1, 2. 1) ¿Imaraykutaj wakin kuti tapukunchej “Jehová Dios, ¿maykʼajkamataj kay kanqari?”, nispa? 2) ¿Imatataj unay tiempomanta Diospa kamachisnin llakisqa kashaspa ruwarqanku?

PROFETA Isaías, Habacuc imaqa, Jehová Diosta taporqanku: “¿Maykʼajkamataj kay kanqari?”, nispa (Isa. 6:11; Hab. 1:2). Rey Davidpis tawa kutita ajinallatataj Jehová Diosta taporqa (Sal. 13:1, 2). Jesucristopis chayllatataj nerqa, runas pisi creeyniyoj kasqankuta rikuspa (Mat. 17:17). Noqanchejpis wakin kuti paykuna jinallataj ichapis ninchej: “Jehová Dios, ¿maykʼajkamataj kay kanqari?”, nispa.

² Ichá chayta tapukunchej pillapis qhasimanta juchachawasqanchejrayku, sajra runaspa ruwasqankuta rikusqanchejrayku. Chayri machituña, onqosqataj kashasqanchejrayku. Mana chayrí kay tiempopi ‘kausay may llakiy kasqanraykuʼ (2 Tim. 3:1). Unay tiempomanta Diospa kamachisnenqa llakisqa kashaspa, mana manchachikuspa Jehová Diosman nerqanku: “¿Maykʼajkamataj kay kanqari?”, nispa. Jehovatajrí paykunata mana kʼamerqachu. Chayta yachaytaj mayta sonqochawanchej.

3. ¿Imataj llakiykunapi kashajtinchej yanapawasunman?

³ Ima llakiykunapi kashajtinchejpis, discípulo Santiagoj  nisqan mayta yanapawasunman. Payqa Diospa yuyaychasqanman jina nerqa: “Chayrayku hermanos, pacienciakuychej Señorpa kutimunan tiempokama”, nispa (Sant. 5:7). Arí, tukuypis pacienciayoj kayta necesitanchej. Jinapis, ¿imaynataj pacienciayoj runa? Chantá, ¿imaynatá pacienciayoj kasqanchejta rikuchisunman? Chaymanta kunan yachakusunchej.

4, 5. 1) Biblia nisqanman jina, ¿imaynatá pacienciayoj kasunman? 2) ¿Imaynatá pacienciayoj kasqanchejta rikuchisunman? 3) ¿Imatataj Santiago pacienciayoj kaymanta nerqa? (3 paginapi dibujota qhawariy).

⁴ Biblia nisqanman jina, pacienciayoj kasunman Jehová Dios atiyninwan yanapallawajtinchej. Jehová Dios mana yanapawasunmanchu chayqa, juchasapa kasqanchejrayku mana pacienciakuyta atillasunmanchu. Pacienciayoj kaytaqa Jehová Dios qowanchej. Pacienciakuspataj Jehová Diosta, runa masinchejtapis munakusqanchejta rikuchinchej. Mana pacienciakojtinchejtaj hermanosta munakusqanchej pisiyapunman (1 Cor. 13:4; Gál. 5:22). Pacienciayoj kasunchej chayqa, ima llakiytapis kusiywan aguantayta atillasun (Col. 1:11; Sant. 1:3, 4). Chantá pillapis ima sajrata ruwawajtinchej, mana sajrallawantaj kutichisunchu, astawanqa Jehová Diosta kasukullasunpuni. Discípulo Santiago nisqanman jina, tukuypis pacienciayoj kayta necesitanchej (Santiago 5:7, 8 leey).

⁵ Santiagoqa jallpʼata llankʼaj runamanta parlarqa. Chay runaqa mana parachimuyta atinmanchu, nitaj tarpusqanta wiñachiyta atinmanchu, nillataj cosecha tiempotapis ñauparichinmanchu. Chayrayku pacienciawan suyakun ‘jallpʼa sumajta poqonanta’. Noqanchejpis jallpʼata llankʼaj runa jina, ashkha imasta mana ruwayta atisunmanchu. Chayrayku Jehová Dios nisqasninta juntʼananta pacienciawan suyakunallapuni (Mar. 13:32, 33; Hech. 1:7).

6. ¿Imatataj profeta Miqueasmanta yachakunchej?

⁶ Kay tiemponchejqa profeta Miqueaspa tiemponman rijchʼakun. Payqa sajra rey Ajaz kamachishajtin kausarqa. Chay tiempopi runasqa imaymana sajrata ruwaj kanku, ‘juchata ruwanapajpis may yachayniyoj’ karqanku (Miqueas 7:1-3 leey). Miqueasqa chay jina kausay tukukunanpaj ni imata ruwayta aterqachu. Chayrayku nerqa: “Noqatajrí Tata Diospi atienekusaj; salvawajniy Diosnillaypi suyakusaj, imaraykuchus pay uyariwanqa”, nispa (Miq. 7:7). Miqueasqa Jehová Diospi suyakorqa, noqanchejpis pay jinallataj ‘Diospi suyakuna’.

7. ¿Allinchu kanman thutuspa Jehovapi suyakunanchej?

⁷ Miqueas jina Jehová Diospi atienekusun chayqa, kusiywan Jehová Dios nisqasninta juntʼananta suyakusunchej. Chayta entiendenapaj, uj presochasqa runamanta parlarina. Chay runataqa wañuchisqa kananpaj juchacharqanku. Wañuchisqa kanan pʼunchay mana chayamunanpaj ni imata ruwayta atinchu. Chayraykutaj llakisqalla chay pʼunchayta suyakun. Noqanchejtajrí may kusiywan suyakunchej Jehová Dios wiñay kausayta, maychus tiemponpi qonawanchejta. Biblia nisqanman jina “pacienciawan, kusiywantaj tukuy imapi sinchʼita” sayanchej (Col. 1:11, 12). Jehová Diosta thutuspa, mala ganawantaj suyakusunchej chayqa, payta phiñachisunman (Col. 3:12).

8. Diospa kamachisninmanta parlarishaspa, ¿imastá yachakusunchej?

⁸ Unay tiempopi Diospa kamachisnenqa, pacienciawan Jehová nisqasninta juntʼananta  suyakorqanku. Paykunamantataj pacienciayoj kayta yachakusunman (Rom. 15:4). Paykunamanta parlarishaspa, yachakusunchej mashkha tiempotachus suyakusqankuta, imaraykuchus suyakusqankuta, chantá suyakusqankurayku ima bendicionestachus japʼisqankuta.

9, 10. ¿Mashkha unaytataj Abrahanwan Sarawan suyakorqanku, Jehovaj wakin nisqasninta juntʼakojta rikunankupaj?

⁹ Abrahanmantawan Saramantawan parlarina. Paykunaqa “creeynejta, paciencianejtataj Diospa nisqasninta herenciata jina japʼerqanku”. Jehovaqa Abrahanta nerqa, bendecinanta, miraynintaj ashkha kananta. Biblia nisqanman jinataj, “Abrahanqa pacienciayoj kasqanta rikuchisqantawanraj”, Diospa chay nisqanta japʼerqa (Heb. 6:12, 15). ¿Imaraykutaj Abrahán pacienciakunan karqa? Imaraykuchus Jehovaqa, unay watasninmanraj nisqanta juntʼarqa. Jehová imatachus Abrahanman nisqantaqa, 1943 watapi, Jesús niraj jamushajtin, nisán killapi, 14 pʼunchaypi juntʼayta qallarerqa. Chay pʼunchaypeqa Abrahán, Sara, paykunawan tiyakojkuna ima, Éufrates mayuta chimparqanku, Sumaj Jallpʼamantaj yaykorqanku. Jinapis Abrahanqa 25 watastaraj suyakorqa wawan Isaac nacekunanpaj. Chaytaj 1918 watapi karqa, Jesús niraj jamushajtin. Chaymantataj 60 watastawanraj suyakorqa allchhisnin Esaú, Jacob ima nacekunankupaj. Chaytaj karqa 1858 watapi, Jesús niraj jamushajtin (Heb. 11:9).

¹⁰ ¿Chay Sumaj Jallpʼamanta uj chhikallantapis Abrahán japʼerqachu? Biblia nin: “Diosqa ni chaki sarunan chhikallantapis kay jallpʼamanta Abrahanman qorqachu. Chaywanpis kay jallpʼata payman  qonantapuni nerqa, wañupojtinpis mirayninpaj kananta nerqa. Chaytataj Dios nerqa Abrahán manaraj wawayoj kashajtin”, nispa (Hech. 7:5). Abrahán Éufrates mayuta chimpasqanmanta 430 watas pasarqa, miraynin uj nación jina chay Sumaj Jallpʼata japʼikapunankupaj (Éxo. 12:40-42; Gál. 3:17).

11. 1) ¿Imaraykutaj Abrahán kusiywan pacienciawantaj Jehovapi suyakorqa? 2) Abrahán pacienciawan suyakusqanrayku, ¿imasmantataj paraisopi kusikonqa?

¹¹ Abrahanqa mana rikorqachu Diospa tukuy nisqasninta juntʼakojta. Jinapis creesqanrayku, kusiywan, pacienciawantaj suyakorqa (Hebreos 11:8-12 leey). Abrahanqa paraisopi kausarimojtin, maytapunichá kusikonqa, kausayninmanta, mirayninmantawan Bibliapi leerejtin. * Chantapis maytachá kusikullanqataj, mirayninmanta Diospa Wawan jamusqanta yachaspa. Reparanqataj may chhika unayta pacienciawan suyakusqan mana qhasipajchu kasqanta.

12, 13. 1) ¿Imaraykutaj José pacienciakunan karqa? 2) ¿Imatataj José jatun ñakʼariypi kashaspapis ruwallarqapuni?

¹² Abrahanpa allchhinpa wawan Josepis, pacienciayojllataj karqa. Joseqa mayta ñakʼarerqa. Paytaqa 17 watasniyoj kashajtin, hermanosnin esclavota jina venderparqanku. Chantá patronninpa warmin llullakuspa nerqa, José paywan puñuykuyta munasqanta. Chayraykutaj Josetaqa carcelman wisqʼaykorqanku (Gén. 39:11-20; Sal. 105:17, 18). Joseqa Jehová Diosta kasukusharqa, jinapis ñakʼariypi rikukorqa. Chaymanta 13 watasninman Joseqa, ujllapi carcelmanta llojsiytawan Egiptomanta kamachej kananpaj jatun atiyta japʼerqa, Faraonllataj paymanta aswan atiyniyoj karqa (Gén. 41:14, 37-43; Hech. 7:9, 10).

¹³ Joseqa chay jina jatun ñakʼariypi kashaspapis, mana anchata llakikorqachu. Jehová Diospitaj atienekullarqapuni. ¿Imataj Joseta yanaparqa pacienciawan Diospi suyakunanpaj? Jehová Diospi sinchʼita creesqan. Joseqa yacharqa Jehová tukuy imata qhawashasqanta. Chayrayku hermanosninman nerqa: “Ama chaymantaqa llakikuychejchu. Mana noqaqa Diospis kayman jina oqharikuymanchu. Qankuna mana allintachu ruwawayta munarqankichej, Diostajrí chay mana allin kajta allinman tukucherqa, mayqentachus kunan rikushankichej, chay ashkhasta kawsachinaypaj”, nispa (Gén. 50:19, 20). Joseqa, pacienciawan Diospi suyakusqan mana qhasipajchu kasqanta repararqa.

14, 15. 1) ¿Imaraykutaj David Jehová Diospi suyakunan karqa? 2) ¿Imataj Davidta yanaparqa pacienciayoj kananpaj?

¹⁴ Rey Davidpis ashkha llakiykunapi rikukullarqataj. Jehová Diosqa, Davidta jovencitollaraj kashajtin Israelmanta rey kananpaj ajllarqa. Jinapis Davidqa 15 watasta suyarqa Judá ayllumanta rey kananpaj (2 Sam. 2:3, 4). Chaykamataj rey Saulmanta ayqeykacharqa. Imaraykuchus Saulqa payta wañuchiyta munarqa. * Chayraykutaj Davidqa llajtanmanta ayqerqa. Chʼin pampapi, qaqa juskʼuspitaj tiyakorqa. Tiemponmantaj Saulqa uj maqanakupi wañuporqa. Chay tiempomantapacha Davidqa 7 watataraj suyakorqa Israel nacionta kamachinanpaj (2 Sam. 5:4, 5).

¹⁵ Davidqa 13 Salmopi Jehová Diosta  tawa kutitapuni taporqa maykʼajkamachus llakiykunasnin kananta. Chantá pacienciawan Diospi suyakorqa. ¿Imarayku? Imaraykuchus Davidqa Jehová Dios mana saqerparinanpi atienekorqa. May kusisqataj suyakorqa Jehová uj pʼunchay llakiykunasninta tukuchinanta. Chayrayku David nerqa: “Noqarí munakuyniykipi atienekuni, sonqoytaj kusikun, imaraykuchus qan salvawanki. Tata Diosman takisaj allinta ruwawasqanmanta”, nispa (Sal. 13:5, 6). Chantapis Davidqa tʼukurerqa imaynatachus ñaupajpi, llakiypi kashajtin Jehová yanapasqanta. Jehová Diospi suyakusqanqa mana qhasipajchu karqa.

16, 17. Jehová Dioswan Jesuswan, ¿imaynatá pacienciayoj kasqankuta rikuchinku?

¹⁶ Jehovaqa pacienciayoj kananchejta munan. Paypis pacienciayojllataj. Pay jina pacienciayojqa ni pi kanchu (2 Pedro 3:9 leey). Jehová Diosqa may chhika watasta suyakushallanpuni Edén huertapi Kuraj Supay imatachus nisqan, llulla kasqanta sutʼita rikuchinanpaj. Jehovaqa pacienciawan suyakushallanpuni maychus tiemponpi sutinta llimphuchananpaj. Chay tiempo chayamojtintaj “paypi tukuy suyakojkunaqa”, may chhika bendicionesta japʼenqanku (Isa. 30:18).

¹⁷ Jesuspis pacienciayojllataj karqa. Kay jallpʼapi kashaspa wañupunankama tatanta kasukullarqapuni. Payqa 33 watapi noqanchejrayku wañorqa, kausarimuspataj cieloman kutiporqa. Chay watamantapacha 1914 watakama suyakorqa, rey jina kamachiyta qallarinanpaj (Hech. 2:33-35; Heb. 10:12, 13). Chantapis tukuy enemigosnin wiñaypaj chinkachisqa kanankukama 1.000 watastawanraj suyakullanqapuni (1 Cor. 15:25). Chay chhika unayta suyakunan kajtinpis, chay suyakusqanqa mana qhasipajchu kanqa.

18, 19. ¿Imataj pacienciayoj kanapaj yanapawasunchej?

¹⁸ Tukuypis pacienciayoj kananchej tiyan. Chaypajqa Jehová Diosmanta atiyninta mañakusunman. Qallariypi nerqanchej jina pacienciayoj kasunman Jehová Dios atiyninwan yanapallawajtinchej (Efe. 3:16; 6:18; 1 Tes. 5:17-19). Chayrayku ima llakiytapis aguantanapaj, Jehová Diosmanta pacienciata qonawanchejta mañakuna.

¹⁹ Abrahanwan Josewan Davidwanqa Jehová Dios nisqasninta juntʼananta pacienciawan suyakorqanku. Paykunaqa Jehová Diospi creerqanku, tukuy ima llakiykunata tiemponpi allinchananpitaj atienekorqanku. Mana paykunallapichu yuyarqanku, nitaj munasqallankupichu. Pacienciayoj kasqankurayku Jehová paykunata bendicerqa. Chaypi tʼukureyqa pacienciayoj kanapaj yanapawasunchej.

20. ¿Imatataj Jeremiasmanta yachakusunman?

²⁰ Jatun ñakʼariykunapi tarikojtinchejpis Jehová Diospi suyakunallapuni. Jinapis ichá wakin kuti Jehovaman nisunchej: “¿Maykʼajkamataj kay kanqari?”, nispa (Isa. 6:11). Chaywanpis Diospa atiyninwanqa Jeremías jina nisunman, pay nerqa: “Tata Diosqa tukuy ima noqapajqa; chayrayku payllapi suyakusaj”, nispa (Lam. 3:21, 24).