1. ¿Imaraykú reunionespi comentanchej?

 ¿IMARAYKUTAJ reunionesman rinchej? Astawanqa Jehovata jatunchanapaj (Sal. 26:12; 111:1). Chantapis reunionesman rillanchejtaj kay llakiy tiempospi purajmanta kallpachanakunapaj (1 Tes. 5:11). Comentaspataj chay iskay imasta ruwayta atinchej.

2. ¿Ima partespitaj reunionespi comentayta atinchej?

² Sapa semana reunionespi comentayta atinchej, semana tukukuytaqa Torremanta Qhawaj revistata Ukhunchanapaj Tantakuypi. Chaupi semanatataj comentayta atinchej “Sumaj yachachiykunata maskʼana” nisqa partepi, “Bibliamanta yachakunapaj” nisqa partepi, waj partespi tapuykunata ruwamojtinkupis.

3. 1) ¿Imajtintaj mana comentayta atillasunmanchu? 2) ¿Imaynatá Hebreos 10:24, 25 yanapawasunman?

³ Tukuypis comentasqanchejwan Jehovata jatunchayta munanchej, hermanosninchejtataj kallpachayta. Jinapis wakin imasrayku mana comentayta atillasunmanchu. Ichapis comentayta manchachikusunman, chayri comentanapaj ashkhata makita oqharejtinchejpis, mana tukuyninpichu comentachiwasunman. Apóstol Pablo Hebreosman Cartanta qhelqasqanpi, yanapanawanchejpaj uj sumaj yuyaychay tiyan. Pabloqa khuska tantakuna kasqanmanta parlashaspa, astawanqa chaykunapi ‘purajmanta kallpachanakunanchej’ kasqanta nerqa (Hebreos 10:24, 25 leey). Creeyninchejta rikuchinapaj may pisisitullata comentajtinchejpis, hermanosta kallpachayta atisunman. Chayta yuyarikuytaj yanapawasun comentayta mana manchachikunapaj. Mana munasqanchejman jinachu ashkhata comentachiwajtinchejtaj, mayta kusikusun wajkunapis comentayta atisqankumanta (1 Ped. 3:8).

4. ¿Imastá kay yachaqanapi yachakusun?

⁴ Ñaupajtaqa qhawarisun, imaynatachus uj juchʼuy congregacionpi purajmanta kallpachanakusunman, maypichus pisi hermanoslla tiyan, ashkhatataj comentayta atikun. Chaymantataj qhawarisun imaynatachus jatun congregacionpi kallpachanakullasunmantaj, maypichus ashkha hermanos makita oqharinku comentanankupaj. Chantá yachakusun imaynachus comentariosninchej kanan kasqanta tukuy hermanosta kallpachanapaj.

5. Pisilla tantakunchej chay, ¿imaynatá purajmanta kallpachanakusunman?

⁵ Uj juchʼuy congregacionpi chayri uj grupitopeqa pisi hermanoslla tiyan comentanankupaj. Wakin kuti tapuykunata ruwaj hermanoqa unaytaraj suyanan tiyan makita oqharinankupaj. Chayraykutaj horawan saruykuchikun, chaytaj mana yanapawanchejchu kallpachanakunapaj. Congregacionninchejpi ajina chay, ¿imaynatá sapa uj yanapakusunman? Ashkha kutista comentanapaj wakichisqa kana. Ajinamanta wajkunapis astawan comentayta munanqanku.

6, 7. ¿Imatá ruwawaj comentayta mana manchachikunaykipaj?

⁶ Ashkha hermanostaqa reunionespi comentana kasqanta yachaylla nerviososta churachin. Qanpis comentayta manchikunki chay, ¿imatá ruwawaj? Yuyaychaykunata maskʼay comentayta mana manchachikunaykipaj. Ajinamanta comentasqaykiwan wajkunata astawan kallpachanki.

⁷ Ñaupaj wataspi llojsimoj Torremanta Qhawaj revistaspi ashkha yuyaychaykuna tiyan. b Chaykunaqa comentayta mana manchachikunapaj yanapawasunman. Chaykunamanta ujnin yuyaychayqa kashan allinta wakichikuna (Pro. 21:5). Imamantachus parlakunanta allinta yachaspaqa makita oqhariyta atillasun. Waj yuyaychaytaj kashan pisi palabrasllawan comentana (Pro. 15:23; 17:27). Pisillata parlaspaqa mana nerviosos churakusunchu. Chantapis pisillata comentajtinchej hermanosqa entiendeyta atillawasun. Ashkhata parlaykojtinchejtaj ni entiendeytapis atiwasunmanchu. Uj mashkha palabrasllawan parlakusqanchejman jinalla comentajtinchejqa, wajkunaqa reparanqanku sumajta wakichikusqanchejta, imamantachus estudiakushasqantataj sumajta entiendesqanchejta.

8. ¿Imaynatá comentanapaj kallpachakusqanchejta Jehová qhawan?

⁸ Sichus chay yuyaychaykunaman jina ruwanchejña, jinapis manchachikusqanchejrayku ujllata chayri iskay kutillata comentanchej chay, ¿imatá ruwasunman? Yuyarikuna Jehovaqa comentanapaj kallpachakusqanchejta may jatunpaj qhawasqanta (Luc. 21:1-4). Payqa mana mañawanchejchu mana ruwayta atisqanchejtaqa (Fili. 4:5). Chayrayku sapa uj qhawarikuna imatachus ruwayta atisqanchejta, chayta ruwanapaj kallpachakuna, Jehovamantataj mañakuna mana manchachikunapaj yanapanawanchejta. Wakenqa pisi palabrasllapi ujllatapis comentanapaj kallpachakusunman.

9. ¿Imajtintaj jatun congregacionpi mana comentayta atikullanmanchu?

⁹ Congregacionninchejpi ashkha publicadores kajtinrí, ¿imataj kanman? Ichapis ashkha kutispeqa mana comentayta atillasunmanchu  ashkha hermanos makita oqharisqankurayku. Hermana Daniellemanqa mayta gustan reunionespi comentay. c Payqa nin comentaspaqa Jehovata yupaychashasqanta, wajkunata kallpachashasqanta, chantapis comentasqanqa Bibliaj yuyaychaykunasnin sonqonman yaykunanpaj yanapasqanta. Jinapis uj jatun congregacionman riporqa, chaypitaj manaña ñaupajta jinachu ashkhata comentachej kanku, wakin kutitaj ni ujllatapis comentachejchu kanku. Pay nin: “Qhasillata tantakuyman jamusqayta yuyaj kani. Uj sumaj ruwaytapis qhechuwankuman jina sientekoj kani. Ashkha kutista mana comentachiwasqankurayku yuyaj kani noqawan japʼinakushawasqankuta”, nispa.

10. ¿Imatá ruwawaj comentariosta qosunankupaj?

¹⁰ ¿Maykʼajllapis Danielle jina sientekorqanchejchu? Ajina sientekorqanchej chayqa, ichapis yuyarqanchej manaña makita oqharinanchejta, manaqa comentasqallankutaña uyarikunanchejta. Jinapis comentanapaj makita oqharinallapuni. ¿Imatá ruwasunman ujllatapis comentachinawanchejpaj? Ashkha comentariosta wakichikuna, amataj ujllatachu. Ajinamanta ñaupaj parrafospi mana comentachiwajtinchejqa, qhepan parrafospi comentachiwasunpuni. Torremanta Qhawaj revistata wakichikushaspaqa reparana imaynatachus sapa párrafo titulonman japʼisqa kashasqanta. Ajinamanta ima tapuyllamanpis kutichiyta atisun. Chantapis comentanapajqa Diospa pakasqa yachayninmanta parlaj parrafosta astawan wakichikusunman (1 Cor. 2:10). Chay jina parrafostaqa mana explicayta atikullanchu, chayrayku uj mashkhalla makinkuta oqhariyta yachanku. Chaywanpis, ichá ashkha reunionespiña chay yuyaychaykunaman jina ruwarqanchej, nipunitaj comentachiwanchejchu. ¿Imatá ruwasunman? Niraj tantakuy qallarishajtin, Torremanta Qhawaj tantakuyta apaykachaj hermanota nina mayqen parrafopichus kutichiyta munasqanchejta.

11. ¿Imata ruwananchejtataj Filipenses 2:4 niwanchej?

¹¹ (Filipenses 2:4 leey). Apóstol Pabloqa  Dios yuyaychasqanman jina cristianosman nerqa wajkunaj allinninkuta maskʼanankuta. ¿Imaynatá chay yuyaychasqanman jina ruwasunman reunionespi? Wajkunapis comentayta munasqankuta yuyarikuspa.

12. ¿Imaynamantá hermanosninchejta reunionespi mayta kallpachasunman? (Fototawan qhawariy).

¹² Kaypi piensarina: Amigosninchejwan parlarikushaspaqa mana noqallanchejchu parlaykunchej, saqenchej paykunapis parlarikunallankutataj, ¿icharí? Reunionesninchejpipis ajinallataj. Munanchej atikojtenqa tukuy hermanos comentanankuta. Hermanosninchejta maytapuni kallpachasunman comentanankuta saqespa (1 Cor. 10:24). ¿Imatá chaypaj ruwasunman? Chayta qhawarina.

13. ¿Imatá ruwasunman aswan ashkha hermanos comentanankupaj?

¹³ Comentariosninchejqa pisi palabrasllapi kanan tiyan. Ajinamanta tiempo kallanqa ashkha hermanos comentanankupaj. Ancianos, unayña testigos kajkunapis chayta ruwaypi ejemplos kananku tiyan. Chantapis comentashaspaqa mana ashkha imasmantachu ujllapi parlaykuna tiyan. Parrafontinmanta parlaykusunman chayqa, wajkunaqa niña imatapis comentayta atinkumanchu. Por ejemplo, kay parrafopeqa iskay imasta yuyaychawanchej: comentariosninchej pisi palabrasllapi kananta, amataj ashkha imasmantachu ujllapi parlaykunata. Sichus kay parrafopi ñaupaj kaj comentariota qosonqanku chayqa, allin kanman ujnillanmanta comentanayki.

14. ¿Imatá yuyarikunanchej tiyan mashkha kutitachus comentanata yachanapaj? (Fotostawan qhawariy).

¹⁴ Wajkunaj allinninkuta maskʼasqanchejrayku ama sapa ratoñataj makinchejta oqharinachu. Makinchejta sapa ratoñataj oqharisunman chayqa, apaykachaj hermanoqa obligasqa jinallaña ashkhata comentachiwasunman, wajkuna manaraj comentajtinkupis. Chantapis waj hermanosqa niña makinkuta oqhariyta munankumanchu (Ecl. 3:7).

15. 1) Reunionpi ni ujtapis comentachiwanchejchu chay, ¿imatataj mana ruwananchejchu tiyan? 2) ¿Imatataj yuyarikunan tiyan tapuykunata ruwaj hermano? (“ Comentachinayki kajtin kayta yuyarikuy” nisqa recuadrota qhawariy).

¹⁵ Comentanankupaj ashkha hermanos makita oqharejtinkoqa, ichapis mana munasqanchejman jinapunichu ashkhata comentayta atisun. Wakin kutitaj ichapis ni ujllatapis comentachiwasunchu. Ichapis chayqa llakichiwasunman, jinapis ama phiñakunachu (Ecl. 7:9).

16. ¿Imatá ruwasunman comentajkunata kallpachanapaj?

¹⁶ Mana munasqanchejman jinachu ashkhata comentachiwajtinchejpis, wajkunaj comentasqankuta sumajta uyarisunman, tantakuy tukukojtintaj comentasqankumanta felicitaykusunman. Felicitaykuspaqa comentariosninchejwan jinallataj paykunata kallpachasun (Pro. 10:21). Mana comentasqallanchejwanchu hermanosta kallpachanchej, manaqa felicitasqanchejwanpis.

17. 1) ¿Imatataj tatas ruwankuman? 2) Videopi rikukusqanman jina, ¿ima tawa imastataj ruwana comentariota wakichikushaspa? (Sutʼinchaynintawan qhawariy).

¹⁷ ¿Imatawán ruwasunman reunionespi purajmanta kallpachanakunapaj? Juchʼuy wawasniyoj kanki chayqa, edadninkuman jina comentariosta wakichikunankupaj yanapariy (Mat. 21:16). Wakin kuti reunionespeqa matrimoniopi  problemasmanta chayri llimphu kausayniyoj kanamanta parlakun. Chaypi mana wawas comentanankupaj jinachu kajtinpis, uj iskay parrafospi kanpuni paykuna comentanankupaj jina. Chantapis wawasniykita entiendechiwaj imaraykuchus mana sapa makinkuta oqharejtinkuchu comentachinankuta. Ajinamanta cuentankumanta wajkunata comentachejtinku mana llakikonqankuchu (1 Tim. 6:18). d

18. ¿Imatá ruwasunman comentashaspa mana alabakunapaj? (Proverbios 27:2).

¹⁸ Tukuypis sumaj comentariosta wakichikusunman Jehovata jatunchananpaj jina, hermanosninchejtataj kallpachananpaj jina (Pro. 25:11). Wakin kuteqa experiencianchejmanta uj chhikata parlayta atisunman, jinapis ama noqallanchejmanta anchata parlaykunachu (Proverbios 27:2 leey; 2 Cor. 10:18). Astawanpis parlarina Jehovamanta, Palabranmanta, llajtanmantapis (Apo. 4:11). Jinapis parrafoj tapuynin sapa ujninchejpaj kajtenqa noqanchejmanta parlareyqa allillan. Ajina tapuy tiyan qhepan parrafoj ujnin tapuyninpi.

19. 1) ¿Imataj kanqa tantakuykunapi wajkunaj allinninkuta maskʼasun chay? (Romanos 1:11, 12). 2) ¿Imaraykutaj tantakuykunapi comentay gustasunki?

¹⁹ Imaynatachus tantakuykunapi comentanamantaqa mana ima kamachiypis kanchu. Jinapis tukuyninchej kallpachakunanchej tiyan wajkunata kallpacharinapaj jina comentanapaj. ¿Imaynamanta? Wakenqa ichapis kallpachakunanchej kanqa astawan comentanapaj. Wakintaj uj mashkhallata comentachiwajtinchejpis chaywan sonqo juntʼasqa kana, kusikunataj wajkunapis comentayta atisqankumanta. Tantakuykunapi wajkunaj allinninkuta maskʼasun chayqa, tukuyninchej kusikusun ‘purajmanta kallpachanakuspa’ (Romanos 1:11, 12 leey).