Chay yachaqanapeqa yachakorqanchej runaspis angelespis mayta suyakushasqanchejta, Jehovaj jatun sutin jatunchasqa kananta. Jehová Dioslla gobernananpaj derechoyoj kasqanpis, nisunman paylla sumaj kamachej kasqanpis, chayman japʼisqallataj kashan, mana wajchu. Runas Diosta tukuy sonqochus manachus kasukunankupis chayman japʼisqallataj kashan, manallataj wajchu.

Chanta, ¿imajtín ninchej Diosninchejpa sutin Jehová, sutin jatunchasqa kananpis aswan sumaj kasqanta? Kay kinsa imasrayku:

Ñaupaj kaj: Edén huertapi Satanasqa Jehovaj sutinta chʼichicharqa nisunman payta sajrapaj qhawacherqa. Satanasqa imatachus Evaman tapusqanwan entiendecherqa Diosqa michʼa kasqanta, Adanmanwan Evamanwan imatachus kamachisqantaj paykunapaj anchañataj kasqanta. Chaymantataj Satanasqa mana pʼenqakuspa nerqa Jehová llulla kasqanta. Chayta nispaqa, llullakuspa payta tumpasharqa, ajinamanta sutinta chʼichicharqa. Chaymantapachataj payqa ‘Diabloman’ tukorqa. Chay sutitaj niyta munan “llullakuspa tumpaj” (Juan 8:44). Evataj Satanaspa llullasninta creeykuspa, Diosta mana kasukorqachu. Ajinamanta rikucherqa mana Dioschu kamachejnin kananta munasqanta (Gén. 3:1-6). Kay tiempopipis Satanasqa Diospa sutinta chʼichichashallanpuni, imaynachus Jehová kasqanmanta llullasta parlaspa. Chay llullasninta creej runastaj mana Jehovata kasukuyta munallankuchu. Chayrayku Diospa kamachisninpajqa manapuni allinchu Jehovaj Santo sutinmanta chay jina llullasta parlakusqanqa. Chayraykutaj mundo enteropi ñakʼariykuna, sajra ruwaykuna ima tiyan.

Iskay kaj: Jehovaqa runaspa chantá angelespa allininkurayku sutinta jatunchananta, llimphuchananta ima nin. Chayta ruway paypajqa tukuy imamanta aswan sumaj. Chayrayku pay nin: “Jatun sutiytaqa llimphuchasajpuni”, nispa (Eze. 36:23). Jesustaj mañakuyta yachachishaspa nerqa: “Sutiyki jatunchasqa kachun”, nispa (Mat. 6:9). Chay nisqanpi sutʼita reparanchej Jehovaj kamachisninpajqa, sutin jatunchasqa kananta mañakunanchej ñaupajpi kanan kasqanta. Bibliaqa kutin kutita niwanchej Jehovaj sutinta jatunchananchej kasqanta. Ujnin versiculopi nin: “Jehová Diosta jatunchaychej sutin jatunchanapaj jina kasqanrayku”, nispa (1 Cró. 16:29; Sal. 96:8). Waj versiculopitaj nin: “Diospa sumaj sutinta jatunchaspa takiychej”, nispa (Sal. 66:2). Wajpitaj nillantaj: “Sutiykita wiñaypaj jatunchasaj”, nispa (Sal. 86:12). Uj pachataj Jehovapuni cielomantapacha parlamorqa, Jesús Jerusalén templopi kashajtin. Chaypitaj Jesusqa nerqa: “Tatáy, sutiykita jatunchay”, nispa. Jehovataj kuticherqa: “Jatunchaniña, watejmantapis jatunchallasajtaj”, nispa (Juan 12:28). a

Kinsa kaj: Jehovaqa munan santo sutin wiñaypaj jatunchasqallapuni kananta. Kaypi piensarina: Cristo waranqa watasta kamachiyta tukojtin, qhepa kaj pruebataj pasajtin, ¿imataj kanqa?  Chay tiempopi, ¿imatataj angelespis runaspis Jehovaj sutinmanta yuyanqanku? Chay tiempopeqa runas manaña rikuchinankuchu kanqa Jehovata tukuy sonqochus manachus kasukushasqankuta. ¿Imaraykú chayta ninchej? Tukuy runas manaña juchasapaschu kanqanku, qhepa kaj pruebatataj pasanqankuña. Paykunaqa wiñaypaj kausakuyta atenqanku. Chantapis manaña iskayrayasunchu Jehová sumaj kamachejpunichus manachus kasqanmanta. Chay tiempopeqa cielopipis kay jallpʼapipis tukuy ujchasqa kanqanku, Jehovalla kamachejninku kasqantataj tukuy sonqo japʼikonqanku. Jehovaj sutinwanrí, ¿imataj kanqa?

Sutenqa jatunchasqamantapis jatunchasqaña kanqa. Niña ima llullapis sutinta chʼichichayta atenqachu. Cielopi tiyakoj Diospa kamachisninpajpis kay jallpʼapi tiyakoj Diospa kamachisninpajpis, sutenqa may sumajllapuni kanqa. ¿Imarayku? Paykunaqa rikonqanku Jehová tʼukuna imasta ruwashallasqantapuni. Jesusqa Tatanman tukuy atiyta qosqanta kʼumuykukoj sonqowan kutichiponqa. “Ajinamanta Dioslla tukuyta kamachinanpaj” (1 Cor. 15:28). Chay pasaytataj kay jallpʼapi tiyakojkunaqa “Diospa wawasnin jina kacharichisqa kanqanku, chaytaj may sumajpuni” kanqa (Rom. 8:21). Jehovataj munayninta juntʼasqata juntʼanqa, cielopi kaj wawasninta, kay jallpʼapi kaj wawasnintapis uj familiallaman tukuchenqa (Efe. 1:10).

Tukuy chay imas pasajtin, ¿imaynataj Jehovaj familian kanqanku? Tukuyninku cielopipis kay jallpʼapipis maytapuni munanqanku Jehovaj kʼachitu sutinta wiñaypaj jatunchallaytapuni. Chay munayninkutaj nina jina laurarenqa. Salmista Davidqa Dios yuyaychasqanman jina qhelqarqa: ‘Jehová Diosqa jatunchasqa kachun. Sumaj sutenqa jatunchasqa kachun’, nispa (Sal. 72:18, 19). Paraisopeqa wiñaypaj wiñaynintinpaj mosoj imasta yachakusun imasraykuchus Jehovaj sutinta jatunchananchej kasqanmanta.

Jehovaj sutenqa imaynachus pay kasqanwan ninakun. Chayrayku sutinpi piensarispaqa munakuyninpi yuyanchej (1 Juan 4:8). Wiñaypaj yuyarikusunchej Jehovaqa munakuwasqanchejrayku ruwawasqanchejta, munakuwasqanchejrayku Wawanta kacharichinawanchejpaj kachamusqanta, munakuwasqanchejraykullataj sumaj cheqan kamachej kasqanta rikuchisqanta. Chantapis Jehová wiñay wiñaypaj munakuwasqanchejta rikullasunpuni. Wiñay wiñaynintinpaj Tatanchej Jehovaman astawan qayllaykunanchejpaj sonqonchej aysallawasunpuni, sumaj sutintataj takispa jatunchallasunpuni (Sal. 73:28).