1. ¿Imaraykú gustasunki pacienciakoj runaswan kay?

 TUKUYMAN gustawanchej pacienciayoj runaswan kay. Mana phiñakuspalla pacienciawan suyakuyta yachaj runastaqa respetanchej, pantajtinchej pacienciakuwasqanchejmantapis mayta agradecekunchej. Chantapis Bibliamanta yachachiwajninchejman mayta agradecekunchej mana entiendeyta atejtinchej pacienciakuwasqanchejmanta, yachachiwasqanchejta mana japʼikuyta atejtinchej, chayri mana chayman jina kausakuyta atejtinchejpis pacienciakuwasqanchejmanta. Astawanqa Jehovaman mayta agradecekunchej noqanchejwan pacienciakusqanmanta (Rom. 2:4).

2. ¿Ima kutispitaj mana pacienciakuyta atillasunmanchu?

² Wajkuna pacienciayoj kasqankumanta mayta agradecekojtinchejpis, noqanchejñataj pacienciakunanchej kajtenqa mana atillasunmanchu. Autota manejashajtinchej ancha trancadera kajtin mana pacienciakuyta atillanchejchu, astawanraj tiempo saruykushawanchejña chayqa. Chantapis pi rabiachiwajtinchej ichapis phiñarpakunchej. Wakin kutistaj ichá yuyanchej, Jehová paraisota apamunanta nisqan anchatañataj qheparikushasqanta. ¿Tukuycharí munasunman astawan pacienciayoj kayta? Kay yachaqanapi yachakusun imachus pacienciayoj kay niyta munasqanta, imajtintajchus pacienciakunapuni kasqanta. Chantapis yachakullasuntaj imaschus yanapawasunman aswan pacienciayoj kanapaj.

3. ¿Imaynataj pacienciayoj runa?

³ Pacienciayoj runa imaynachus kasqanmanta tawa imasta qhawarina. Ñaupaj kaj: Mana usqhayllata phiñarparikunchu. Wajkuna phiñachinanpaj jina imata ruwajtinkupis mana chay rato phiñarpakunchu, mana kikillanwantajchu kutichikun, nitaj pitapis rimarpallanchu. Bibliapeqa ñaupaj kutirayku ‘mana usqhayllata  phiñarparikunchu’ nispa nin, Jehovamanta parlashaspa. Kay jinata nin: “Khuyakoj Dios, kʼacha sonqoyoj, mana usqhayllata phiñarparikoj, may jina munakuyniyoj, nisqantapis juntʼanpuni”, nispa (Éxo. 34:6, sutʼinchaynin).

4. Imatapis suyarinan kajtin, ¿imaynataj pacienciayoj runa?

⁴ Iskay kaj: Pacienciayoj runaqa sonqo tiyasqa suyarillan. Imapis qheparejtin mana phiñakunchu, nitaj munanchu chay ratopuni ruwakunanta (Mat. 18:26, 27). Ajina kananchej tiyan ashkha imaspi, sonqo tiyasqalla suyarikuyta yachananchej tiyan. Pillapis imata willarikuwajtinchejqa pacienciawan uyarina tiyan, nitaj pantachinachu tiyan (Job 36:2). Chantapis pacienciakunanchej tiyan Bibliamanta yachakojman uj yachachiyta entiendechinapaj, chayri ima viciotapis saqeyta yanaparinapaj.

5. ¿Imaynamantá pacienciayoj kasqanchejta rikuchillanchejtaj?

⁵ Kinsa kaj: Pacienciayoj runaqa mana chay ratochu imatapis ruwarpayta munan. Wakin kuteqa usqhaysitutapuni imatapis ruwananchej tiyan, jinapis wakin imasta ruwayqa tiempopajpuni. Pacienciayoj runataj mana usqhayllatachu chayta ruwaj churakun, nitaj tukunanrayku ima imatapis ruwarpallanchu. Astawanpis tiempochakun imaynatachus ruwananpi sumajtaraj piensarinanpaj. Chaymantataj calmawan sumajsituta chayta ruwan.

6. Pacienciayoj runa, ¿imaynataj pruebaspi kaspa?

⁶ Tawa kaj: Pacienciayoj runaqa kallpachakun pruebasta mana quejakuspa aguantananpaj. Chayrayku pichus mana aguantajqa mana pacienciayojchu. Arí, tukuypis wakin kutis uj llakiypi kaspa imaynachus kashasqanchejta uj amigonchejman willarikunchejpuni, chaytaj mana juchachu. Jinapis pacienciayoj runaqa tukuy atisqanta kallpachakun allin imas kasqanpi piensarinanpaj, Jehovatataj kusisqa sirvinallanpajpuni (Col. 1:11). Cristianosqa chay tawanejmanta pacienciakunanchejpuni tiyan. Qhawarina imaraykuchus.

7. Santiago 5:7, 8 nisqanman jina, ¿imajtintaj pacienciakunanchejpuni tiyan? (Dibujostawan qhawariy).

⁷ Salvakunapajqa pacienciayoj runaspuni kananchej tiyan. Ñaupa tiempomanta Jehovaj kamachisnin jina, pacienciawan suyakunanchej tiyan Jehová nisqasninta juntʼananta (Heb. 6:11, 12). Bibliaqa chajra runawan kikinchawanchej (Santiago 5:7, 8 leey). Chajra runaqa maytapuni llankʼan. Payqa tarpunan tiyan, qarpanan tiyan, nitaj yachanchu chay tarpusqan maykʼajpunichus poqonanta. Chayrayku pacienciawan suyan, pero yachan tarpusqanta oqharinantapuni. Ajinallatataj cristianospis Jehová Diospaj sinchʼita llankʼanchej, nitaj yachanchejchu ima pʼunchaychus Señorninchej jamunanta (Mat. 24:42). Pacienciawan suyakushanchej, pero yachanchej Jehovaqa nisqasninta maychus tiemponpi juntʼanantapuni. Mana pacienciakusunman chayqa, saykʼupusunman, Jehovamantataj pisimanta pisi karunchakapusunman. Chantapis imaschus uj ratollata kusichiwanchej chay imasta ruwaj churakusunman. Pacienciayoj kasun chaytaj, tukukuykama aguantasun, salvasqataj kasun (Miq. 7:7; Mat. 24:13).

8. ¿Imaraykutaj pacienciayoj kay yanapawanchej wajkunawan allinta apanakunapaj? (Colosenses 3:12, 13).

⁸ Pacienciayoj kaspaqa wajkunawan allinta apanakunchej. Pacienciayoj kanchej chayqa, wajkunata sumajta uyarinchej (Sant. 1:19). Chantapis wajkunawan allinpi kanchej. Imapis phiñachinawanchejpaj jina kajtin, mana chay ratochu imatapis ruwarpanchej, nitaj sonqota nanachinapaj jinachu parlanchej. Chantapis pillapis sonqonchejta nanachiwajtinchej mana usqhayllatachu phiñakunchej, nitaj kikillanwantajchu kutichinchej. Astawanpis ‘ujkuna ujkunawan aguantanakullanchejpuni, tukuy sonqotaj perdonanakunchej’ (Colosenses 3:12, 13 leey).

9. ¿Imaynatá pacienciayoj kay yanapawanchej imatapis ajllananchej kajtin? (Proverbios 21:5).

⁹ Pacienciayoj kayqa yanapallawanchejtaj kausayninchejpi allin imasta ajllanapaj. Chay rato ruwarparinamanta, chayri mana yuyaychakuspalla imatapis ruwarparinamantaqa, tiempochakusun sumajta qhawaykurinapaj imata ruwaychus aswan allin kasqanta (Proverbios 21:5 leey). Sichus uj trabajota maskʼakushanchej chayqa, ichá ima trabajollatapis chay rato japʼikuyta munasunman, wakin reunionesman manaña rinanchej kajtinpis chayri pisillataña predicananchej kajtinpis. Pacienciayoj kasun chaytajrí, kaykunata sumajtaraj qhawaykurisun: maypichus chay trabajo kasqanta, ima horariospichus trabajananchej kasqanta, chay trabajoman yaykojtinchej familianchejpaj, Jehovata yupaychanapajpis tiemponchej kanantachus manachus. Pacienciayoj kaspaqa allin kajtapuni ajllasun.

10. ¿Imatá ruwasunman pacienciakuyta yachakunallapajpuni?

¹⁰ Jehovamanta mañakuna astawan pacienciayoj kanapaj yanapanawanchejta. Pacienciaqa Diospa espiritunpa poqoyninmanta (Gál. 5:22, 23). Chayrayku Jehovamanta mañakuna espíritu santonta qonawanchejta, espiritoj poqoyninmanta kaj imastataj kausayninchejpi rikuchinapaj yanapanawanchejta. Ima kajtinpis mana atishanchejchu pacienciayoj kayta chayqa, espíritu santota ‘mañakunallapuni’ (Luc. 11:9, 13). Chantapis Jehovamanta mañakullasunmantaj pay jina yuyanapaj yanapanawanchejta. Orakuytawantaj tukuy atisqanchejta kallpachakuna sapa día pacienciakunapaj. Mana saykʼuspa Jehovamanta yanapata mañakullasunpuni chayqa, tukuy atisqanchejtataj pacienciakunapaj kallpachakullasunpuni  chayqa, Jehová yanapawasun aswan pacienciayoj kanapaj.

11, 12. ¿Imaspitaj Jehová pacienciayoj kasqan rikukun?

¹¹ Bibliamanta Jehovaj wakin kamachisninpi piensarina. Bibliaqa pacienciayoj ashkha runasmanta parlan. Paykunapi piensarisun chayqa, paykuna jina pacienciayoj kayta yachakusun. Niraj chay runasmanta parlarishaspa, ñaupajta Jehovamantaraj parlarina. Payqa ni pi jina pacienciayoj.

¹² Satanasqa Edén huertapi Jehovaj sutinta chʼichicharqa, Evatataj iskayrayacherqa Jehová cheqan kamachejchus manachus kasqanmanta, munakuyniyoj kamachejchus manachus kasqanmantapis. Jinapis Jehovaqa mana chay ratochu chay llulla Satanasta chinkarparicherqa, astawanpis pacienciakorqa, nitaj rabiawan atipachikorqachu. Payqa yacharqa kamachiynin may sumajpuni kasqanta rikuchinanpaj tiempo necesitakusqanta. Chaykamataj aguantashallanpuni Satanás sutinta chʼichichananta. Chantapis Jehová ajinata pacienciakusqanrayku may chhika runas payta rejsiyta atishankuraj, wiñaypaj kausakuytataj suyakushanku (2 Ped. 3:9, 15). Chayrayku tʼukurinapuni Jehová pacienciakusqanrayku ima sumaj imaschus kasqanpi. Ajinamanta pacienciawan suyakuyta atillasun, tukukuy pʼunchayta maychus tiemponpi apamunankama.

13. ¿Imajtintaj nisunman Jesús kay jallpʼapi kashajtin Tatan jinapuni pacienciayoj kasqanta? (Fototawan qhawariy).

¹³ Jesusqa Tatan jinapuni pacienciayoj. Chaytaj sutʼi rikukorqa kay jallpʼapi kashajtin. Pero wakin kutisqa nichá pacienciakuyta atillarqachu, astawanraj leymanta yachachejkunawan, fariseoswanpis. Paykunaqa puraj uyas karqanku (Juan 8:25-27). Jinapis Jesusqa Tatan jina mana usqhayta phiñarpakullajchu. Enemigosnin insultajtinku, phiñachiyta munajtinkupis,  payqa mana sajra simiwanchu kutichikoj (1 Ped. 2:23). Astawanpis pruebasta pacienciawan aguantarqa, mana quejakuspataj. Chayraykuchá Bibliaqa kay jinata yuyaychawanchej: “Sumajta tʼukuriychej, pichus juchasapaspa sajra rimasqankuta aguantarqa chaypi”, nispa (Heb. 12:2, 3). Noqanchejpis Jehovaj yanapayninwanqa, ima pruebatapis pacienciawan aguantayta atisun.

14. ¿Imatá yachakunchej Abrahán pacienciakusqanmanta? (Hebreos 6:15; fototawan qhawariy).

¹⁴ ¿Imataj yanapawasun tukukuy pʼunchaykama pacienciawan suyakunallapajpuni? Ichapis ninchej: “Tukukoyqa chayamunanña karqa, niñasina kausasajchu chayta rikunaypajqa”, nispa. Ajinata yuyanchej chayqa Abrahanpi piensarina. Jehovaqa Abrahanta nerqa: “Mirayniykita uj jatun nacionman tukuchisaj”, nispa. Chaypachataj Abrahanqa 75 watasniyojña karqa, nitaj wawanpis karqarajchu (Gén. 12:1-4). ¿Abrahán rikorqachu Diospa chay nisqan juntʼakusqanta? Uj chhikallanta rikorqa. Jinapis chaypajqa Éufrates mayuta pasaspa 25 watastaraj suyakunan karqa. Chaymantaraj wawan Isaac nacekorqa, Jehová uj milagrota ruwasqanrayku. Chaymanta 60 watasninmanraj allchhisnin Esauwan Jacobwan nacekorqanku (Hebreos 6:15 leey). Jinapis Abrahanqa manaña rikorqachu miraynin uj jatun nacionman tukusqanta, Sumaj Jallpʼatapis herenciata jina japʼisqankuta. Chayta mana rikojtinpis, Abrahanqa Jehovaj sumaj amigollanpuni karqa (Sant. 2:23). Chantapis Abrahanqa kausarimuytawan maytachá kusikonqa creeyninrayku, pacienciakusqanrayku tukuy naciones bendecisqa kasqankuta yachaspa (Gén. 22:18). ¿Imatá yachakunchej? ¿Jehovaj tukuy nisqasnin juntʼakojta rikusunmanchu? Ichapis mana. Jinapis Abrahán jina pacienciakusun chayqa, mana iskayrayasunchu Jehová kunan bendecinawanchejmanta, paraisopitaj  may chhikatawanraj bendecinawanchejmanta (Mar. 10:29, 30).

15. Bibliata sapallanchejpi estudiashaspa, ¿imastataj ukhuncharisunman?

¹⁵ Bibliaqa waj runasmantapis parlallantaj, pikunachus pacienciallayojtaj karqanku chaykunamanta (Sant. 5:10). Allin kanman paykunamanta estudiananchej. b Davidmanta parlarina. Payqa jovencitollaraj kashaspa Israelpi rey kananpaj ajllasqa karqa, jinapis kamachiyta qallarinanpajqa ashkha watastaraj suyanan karqa. Simeonwan Anawantaj, Mesiasta suyanankukama Jehovata tukuy sonqo sirvillarqankupuni (Luc. 2:25, 36-38). Paykunamanta estudiashaspa kay tapuykunapi piensarisunman: “¿Imataj paykunata yanaparqa pacienciakunankupaj? ¿Ima bendicionestataj japʼerqanku pacienciakusqankurayku? ¿Imaynatá paykuna jina ruwayman?”, nispa. Mana pacienciayoj kajkunamantapis ashkha imasta yachakullasunmantaj (1 Sam. 13:8-14). Kay tapuykunapi piensarisunman: “¿Imaraykutaj mana pacienciakorqankuchu? Mana pacienciakusqankurayku, ¿imaspitaj rikukorqanku?”, nispa.

16. ¿Imaspitaj pacienciakuy yanapawanchej?

¹⁶ Pacienciakusqanchej imaspichus yanapawasqanchejpi piensarina. Pacienciakoyqa yanapawanchej aswan kusisqa kanapaj, aswan sonqo tiyasqataj kanapaj. Chayrayku pacienciakoyqa allinninchejpajpuni. Yanapallawanchejtaj wajkunawan allinta apanakunapaj, congregacionpis astawan ujchasqa kananpaj. Pillapis sonqonchejta nanachinawanchejpaj jina imata ruwajtenqa mana usqhayllata phiñarpakunachu. Ajinamanta yanapakusun chay problema mana jatunyananpaj (Sal. 37:8; Pro. 14:29). Nitaj chayllachu, pacienciakuspaqa Tatanchej Jehová jina ruwashanchej, paymantaj astawan qayllaykunchej, chaytaj imamantapis aswan sumaj.

17. ¿Imata ruwanapajtaj kallpachakunanchej tiyan?

¹⁷ Yachakunchej jina, pacienciayoj kayqa may sumajpuni, tukuytataj mayta yanapawanchej. Pacienciakuy mana atikullajtinpis Jehovaqa yanapawasun pacienciakuyta yachakunallapajpuni. Paraisota pacienciawan suyakunanchejkamaqa kayta sutʼita yachanchej: Jehovaqa “payta manchikojkunata cuidan, munakuyninta suyakojkunata” (Sal. 33:18). Chayrayku tukuyninchej kallpachakunanchej tiyan pacienciawan pʼachawan jina pʼachallikunallapajpuni.