1. ¿Maykʼajtaj Jesús ñaupaj kaj milagronta ruwarqa?

 JESUSQA 29 watapi predicayta qallarerqa. Chaypachas paywan, maman Mariawan, wakin discipulosninwan ima uj casamientoman rerqanku. Chay casamientoqa Caná llajtapi karqa, Nazaretpa norte ladonpi, maypichus pay wiñakorqa chaypi. Mariaqa noviospa familianpata amiganku karqa, chayrayku invitadosta atiendeypisina yanapakusharqa. Jinallapi vino tukukaporqa, chaywantaj noviospis familiasninkupis may pʼenqaypi rikhurinkuman karqa. b Ichapis chay casamientomanqa ashkha runas riykorqanku. Mariataj usqhayllata wawan Jesusta nimorqa: “Manaña vinonku kanchu”, nispa (Juan 2:1-3). Jesustaj tʼukunapaj jina yakuta ‘sumaj vinoman’ tukucherqa (Juan 2:9, 10).

2, 3. 1) ¿Imaynatá Jesús atiyninwan runasta yanaparqa? 2) ¿Imajtintaj Jesuspa milagrosninta sumajta ukhuncharina tiyan?

² Jesusqa willayta qallarisqanmantapacha ashkha milagrosta ruwarqa. c Payqa atiyninwan may chhika runasta yanaparqa. Uj pacha 5.000 qharista mikhucherqa, waj kutipitaj 4.000 qharista. Chay iskay milagrosnillanpi 27.000 runasmanta astawansina mikhucherqa, warmistawan wawastawan yupaspa (Mat. 14:15-21; 15:32-38). Chay iskaynin kutispi Jesusqa onqosqastapis sanoyachillarqataj (Mat. 14:14; 15:30, 31). Tukuy  chay runasqa Jesús milagronejta paykunata mikhuchisqanmanta, onqosqastapis sanoyachisqanmanta maytachá tʼukorqanku.

³ Jesuspa milagrosninmantaqa mayta yachakusunman. Kay yachaqanapeqa chay milagrosmanta wakin imasta yachakusun, chaytaj creeyninchejta sinchʼiyachenqa. Yachakullasuntaj imaynatachus Jesús jina kʼumuykukoj sonqo kanata, khuyakuyniyoj kanatapis. Payqa milagrosninta ruwashaspa chay kʼacha kaykunata rikucherqa.

4. Jesuspa milagrosninta ukhuncharispa, ¿pikunamantataj yachakusunman?

⁴ Jesuspa milagrosnenqa mana payllamantachu ashkha imasta yachachiwanchej, manaqa Tatanmantapis. Milagrostaqa Jehová atiyta qosqanwan ruwarqa. Hechos 10:38 Jesusmanta nin: “Paytaqa Dios espíritu santowan ajllarqa, atiytataj qorqa. Ajinamanta Jesusqa tukuynejta purerqa allin kajta ruwaspa, sanoyachispataj Diabloj atiyninpi tukuy ñakʼarejkunata, Dios paywan kasqanrayku”, nispa. Chantapis Jesusqa Tatan jinapuni runaspaj sonqoyoj karqa, pay jinataj piensarqa. Chaytaj sutʼi rikukorqa imatachus parlasqanpi, imatachus ruwasqanpi, milagrosta ruwasqanpipis (Juan 14:9). Kay yachaqanapi Jesuspa milagrosninmanta kinsa imasta yachakusun, chaytaj creeyninchejta sinchʼiyachenqa.

5. ¿Imaraykutaj Jesús milagrosta ruwarqa? (Mateo 20:30-34).

⁵ Ñaupaj kaj, Jesuswan Tatanwanqa maytapuni munakuwanchej. Jesusqa kay jallpʼapi kashaspa, runasta maytapuni munakusqanrayku llakiypi kajkunata yanapananpaj atiyninwan milagrosta ruwarqa. Uj kutipi, iskay cieguitos Jesusmanta qhaparispa yanapata mañakorqanku (Mateo 20:30-34 leey). Bibliataj nin Jesusqa “mayta khuyakuspa” ñawisninkuta llankharispa sanoyachisqanta. Griego parlaypi ‘mayta khuyakuy’ nisqanqa uj runaj sonqon mayta nanasqanta, cuerpontaj chay nanayta sientesqanta niyta munan. Jesús paykunata chay jinatapuni khuyakusqanqa, runasta mayta munakusqanta rikuchin. Chayrayku yarqhachikojkunata mikhucherqa, uj lepra onqoyniyoj runatataj sanoyacherqa (Mat. 15:32; Mar. 1:41). Chaytaj sutʼita reparachiwanchej ‘jatun khuyakuyniyoj’ Jehová Diosninchejpis, Wawanpis maytapuni munakuwasqanchejta, sufrejtinchejtaj sonqonku mayta nanasqanta (Luc. 1:78; 1 Ped. 5:7). Paykunaqa maytapuni munashanku runaspa tukuy llakiyninkuta chinkachiyta.

6. ¿Imasta ruwananpajtaj Jesusman Dios atiyta qon?

⁶ Iskay kaj, Diosqa Jesusman atiyta qon runaspa tukuy llakiyninkuta chinkachinanpaj. Noqanchejqa wakin llakiykunata ni jaykʼaj chinkachiyta atisunmanchu. Jesustajrí milagrosta ruwasqanwan rikucherqa chinkachiyta atisqanta. Runaspa tukuy llakiyninkoqa jucharayku tiyan, Jesustaj atiyniyoj juchata chinkachinanpaj, jucharayku imaschus kasqantapis, nisunman onqoykunata, wañuytapis (Mat. 9:1-6; Rom. 5:12, 18, 19). Milagrosta ruwasqanqa sutʼita rikuchiwanchej “tukuy laya onqoyniyoj runasta” sanoyachiyta atisqanta, wañusqastapis kausarichimuyta atisqanta (Mat. 4:23; Juan 11:43, 44). Payqa atiynillayojtaj sinchʼi loco wayrasta thañichinanpaj, supaykunatapis qharqonanpaj (Mar. 4:37-39; Luc. 8:2). Jehová chay jina atiyta Wawanman qosqanta yachayqa, maytapuni sonqochawanchej.

7, 8. 1) Jesuspa milagrosninta ukhuncharispa, ¿imamantataj mana iskayrayanchejchu? 2) ¿Ima milagrotataj astawan suyakushanki?

⁷ Kinsa kaj, Diospa Gobiernon bendicionesta apamunanmanta mana iskayrayanchejchu.  Jesús kay jallpʼapi kashaspa ima milagrostachus ruwasqanqa uj mashkhitalla karqa. Diospa Gobiernonpi Rey kashaspaqa may chhika milagrostaraj ruwanqa. Cristo kay jallpʼata gobernamushajtin kausayqa may sumajpuni kanqa. Tumpamantawan payqa tukuy onqoykunata, tukuy nanaykunata chinkachenqa, tukuypis sanitos kasunchej (Isa. 33:24; 35:5, 6; Apo. 21:3, 4). Niña jaykʼajpis yarqhaymanta wañusunchu, nitaj sufrisunchu desastres naturales kasqanrayku (Isa. 25:6; Mar. 4:41). Chantapis maytapuni kusikusun wañupoj familiaresninchejwan watejmanta tinkukapuspa (Juan 5:28, 29). Paraisopi tʼukurispa, ¿ima milagro kanantataj astawan suyakushanki?

⁸ Jesusqa milagrosta ruwashaspa kʼumuykukoj sonqo kasqanta, wajkunatataj khuyakusqanta rikucherqa. Chaytataj noqanchejpis rikuchinallanchejtaj tiyan. Iskay milagrosninmanta parlarina, ñaupajtaqa casamientopi milagrota ruwasqanmanta.

9. ¿Imaraykutaj Jesús uj casamientopi milagrota ruwarqa? (Juan 2:6-10).

⁹ (Juan 2:6-10 leey). Casamientopi vino tukukapojtin, ¿Jesús imatapis ruwananpunichu karqa? Mana. Mana ima profeciapipis nerqachu Mesías milagronejta yakuta vinoman tukuchinanta. Jinapis kaypi piensarina. ¿Imaynataj sonqonchej kashanman casarakushajtinchej vino tukukapojtin? Jesusqa ichapis piensarerqa casarakojkunaj familianku, astawanraj novios jatun pʼenqaypi rikhurinankupi, paykunamanta khuyakuspataj yanapariyta munarqa. Chayrayku milagrota ruwaspa  390 litros yakuta sumaj vinoman tukucherqa. Chanta, ¿imajtintaj chay chhika yakuta vinoman tukuchinman karqa? Casarakojkunaqa puchoj vinota ichapis waj kutipaj jallchʼakunkuman karqa chayri vendenkuman karqa qolqesitunku kananpaj. Chayrayku maytachá Jesusta agradecekorqanku.

10. ¿Imastataj Juan capítulo 2 chay milagromanta willawanchej? (Dibujotawan qhawariy).

¹⁰ Chay milagromanta Juan capítulo 2 imastachus nisqanta qhawarina. ¿Pitaj pʼuñusman yakuta juntʼaracherqa? Mana Jesuschu. Payqa mana munarqachu chay milagrota ruwashasqanta runas yachanankuta. Chayrayku kamachista juntʼarachinankuta nerqa (versículos 6, 7). Chanta milagrota ruwasqantawan, ¿pitaj casamiento cargoyojman vinota llamiricherqa? Nillataj Jesuschu. Astawanqa kamachista nerqa llamirichimunankuta (versículo 8). Chantá manallataj vinomanta uj copata oqharispa invitadosta nerqachu: “Llamiriychej kay ruwasqay sumaj vinota”, nispa.

11. ¿Imatá yachakunchej Jesús chay milagrota ruwasqanmanta?

¹¹ ¿Imatá yachakunchej Jesús chay milagrota ruwasqanmanta? Kʼumuykukoj sonqo kanata. Jesusqa mana alabakorqachu yakuta vinoman tukuchisqanmanta. Payqa ni jaykʼaj jatunchakojchu imata ruwasqanmantapis. Astawanqa kʼumuykukoj sonqo karqa, tukuy imapi Tatantapuni jatunchaj, paypa atiynillanwantaj imatapis ruwasqanta nej (Juan 5:19, 30; 8:28). Jesús jina kasunchej chayqa kʼumuykukoj sonqo kasun, nitaj jatunchakusunchu imastachus ruwasqanchejmanta. Diosta yupaychaspa imastachus ruwanchej chaykunamantaqa ama jatunchakunachu, astawanqa kʼacha Diosninchejta jatunchana (Jer. 9:23, 24). Paylla jatunchanapaj jinaqa. Mana Jehovaj yanapayninwanqa mana imatapis ruwayta atisunmanchu (1 Cor. 1:26-31).

12. ¿Imaynamantá Jesús jina kʼumuykukoj sonqo kallasunmantaj? Sutʼinchariy.

¹² ¿Imaynamantá Jesús jina kʼumuykukoj sonqo kallasunmantaj? Kaypi tʼukurina: Uj anciano uj joven siervo ministerialta yanapananpaj tiempochakunman ñaupaj kaj discursonta wakichikunanpaj. Ajinata yanapasqanraykutaj chay joven hermanoqa sumajta discursanman, congregacionmanta kajkunataj mayta kusikunkuman. Reunión tukukojtintaj ujnin hermano ancianota ninman: “Kʼachitutapuni hermanitonchej discursonta qon, ¿i?” nispa. ¿Chay anciano ninmanchu “arí, es que noqa yanaparqani á” nispa? Chayrí, ¿kʼumuykukoj sonqowanchu ninman “arí, sumajtapuni discursan” nispa? Kʼumuykukoj sonqo runaqa wajkunata yanapasqanmanta mana jatunchachikunchu. Astawanqa chay ruwasqanta Jehová qhawamushasqanta, jatunpajtaj qhawasqanta yachaspa sonqo juntʼasqa (Mat. 6:2-4; Heb. 13:16, kikinchay). Jehovaqa mayta kusikun Jesús jina kʼumuykukoj sonqo kanapaj kallpachakojtinchej (1 Ped. 5:6).

13. Jesús Naín llajtaman qayllaykushaspa, ¿pikunawán tinkorqa chanta imatá ruwarqa? (Lucas 7:11-15).

¹³ (Lucas 7:11-15 leey). Jesusqa willayta qallarisqanmanta wata khuskanninman jina Naín llajtaman viajarqa. Chay llajtaqa Galileapi karqa, Sunemmanta qayllallapi, maypichus Eliseo chay kutimanta 900 watas ñaupajta uj warmej wawanta kausaricherqa chaypi (2 Rey. 4:32-37). Naín llajtaman qayllaykushaspa Jesusqa wañusqata apashajkunawan tinkorqa. Chayta rikoyqa may llakiypunichá karqa. Uj viudaj kʼata qhari wawan wañupusqa. Chay viudaqa mana sapallanchu kasharqa, llajtamanta ashkha runas acompañamusharqanku. Jesustaj wañusqata apajkunata sayachispa, chay viudaj wawanta kausarichiporqa.  Chaytaj ñaupaj kaj kausarichimusqan karqa, Mateo, Marcos, Lucas, Juan librospi Jesús kinsa runasta kausarichimusqanta nisqanmanta.

14. ¿Imastataj Lucas capítulo 7 Jesús ruwasqanmanta willawanchej? (Dibujotawan qhawariy).

¹⁴ Chay kutipi imaschus pasasqanmanta Lucas capítulo 7 willawanchej. Jesusqa ñaupajta chay viudata ‘rikorqa’, chaymantataj ‘mayta khuyakorqa’ (versículo 13). Ichapis chay viudaqa waqaspa risharqa ayaj ñaupaqenta. Chayta rikuspa Jesusqa mayta sonqonta nanachikorqa. Payqa mana chay viudamanta khuyakullarqachu, manaqa khuyakusqanta ruwasqanwan rikucherqa. Kʼachamantachá “amaña waqaychu” nispa nerqa. Jinapis Jesusqa mana paywan parlallarqachu, manaqa joventa kausarichispa “mamanman qoporqa” (versículos 14, 15).

15. ¿Imatataj yachakunchej Jesús chay milagrota ruwasqanmanta?

¹⁵ ¿Imatá Jesús chay milagrota ruwasqanmanta yachakusunman? Llakisqa kajkunata imaynatachus khuyakunata. Noqanchejqa mana Jesús jina wañusqasta kausarichiyta atinchejchu. Jinapis pinillankupis wañupusqanmanta llakisqa kajkunata khuyakuyta yachakusunman. Ñaupajtaqa sumajta qhawarina tiyan. Chaymantataj paykunata yanaparinapaj, sonqocharinapaj ima, imallatapis nina chayri imitallatapis ruwapuna (Pro. 17:17; 2 Cor. 1:3, 4; 1 Ped. 3:8). d Uj simita nispalla chayri uj imitata ruwapuspalla mayta kallpachasunman, sonqochasunmantaj.

16. ¿Imatá uj experienciamanta yachakunchej? (Fotota qhawariy).

¹⁶ Uj experienciamanta parlarina. Uj mashkha watas ñaupajta, tantakuypi kausarimuymanta takiyta takishajtinku uj hermana waj hermanata waqajta rikusqa. Chay hermanajtaqa niraj unaychu warmi wawitan wañupusqa. Chayrayku waqashasqa. Waqajta rikoj hermanaqa chayta yacharqa, chayrayku usqhayllata ladonman rispa abrazaykorqa, paywan khuskataj takerqa. Aswan qhepaman chay hermanitaqa nerqa: “Chaywan sutʼita repararqani  hermanos, hermanas mayta munakuwasqankuta”, nispa. Chay kutipi may kusisqa kasharqa tantakuyman risqanmanta. Pay nillarqataj: “Yacharqani Tantakuna Wasipi yanaparinawankutapuni”, nispa. Jehová Diosqa pinillankupis wañupusqanmanta ‘llakisqa kajkunata’ khuyakusqanchejta qhawamushan, may jatunpajtaj qhawan, juchʼuy imitasllata ruwapojtinchejpis (Sal. 34:18).

17. ¿Imastá kay yachaqanapi yachakunchej?

¹⁷ Jesuspa milagrosninta estudiayqa creeyninchejta mayta sinchʼiyachin. Mateo, Marcos, Lucas, Juan librospi Jesuspa milagrosninmanta parlasqanqa, kay imasta sutʼita rikuchiwanchej: Jehovawan Jesuswan maytapuni munakuwasqanchejta, Jesusqa runaspa tukuy llakiyninkuta chinkachinanpaj atiyniyoj kasqanta, tumpamantawantaj Diospa Gobiernon may sumaj bendicionesta apamunanta. Chantapis milagrosninmanta estudiaspaqa, piensarisunman imaynatachus Jesús jina kʼacha kaykunasniyoj kanata. Allin kanman kayta ruwananchej: Familiapi Diosta Yupaychanapaj tantakuyta ruwashaspa chayri sapallanchejpi Bibliata estudiashaspa, Jesuspa waj milagrosninmantawan estudiasunman. Estudiashaspaqa piensarina imatachus chaymanta yachakunanchejpi, wajkunamantaj cuentarina. Ajinamanta wajkunawan parlarikuspaqa sumajta kallpachanakusun (Rom. 1:11, 12).

18. ¿Imatá qhepan yachaqanapi yachakusun?

¹⁸ Jesusqa kay jallpʼapi willayta tukuchashaspaña uj wañusqata kausarichimorqa. Chaytaj Biblia nisqanman jinaqa último kausarichimusqan karqa. Kay kausarichimusqantaj ñaupaj kutispi iskay kutitaña kausarichimusqanmanta uj jina karqa. Kay kutipeqa uj sumaj amigonta kausarichimorqa, pichus tawa diastaña wañusqa karqa. ¿Imastá chay milagronmanta yachakusunman? ¿Imaynatá kausarimuy kananpi creesqanchejta astawan sinchʼiyachisunman? Chayta qhepan yachaqanapi yachakusun.