1. ¿Imaynapí yachanchej Matthew kausarimuy kananmanta mana iskayrayasqanta?

 MATTHEW sutiyoj lloqallituta sinchʼi onqoyniyoj kasqanrayku ashkha kutispi operarqanku. Uj pʼunchay qanchis watitasnillayojraj kashajtin, paywan familianwanqa JW Broadcasting^® nisqata qhawasharqanku. Chay programa tukukushajtintaj takiyniyoj video rikhurimorqa, chaypitaj rikorqanku hermanos wañupoj familiaresninkuwan tinkukapushasqankuta. b Chay video tukukuyta Matthewqa tatasninman qayllaykuspa makisninkumanta japʼiykuytawan nerqa: “Tatáy mamáy, ¿reparankichejchu? Wañupusaj chayqa kausarinpullasaj. Ama llakikuychejchu, watejmanta tinkukapusun”, nispa. ¿Imaynataj tatanwan mamanwan kashankuman karqa lloqallitunku chay jina creeyniyoj kasqanta rikuspa? Matthewqa kausarimuy kananmanta ni tumpitata iskayrayanchu.

2, 3. ¿Imaraykutaj kausarimuy kananpi tʼukurinanchejpuni tiyan?

² Allin kanman kausarimuy kananpi sapa kuti tʼukurinanchej (Juan 5:28, 29). Mana yachanchejchu imachus qʼaya kananta. Ichapis noqanchej sinchʼita onqoykusunman chayri munasqa familianchej kaymanta jinalla wañupunman (Ecl. 9:11; Sant. 4:13, 14). Kausarimuy kanantapuni suyakusqanchejqa chay llakiykunata aguantanapaj yanapawasun (1 Tes. 4:13). Bibliaqa niwanchej Tatanchej Jehovaqa sumajta rejsiwasqanchejta, maytataj munakuwasqanchejta (Luc. 12:7). Jehovaqa mosoj cuerpoyojta kausarichimuwasun, jinapis kikin yuyayniyojta, kikin genioyojta, imaynachus ñaupajta karqanchej ajina kikisituntapuni. Chayta ruwananpajqa may sumajtapuni rejsiwanchej. Mayta munakuwasqanchejraykutaj wiñaypaj kausakunanchejta munan. Chayrayku wañupojtinchejpis payqa kausarichimullawasun.

³ Kay yachaqanapi qhawarisun imaraykuchus creesqanchejta Dios kausarimuy kananta niwasqanchejpi. Kay yachaqanapaj textopis creeyninchejta sinchʼiyachenqa. Chaypi nin: “Hermanoykeqa kausarinponqa”, nispa (Juan 11:23). Chantapis yachakullasuntaj kausarimuy kananpi astawan creenapaj imatachus ruwanata.

4. Pipis uj imata ruwananta niwajtinchej, ¿imaynapí yachasunman ruwanantapunichus manachus? Sutʼinchariy.

⁴ Pipis uj imata ruwananta niwajtinchej, ¿imaynapí yachasunman ruwanantapunichus manachus? Chaypajqa sumajta qhawarinanchej tiyan chayta ruwaytapunichus manachus munasqanta, chantapis chayta ruwananpaj atiyniyojchus manachus kasqanta. Kaypi piensarina: Wasinchejta loco para qʼalata thuñiykunman. Ujnin amigonchejtaj niwasunman: “Noqa yanapasqayki wasiykita watejmanta sayarichinaykipaj”, nispa. Yachanchej payqa sonqomantapachapuni chayta nishawasqanchejta, yanapariytapunitaj munawasqanchejta. Chantapis payqa sumajta wasista ruwayta yachanman, herramientasniyojtaj kanman. Chaypi yachanchej yanapayta atiwasqanchejtapuni. Chayraykutaj nisqanpi atienekunchej. Dios kausarimuy kananta niwasqanchejmantarí, ¿imatá nisunman? ¿Chayta ruwaytapunichu munan, ruwananpaj atiyniyojchu?

5, 6. ¿Imaynapí yachanchej Jehová wañusqasta kausarichimuytapuni munashasqanta?

⁵ ¿Jehová munanchu wañusqasta kausarichimuyta? Arí, mayta munan. Payqa Palabranta qhelqajkunamanta ashkhasta yuyaycharqa kausarimuy kananmanta qhelqanankupaj (Isa. 26:19; Ose. 13:14; Apo. 20:11-13). Jehovataj imata nin chayqa, juntʼanpuni (Jos. 23:14). Payqa wañupojkunata watejmanta kausarichimuyta mayta munashan. ¿Imajtín chayta ninchej?

⁶ Imatachus Job nisqanpi piensarina. Payqa sutʼita yacharqa wañupojtin Jehovaqa imata jina rikukapuyta munasqanta (Job 14:14, 15). Jehovaqa kunanpis kikillantataj tukuy wañupoj kamachisninta rikukapuyta munashan. Mayta munashan paykunata kausarichimuyta sanitos, kusisqastaj kausakunankupaj. Mana payta rejsiyta atispa wañupoj runastarí, ¿kausarichimuyta munashallantajchu? Arí, Tatanchej Jehovaqa paykunatapis kausarichimuyta munashallantaj (Hech. 24:15). Chantapis munashan paykuna amigosninman tukunankuta, kay jallpʼapitaj wiñaypaj kausakunankuta (Juan 3:16). Sutʼita reparanchej Jehovaqa wañusqasta kausarichimuytapuni munashasqanta.

7, 8. ¿Imaynapí yachanchej Jehová wañusqasta kausarichimunanpaj atiyniyoj kasqanta?

⁷ Chanta, ¿Jehová wañusqasta kausarichinanpaj atiyniyojchu? Arí, ‘Tukuy Atiyniyojʼ (Apo. 1:8). Payqa tukuy enemigosninta atipayta atin, wañuytapis (1 Cor. 15:26). Chayta yachayqa mayta kallpachawanchej, sonqochawanchejtaj. Hermananchej Emma Arnoldmanta parlarina. Paywan familianwanqa Segunda Guerra Mundial kashajtin sinchʼi llakiykunapi rikukorqanku. Paypa ashkha familiaresnenqa nazispa carcelesninkupi wañorqanku. Payqa warmi wawanta sonqochananpaj nerqa: “Runas wañuymanta mana kausarinpunkuman chayqa, wañoyqa Diosmanta aswan atiyniyoj kanman. Pero chayqa mana jinachu”, nispa. Ajinapuni, Jehovamanta aswan atiyniyojqa mana pipis, nitaj imapis kanchu. Pay kausayta rikhuricherqa, chayrayku wañusqasta kausarichimunanpajpis atiyniyojllataj.

⁸ Jehová wañusqasta kausarichimunanpi creellanchejtaj mana tukukuy yuyayniyoj kasqanrayku. Biblia niwanchej Jehovaqa tukuy estrellasta sapa ujninkuta sutinmanta wajyasqanta (Isa. 40:26). Payqa tukuy wañupoj runasmanta yuyarikun (Job 14:13; Luc. 20:37, 38). Jehovaqa pikunatachus kausarichimonqa chaykunamanta tukuy imitatapuni yuyarikun,  imayna rijchʼayniyojchus kasqankuta, imayna genioyojchus kasqankuta, imastachus ruwasqankuta, imaynatachus kausakusqankutapis.

9. ¿Imaraykutaj kausarimuy kananpi creenki?

⁹ Jehová wañusqasta kausarichimunanpi creenchej, imaraykuchus yachakunchej jina, payqa chayta ruwaytapuni munashan, chayta ruwananpajtaj atiyniyoj. ¿Imajtintaj creellanchejtaj Jehová wañusqasta kausarichimunanta nisqanpi? Imaraykuchus payqa wakin runasta kausarichimorqaña. Ñaupa tiempopi Jehovaqa wakin runasman atiyta qorqa wañusqasta kausarichimunankupaj. Paykunamanta ujtaj kashan Jesucristo. Qhawarina Jesús uj pacha uj runata kausarichimusqanta. Chayqa kashan Juan 11 capitulopi.

10. Jesús Betaniamanta iskay día puriypi kashajtin, ¿imataj pasarqa, chanta Jesús chay ratochu Betaniaman rerqa? (Juan 11:1-3).

¹⁰ (Juan 11:1-3 leey). Jesuspata wakin amigosnenqa Betaniapi tiyakorqanku. Paykuna karqanku Lázaro, hermanasnin María, Marta ima (Luc. 10:38-42). Lazaroqa 32 wata tukukuy chaynejta onqoykorqa. Hermanasnintaj maytapuni llakikorqanku, chaytataj Jesusman willachimorqanku. Jesusqa chaymanta iskay día puriypi kasharqa, Jordán mayu chimpapi (Juan 10:40). Jinapis Lazaroqa Jesusman chay willay chayashajtinsina wañuporqa. Jesustaj amigon Lázaro wañupusqanta yachaspapis iskay diatawanraj qhepakorqa, chaymantaraj Betaniaman rerqa. Chayrayku Jesús Betaniaman chayananpaj Lazaroqa tawa diaña wañusqa kasharqa. Jesusqa chaypi uj imata ruwayta yuyasharqa, amigosninta yanapananpaj, Diostapis jatunchananpaj (Juan 11:4, 6, 11, 17).

11. ¿Imatá yachakunchej Jesuspa ruwasqanmanta?

¹¹ Imatachus Jesús ruwasqanmantaqa imaynatachus uj sumaj amigo kayta yachakusunman. Mariawan Martawanqa hermanonku onqosqa kashasqallanta Jesusman willachimorqanku, manataj nerqankuchu Betaniaman jamunanta (Juan 11:3). Jesusqa Lázaro wañupojtin, maypichus kasharqa chayllamanta kausarichiyta atinman karqa. Jinapis Betaniaman rerqa Mariatawan Martatawan acompañananpaj, amigasnin kasqankurayku. ¿Ajinallatatajchu mayqen amigonchejpis mana yanapata mañashajtillanchej yanapaykuriwanchej? Yachanchej chay amigonchejqa ‘llakiy kajtin’ yanaparinawanchejtapuni (Pro. 17:17). Noqanchejpis Jesús jina uj sumaj amigo kayta atisunman. Imatawanchus Jesús ruwasqanta qhawarina.

12. ¿Imatá Jesús Martata nerqa, chanta imaraykutaj Marta chay nisqanta juntʼananpi creeyta aterqa? (Juan 11:23-26).

¹² (Juan 11:23-26 leey). Martaqa Jesús Betaniaman chayamushasqantaña yachaspa, chay ratopacha taripamorqa. Taripaspataj nerqa: “Señor, kaypichus kawaj karqa chayqa, hermanoyqa mana wañupunmanchu karqa”, nispa (Juan 11:21). Jesusqa Lazarota sanoyachiyta atinman karqa, jinapis uj tʼukuna imata ruwayta munarqa. Jesusqa Martata nerqa: “Hermanoykeqa kausarinponqa”, nispa. Chantá chay nisqanpi Marta astawan creenanpaj kaytawan nerqa: “Noqa kani kausarimuy, kausaytaj”, nispa. Diosqa Jesusman atiyta qorqa wañusqasta kausarichimunanpaj. Chay kutikama Jesusqa  uj imillitata wañupusqanmanta pisi horasnillanman kausaricherqa, uj joventataj wañupusqan diallatajsina kausaricherqa (Luc. 7:11-15; 8:49-55). Jinapis Lázaro wañupusqanqa tawa diasña kasharqa, asnasharqañatajchá. Ajinata, ¿Jesús kausarichiyta atinmanchu karqa?

13. Juan 11:32-35 nisqanman jina, ¿imatá Jesús ruwarqa Mariata, wajkunatawan waqajta rikuspa? (Dibujotawan qhawariy).

¹³ (Juan 11:32-35 leey). Chaypipis kashasunman jina piensarina. Lazaroj hermanan Mariañataj, Marta jinallataj Jesusman qayllaykuspa nerqa: “Señor, kaypichus kawaj karqa chayqa, hermanoyqa mana wañupunmanchu karqa”, nispa. Paypis acompañashajkunapis mayta waqasharqanku. Paykunata chay jinata waqajta rikuspataj, Jesusqa sonqonta mayta nanachikorqa. Amigosninta mayta khuyakusqanrayku paypis waqarikullarqataj. Payqa maytachá munarqa chay llakiyninkuta chinkachiyta, porque payqa yachan pininchejpis wañupojtin jatun llakiypipuni rikhurisqanchejta.

14. ¿Imatá Jehovamanta yachachiwanchej Jesús waqarikusqan?

¹⁴ Jesusqa Mariata waqashajta rikuspa paypis waqarikullarqataj. Chaytaj yachachiwanchej Jehová Diosninchejqa jatun khuyakuyniyoj kasqanta. ¿Imaraykú chayta ninchej? Ñaupaj yachaqanapi yachakorqanchej jina, Jesusqa Tatan jinallataj wajkunapaj sonqoyoj, pay jinataj yuyan (Juan 12:45). Jesús amigosnin llakisqa kashasqankuta rikuspa waqarikusqanmanta leespaqa, yachanchej Jehovapis waqajta rikuwajtinchej mayta sonqonta nanachikusqanta (Sal. 56:8). ¿Nichu chayta yachay munakuyniyoj Diosninchejman astawan qayllaykuchiwanchej?

15. Juan 11:41-44 nisqanman jina, ¿imatataj Jesús tʼukunapaj jina ruwarqa? (Dibujotawan qhawariy).

¹⁵ (Juan 11:41-44 leey). Jesusqa Lazaroj sepulturanman chayaspa, atiykusqa kasharqa chay rumita tanqarpanankuta nerqa. Jinapis Martaqa Jesusta nerqa: “Asnashanñachari”, nispa. Jesustaj kuticherqa: “¿Manachu nerqayki creenkichus chayqa Diospa jatun kayninta rikunaykita?”, nispa (Juan 11:39, 40). Chaymantataj Jesusqa cielota qhawarispa tukuypa ñaupaqenkupi Tatanmanta mañakorqa. Chaytaqa ruwarqa Jehovata jatunchayta munasqanrayku. Mañakuytawantaj jatunmanta qhaparerqa: “¡Lázaro! ¡Llojsimuy!”, nispa. Lazarotaj sepulturanmanta llojsimorqa. Nichá pipis creerqachu  Jesús payta kausarichimuyta atinanta tawa diaña wañusqa kasqanrayku, Jesustaj payta kausarichimorqapuni (castellanopi estudianapaj Bibliapi Juan 11:17 versiculoj sutʼinchayninta qhawariy).

16. ¿Imaynatataj Juan 11 capitulota ukhunchariy yanapawanchej kausarimuy kananpi astawan atienekunapaj?

¹⁶ Juan 11 capitulota ukhunchareyqa yanapawanchej kausarimuy kananpi astawan atienekunapaj. Yuyarikuna imatachus Jesús Martaman nisqanta. Pay nerqa: “Hermanoykeqa kausarinponqa”, nispa (Juan 11:23). Jesusqa Tatan jinallataj wañusqasta kausarichimuyta munashan, chayta ruwananpajtaj atiyniyoj. Waqarikusqanpi sutʼita reparanchej wañuyta tukuy sonqo chinkarparichiyta munashasqanta, pininchejpis wañupusqanmanta llakikusqanchejtapis. Jesusqa Lazarota kausarichimuspa sutʼita rikuchillarqataj wañusqasta kausarichimunanpaj atiyniyoj kasqanta. Chantapis yuyarikuna imatachus Jesús Martata nisqanta: “¿Manachu nerqayki creenkichus chayqa Diospa jatun kayninta rikunaykita?”, nispa (Juan 11:40). Chay tukuy imasrayku creenchej, Diosqa wañusqasta kausarichimunanta nisqanta juntʼanantapuni. Jinapis, ¿imatá ruwasunman kausarimuy kananmanta ni tumpitata iskayrayanapaj?

17. Kausarimojkunamanta Bibliapi leeshaspa, ¿imatá ruwananchej kanman?

¹⁷ Ñaupa tiempopi kausarimojkunamanta leerina, chaypitaj tʼukurina. Bibliaqa kay jallpʼapi pusaj runas kausarichisqa kasqankumanta willawanchej. c Allin kanman chaykunata ujmanta uj sumajta ukhuncharinanchej. Estudiashaspataj yuyarikuna chay runasqa kasqankutapuni. Wakin karqanku qharis, wakin warmis, wakintaj wawas. Reparana imastachus paykunamanta yachakuyta atisqanchejta. Piensarinataj Diosqa wañusqasta kausarichiyta munasqanpi, chayta ruwananpajtaj atiyniyoj kasqanpi. Astawanqa Jesús kausarichisqa kasqanpi tʼukurina. Jesustaqa kausarimusqantawan ashkha runas rikorqanku. Jesús kausarimusqanqa creeyninchejpaj uj sumaj cimiento jina (1 Cor. 15:3-6, 20-22).

18. Kausarimuymanta parlaj takiykunawan, ¿imaynatá yanapachikusunman? (Sutʼinchaynintawan qhawariy).

¹⁸ Kausarimuymanta parlaj “Diosta alabanapaj takiykunawan” yanapachikuna (Efe. 5:19). d Chay takiykunaqa kausarimuy kananpi creesqanchejta astawan sinchʼiyachin, ni imaynitata iskayrayanapajtaj yanapawanchej. Chayrayku familiapi Diosta yupaychashaspa chay takiykunata uyarina, takirina, letran imatachus yachachiwasqanchejmantataj parlarina. Allin kanman chay takiykunata yuyayninchejpi, sonqonchejpi japʼikunanchej. Ajinamanta wañuy patapi rikhurejtinchejpis chayri uj munasqa familiarninchej wañupojtinpis, Jehovaj espiritonqa yanapawasun chay takiykunata yuyarikunapaj. Chaytaj mayta sonqochawasun, kallpachawasuntaj.

19. Kausarimuymanta, ¿imaspitaj piensarishasunmanña? (“ ¿Imastá tapurisunman?” nisqa recuadrota qhawariy).

¹⁹ Chaypiñapis kashasunman jina yuyana. Jehovaqa paraisopiñapis kashasunman jina yuyayta atinapaj ruwawarqanchej. Uj hermana nin: “Paraisopiñapis kashayman jina ashkhata yuyasqayrayku, tʼikitaspa qʼapayninta sienteshaymanñapis jina kani”, nispa. May sumajchá kanqa ñaupa tiempomanta Diospa kamachisninta rejseyqa. ¿Mayqentataj astawan rejsiyta munawaj? ¿Imatá tapuriwaj? Tʼukurinallataj imayna sumajchus kanqa wañupoj familiaresninchejwan tinkukapunanchej. Piensarina imatachus ñaupajta ninanchejpi, abrazaykunanchejpi, watejmanta rikukapuspataj mayta kusikunanchejpi.

20. ¿Imatataj ruwanallanchejpuni tiyan?

²⁰ Maytapuni Jehovaman agradecekunchej kausarimuy kananta niwasqanchejmanta. Yachanchej chayta ruwanantapuni. Imaraykuchus payqa wañusqasta kausarichiytapuni munan, chayta ruwananpajtaj atiyniyoj. Payqa kaytapis sapa ujninchejta nishawasunman jina: “Munasqa familiaresniykeqa kausarinponqanku”, nispa. Diosninchej kausarimuy kananta niwasqanchejpi creesqanchejta sinchʼiyachinallapuni. Chayta ruwasun chayqa, Jehová Diosninchejman sapa kuti astawan qayllaykusun.