1. ¿Imataj yanapawasun Bibliaj profeciasninta estudiaspa gustachikunapaj?

 BEN sutiyoj joven hermano nin: “Bibliaj profeciasninta estudiayqa mayta gustawan”, nispa. Qanmanrí, ¿gustasunkichu? Chayri, ¿yuyankichu profeciasta estudiayqa mana entiendey atina kasqanta, chayri puñurpachinawanchejpaj jina kasqanta? Imapajchus Jehová palabranpi profeciasta escribichisqanta astawan sumajta entiendespaqa, niña ajinatachu yuyanki.

2. ¿Imatá kay yachaqanapi yachakusun?

² Kay yachaqanapeqa yachakusun imaraykuchus Bibliaj profeciasninta sumajta rejsinanchej kasqanta, imatajchus yanapawasunman chaykunata estudianapaj. Chantá Danielpa iskay profeciasninta ukhuncharisun, chaykunata entiendeytaj kunanña yanapawasqanchejta.

3. ¿Imatá ruwananchej tiyan Bibliaj profeciasninta entiendenapaj?

³ Bibliaj profeciasninta entiendenapajqa Jehovamanta yanapata mañakunanchej tiyan. Kaypi piensarina: Mana rejsisqanchej llajtapi kashasunman, pero chay llajtata sumajta rejsej amigonchej noqanchejwan kashanman. Chay amigonchejqa sumajta yachanman maypichus kashasqanchejta, callestapis sumajta rejsinman. May sumajpuni noqanchejpaj kanman chay amigonchej noqanchejwan kashasqanqa, ¿icharí? Jehovaqa chay amigonchej jina, payqa sumajta yachan ima tiempopichus kausakushasqanchejta, imachus aswan qhepaman kanantapis. Chayrayku Bibliaj profeciasninta sumajta entiendenapajqa kʼumuykukoj sonqowan paymanta yanapata mañakuna tiyan (Dan. 2:28; 2 Ped. 1:19, 20).

4. ¿Imaraykú Jehová Palabranpi profeciasta qhelqacherqa? (Jeremías 29:11; fototawan qhawariy).

⁴ Jehovaqa uj tata jina, munan qhepaman wawasninta allin  rinanta (Jeremías 29:11 leey). Jinapis tatasmanta nisqaqa, payqa maychus kajsituta niyta atin imachus qhepaman kananta. Payqa profeciasta Palabranpi qhelqacherqa. Ajinamanta imachus qhepaman kananta ñaupajmantaña yachananchejpaj (Isa. 46:10). Jehovaqa mayta munakuwasqanchejrayku, profeciasta uj sumaj regalota jina qowanchej. Jinapis, ¿imaraykutaj nisunman Bibliaj profeciasnin juntʼakunantapuni?

5. ¿Imatá jóvenes Maxmanta yachakunkuman?

⁵ Colegiollapiraj kashanku chay joven hermanitosninchej, ¿imapitaj rikukunku? Paykunaqa Bibliata mana respetaj runaswan chayri pisillata respetaj runaswan muyurisqa kashanku. Ichapis chay runaspa nisqanku chayri ruwasqanku, imapichus creesqankumanta iskayrayachinman. Maxmanta parlarina. Pay nin: “Jovencitullaraj kashaspaqa, iskayrayayta qallarerqani tatasniypa religionninku cheqachus manachus kasqanmanta, Bibliapis Diosmantachus manachus jamusqanmanta”, nispa. ¿Imatá tatasnin ruwarqanku? Max nillantaj: “Yacharqani tatasniy noqamanta llakikusqankuta, pero mana phiñakorqankuchu”, nispa. Tatasnenqa tapuykunasninman Bibliawan kuticherqanku. Maxtaj mana jinallachu kakorqa. Pay nin: “Bibliaj profeciasninta estudiaj churakorqani, congregacionniymanta waj jovenesmantaj chay yachakusqayta willarej kani”, nispa. Chayta ruwasqanrayku, ¿imataj karqa? Max nin: “Ajinata estudiasqaytawan noqapuni sutʼita repararqani Bibliaqa Diospa yuyaychasqanpuni kasqanta”, nispa.

6. ¿Imatá ruwasunman iskayrayayta qallarejtinchej, chanta imarayku?

⁶ Qanpis Max jinallataj Biblia cheqatachus manachus nisqanmanta iskayrayayta qallarinki chay, ¿imatá ruwawaj? Ama chaymanta llakikuychu, nitaj jinallachu kakuy. Imamantapis iskayrayayqa sarru jina. Sichus imapis valorniyoj kapuwanchej chayqa, sarruykushasqanta rikuspaqa chay rato sarrunta orqhonchej, mana orqhojtinchejqa niña sirvinmanchu. Iskayrayaypis sarru jina kanman creeyninchejpaj. ¿Imatá ruwasunman sarruta jina iskayrayasqanchejta orqhonapaj? Ñaupajta kayta tapurikuna: “¿Aswan qhepaman imachus kananmanta Biblia nisqanta creenichu?”, nispa. Chaymanta iskayrayashanchej chayqa, ima profeciaschus juntʼakunña chaykunata estudiananchej tiyan. ¿Imaynatá chayta ruwasunman?

7. ¿Imataj Danielta yanaparqa profeciasta estudiananpaj? (Daniel 12:10; fototawan qhawariy).

⁷ Bibliaj profeciasninta estudianapajqa Daniel jina ruwana tiyan. Payqa profeciasta allin sonqowan estudiaj. ¿Imaraykutaj estudiaj? Cheqa kajta yachayta munaspa, chantapis payqa kʼumuykukoj sonqo karqa. Danielqa yacharqa Jehovaqa payta rejsejkunata, kamachiykunasnintapis kasukojkunata, entiendenankupaj yanapasqanta (Dan. 2:27, 28; Daniel 12:10 leey). Payqa kʼumuykukoj sonqo kasqanta rikucherqa Jehovamanta yanapata mañakuspa (Dan. 2:18). Chantapis Danielqa Diosmanta Qhelqasqata sumajsitutapuni estudiaj. Tiemponpi ima qhelqasqaschus karqa chaykunata leespa sumajta ukhunchaj (Jer. 25:11, 12; Dan.  9:2). ¿Imaynatá noqanchejpis pay jina ruwasunman?

8. ¿Imata tariyta munaspataj wakin runas Bibliaj profeciasninta estudianku, noqanchejrí imatá ruwananchej tiyan?

⁸ ¿Imajtintaj Bibliaj profeciasninta estudianchej? ¿Cheqa kajta yachayta munaspachu? Jina kajtenqa Jehová yanapawasun (Juan 4:23, 24; 14:16, 17). Jinapis wakin runasqa mana cheqa kajta yachayta munaspachu Bibliata estudianku. Paykunaqa Biblia mana Diosmantapunichu kasqanta rikuchinankupaj, imitallatapis tariyta munaspa estudianku. Ajinamanta imachus allin, imatajchus mana allin kasqanta paykunallamantaña ajllakunankupaj. Noqanchejtajrí mana paykuna jinachu kananchej tiyan, manaqa allin sonqowan Bibliaj profeciasninta estudiananchej tiyan. Chantapis profeciasta sumajta entiendenapajqa kʼumuykukoj sonqo kananchej tiyan.

9. ¿Imaynataj kananchej tiyan Bibliaj profeciasninta entiendenapaj chanta imaraykutaj?

⁹ Kʼumuykukoj sonqo kana. Jehovaqa nin kʼumuykukoj sonqosta yanapananta (Sant. 4:6). Chayrayku Bibliaj profeciasninta entiendeyta munanchej chayqa, Jehovamanta yanapata mañakunanchej tiyan. Chantapis kʼumuykukoj sonqo kasun chayqa, allin kamachi yuyayniyojpa yanapayninta japʼikusun. Jehovaqa paykunanejta yachachiykunata mikhunata jina maychus tiemponpi qowanchej (Luc. 12:42). Jehovaqa mana munanchu imapis patan uran ruwakunanta. Chayrayku allin kamachi yuyayniyojnejllata yanapawanchej Bibliaj cheqa yachachiykunasninta entiendenapaj (1 Cor. 14:33; Efe. 4:4-6).

10. ¿Imatá Esthermanta yachakunchej?

¹⁰ Sumajsituta estudiana. Piensarina ima profeciachus gustawasqanchejpi, chaytataj estudiayta qallarina. Hermananchej Esther chayta ruwarqa. Payqa mayta yachayta munaj Mesías jamunanmanta profeciasmanta. Pay nin: “15 watasniyoj kashajtiy noqapuni yachayta munarqani, chay profecías Jesús niraj kay jallpʼaman jamushajtinchus manachus qhelqakusqanta”, nispa. Chaypaj, ¿imatá ruwarqa? Wañusqa qochapi tarisqanku qhelqasqasmanta leej churakorqa. Leeytawantaj niña iskayrayarqachu. Esther nin: “Chay qhelqasqasmanta wakenqa, manaraj Jesús kay jallpʼaman jamushajtin qhelqakusqa. Chayrayku chay qhelqasqaspi kaj profeciasqa Diosmantapuni kasqanta repararqani”, nispa. Pay nillanpuni: “Wakin imasta entiendenaypajqa kutin kutinta leenay karqa”, nispa. Jinapis payqa mayta kusikun chayta ruwasqanmanta. Ashkha profeciasta ukhunchaytawan imaynachus kashasqanmanta pay nin: “Sutʼita repararqani Bibliaqa cheqa kajtapuni parlasqanta”, nispa.

11. Bibliaj nisqan cheqapuni kasqanta sutʼita reparay, ¿imaynatá yanapawanchej?

¹¹ Bibliaj wakin profeciasnin imaynatachus juntʼakusqanta sutʼita reparaspaqa Jehovapi, kamachiykunasninpipis astawan atienekunchej. Chantapis Bibliaj profeciasnenqa yanapawanchej suyakuyninchejmanta mana iskayrayanapaj, ima kajtinpis kusisqallapuni kanapaj. Kunanqa Danielpa iskay profeciasninta ukhuncharisun, chaykunataj kay tiempopiña juntʼakushanku.  Chay profeciasta entiendeyqa yanapawasun imatapis allinta ajllanapaj.

12. ¿Pikunawantaj ninakun ‘fierrowan tʼuruwan chajrusqa’ chakis? (Daniel 2:41-43).

¹² (Daniel 2:41-43 leey). Rey Nabucodonosorqa mosqoyninpi uj jatun lantita rikorqa, chakisninta “tʼurutawan fierrotawan chajrusqata”. Kay profeciata Daniel libromanta, Apocalipsis libromantawan wakin profeciaswan kikinchaspaqa, sutʼita reparanchej lantej chakisnenqa Reino Unidowan, Estados Unidoswan ninakusqankuta. Chay iskay naciones kay tiempopi uj atiyniyoj gobiernolla kanku. Danielqa Nabucodonosorman imachus chay mosqoynin niyta munasqanta sutʼinchashaspa, chay atiyniyoj gobiernomanta kayta nerqa: “Wakinpi kallpayoj kanqa, wakinpitaj pisi kallpayoj”, nispa. ¿Imajtintaj wakinpi pisi kallpayoj kanan karqa? Tʼuruwan ninakoj runas mana fierro jina kallpayoj kananta saqesqankurayku. b

13. ¿Ima iskay imastataj yachakunchej Danielpa profecianmanta?

¹³ Chay jatun lantimanta, astawanraj chakisninmanta imatachus Daniel nisqanmantaqa, ashkha imasta yachakunchej. Uj kaj, Reino Unidowan Estados Unidoswanqa, atiyniyoj gobierno jina may atiyniyoj kasqankuta rikuchinkuña. Primera Guerra Mundialpi, Segunda Guerra Mundialpipis, Reino Unidowan Estados Unidoswanqa atipaj naciones ukhupi kasharqanku. Jinapis chay atiyniyoj gobiernoj kallpanqa pisiyan, sigataj pisiyallanqapuni, chay nacionespi tiyakojkuna paykunapura chʼajwasqankurayku. Iskay kaj, chay atiyniyoj gobiernomanta wajqa manaña kanqachu Diospa Gobiernon tukuy gobiernosta tukuchinankama. Ichapis maypi jina waj naciones chay atiyniyoj gobiernoj contranta sayaykonqanku, pero mana cuentanmantaqa atiyniyoj gobierno kayta atenqankuchu. Chayta yachanchej Bibliaj profecianpi “rumi”, nisunman Diospa Gobiernon chay lantej chakisninta qʼalata phirirparinanta nisqanrayku (Dan. 2:34, 35, 44, 45).

14. Danielpa profecianta sumajta entiendey, ¿imata ruwanapajtaj yanapawanchej?

¹⁴ ¿Imatachus Daniel lantej chakisninmanta nisqanta creenchejchu? Creenchej chayqa kausayninchejpi chay rikukonqa. Kay mundoj tukukuynin qayllitapiña kashasqanta yachasqanchejrayku, mana ashkha qolqeta ganaytachu, nitaj ashkha imasniyoj kaytachu maskʼasun (Luc. 12:16-21; 1 Juan 2:15-17). Chantapis chay profeciata entiendeyqa yanapawasun predicayta, runasta Jesuspa discipulosninman tukuchiytapis kausayninchejpi ñaupajman churanapaj (Mat. 6:33; 28:18-20). Kay profeciata estudiaytawan kaypi piensarisunman: “Diospa Gobiernonqa tumpamantawan tukuynin gobiernosta chinkachenqa, ¿ruwasqasniywan chaymanta mana iskayrayasqaytachu rikuchini?”.

15. ¿Pikunataj kanku ‘norte ladomanta rey’, chanta “sur ladomanta rey”? (Daniel 11:40).

¹⁵ (Daniel 11:40 leey). Daniel libroj 11 capitulonpeqa iskay reyesmanta chayri iskay gobiernosmanta parlan. Paykunaqa kay mundota mandonkuman churayta munaspa purajmanta maqanakunku. Kay profeciata, Bibliamanta waj profeciastawan kikinchaspaqa, yachanchej kay tiempopi “norte ladomanta reyqa” Rusiawan paywan ujchasqa suyuswan ima ninakusqanta. ‘Sur ladomanta reytaj’ Reino Unidowan, Estados Unidoswan ninakusqanta. Paykunaqa uj atiyniyoj gobiernolla kanku. c

16. ¿Imaspitaj rikukunku ‘norte ladomanta reypa’ kamachiyninpi tiyakoj hermanos?

 ¹⁶ “Norte ladomanta reyqa” kamachiyninpi tiyakunku chay hermanosninchejta qhatiykachashan. Wakin hermanosninchejtaqa creenciasninkurayku maqanku, carcelman ima wisqʼanku. Jinapis hermanosninchejqa ‘norte ladomanta reypa’ ruwasqasninwan mana mancharinkuchu, manaqa creeyninku astawan sinchʼiyan. ¿Imarayku? Paykunaqa sutʼita yachanku Daniel libropi Diospa kamachisnin qhatiykachasqa kanankuta nikusqantaña (Dan. 11:41). d Chayta yachayqa noqanchejtapis yanapawanchej suyakuyninchejmanta mana iskayrayanapaj, Jehovatapis kasukunallapajpuni.

17. ¿Imaspitaj rikukunku ‘sur ladomanta reypa’ kamachiyninpi tiyakoj hermanosninchej?

¹⁷ Pasaj wataspi ‘sur ladomanta reypis’ Jehovaj llajtanta qhatiykachallarqataj. Primera Guerra Mundial kashajtin, Segunda Guerra Mundial kashajtinpis, guerraman mana riyta munasqankurayku  ashkha hermanosninchejta carcelman wisqʼaykorqanku, wakin testigo wawastapis escuelamanta wijchʼorqanku. Jinapis kay qhepa watasllapi chay reypa kamachiyninpi tiyakoj hermanosqa, waj jinasmanta pruebaman churasqa kanku. Elecciones kajtin, ichapis uj cristianotaqa uj partidota chayri uj politicota apoyananpaj sonqon aysanman. Ni pipaj votajtinpis, ichapis yuyayninpi, sonqonpi munanman uj político ganananta. Politicaman ni imaynitata chhapukunapajqa, mana ruwasqallanchejtachu qhawarikunanchej tiyan, manaqa imatachus yuyasqanchejta, imachus sonqonchejpi kasqantapis (Juan 15:18, 19; 18:36).

18. Chay iskay reyes maqanakushasqankuta rikuy, ¿imaynatá yanapawanchej? (Dibujostawan qhawariy).

¹⁸ ‘Sur ladomanta reyqa’, ‘norte ladomanta reywan’ wajrasninta takanachishan. Chayta rikuspataj Bibliaj profeciasninpi mana creej runasqa mayta mancharinkuman, llakikunkumantaj (Dan. 11:40). Chay iskaynin reyespata ashkha bombas tiyapun, chaywantaj kay jallpʼapi kausayta tukuchiyta atinkuman. Noqanchejtajrí yachanchej Jehovaqa chayta ruwanankuta mana saqenanta (Isa. 45:18). Chayrayku mana llakikunchejchu, nitaj manchikunchejchu. Astawanpis ‘norte ladomanta reywan’ ‘sur ladomanta reywan’ chejninakusqankuta rikuspa, creeyninchej astawan sinchʼiyan. Chay chejninakusqankoqa sutʼita rikuchiwanchej kay mundoj tukukuynin qayllitapiña kashasqanta.

19. ¿Imaynapí yachanchej Bibliaj profeciasnin juntʼakunantapuni?

¹⁹ Mana yachanchejchu imaynatachus Bibliamanta wakin profecías juntʼakunanta. Profeta Danielpis qhelqasqanmanta wakintaqa mana entienderqachu (Dan. 12:8, 9). Jinapis imaynatachus uj profecía juntʼakunanta mana sumajsitutachu entiendesqanchejqa, mana niyta munanchu mana juntʼakunanta. Kayta sutʼita yachanchej: Jehovaqa imatachus yachayta necesitanchej chayta, maychus tiemponpi sumajta sutʼinchawasun, imaynatachus ñaupa tiempopi ruwarqa ajinata (Amós 3:7).

20. 1) ¿Ima profeciastaj tumpamantawan juntʼakonqa? 2) ¿Imatá ruwanallanchejpuni tiyan?

²⁰ Nacionesqa kay jinata nenqanku: “Tukuy imapis allillan, ni imamanta llakikuna kanchu”, nispa (1 Tes. 5:3). Chantataj kay mundomanta gobiernosqa llulla religionespa contranpi oqharikuspa qʼalata tukurpachenqanku (Apo. 17:16, 17). Chaymantataj Diospa llajtantañataj chinkachiyta munanqanku (Eze. 38:18, 19). Ajinamanta Armagedón guerra qallarenqa, chay kanqa último kaj maqanakuy (Apo. 16:14, 16). Ni imaynitata iskaychakunchejchu tukuy chay imas tumpamantawan juntʼakunanmanta. Chaykamataj Bibliaj profeciasnin imaynatachus juntʼakushasqanta sumajta reparana, wajkunatapis chayllatataj ruwanankupaj yanapana. Ajinamanta Tatanchej Jehovaman agradecekusqanchejta rikuchillasunpuni.