchejrayku wañunanta necesitarqanchejchu. Jehová Diosninchejrí, mayta munakuwasqanchejrayku Wawanta kachamorqa noqanchejrayku wañunanpaj. Jesucristopis manchayta munakuwasqanchejrayku, kausayninta entregarqa (Juan 3:16; 15:13 leey). Jehovawan Jesuswanqa maytachá llakikunku, Satanaspa llulla yachachiynin Jesuspa wañusqanta qhasillapaj qhawachisqanmanta.

10. Supaypa llulla yachachiykunasnin, ¿runasta sonqochanchu?

¹⁰ Supayqa runaspa llakiyninkuta astawan yapan. Uj wawita wañupojtin, runasqa ninku: “Diosqa angelitosta necesitasqanrayku wawitaykiyta cieloman apakapun”, nispa. Chaytaj tatasta sonqochananmantaqa, astawan llakichin. Chantapis runasqa infiernopi creesqankurayku, runa masinkuta khuyayta ñakʼarichinku. Ashkha runasta iglesiaj yachachisqanta mana japʼikusqankuraykulla, kausashajta ruphaykuchej kanku. Iglesia catolicaqa, Inquisición española nisqa tribunalta rikhuricherqa. Chay tribunalqa iglesia catolicaj yachachiyninta mana japʼikojkunata, sonqo nanayta ñakʼarichispa wañuchej kanku. Uj libro nisqanman jina, “chay tribunalmanta juezkunaqa, juchasapa runasman infiernota llamirichishasqankuta nej kanku”. Ajinamanta niraj wañushaspa pesachikunankupaj, nitaj infiernoman chayanankupaj. Ashkha lugarespitaj, runasqa alma castigananta manchachikuspa, wañusqaspaj mikhunasta churapunku, waj costumbrestawan ruwanku. Manachayqa almamanta bendicionta mañakunku. Runasqa chay costumbresta ruwanku, Satanaspa llulla yachachiykunasninta creesqankurayku. Chaytaj runasta sonqochananmantaqa, astawan llakichin, manchachintaj.

11. ¿Imastataj familiasninchej niwasunman?

¹¹ Familiasninchej chayri amigosninchej wañusqaspaj costumbresta ruwachiyta munawajtinchej, ¿imataj yanapawasunman Jehovata kasukunapaj? Diosta, Palabrantawan munakuy. Familiasninchejqa costumbresta mana ruwayta munajtinchej, ichá niwasun: “Almapaj ni ima respetoyki kanchu, ¿manachu payta munakunki?”, nispa. Chayrí niwasunman: “Juchaykirayku alma castigawasun”, nispa. ¿Imatá ruwasunman Jehovata kasukunallapajpuni? Qhepan parrafospi, imaynatachus Biblia yanapawasqanchejta qhawarisun.

12. ¿Ima costumbrestaj Bibliaj nisqanman churanakun?

¹² Creenciasmanta, costumbresmantawan ‘tʼaqakuna’ (2 Cor. 6:17). Caribemanta uj lugarpi, ashkha runas creenku, runa wañupojtin  alman qhepakusqanta payta sufrichejkunata castigananpaj. Uj libro nisqanman jina, almaqa “uj llajta enterotapis castiganman”. Africaj wakin lugaresninpitaj, runa wañupojtin espejosta qhatanku, wañusqaj fotosnintataj perqa ladoman tijranku. Paykunaqa chayta ruwanku, alma uyanta mana rikukunanpaj. Chay jina costumbresqa Satanasmanta jamun. Noqanchejqa chayta yachasqanchejrayku, mana costumbresta ruwanchejchu, nitaj wañusqasmanta ima cuentotapis creenchejchu (1 Cor. 10:21, 22).

13. Uj costumbre allinchus manachus kasqanta yachanapaj, ¿imatá ruwasunman Santiago 1:5 nisqanman jina?

¹³ Uj costumbre allinchus manachus kasqanta yachanapaj, ¿imatá ruwasunman? Jehová Diosmanta yuyayta mañakuna (Santiago 1:5 leey). Chantá publicacionespi yachayta maskʼarina. Ancianosmanpis chimpasunman yanaparinawanchejpaj. Jinapis ama suyanachu, ancianos imatachus ruwanata ninawanchejta. Paykunaqa Bibliaj nisqanta rikuchiwasun, kunan yachakushanchej jinasta. Ajinamanta yuyayninchejta yachachisun, “imachus allin, imatajchus mana allin kasqanta” reparananpaj (Heb. 5:14).

14. ¿Imastá ruwasunman mana pitapis pantachinapaj?

¹⁴ “Tukuy imata ruwaychej Dios jatunchasqa kananpaj. Allinta qhawarikuychej ama pantachinaykichejpaj” pitapis (1 Cor. 10:31, 32). Niraj ima costumbretapis ruwashaspa, chay ruwasqanchej wajkunata pantachenqachus manachus, chaypiraj piensarinanchej tiyan. Mana pi hermanonchejtapis urmachiyta munanchejchu (Mar. 9:42). Nillataj mana testigo kajkunatapis phiñachiyta munanchejchu. Munakuyniyoj kaspaqa, paykunawan kʼachamanta parlarisun. Chayta ruwaspa, Jehová Diosninchejta jatunchasun. Ama paykunawan discutinachu, nitaj costumbresninkumanta burlakunachu. Munakuyniyoj kaspaqa, paykunawan kʼachas kasun, respetasuntaj. Ajinamanta sonqonkuta llampʼuyachisunman.

15, 16. 1) ¿Allinchu kasqa testigos kasqanchejta wajkunaman willarinanchej? Sutʼinchay. 2) ¿Imatataj Romanos 1:16 versiculomanta yachakusunman?

¹⁵ Tukuyman Jehovaj testigosnin kasqanchejta willarina (Isa. 43:10). Familiasninchejman chayta ñaupajsitumanta willasunchej chayqa, costumbresta mana ruwasqanchejta yachanqankuña. Pi familianchej wañupojtintaj, ichapis mana costumbresta ruwanapaj tanqawasunchu. Franciscomanta señoran  Carolinamantawan parlarina. Paykunaqa Mozambique suyumanta kanku. Francisco nin: “Bibliamanta yachakusqaykutawan, familiasniykuman willarerqayku wañusqaspaj costumbresta manaña ruwanaykuta. Chaymanta qhepaman, señoraypa hermanan wañuporqa. Llajtaykupeqa wañusqata bañanku almata jatunchanapaj. Chantá aswan qaylla familian, bañasqanku yakuta maymanchus jichʼanku, chaypi kinsa tutata puñunan tiyan. Chaytaqa alma castigota manchachikuspa ruwanku. Señoraypa familianqa, pay chaypi puñunanta munarqanku. Chaypacha pruebapi jina karqayku”, nispa.

¹⁶ ¿Imatá Franciscowan señoranwan ruwarqanku? Pay nin: “Jehová Diosta munakusqaykurayku, mana sonqonta nanachiyta munarqaykuchu. Chayrayku señoraypa familianman nerqayku, chay costumbreta mana ruwanaykuta. Paykunarí mayta phiñakorqanku, niwarqaykutaj: ‘Qankunaqa mana wañusqata respetankichejchu. Niña ujtawan visitasqaykuchu, manataj imapipis yanapasqaykuñachu’, nispa. Noqaykoqa ñaupajtaña willarqayku, testigos kasqaykurayku chay costumbresta mana ruwasqaykuta. Chayrayku rabianku pasarananta suyarqayku. Wakin familiaresniykupis kutikuwarqayku. Aswan qhepaman señoraypa familiaresnenqa, niña phiñasqachu kasharqanku, allinyakaporqaykutaj. Wakenqa publicacionesta mañakunawaykupaj wasiykumanpis jamunku”, nispa. Ama jaykʼajpis pʼenqakunachu, wañusqasmanta yachasqanchejta sutʼinchariyta (Romanos 1:16 leey).

17. ¿Imaynatá hermanosninchejta yanapasunman?

¹⁷ Pi hemanonchejpa familian wañupojtinpis, paykunawan “khuska llakiypi” sayananchej tiyan (Pro. 17:17). Hermanosninchej costumbresta ruwanankupaj tanqasqa kajtinku, ¿imaynatataj paykunata yanapasunman? Bibliapi iskay yuyaychaykunata yachakuna.

18. 1) ¿Imaraykutaj Jesús waqarikorqa? 2) ¿Imatataj Jesusmanta yachakusunman?

¹⁸ “Waqajkunawantaj waqaychej” (Rom. 12:15). Wakin kutisqa, wañupojpa familianman ni imata niyta atinchejchu. Jinapis paykunawan  khuska waqaspaqa, mayta kallpachasunman. Lázaro wañupojtin, hermanasnin Marta, María, wajkuna ima, mayta waqarqanku. Jesusqa tawa diasmantaraj chayman chayarqa. Payqa Lazarota kausarichinanta yachaspapis, “waqarikorqa” (Juan 11:17, 33-35). Jesuspa waqarikusqanqa, rikucherqa Tatanpis ajina llakisqallataj kasqanta. Mana chayllachu, Jesuspa waqarikusqanqa, Lazaroj familianta mayta munakusqanta rikucherqa. Chaytaj Mariata, Martatawan maytachá sonqocharqa. Ajinallataj hermanosninchejwanpis. Paykunamanta llakikojtinchej, munakojtinchejtaj, yachanqanku mana sapankuchu kasqankuta. Astawanpis ashkhas paykunata munakusqankuta reparanqanku.

19. ¿Imaynatataj Eclesiastés 3:7 hermanonchejta sonqochanapaj yanapawasunman?

¹⁹ “Uj tiempoqa tiyan chʼinyanapaj, uj tiempotaj parlanapaj” (Ecl. 3:7). Hermanonchejta sonqochallasunmantaj, payta sumajta uyarispa. Llakiyninta willarishawajtinchej, mana pantachispa uyarina. Imatapis parlarparillan chaytaj, ama phiñakunachu (Job 6:2, 3). Ichapis hermanonchejqa, mana testigo familiasnin rabiachisqankurayku aswan llakisqa kashan. Paywan khuska Jehová Diosmanta mañakuna. Rogakunataj mañakuykunata uyarej Diosninchej, hermanonchejta kallpachananta, allin yuyaytawan qonanta (Sal. 65:2). Atikojtenqa paywan khuska Bibliata chayri uj experienciata leerisunman.

20. ¿Imatá qhepan yachaqanapi yachakusun?

²⁰ Noqanchejqa maypichus wañusqas kashasqankuta, kausarimunankutapis sutʼita yachanchej. Chayrayku may kusisqa kanchej (Juan 5:28, 29). Atikusqanman jina, parlasqanchejwan ruwasqanchejwantaj, Bibliaj yachachisqanta wajkunaman yachachina. Jinapis Satanasqa, tukuy imata ruwan runas cheqa kajta mana yachanankupaj. Chayrayku qhepan yachaqanapi, imaynatachus runasta layqerioswan engañasqanta yachakusun. Yachakullasuntaj imaraykuchus layqeriosman mana chhapukunachu kasqanta.