• “Qosay kutin kutitapis wasanchashawanman jina sientekorqani”.

• “Kʼumuykachachisqa sientekorqani, yuyarqani mana kʼachitachu kasqayta, ni imapajtaj valesqayta”.

• “Sapallay sufrisharqani, nitaj ni piwan chaymanta parlarikuyta aterqanichu”.

• “Yuyarqani Jehová noqamanta mana llakikusqanta”.

Chay nisqankupi sutʼita reparanchej, imaynatapunichus uj warmi sufrisqanta qosan pornografiata qhawajtin. a Killastaña watastaña qosan chayta pakayllapi qhawashan chaytaj, ichá payqa yuyanman qosanpi niña confiayta atinanta. Uj warmi nerqa: “Kaymanta jinalla qosayqa mana rejsisqay runa jina karqa. Yuyajtaj kani: ‘¿Imatawán pakashawanri?’, nispa”.

¿Qosaykipis pornografiata qhawaymanchu urman? b Kay yachaqanaqa qan jina hermanasta yanapananpaj wakichisqa kashan. Kay yachaqanapeqa Bibliaj yuyaychaykunasninta yachakusun, chaykunataj sonqochasonqa, Jehová yanapasunanta yuyarichisonqa. Yanapallasonqataj sonqo tiyasqa kanaykipaj, Jehovaj qayllallanpipunitaj kanaykipaj. c

Qanqa mana qosaykita ñawillaykipi purichiyta atiwajchu. Jinapis kay imasta ruwawaj sonqo tiyasqa kanaykipaj. Chaykunata qhawarina.

Ama yuyaychu qan juchayoj kasqaykita. Ichapis warmeqa yuyanman, qosan pornografiata qhawasqanmanta pay juchayoj kasqanta. Alicemanta parlarina. d Payqa yuyarqa mana kʼachita warmichu qosanpaj kasqanta. Ajinatataj piensaj: “¿Imajtintaj qosayman waj warmista qhaway gustanri?”, nispa. Wakin warmistaj phiñakusqankurayku mal sientekunku, phiñakuyninkuwan qosankuta mana yanapanankuta yuyasqankurayku. Daniela nin: “Rabiamanta phatasharqaniña. Yuyarqani chay phiñakuyniywan noqallataj matrimonioyta mana allinman tukuchishasqayta”, nispa.

Qanpis ajinata yuyanki chayqa, yuyarikuy Jehovaqa mana qantachu juchachasusqanta qosayki imatapis ruwasqanmanta. Santiago 1:14 nin: “Sapa  ujta munaynillantaj pruebaman churan sonqonta aysaspa, suwaspataj”, nispa (Rom. 14:12; Fili. 2:12). Reparanchej jina Jehovaqa mana qantachu juchachasunki, astawanpis mayta munakusunki tukuy sonqo payta sirvisqaykimanta (2 Cró. 16:9).

Qosayki pornografiata qhawasqanqa mana ninayanchu qanqa mana kʼachita warmichu kasqaykita. Chayta entiendeyqa mayta yanapasunkiman. Yachayniyoj runasqa ninku pornografiata qhawaj runasqa, millay khuchi imasta ruwayta munapayasqankuta, nitaj ni mayqen warmipis chay munayninkuta sajsachiyta atisqanta.

Ama chay yuyayllaqa kaychu. Catherine nin: “Tuta pʼunchay yuyaj kani qosay pornografiata qhawasqanpi. Nipuni chayta umaymanta orqhoyta atejchu kani”, nispa. Francespis nillantaj: “Qosay maypichus kashasqanta mana yachaspaqa ni imanakuyta atinichu, diantintataj ajina kani”, nispa. Waj hermanastaj ninku qosanku pornografiata qhawasqanta yachaj hermanoswan, hermanaswan kaspa mayta pʼenqakusqankuta. Wakintaj ninku sapallanku sientekusqankuta, ni pi entiendesqanta yuyasqaykurayku.

Ajinapi rikukojkunaqa ajinatapuni sientekuyta yachanku. Pero chayllapipuni yuyanki chayqa, astawan llakikunki. Aswan sumaj kanman Jehovaman astawan qayllaykunaykipaj kallpachakunayki. Chaytaj kallpata qosonqa ñaupajllamanpuni rinaykipaj (Sal. 62:2; Efe. 6:10).

¿Imaynatá yanapasunkiman Bibliata leey, chaypitaj tʼukuriy? Bibliapeqa may sinchʼi llakiypi rikukoj warmismanta parlan. Paykunataj Jehovaman llakiyninkuta willakuspa, niña anchata llakikorqankuchu. Jehová llakiyninkuta mana chinkachejtinpis sonqo tiyayta paykunaman qorqapuni. Anapi piensarina. Payqa “sonqon ukhupi may phutisqa” kasharqa. Chayrayku ‘unayta Jehová Diosmanta mañakorqa’. Chaytaj yanaparqa sonqon tiyaykunanpaj, problemasnin imaynatachus allinchakunanta mana yachajtinpis (1 Sam. 1:10, 12, 18; 2 Cor. 1:3, 4).

Ancianoswan yanapachikuy. Paykunaqa kanku “wayramanta pakakunapaj jina, sinchʼi paramanta pakakunapaj jina” (Isa. 32:2). Chantapis ancianosqa ichá nisonqanku sonqocharisunanpaj, imatapis willarikunaykipaj de confianza hermanawan parlarinaykita (Pro. 17:17).

Ichá nishanki: “¿Imaynallamantapis qosayta yanapayta atiymanchu manaña pornografiata qhawananpaj?”, nispa. Arí, atiwaj. Biblia nin uj problemata chayri uj atiyniyoj enemigota atipanapajqa “aswan allin iskay ukhu kayqa” kasqanta, “ujlla kanamantaqa” (Ecl. 4:9-12). Yachayniyoj runas ninku pornografiata qhawayta aswan facilta saqeyta atisqankuta qhariwarmi jina yanapanakojtinku. Ajinamanta matrimonionkupi watejmanta confianza kananpaj.

 Sutʼita yachanayki tiyan qosayki pornografiata qhawayta saqeyta munasqantapunichus manachus, chaypajtaj kallpachakushasqantachus manachus. Pay, ¿Jehovamanta kallpata mañakunchu? ¿Ancianospa yanapaynintapis maskʼanchu? (2 Cor. 4:7; Sant. 5:14, 15). Pornografiata manaña qhawananpaj, ¿imatapis ruwanchu? ¿Sigachu celular, computadora qhawarisqalla kashan? ¿Cuidakushanchu chay juchaman tanqaj imasmanta? (Pro. 27:12). ¿Yanapachikusunkichu? ¿Mana pakaspatajchu tukuy imata willasunki? Jina kajtenqa ichapis yanapariyta atiwaj.

¿Imaynata? Qhawarina imatachus Felicia ruwasqanta. Qosan Ethanqa wawamantapacha pornografiata qhawayman yachasqa kasqa. Feliciaqa tukuy imata ruwan qosan pornografiata qhawayta munajtin payman willarikuyta atinallanpaj. Ethanqa nin: “Warmiymanqa tukuy imata willariyta atillani, ni imata pakaspa. Payqa may kʼacha noqawan. Pornografiata qhawaypi manaña urmanaypaj yanapawan, tapuriwaytapunitaj yachan imaynachus kashasqayta. Chantapis yanapallawantaj sumajta Internetta apaykachanaypaj”, nispa. Pero Feliciaj sonqonqa mayta nanan qosan pornografiata qhawayta munajtin. Pay nin: “May phiñasqa kasqaywan, sonqo nanasqa kasqaywanqa mana qosayta yanapasajchu chay vicioman manaña urmananpaj. Chayrayku ñaupajtaqa chay problemanmantaraj parlariyku. Chaymantataj niyku imatachus ruwanaykuta, sonqoy manaña anchata nananawanpaj”, nispa.

Ajinata sumajsituta parlarikusqankurayku purajmanta yanapanakunku. Warmeqa qosanta yanapan manaña pornografiata qhawananpaj, qosantaj warminta yanapan paypi watejmanta confiananpaj. Uj qosa warminman ima sajra imasmanchus sonqon aysasqanta willarejtin, maypichus kashasqanta willarejtin, imatachus ruwashasqanta willarejtin, warmenqa paypi confiayta atillanqa.

Qanrí, ¿chayman rijchʼakojta imatapis ruwawajchu qosaykita yanapanaykipaj? Jina kajtenqa ichapis allin kanman kay yachaqanata khuska leerinaykichej. ¿Imatataj qosayki ruwanan kanman? Pornografiata qhawayta saqenan tiyan, tukuy imatataj ruwanan tiyan watejmanta qan paypi confianaykipaj. Chay vicionmanta parlarejtiyki, phiñakunanmantaqa kallpachakunan tiyan imaynachus sientekusqaykita entiendesunanpaj. Qanrí, ¿imatá ruwanayki kanman? Chay viciota saqenanpaj imastachus ruwashasqanpi yanapay. Chantapis payqa reparanan tiyan qan watejmanta paypi confiashasqaykita. Iskayniykichej sumajta yachanaykichej tiyan imaschus runasta tanqasqanta pornografiata  qhawanankupaj, imastatajchus ruwananku kasqanta manaña pornografiata qhawanankupaj. e

Ichapis mana atillankichejchu mana phiñarikuspalla chaymanta parlayta. Jina kajtenqa ichapis allin kanman uj tiempota uj anciano qankunawan khuska kanan, chaymanta parlarinaykichej kajtin. Iskayniykichejmanta uj ancianota ajllakuychej. Kayta yuyarikuypuni: Qosayki pornografiata qhawayta saqejtinñapis, ichá qanqa mana chay rato paypi confiayta atillankichu, manaqa unayninmanraj. Pero kallpachakullaypuni. Qhariwarmi kausayniykichejpi imitaschus allinyashasqanpi piensariy. Ama yuyaychu matrimonioyki ni jaykʼaj watejmanta allinyananta. Chaypajqa tiempowan pacienciallawan necesitakun (Ecl. 7:8; 1 Cor. 13:4).

Qosayki pornografiata qhawayman watejmanta urman chay, ¿niyta munanchu ni imaynitata arrepientekusqanta chayri ni jaykʼaj chayta qonqananta? Mana jinapunichu kanman. Chayta qhaway paypaj uj vicio chayqa, ichapis wañupunankama kallpachakunan kanqa chay munayninwan mana atipachikunanpaj. Watastaña saqejtinpis watejmanta qhawayta qallarinman. Mana chaypi watejmanta urmananpajqa wakin imasmanta astawanraj cuidakunan tiyan. Chaytataj ichapis ruwanallanpuni kanqa chay vicionta qonqasqantaña yuyajtinpis (Pro. 28:14; Mat. 5:29; 1 Cor. 10:12). ‘Yuyayninta’ cambianan kanqa, “sajra kajta” chejnikuytataj yachakunan kanqa. Chaykunataj kanku pornografía, millay imasta ruway, masturbación viciopis (Efe. 4:23; Sal. 97:10; Rom. 12:9). ¿Qosayki kallpachakuyta munanchu chay imasta mana qhawananpaj, nitaj ruwananpaj? Jina kajtenqa pisimanta pisi pornografiata qhawayta saqepuyta atenqa. f

¿Qosayki pornografiata qhawayta manapuni saqeyta munanchu chayrí? Jina kajtenqa ichapis qanqa sonqo pʼakisqa kanki, wasanchashasusqanta yuyanki, rabiakunkitaj. Pero tukuy llakiyniykita Jehovaman willakuy. Chaytaj yanapasonqa sonqo tiyasqa kanaykipaj (1 Ped. 5:7). Chantapis Bibliata estudiallaypuni, orakullaypuni, tʼukurillaypunitaj. Ajinamanta sapa kuti astawan Jehovaman qayllaykunki, reparankitaj paypis qanman qayllaykamususqanta. “Jehová Diosqa sonqo pʼakisqa runaspa qayllallanpi kashan”, watejmanta kusisqa kanankupajtaj yanapayta munan (Sal. 34:18). Tukuy atisqaykita ruway sumaj cristianallapuni kanaykipaj, ancianospa yanapayninta maskʼay, amataj yuyaychu qosayki ni jaykʼaj cambiayta munananta (Rom. 2:4; 2 Ped. 3:9).