1. ¿Imatá sutʼita yachanchej?

 DIOSPA kamachisnenqa yachanchej pay munakuwasqanchejta, allinninchejtapunitaj munasqanta (Rom. 8:35-39). Yachallanchejtaj Bibliaj yuyaychaykunasninta kasukoyqa allinninchejpajpuni kasqanta (Isa. 48:17, 18). Jinapis, ¿imatá ruwasunman kaymanta jinalla uj llakiypi rikhurejtinchej?

2. ¿Ima llakiykunapitaj rikukusunman, ajinapi rikukuspa imastá tapukusunman?

² Jehovaj kamachisninmanqa ima llakiypis chayamuwanchejpuni. Ichapis uj familiarninchej imata nispa chayri imata ruwaspa, sonqonchejta nanachiwasunman. Ichapis onqosqa kasqanchejrayku manaña anchata Jehovapaj llankʼayta atisunmanchu. Ichapis uj desastre natural kasqanrayku llakiypi rikhurinchej. Chayri ichapis creenciasninchejrayku qhatiykachasqas kanchej. Chay jina llakiykunapi rikukuspa ichapis tapukunchej: “¿Imajtintaj noqatapuni kay pasashawanri? ¿Imapichu pantani? ¿Niñachu Jehová bendecishawanman?”, nispa. Maykʼajllapis ajinata yuyarqanki chayqa ama llakikuychu. Diospa kamachisninmanta ashkhas ajinallapitaj rikukorqanku (Sal. 22:1, 2; Hab. 1:2, 3).

3. ¿Imatá yachakunchej Salmo 34:19 nisqanmanta?

³ (Salmo 34:19 leey). Kay versiculoqa kay iskay imasta niwanchej. 1) Cheqan runataqa imaymana llakiykuna qhatirisqanta.  2) Jehová Diostajrí chay tukuy llakiykunamanta librasqanta. ¿Imaynatá Jehová librawanchej? Payqa yanapawanchej kay tiempopi kausaymanta maychus kajllata yuyanapaj. Jehovaqa niwanchej payta sirvikuspa kusisqa kausakunata. Jinapis kay tiempopeqa llakiykuna kapuwasunpuni (Isa. 66:14). Payqa munan wiñay kausaypi yuyayninchej kananta, chay kausayta qoyta munawasqanchejrayku (2 Cor. 4:16-18). Chay pʼunchay chayamunankamataj payta sirvinallapajpuni sapa día yanapawanchej (Lam. 3:22-24).

4. ¿Imastá kay yachaqanapi yachakusun?

⁴ Kay yachaqanapi yachakusun Jehovaj ñaupa tiempo kamachisninmanta, kay tiempo kamachisninmantapis. Yachakusun jina, ichapis mana yuyasqanchej llakiykunapi rikhurisunman. Jinapis Jehovapi atienekusun chayqa, payqa ni jaykʼaj urmajta saqewasunchu (Sal. 55:22). Jehovaj sapa uj kamachinmanta yachakushaspaqa, kayta tapurikuna: “Ajina llakiypi rikukuspa, ¿imatá noqa ruwayman karqa? ¿Imaynatá paypa kausaynin yanapawan Jehovapi astawan atienekunaypaj? ¿Imastá paymanta yachakuyman?”, nispa.

5. ¿Imastataj Labán Jacobta ruwarqa? (Tapapi kaj dibujota qhawariy).

⁵ Ñaupa tiempomanta Jehovaj kamachisnenqa mana yuyasqanku llakiykunapi rikhurerqanku. Ujnenqa karqa Jacob. Tatanqa nerqa tion Labanpa ujnin wawanwan casarakamunanta, chay tionqa Jehovata yupaychallajtaj. Chantapis nillarqataj Jehová ashkha bendicionesta qonanta (Gén. 28:1-4). Jacobqa kasukuspa allin kajta ruwarqa. Payqa Canaanman riporqa, viajarqataj tion Labán tiyakorqa chaykama. Labanpataqa iskay warmi wawasnin tiyaporqa, ujnin Lea sutikorqa, ujnintaj Raquel. Jacobqa sullkʼa kajta munakuyta qallarerqa, Raquelta. Paywan casarakunanraykutaj Labanpaj qanchis watasta trabajapunanta nerqa (Gén. 29:18). Jinapis mana yuyasqanman jinachu karqa. Labanqa Jacobta engañaykuspa kuraj wawan Leata warmin kananpaj qorqa. Semananmantaj wawan Raquelwanñataj casaracherqa. Chayrayku Jacobqa qanchis watastawanraj paypaj trabajanan karqa (Gén. 29:25-27). Labanqa mana chayllatachu Jacobta ruwarqa. Payqa 20 watastapuni mana allinta pagaspa Jacobta trabajacherqa (Gén. 31:41, 42).

6. ¿Ima llakiykunapiwantaj Jacobta qhatirerqa?

⁶ Jacobtaqa waj llakiykunapis qhatirillarqataj. Familianqa jatun karqa, wawasnintaj mana paykunapura allintachu apanakoj kanku. Uj pacha paykunaqa hermanonku Joseta esclavota jina vendeykorqanku. Waj kutipitaj, Jacobpa wawasnin Simeonwan Leviwanqa familianta, Jehovaj sutintapis pisipaj qhawacherqanku. Chantapis munasqa warmin Raquelqa iskay kaj wawitanta nacechikushaspa wañuporqa. Machituña kashaspataj Jacobqa, unayta yarqhay kasqanrayku Egiptoman tiyakoj riporqa (Gén. 34:30; 35:16-19; 37:28; 45:9-11, 28).

7. ¿Imaynatá Jehová Jacobman rikucherqa paywan kashasqanta?

⁷ Jacobqa ajina llakiykunapi rikukuspapis Jehovapi, nisqasninpipis creellarqapuni. Jehovataj paywanpuni kashasqanta sutʼita rikucherqa. ¿Imaynamanta? Labán engañajtinpis, Jacobqa ashkha imasniyoj karqa Jehová bendecisqanrayku. Chantapis wawan Josewan ashkha watasmanta watejmanta tinkukapuspa maytachá Diosman agradecekorqa, payqa yuyarqa chay wawan wañupusqantaña. Jacobqa tukuy chay llakiykunata aguantarqa  Jehová sumaj amigon kasqanrayku (Gén. 30:43; 32:9, 10; 46:28-30). Noqanchejpatapis Jehová sumaj amigonchej kanqa chayqa, mana yuyasqanchej llakiykuna chamuwajtinchej aguantayta atillasun.

8. ¿Imatá rey David ruwayta munarqa?

⁸ Rey Davidqa mana tukuy munasqantapunichu Jehová Diospaj ruwapuyta aterqa. Payqa mayta munarqa Diosninpaj templota ruwapuyta. Chayta ruwayta munasqanta profeta Natanman willajtintaj, pay nerqa: “Ruwallay imatachus sonqoyki munasqanta, cheqa Diosqa qanwan kashan”, nispa (1 Cró. 17:1, 2). Davidqa may kusisqachá kasharqa Natán chayta nejtin. Ichapis chay ratopacha wakichikuyta qallarerqa chay wasita ruwananpaj.

9. ¿Imatá David ruwarqa mana paychu Diospa templonta ruwananta yachaspa?

⁹ Chay chʼisipacha Jehovaqa profeta Natanman nerqa mana Davidchu templota ruwapunanta, manaqa ujnin wawan. Natantaj chay mana allin willayta Davidman willamorqa (1 Cró. 17:3, 4, 11, 12). Chayta uyarispa, ¿David phiñakorqachu? Mana. Astawanqa wawan Salomón chay wasita ruwananpaj tukuy imata alistarqa: qolqeta, materialestapis (1 Cró. 29:1-5).

10. ¿Imaynatá Jehová Davidta bendicerqa?

¹⁰ Jehovaqa Davidwan uj tratota ruwarqa mana paychu templota ruwapunanta nisqantawanpacha. Payqa nerqa mirayninmanta ujnin wiñaypaj kamachinanta (2 Sam. 7:16). Paraisopi Cristo waranqa watasta kamachishajtin, Davidqa maytachá kusikonqa Jesucristo paypa mirayninmanta kasqanta yachaspa. Davidpa kausayninmanta yachakunchej Jehovapaj mana tukuy munasqanchejtapunichu ruwayta atejtinchejpis, Diosninchejqa mana suyasqanchej bendicionesta qonawanchejta.

11. ¿Imatá repararqanku ñaupa tiempomanta cristianos suyakusqanku manaraj juntʼakojtinpis? (Hechos 6:7).

¹¹ Ñaupa tiempomanta cristianosqa mana suyasqallanku llakiykunapi rikukorqanku. Paykunaqa mayta suyakusharqanku Diospa Gobiernon sayarichisqallaña kananta, jinapis mana yacharqankuchu maykʼajchus chay kananta (Hech. 1:6, 7). ¿Chaykama imatá ruwarqanku? Siga predicashallarqankupuni. Tukuynejman sumaj willaykuna chayashasqanta yachaspataj, repararqanku Jehová paykunata bendecishasqanta (Hechos 6:7 leey).

12. ¿Imatá ñaupa tiempomanta cristianos ruwarqanku yarqhay tiempopi?

¹² Ñaupa cristianospa tiemponkupeqa “manchay yarqhay jallpʼantinpi” karqa (Hech. 11:28). Chayrayku cristianospis pisichikorqanku. Tatamamasqa maytachá llakikorqanku imaynatachus familiankuta mantienenankumanta. Jovenestaj ichapis Jehovapaj astawan llankʼayta munarqanku, jinapis ichá yuyarqanku niña chayta ruwayta atinankuta. Ima llakiypi rikukuspapis cristianosqa sigue kallpachakullarqankupuni predicanankupaj, Judeamanta hermanosninkutapis kapuyninkuwan tukuy sonqo yanaparerqanku (Hech. 11:29, 30).

13. ¿Ima bendicionestataj cristianos japʼerqanku yarqhay tiempopi kashajtinku?

¹³ Chay llakiy tiempopi rikukoj cristianos, ¿ima bendicionestataj japʼerqanku? Yanapata japʼej cristianosqa ñawisninkuwanpuni rikorqanku Jehová paykunata cuidashasqanta (Mat. 6:31-33). Chantapis astawanchá munakorqanku yanapata apachimoj hermanosta. Yanapata apachimojkunataj, waj jinasmanta yanapakojkunapis maytachá kusikorqanku (Hech. 20:35). Jehovaqa tukuyninkuta bendicerqa ajina llakiypi rikukuspapis ñaupajllamanpuni risqankurayku.

14. ¿Imataj pasarqa Bernabeta, apóstol Pablotawan, chanta imataj chayrayku karqa? (Hechos 14:21, 22).

¹⁴ Ñaupa tiempomanta cristianosqa ashkha kutispi qhatiykachasqa karqanku, wakin kutispeqa mana suyashajtillanku. Qhawarina imachus Bernabeta, apóstol Pablotawan pasasqanta Listrapi predicashajtinku. Qallariypi runasqa tukuy sonqo paykunata japʼikorqanku, uyarerqankutaj. Jinapis qhepaman wakin enemigosqa runasta yachaykucherqanku paykunaj contranta oqharikunankupaj. Chay runasmanta wakintaj Pablota rumiswan chʼanqaykorqanku, yuyarqankutaj wañuchisqankuta (Hech. 14:19). Jinapis Bernabewan Pablowanqa waj ladoman ripuspa sigue predicasharqanku. Chayta ruwasqankuwantaj ‘ashkha runasta yanaparqanku creejkunaman tukunankupaj’. Hermanosninkutapis nisqankuwan ruwasqankuwan kallpacharqanku (Hechos 14:21, 22 leey). Bernabewan Pablowanqa qhatiykachasqa kaspapis mana saykʼuporqankuchu, chay ruwasqankutaj ashkha runasta yanaparqa. Sichus noqanchejpis mana saykʼupusunchu, Jehovaj kamachiwasqanchejtataj ruwallasunpuni chayqa, ashkha bendicionesta japʼisun.

15. ¿Imatá yachakunki hermano Alexander Macmillanmanta?

¹⁵ 1914 wata ñaupajta Jehovaj kamachisnenqa wakin imas pasananta mayta suyakusharqanku. Paykunamanta ujnenqa hermano Alexander Macmillan karqa. Payqa wajkuna jinallataj yuyarqa pisimantawan cieloman ripunanta. Chayrayku septiembre de 1914 watapi uj discursota qoshaspa nerqa: “Ichapis kayqa último discursoy kanqa”, nispa. Jinapis mana ajinachu karqa. Aswan qhepaman qhelqarqa: “Wakenqa anchatañatajsina apuraykukusharqayku cieloman chay rato ripunaykuta yuyaspa”, nispa. Chantá nillarqataj: “Chayta yuyanaykumantaqa Señorpa kamachisqanta ruwanallaykupuni karqa”, nispa. Chaytapunitaj ruwarqa. Payqa sonqo kʼajaywan predicallarqapuni, ashkha hermanostataj kallpacharqa, pikunachus guerraman mana risqankurayku carcelpi kasharqanku chaykunata. Reunionesmantaj mayorcituña kaspapis rillarqapuni. Hermanoqa tʼinkanta japʼinankama tiemponta sumajta aprovecharqa. ¿Imaynatá chay yanaparqa? Payqa niraj wañupushaspa 1966 watapi qhelqarqa: “Creeyneyqa ñaupajta jina sinchʼillapuni kashan”, nispa. Kausaynenqa tukuyta yanapawanchej, astawanraj unaytaña kay sajra mundopi aguantashanchej chayqa (Heb. 13:7).

16. ¿Ima llakiypitaj rikhurerqanku hermano Jenningswan señoranwan? (Santiago 4:14).

¹⁶ Jehovaj ashkha kamachisnenqa mana suyashajtillanku onqoykunku. Hermano Herbert Jennings kausayninmanta willarishaspa nerqa, paywan señoranwanqa misioneros jina Ghanapi may kusisqas sirvishasqankuta. b Tiemponmantaj doctoresqa umanmanta mal kashasqanta nisqanku. Hermano Jenningsqa nerqa kausayninwanqa Santiago 4:14 (leey) nisqanman jinapuni kasqanta. Chaypi nin: “Manataj yachankichejchu imachus kausayniykichejwan qʼaya kananta”, nispa. Pay qhelqarqa: “Repararqayku kausayniyku cambiasqanta. Chayrayku Ghanamanta ripunayku karqa, ashkha sumaj amigosniykumantataj despedikorqayku. Chantá Canadaman kutimporqayku [tratamientota ruwanaypaj]”. Jehovaqa hermano Jenningsta señorantawan yanaparqa ajina llakiypi kajtinkupis payta sirvinallankupajpuni.

17. ¿Imaynatá hermano Jenningspa kausaynin wajkunata yanaparqa?

 ¹⁷ Hermano Jennings kausayninmanta parlarishaspa imaspichus rikukusqanta sutʼita willarisqanqa, wajkunata mayta yanaparqa. Uj hermana nerqa: “Ni jaykʼaj uj yachaqanata leesqay chay jinatapuni sonqoyta kuyuricherqachu. Hermano Jennings tratamientota ruwananpaj misionero kayta saqepusqanta yachayqa, mana anchata llakikunaypaj yanapawarqa, maychus kajllatataj yuyanaypaj”, nispa. Waj hermanotaj qhelqarqa: “Chunka wata kurajtaña anciano kashaspa umaymanta mal kasqayrayku anciano kayta saqeporqani. Ni imapaj sirvisqayta yuyasqayrayku, hermanospa experienciasninkumanta leerispa astawan llakikullaj kani. Jinapis hermano Jennings imaynatachus aguantasqanta yachayqa mayta kallpachawarqa”, nispa. Noqanchejpis kaymanta jinalla ima llakiy chayamuwasqanchejta aguantasun chayqa, wajkunata kallpachasun. Mana yuyasqanchejman jina kausayninchej kajtinpis, sinchʼi creeyniyoj kasqanchejwan aguantasqanchejwan ima wajkunata yanapayta atisunman (1 Ped. 5:9).

18. ¿Imatataj uj viuda hermanamanta yachakunchej? (Fotosta qhawariy).

¹⁸ Coronavirus onqoy kasqanrayku, ashkha hermanos llakiypi rikukorqanku. Nigeria suyumanta uj viuda hermanajta mikhunan, qolqesitunpis may pisisitullaña tiyaporqa. Uj paqarenqa uj vaso arrozllaña tiyaporqa. Imillitantaj taporqa: “¿Imatá chanta mikhusun mamáy?”, nispa. Hermanataj nerqa manaña ni qolqenku, ni mikhunankupis kapusqanta, Sareptamanta viuda jinataj ruwanankuta, último kapusqankuta waykʼuykuspa Jehovapi atienekunankuta (1 Rey. 17:8-16). Chay día imatachus almuerzanankupi niraj piensarishajtinku, hermanosqa mikhunankupaj ashkha imitasta apaporqanku. Apapusqankutaj iskay semana kurajpaj jinapuni kasqa. Hermanaqa chaypi repararqa imatachus imillitanman nisqanta Jehová sumajta uyarisqanta. Sutʼita reparanchej mana yuyashajtillanchej ima llakiypis kajtin, Jehovapi atienekusun  chayqa, payman astawan qayllaykusun (1 Ped. 5:6, 7).

19. ¿Ima llakiypitaj hermano Alexéi Yershov rikukorqa?

¹⁹ Kay qhepa wataspi, ashkha hermanos mana yuyasqallamanta qhatiykachasqa kashanku. Rusiapi tiyakoj hermanonchej Alexéi Yershovmanta parlarina. 1994 watapi pay bautizakushajtin, chay lugarmanta Jehovaj testigosnenqa mana ancha qhatiykachasqachu kasharqanku. Jinapis aswan qhepamanqa manaña ajinachu Rusiapi karqa. 2020 watapi hermano Yershovpa wasinman policías yaykuykorqanku, tukuy imanta qhawarqanku, ashkha imasnintataj apakaporqanku. Killasninmantaj autoridadesqa ashkha imasmanta payta juchacharqanku. Ajinata juchacharqanku wakin videospi imatachus rikusqankuman jina. Chay videostaqa uj runa grabasqa, payqa uj watatapuni Bibliamanta yachakuyta munaspa pasachikusqa. Chayqa may llakiypuni karqa.

20. ¿Imatá hermano Yershov ruwan Jehovaman astawan qayllaykunanpaj?

²⁰ Hermano Yershovqa qhatiykachasqa kasqanrayku Jehovaman astawan qayllaykorqa. Pay nin: “Kunanqa señoraywan aswan kʼiskita orakuyku. Mana Jehovaj yanapanwanqa mana aguantayta atiymanchu”, nispa. Pay nillanpuni: “Bibliata estudiayqa llakiyniywan mana atipachikunaypaj yanapawan. Ñaupa tiempomanta Jehovaj kamachisninpi tʼukurini. Ashkhasmanta yachakuni may importante kasqanta sonqo tiyasqalla kay, Jehovapitaj atienekuy”, nispa.

21. ¿Imatá kay yachaqanapi yachakunchej?

²¹ ¿Imatá kay yachaqanapi yachakunchej? Kay mundopi kausakushajtinchejqa mana yachanchejchu imachus pasanawanchejta. Jinapis Jehovapi atienekusun chayqa, payqa yanapawasunpuni. Kay yachaqanapaj textopi nin jina, “cheqan runataqa imaymana llakiykuna qhatirin. Jehová Diostajrí chay tukuy llakiykunamanta libran” (Sal. 34:19). Chayrayku ama llakiykunasnillanchejpi yuyanachu, astawanqa Jehová atiyninwan yanapanawanchejpi yuyana. Ajinamanta apóstol Pablo jina nisun: “Tukuy imapaj kallpayoj kani, Dios atiyta qowasqanrayku”, nispa (Fili. 4:13).