1, 2. Paraíso chayamunankama, ¿imatá ruwananchej tiyan?

 JEHOVAQA ninña kay sajra mundota chinkachinanta, uj mosoj jallpʼatataj apamunanta, maypichus cheqan kausaylla kanqa. Chaymantaqa maytapuni Jehovaman agradecekunchej (2 Ped. 3:13). Mana yachanchejchu maykʼajchus paraisota apamunanta, jinapis imastachus kay tiempopi rikusqanchejqa sutʼita reparachiwanchej paraíso kananpaj pisillaña faltasqanta (Mat. 24:32-34, 36; Hech. 1:7).

² Chaykamataj mashkha unayña testigos kaspapis, tukuyninchej Jehová paraisota apamunanta nisqanpi creesqanchejta sinchʼiyachinallanchejpuni tiyan. Imajtinchus creeyninchejqa may sinchʼi kajtinpis pisiyapunman. Apóstol Pablo nerqa pisi creeyniyoj kayqa ‘facilta chʼipaykoj jucha’ kasqanta (Heb. 12:1). Mana ajinapi rikukunapajtaj, imaschus sutʼita rikuchiwanchej Jehová tumpamantawan paraisota apamunanta, chay imaspi sapa kuti tʼukurinanchej tiyan (Heb. 11:1).

3. ¿Imastá kay yachaqanapi yachakusun?

³ Jehová paraisota apamunanta nisqanpi creesqanchejta sinchʼiyachinapaj, kinsa imasta ruwanata kay yachaqanapi yachakusun. 1) Kacharichisqa kasqanchejpi tʼukurina. 2) Jehovaj atiyninpi tʼukurina. 3) Jehovaman qayllaykuchiwanchej chay imasta ruwana. Chantá yachakusun Jehová imatachus Habacucman nisqanqa creeyninchejtapis sinchʼiyachillasqantataj. Jinapis ñaupajtaqa qhawarina Jehová paraisota apamunanta nisqanpi imaraykuchus sinchʼita creena kasqanta.

 ¿IMARAYKUTAJ SINCHʼI CREEYNIYOJ KANANCHEJ TIYAN?

4. ¿Imasta ajllanapajtaj sinchʼi creeyniyoj kananchej tiyan?

⁴ Sapa día imata ruwaytapis ajllanchejpuni, chaypajtaj sinchʼi creeyniyoj kananchej tiyan. Ajllananchej tiyan pikunawanchus masichakunanchejta, imawanchus kusirikunanchejta, imatachus estudiananchejta, piwanchus casarakunanchejta, wawasniyojchus manachus kananchejta, imapichus trabajananchejtapis. Kayta tapurikusunman: “Imastachus ajllasqay, ¿rikuchinchu kay mundoqa uj ratollapaj kasqanta, Jehovataj paraisota tumpamantawan apamunanpi creesqayta? Chayrí, ¿wiñay kausay kananta mana creej runas jinachu imatapis ajllani?”, nispa (Mat. 6:19, 20; Luc. 12:16-21). Paraíso qayllitapiña kashasqanpi astawan creesun chayqa, allinta imatapis ajllayta atisun.

5, 6. ¿Imaraykutaj llakiykunapi kashaspa sinchʼi creeyniyoj kayta necesitanchej? Kikinchariy.

⁵ Llakiykunata aguantanapajpis sinchʼi creeyniyojllataj kananchej tiyan. Ichapis qhatiykachasqas kasunman, sinchʼita onqoykusunman chayri waj llakiykunapi rikukusunman, chaykunataj desanimachiwasunman. Ichapis qallariypeqa yuyasunman chay llakiykunata aguantayta atinallanchejta. Jinapis chay jina llakiykunaqa mana uj ratollapichu chinkapuyta yachan. Chayrayku sinchʼi creeyniyoj kayta necesitanchej chaykunata aguantanapaj, Jehovatataj kusiywan sirvinallapajpuni (Rom. 12:12; 1 Ped. 1:6, 7).

⁶ Uj llakiypi kashaspa ichapis yuyasunman Jehovaqa paraisota ni jaykʼaj apamunanta. Ajinata yuyasqanchejrayku, ¿pisi creeyniyoj kasqanchejtachu nisunman? Ichapis mana ajinapunichu kanman. Kaypi tʼukurina: Manchaytañataj qʼoñimojtin ichapis nisunman: “¿Maykʼajtaj paramonqari? ¿Niñachu paramonqa?”, nispa. Jinapis paray tiempoqa chayamunpuni. Kikillantataj uj llakiyrayku may desanimasqa kaspaqa, ichapis yuyasunman paraíso ni jaykʼaj chayamunanta. Jinapis creeyninchej sinchʼi chayqa, yachanchej Jehová nisqasninta juntʼanantapuni (Sal. 94:3, 14, 15; Heb. 6:17-19). Chaytaj yanapawasun Jehovata yupaychayta kausayninchejpi ñaupajman churanallapajpuni.

7. ¿Ima yuyaywantaj mana chimpaykuchikunanchejchu tiyan?

⁷ Predicanapajpis sinchʼi creeyniyoj kayta necesitallanchejtaj. Diosninchej tumpamantawan uj paraisota apamunanmanta parlarejtinchej, ashkha runasqa mana chay ‘sumaj willaykunata’ creellankuchu, yuyanku uj cuentolla kasqanta (Mat. 24:14; Eze. 33:32). Noqanchejtaj amapuni ajinata yuyasqankuwan chimpaykuchikunachu. Mana chay yuyasqankuwan chimpaykuchikunapajqa creeyninchejta sinchʼiyachinallanchejpuni tiyan. Chaypaj kinsa imasta ruwana kasqanta qhawarina.

KACHARICHISQA KASQANCHEJPI TʼUKURINA

8, 9. Jesús kausayninta qosqanpi tʼukuriy, ¿imaynatá creeyninchejta kallpachan?

⁸ Kacharichisqa kasqanchejpi tʼukurispa, creeyninchejta astawan sinchʼiyachisunman. Jesús wañusqanqa uj garantía jina Diospa nisqasnin juntʼakunanpaj. Allin kanman tʼukurinanchej imaraykuchus Jehová Wawanta kachamusqanpi, imastachus chaypaj ruwasqanpipis. Ajinamanta astawan atienekusun Jehová sumaj kausayta apamunanpi, chaypitaj wiñaypaj kausakuyta atisunchej.

⁹ ¿Imastá Jehová ruwarqa juchamanta kacharichinawanchejpaj? Payqa munasqa kʼata Wawanta, aswan sumaj amigonta cielomantapacha kachamorqa, kay jallpʼapi mana pantaj runa jina nacekunanpaj. Jesustaj kay jallpʼapi kashaspa mayta sufrerqa, ashkha llakiykunapi  rikukorqa, sonqo nanaytataj wañucherqanku. Arí, Jehovaqa rantinawanchejpaj may chhika qolqetapis pagashanman jina karqa. Payqa may munakoj Dios. Chayrayku nichá saqenmanchu karqa Wawan ajinata sufrispa wañunanta, sichus uj tiempollata allinta kausakunanchejta munanman karqa chayqa (Juan 3:16; 1 Ped. 1:18, 19). Jehovaqa munasqa Wawanpa kausayninwan rantiwasqanchejrayku, wiñay kausayta qowasunpuni paraisopi.

JEHOVAJ ATIYNINPI TʼUKURINA

10. Efesios 3:20 nisqanman jina, ¿imatataj Jehová ruwayta atin?

¹⁰ Jehovaj atiyninpi tʼukurispa creeyninchejta sinchʼiyachillasunmantaj. Jehovaqa atiyniyoj tukuy nisqasninta juntʼananpaj. Runapajqa paraisopi wiñaypaj kausakuy mana creenapaj jinachu kaspa jinan. Jinapis Jehovaqa runaspaj mana atikoj imastapuni ruwananta niyta yachan. Payqa imatapis ruwananta nin Tukuy Atiyniyoj kasqanrayku (Job 42:2; Mar. 10:27). Chayrayku tʼukuna imasta ruwananta niwajtinchejqa mana tʼukunchejchu (Efesios 3:20 leey).

11. Jehová tʼukuna imasta nisqasninmanta ujmanta parlariy (“ Jehovaqa nerqa tʼukuna imasta ruwananta, juntʼarqapunitaj” nisqa recuadrota qhawariy).

¹¹ Jehová ñaupa tiempo kamachisninman imasta ruwanantachus nisqanpi tʼukurina. Chay nisqasnenqa runaspaj mana ruway atina kaspa jinarqa. Abrahanmanwan Saramanwan nerqa allin viejitusña kajtinkupis, wawitayojraj kanankuta (Gén. 17:15-17). Chantá Abrahanman nillarqataj mirayninman Canaán jallpʼata qonanta. Jinapis Abrahanpa miraynenqa, nisunman israelitasqa ashkha watasta Egiptopi esclavos karqanku. Chayrayku ichapis yuyarqanku Jehovaj chay nisqan ni jaykʼaj juntʼakunanta. Jinapis chayqa juntʼakorqapuni. Aswan qhepamantaj, Jehovaqa Elisabetmanñataj nerqa may viejinataña kajtinpis wawitayoj kananta. Mariamantaj mana qhariwan puñuykuspalla Wawanta nacechikunanta nerqa. Chaywantaj juntʼakorqa imatachus Edén huertapi ashkha watas ñaupajtaña nisqan (Gén. 3:15).

12. ¿Imatá Jehovaj atiyninmanta niwanchej Josué 23:14 chantá Isaías 55:10, 11?

¹² Jehovaj tukuy nisqasninpi, imaynatatajchus chaykunata juntʼasqanpi tʼukurispaqa sutʼita reparanchej may atiyniyoj kasqanta. Chayraykutaj paraisota apamunanpi astawan creenchej (Josué 23:14; Isaías 55:10, 11 leey). Ajinamanta wajkunata entiendechinapaj sumaj wakichisqa kanchej paraíso kananqa mana uj cuentollachu kasqanta, nitaj uj niyllachu kasqanta. Jehovaqa mosoj cielota, mosoj jallpʼatawan apamunanmanta parlaspa nerqa: “Kay palabrasqa atienekunapaj jina kanku, cheqataj kanku”, nispa (Apo. 21:1, 5).

DIOSMAN QAYLLAYKUCHIWANCHEJ CHAY IMASTA RUWANA

13. ¿Imaynatá reuniones creeyninchejta sinchʼiyachin?

¹³ Diosman qayllaykuchiwanchej chay imasta ruwaspapis creeyninchejta sinchʼiyachillanchejtaj. Tʼukurina reuniones mayta yanapawasqanchejpi. Annaqa ashkha watastaña tukuy imaymanasmanta Jehovapaj astawan llankʼarqa. b Pay nin: “Reunionesqa barco sayachina gancho jina creeyniyta sinchʼita sayachin. Uj discursante mana may sumaj yachachejpunichu kajtinpis, chayri mana ima mosoj imata nejtinpis, yachachisqanmanta mayqen partellapis yanapawanpuni Bibliaj yachachisqanta astawan sumajta entiendenaypaj. Ajinamanta creeyneyqa astawan sinchʼiyan”, nispa. Reunionespeqa wajkunaj comentasqankupis creeyninchejta astawan sinchʼiyachillantaj (Rom. 1:11, 12; 10:17).

14. ¿Imaynatá predicación creeyninchejta astawan sinchʼiyachin?

¹⁴ Predicaspapis creeyninchejta sinchʼiyachillanchejtaj (Heb. 10:23). Barbaraqa 70 watas kurajña testigo. Pay nin: “Predicacionqa creeyniyta astawan sinchʼiyachinaypaj mayta yanapawan. Jehovamanta, sumaj imasta ruwananta nisqanmantapis parlarejtiy, reparani creeyniy astawan sinchʼiyasqanta”, nispa.

15. Sapallanchejpi Bibliata estudiasqanchej, ¿imaynatá creeyninchejta astawan sinchʼiyachin? (Dibujostawan qhawariy).

¹⁵ ¿Imataj creeyninchejta sinchʼiyachillantaj? Sapallanchejpi Bibliata estudiay. Susantaqa uj horarioyoj kasqan mayta yanapan. Pay nin: “Domingosqa qhepan semanapaj Torremanta Qhawaj revistata wakichikuni. Lunestawan martestawantaj chaupi semana tantakuypaj wakichikuni. Waj diastaj sapallaypi Bibliamanta waj imasta estudiani”, nispa. Sapa semana chay horarionman jina ruwasqanrayku, Susanpa creeynenqa sapa kuti astawan sinchʼiyan. Hermananchej Irenetaj centralninchejpi ashkha watastaña sirvishan, Bibliaj profeciasninta estudiasqantaj creeyninta mayta sinchʼiyachin. Pay nin: “Mayta tʼukuchiwan imaynatachus Bibliaj profeciasnin nisqanman jina tukuysitunpuni juntʼakusqan”, nispa. c

“JUNTʼAKONQAPUNI”

16. ¿Imaynapí yachanchej Jehová profeta Habacucman nisqan noqanchejpajwan kasqanta? (Hebreos 10:36, 37).

¹⁶ Jehovaj kamachisninmanta wakenqa ashkha watastaña suyakushanku tukukuy pʼunchay chayamunanta. Runaspajqa qheparikojman rijchʼakunman. Jehovaqa imaynachus kamachisnin sientekusqankuta entienden. Chayrayku profeta Habacucta nerqa: “Mosqoypi jina rikusqaykimanta señalasqa tiempo chayamunanpajqa faltarinraj. Tukukuyninmanqa usqhayllata rishan, ruwakonqapunitaj. Qheparikojtinpis suyakullaypuni. Juntʼakonqapuni.  Mana qhepataqa chayamonqachu”, nispa (Hab. 2:3). Jehová chayta nisqan, ¿Habacucllapajchu karqa? ¿Chayri noqanchejtapis kay tiempopi yanapallawanchejtajchu? Jehovaqa apóstol Pabloman nerqa chayman rijchʼakojllatataj ninanta paraisota suyakoj cristianosman (Hebreos 10:36, 37 leey). Chayrayku Jehová qheparikushasqanta yuyajtinchejpis, nisqanqa “juntʼakonqapuni. Mana qhepataqa chayamonqachu”.

17. ¿Imaynatá uj hermana Jehová imatachus Habacucman nisqanman jina ruwarqa?

¹⁷ Jehovaqa Habacucman nerqa ‘suyakunallantapuni’. Ashkha cristianospis chayllatataj ruwashanku may chhika watasña pasajtinpis. Hermananchej Louiseqa 1939 watapi Jehovata sirviyta qallarerqa. Pay nin: “Armagedón may qayllitapiña kashasqanta yuyasqayrayku, ‘nichá dieciochoymanpis chayasajchu’ nispa nerqani, nitaj jinachu karqa. Tukuy kay wataspi Noemanta, Abrahanmanta, Josemanta, Jehovaj waj kamachisninmantapis leesqay yanapawarqa. Paykunaqa manchay pacienciayoj karqanku, suyakorqankutaj Jehová tʼinkata qonanta nisqanta. Suyakuyta yachasqayqa mayta yanapawan paraíso kaysitupiña kashasqanmanta mana iskayrayanaypaj, wajkunatapis chayqa yanapallantaj”, nispa. Jehovata ashkha watastaña sirvejkunapis kikillantataj ninku.

18. ¿Imaynatataj Jehovaj ruwasqasninta rikuy yanapawanchej paraisota apamunanpipuni creenapaj?

¹⁸ Yachanchej jina, paraisotaqa niraj rikunchejchu. Jinapis piensarina imastachus kunanña rikushasqanchejpi: estrellasta, sachʼasta, animalesta, runastapis. Chaykuna kasqanmantaqa mana iskayrayanchejchu, ñaupa tiempopi manaraj karqankuchu chaypis. Tukuy chay imasqa Jehová Dios ruwasqanraykulla rikhurerqa (Gén. 1:1, 26, 27). Diosninchejqa niwanchej paraisotapis apamunallantataj, chay nisqantataj juntʼanqapuni. Chaypitaj wiñaypaj kausakusun ni imamanta onqospa. Jehovaj señalasqan tiempo chayamojtin paraisotaqa rikusunpuni, imaynatachus kunan tukuy ruwasqasninta rikushanchejña ajinata (Isa. 65:17; Apo. 21:3, 4).

19. ¿Imaynatá creeyninchejta astawan sinchʼiyachisunman?

¹⁹ Paraíso chayamunankamaqa tukuy atisqanchejta kallpachakuna creeyninchejta sinchʼiyachinallapajpuni. Kacharichisqa kasqanchejpi tʼukurina, agradecekunataj. Jehovaj atiyninpipis piensarinallataj. Chantapis imaschus Jehovaman qayllaykuchiwanchej chay imasta ruwana. Tukuy chaykunata ruwasun chayqa, “creesqankurayku, pacienciakusqankurayku Diospa nisqasninta herenciata jina japʼinku” chaykunamanta kasun (Heb. 6:11, 12; Rom. 5:5).