1. ¿Imajtintaj Daniel babiloniospaj may sumajpaj qhawasqa karqa?

 DANIELTAQA Joven kashajtin, babilonios may karuman presota apakaporqanku. Jinapis Danielqa jovencitollaraj kaspapis, babiloniospa rikusqankuman jinaqa sumaj qhawasqa joven karqa. Payqa ‘ni iman imanasqa, sumaj rijchʼayniyoj’ karqa, may rejsisqa familiamantataj (1 Sam. 16:7). Chayrayku paytaqa yachacherqanku reypa kamachina wasinpi sirvinanpaj (Dan. 1:3, 4, 6).

2. ¿Imatá Jehová Danielmanta nerqa? (Ezequiel 14:14).

² Jehovaqa Danielta munakorqa. Jinapis mana sumaj rijchʼayniyoj kasqanraykuchu, nitaj sumaj familiamanta kasqanraykuchu, manaqa ñaupaqenpi allin runa kananpaj kallpachakusqanrayku. Jehovaqa payta unayta sirvej kamachisninmanta parlashaspa Noemanta, Jobmanta jina, Danielpa sutintawan oqharerqa. Chaypachataj Danielqa 20 watasniyojchus nirajchus kasharqa (Gén. 5:32; 6:9, 10; Job 42:16, 17; Ezequiel 14:14 leey). Danielqa unayta kausakorqa, kausaynintaj tʼukunapaj jina karqa. Jehovataj payta munakullarqapuni (Dan. 10:11, 19).

3. ¿Imastá kay yachaqanapi yachakusun?

³ Danielqa iskay imasrayku Jehovapaj may munasqa karqa. Kay yachaqanapitaj chaykunamanta yachakusun. Ñaupajtaqa qhawarisun ima kutispichus Daniel mana manchachikusqanta, Jehovatataj kasukusqantapuni. Chantá qhawarisun ajina kananpaj imatachus ruwasqanta, noqanchejpis imaynatachus pay jina ruwananchejta. Kay yachaqana jovenespaj astawan kajtinpis, tukuyninchej Danielmanta mayta yachakusunman.

4. ¿Maykʼajtaj Daniel mana manchachikorqachu?

⁴ Mana manchachikoj runasqa mana manchikuyninkuwan atipachikunkuchu, allin kajtapunitaj ruwanku. Danielqa mana manchachikoj joven karqa. Qhawarina imaynatachus iskay kutispi chayta rikuchisqanta: Ñaupaj kajqa babilonios Jerusalenta thuñisqankumanta iskay watanman jinasina karqa. Rey Nabucodonosorqa  mosqoyninpi uj jatun lantita rikorqa, chaytaj ni puñukojtapis saqejchu. Chayrayku Babiloniamanta tukuy yachayniyojkunata, Danieltapis nerqa imatachus mosqokusqanta, imatajchus niyta munasqantapis sutʼinchanankuta. Mana sutʼinchajtinkutaj tukuyninkuta wañuchinanta nerqa (Dan. 2:3-5). Danielqa chay rato imatapis ruwanan karqa, manaqa ashkha runas wañunkuman karqa. Chayrayku “Danielqa reypaman rispa uj tiempota suyarinanta mañakorqa reypa mosqokusqan imatachus niyta munasqanta sutʼita willananpaj” (Dan. 2:16). Chayta ruwananpajqa sinchʼi creeyniyoj kanan karqa, mana manchachikojtaj. Imajtinchus Bibliaqa mana ninchu Daniel ñaupajta mosqoykunata sutʼinchasqantaña. Chayrayku payqa kinsa amigosninwan parlarerqa, Babiloniapi paykunaj sutisninkoqa karqa Sadrac, Mesac, Abednego ima. Paykunamantaj “nerqa cielopi kaj Diosmanta khuyakuyninta mañakunankuta, chay pakasqa imata paykunaman sutʼinchananpaj” (Dan. 2:18). Jehovaqa mañakuykunasninkuman kuticherqa, yanapanwantaj Danielqa Nabucodonosorpa mosqoyninta sutʼinchayta aterqa. Ajinamanta Danielwan amigosninwanqa mana wañuchisqachu karqanku.

5. ¿Ima kutipiwantaj Daniel mana manchachikullarqatajchu?

⁵ Daniel chay mosqoyta sutʼinchasqanmanta uj tiemponman, watejmanta mana manchachikoj kasqanta rikucherqa. Nabucodonosorqa mancharinapaj jina mosqokullarqataj. Chay kutipeqa uj jatun sachʼata rikorqa. Danieltaj mana manchachikuspa imachus Nabucodonosorpa mosqoynin niyta munasqanta sutʼincharqa. Payqa mana manchachikuspa nerqa locoyapunanta, uj tiempotataj niña reychu kananta (Dan. 4:25). Chayrayku Nabucodonosorqa yuyayta atinman karqa Daniel contranpi oqharikushasqanta, wañuchinankutataj kamachinman karqa. Jinapis Danielqa mana manchachikuspa tukuy imata sutʼincharqa.

6. ¿Imataj Danielta yanaparqa mana machachikoj kananpaj?

⁶ ¿Imataj Danielta yanaparqa mana manchachikunanpaj? Jovenmantapacha maytachá tatasninmanta yachakorqa. Tatanwan mamanwanqa imatachus Jehová israelita tatasman kamachisqanta kasukorqanku, Diospa Leynintataj payman yachacherqanku (Deu. 6:6-9). Danielqa Leymanta mana wakin imitasllatachu yacharqa, nitaj Chunka Kamachiykunallatachu. Payqa sumajta yacharqa ima mikhunastachus  israelitas mikhuyta atisqankuta, imastatajchus mana (Lev. 11:4-8; Dan. 1:8, 11-13). b Chantapis yacharqa imastachus Diospa llajtan ruwasqanta, mana kamachiykunasninta kasukojtintaj imapichus rikukusqanta (Dan. 9:10, 11). Tukuy kausayninpi imaschus pasasqanqa sutʼita payman rikucherqa Jehovawan, atiyniyoj angelesninwanqa yanapanankupaj paywanpuni kashasqankuta (Dan. 2:19-24; 10:12, 18, 19).

7. ¿Imataj Danielta yanapallarqataj mana manchachikoj kananpaj? (Dibujotawan qhawariy).

⁷ Danielqa Diospa profetasninpa qhelqasqasninkuta estudiajpuni. Chaykunamanta ujnintaj Jeremiaspa qhelqasqan karqa. Ajinata estudiasqanrayku tiemponmanqa repararqa, judíos Babiloniamanta kacharichisqa kanankoqa qayllaykamushasqantaña (Dan. 9:2). Payqa Jehovaj profeciasnin imaynatachus juntʼakusqanta rikuspa astawanchá Jehovapi atienekorqa. Uj runa Jehovapi mayta atienekun chayqa, nipuni imatapis manchachikunchu (Rom. 8:31, 32, 37-39, kikinchay). Danielqa Tatan Jehovaman orakuytapuni yachaj. Chay paytaqa astawan yanaparqa (Dan. 6:10). Danielqa Jehovaman juchasninta willakoj, imaynachus kashasqantapis, yanapantataj mañakoj (Dan. 9:4, 5, 19). Danielqa tukuy runas jina mana nacekusqanmantapachachu mana manchachikoj runa karqa. Payqa estudiaspa, orakuspa, Jehovapitaj atienekuspa mana manchachikoj kayta yachakorqa.

8. ¿Imataj yanapawasun mana manchachikunapaj?

⁸ Tatasninchej mana manchachikojkuna kajtinkupis, paykuna jina kananchejta niwajtinchejpis, mana uj herenciata jina chayta saqewasunmanchu. Noqanchejpuni kallpachakunanchej tiyan mana manchachikojkuna kanapaj. Imaynatachus imata ruwaytapis yachakunchej, ajinallatataj mana manchachikoj kaytapis yachakullanchejtaj. Pipis imata ruwayta yachachishawanchej chayqa, sumajta qhawananchej tiyan kikisitunta ruwanapaj. Ajinallatataj mana manchachikoj kaytapis wajkunata qhawarispa yachakusunman. ¿Imatá Danielmanta yachakunchej? Pay jina Bibliata sumajta estudiana tiyan, Jehovamanta tukuy sonqo ashkhata mañakuspa paywan amigos kananchej tiyan, pay yanapanawanchejpipunitaj atienekunanchej tiyan. Tukuy chayta ruwasun chayqa, creeyninchej pruebaman churasqa kajtinpis mana manchachikusunchu.

9. ¿Imataj kanman mana manchachikoj kajtinchej?

⁹ Mana manchachikoyqa ashkha imaynasmanta yanapawanchej. Qhawarina imachus pasasqanta Ben sutiyoj hermanitota, payqa Alemaniamanta. c Colegionpeqa kausay jinallamanta rikhurisqanpi tukuy creej kanku, yuyajtaj kanku Diospuni tukuy imata ruwasqanmanta Biblia nisqanqa uj cuentolla kasqanta. Uj kuti nerqanku clasesninpi sutʼinchananta imaraykuchus Diospuni tukuy imata ruwasqanpi creesqanta. Paytaj mana manchachikuspa imapichus creesqanta sutʼincharqa. Chayta ruwasqanrayku, ¿imataj karqa? Pay nin: “Profesorneyqa sumajta uyariwarqa, sutʼinchanaypaj wakichikorqani chaymanta copiastataj tukuy compañerosniyman jaywarqa”, nispa. ¿Imatá ruwarqanku compañerosnin? Pay nin: “Ashkha compañerosneyqa sumajta uyariwarqanku, niwarqankutaj respetawasqankuta”, nispa. Paypa experiencianpi sutʼita reparanchej mana manchachikojtinchejqa wajkuna respetayta atiwasqanchejta, wajkunatapis yanapayta atisqanchejta Jehovamanta astawan yachakuyta munanankupaj. Chayrayku mana manchachikoj kanapaj kallpachakoyqa mana qhasichu.

10. ¿Ima niytá munan mana tukukoj munakuy?

¹⁰ Bibliaqa hebreo parlaypi “munakuy” palabrata chayri “mana tukukoj munakuy” palabrata oqharispa kay jinata munakojmanta parlan: tukuy sonqo munakojmanta, pitachus munakun chayman sumaj kʼaskasqa kajmanta ima. Ashkha kutispeqa chay palabrata oqharin Dios imaynatachus kamachisninta munakusqanmanta parlananpaj. Chay kikin palabrallatataj oqharin Diospa kamachisninpura munanakusqanchejmanta parlananpaj (2 Sam. 9:6, 7). Jehovaqa munallantaj paytapis kikillantataj munakunanchejta. Tiempo pasasqanman jina chay munakuyninchejqa astawan sinchʼiyanman. Chayta sutʼita reparanchej Danielpi.

11. ¿Ima pruebapitaj Daniel rikukorqa machituña kashaspa? (Tapapi dibujota qhawariy).

¹¹ Danielqa kausayninpi ashkha kutispi pruebaspi kaspapis, Jehovata munakusqanta rikucherqa. Jinapis 90 kurajniyojña kashajtin uj jatun pruebapi rikukorqa. Chaypachas Babiloniaqa medospa makinpi, persaspa makinpiwan kasharqa, reytaj Darío karqa. Kamachina wasipi wakin sirvejkunaqa Danielta chejnikoj kanku, nitaj Jehovata respetajchu kanku. Chayrayku yuyaychakorqanku imaynatachus Danielta wañuchichinankupaj. Paykunaqa rey Dariowan uj leyta firmaykucherqanku. Danieltaj chay leyta kasukuspaqa Diosta mana kasukushanmanchu karqa, mana kasukuspataj reytañataj mana kasukushanmanchu karqa. Tukuy runas jina reyta kasukusqanta rikuchinanpajqa, 30 diasllata mana Jehovamanta mañakunanchu karqa. Danieltaj Diosta munakusqanta rikucherqa. Chayraykutaj leonespa tʼoqonkuman wijchʼuykorqanku. Jinapis Jehovaqa payta salvarqa munakusqanrayku (Dan. 6:12-15, 20-22). ¿Imataj yanapawasunman Daniel jina kanapaj?

12. ¿Imatá Daniel ruwarqa Jehovata astawan munakunanpaj?

¹² Jehovamanta mana karunchakunapajqa payta tukuy sonqo munakunanchej tiyan. Danielpis Tatan Jehovata tukuy sonqo munakusqanrayku paymanta mana karunchakorqachu. ¿Imatá Daniel ruwarqa Jehovata astawan munakunanpaj? Payqa piensarerqachá Jehovaj kʼacha kaykunasninpi, imaynatachus chaykunata rikuchisqanpipis (Dan. 9:4). Chantapis Danielqa tʼukurej imastachus Jehová payrayku, llajtanrayku ruwasqanpi, chaymantataj agradecekoj (Dan. 2:20-23; 9:15, 16).

13. 1) ¿Ima pruebaspitaj rikukunku joven hermanitosninchej? Ujmanta parlariy (fototawan qhawariy). 2) Qharipura chayri warmipura puñuykuyta allinpajchus manachus qhawasqanchejta tapuwajtinchej, ¿videoman jina imatá kutichisunman?

 ¹³ Joven hermanitosninchejpis, Daniel jinallataj Jehovata mana respetaj runaswan, kamachiykunasnintapis mana kasukoj runaswan muyurisqa kashanku. Ichapis chay runasqa Diosta munakojkunata chejnikunku, wakintaj joven hermanitosta tanqanku Jehovamanta karunchakunankupaj. Ajinapi rikukorqa Australiamanta Gabriel sutiyoj hermanonchej. Colegiollapiraj kashajtin uj jatun pruebapi rikukorqa. Profesoranqa tukuynin alumnosta tapusqa: “¿Imatá ruwawajchej uj amigoykichej qhari masillantaj chayri warmi masillantaj gustasqanta nisojtiykichej?”, nispa. Chaymantataj nisqa chay amigonkoj nisqanta allillanpaj qhawajkuna uj ladoman sayaykunankuta, mana allinpaj qhawajkunataj ujnin ladoman sayaykunankuta. Gabriel nin: “Ujnin ladomanqa noqawan waj testigollawan rerqayku mana allinpajchu qhawasqaykurayku”, nispa. Chaymantataj aswan sinchʼi pruebapiraj rikukorqa. Pay nin: “Clases tukukunanpajqa ashkharaj faltarqa. Compañerosniykuwan profesoraykuwantaj clases tukukunankama insultawarqayku, burlakuwarqayku ima. Tukuy atisqayta ruwarqani sonqo tiyasqalla kanaypaj, creenciasniymantataj sumajta sutʼinchanaypaj. Jinapis mana uyariyta munawarqankuchu”, nispa. ¿Imaynataj chayrayku kasharqa? Pay nin: “Insultawasqankoqa mana gustawarqachu. Jinapis may kusisqa kasharqani Jehovata munakusqayta rikuchisqaymanta, creenciasniytapis sutʼinchasqaymanta”, nispa. d

14. ¿Imatá ruwasunman Jehovamanta mana karunchakunapaj?

¹⁴ Noqanchejpis Jehovata tukuy sonqo astawan munakusun chayqa, Daniel jina paymanta mana karunchakusunchu. Chay munakuy sapa día astawan wiñananpajtaj payta astawan rejsinanchej tiyan. Chaypajtaj imastachus Jehová ruwasqanta estudiananchej tiyan (Rom. 1:20). Joven, ¿ima yanapastaj tiyapusunki Jehovata astawan munakunaykipaj, respetanaykipajpis? Jw.org paginapi ¿Pitaj ruwanman karqa? nisqapi tiyan juchʼuy videos, yachaqanas ima. Chaykunata qhawariwaj. Chantapis leerillawajtaj kay folletosta: ¿Es la vida obra de un Creador? chantá El origen de la vida. Dinamarcamanta sipas hermananchej Esther kay publicacionesmanta kayta nerqa: “Chay folletospa sutʼinchasqanqa mayta gustawan. Mana nisunkichu imapichus creenaykita, manaqa sapa ujña ajllakunanchejpaj jina sutʼinchashan”, nispa. Benpis nillantaj: “Chay yachaqanas, chay folletospis maytapuni creeyniyta sinchʼiyachin. Chaykunata leespa sutʼita reparani Diospuni kausayta rikhurichisqanta”, nispa. Chay folletosta estudiaytawan qanpis Apocalipsis 4:11 nisqanman jinachá niwaj. Chaypi nin: “Jehová Diosniyku, qanllamin jatunchanapaj jina kanki, yupaychanapaj jina, atiyta japʼinaykipaj jinataj, qanmin tukuy imata ruwarqanki”, nispa. e

15. ¿Imatawán ruwasunman Jehovaman astawan qayllaykunapaj?

¹⁵ Jehovata astawan munakunapaj yanapallawasuntaj Wawanpa kausayninmanta estudiay. Alemaniamanta Samira sutiyoj sipas hermananchej chayta ruwarqa. Pay nin: “Jesusnejta Jehovata aswan sumajta rejserqani”, nispa. Samiraqa wawa kashaspa mana entiendeyta atillajchu Jehová sonqoyoj kasqanta, pero Jesusmantaqa mana ajinatachu yuyaj. Pay nin: “Jesusqa wawasta mayta munakoj, tukuypis paypa amigon kayta atillaj kanku. Chayrayku Jesusmanta yachakuy mayta gustawaj”, nispa. Samiraqa  Jesusta astawan rejsisqanman jina astawan Jehovaman qayllaykorqa. ¿Imajtin? Pay nin: “Pisimanta pisi entienderqani Jesusqa Tatanman mayta rijchʼakusqanta, Tatan jinapuni imatapis ruwasqanta. Repararqanitaj Jehovaqa Wawanta kay jallpʼaman kachamusqanta payta aswan sumajta rejsinanchejpaj”, nispa (Juan 14:9). Joven, Jehovaman astawan qayllaykuyta munanki chayqa, allin kanman Jesusta astawan rejsinaykipaj kallpachakunayki. Chayta ruwanki chayqa Jehovata astawan munakunki, ni imaraykutaj paymanta karunchakuyta munankichu.

16. ¿Imaraykutaj munakuyta yachananchej tiyan? (Salmo 18:25; Miqueas 6:8).

¹⁶ Mayta munakoj runasqa sumaj amigosniyoj kanku, nitaj uj tiempollapajchu (Rut 1:14-17). Chantapis Jehovata tukuy sonqo munakusun chayqa sonqo tiyasqa kasun. Imajtinchus payqa niwanchej payta munakojkunata munakunallantataj. Chayta yachaytaj sonqonchejta tiyaykuchin (Salmo 18:25; Miqueas 6:8 leey). Diosninchejqa Tukuy atiyniyoj, Ruwawajninchejtaj. Noqanchejtaj ladonpeqa ni imapischu kanchej. Chayrayku wiñaypaj amigonchej kayta munasqanqa tʼukunapaj jinapuni. Paywan amigos kasqanchejtataj ni pi enemigo, ni wañuypis chinkachiyta atinmanchu (Dan. 12:13; Luc. 20:37, 38; Rom. 8:38, 39). Chayrayku kallpachakunallapuni Daniel jina Jehovata munakunapaj.

17, 18. ¿Imatawán Danielmanta yachakusunman?

¹⁷ Kay yachaqanapeqa Danielmanta iskay imasllata yachakunchej. Jinapis ashkhataraj paymanta yachakusunman. Jehovaqa Danielman wakin imasta mosqoykunapi rikucherqa, wakin imastataj mosqoypi jina. Yanapallarqataj profeciasta sutʼinchananpaj. Chay profeciasmanta ashkhasqa juntʼakunkuña, wakin profeciastaj imaschus tumpamantawan kay jallpʼapi tukuy runaspaj kananta entiendechiwanchej.

¹⁸ Qhepan yachaqanapi parlarisun Danielpa iskay profeciasninmanta. Chayta entiendeyqa jovenesta, kurajkunatapis yanapawanchej kunanña kausayninchejpi allin imasta ajllanapaj. Chay profeciasqa astawan yanapallawasuntaj mana manchachikojkuna kanapaj, Jehovatataj tukuy sonqo munakunapaj. Ajinamanta wakichisqa kasun tumpamantawan jamonqa chay pruebaspaj.