1, 2. 1) ¿Imaynatá Isaías 60:22 kay tiempopi juntʼakushan? 2) ¿Imataj Diospa llajtanpi necesitakun?

“KAY pisi puchoj runasqa waranqasta miranqanku; aswan mana kasuy runaspis uj jatun nacionman tukonqanku” (Isa. 60:22). Kay profeciaqa kay tiempopi juntʼakushan. Kay 2015 watapi Jehovaj testigosnenqa Jallpʼantinpi 8.220.105 karqanku, sumaj willaykunamantataj willarqanku. Jehovaqa imaynatachus llajtan wiñananmanta nerqa: “Noqa Tata Diosmin chaytaqa nini. Chay imasqa usqhayta juntʼakonqapuni”, nispa. Tiempo pasasqanman jina, Diospa llajtanpi astawan llankʼaykuna kanqa. ¿Tukuy atisqanchejtachu ruwashanchej Diosmanta willamunapaj, yachachimunapaj ima? Ashkha hermanos, hermanas ima precursores auxiliares chayri regulares jina llankʼashanku. Wakenqa pisi willajkuna kanku chayman Diosmanta willaj ripunku. Wakintaj Tantakuna Wasista ruwaypi mayta yanapakushanku.

² Sapa wata 2.000 congregaciones jina rikhurin. Chay congregacionespitaj ancianos, siervos ministeriales ima necesitakun. Chayrayku sapa wata may chhika hermanos, siervos ministeriales kanankupaj kallpachakunanku tiyan. Jinallataj may  chhika siervos ministeriales, ancianos kanankupaj kallpachakunanku tiyan. Cheqamantapuni tukuyninchej “Señorpa ruwaynimpi” mayta llankʼananchej tiyan (1 Cor. 15:58).

3, 4. ¿Imastá ruwasunman Diospa llajtanpi ñauparinallapajpuni?

³ (1 Timoteo 3:1 leey). Apóstol Pabloqa ancianos kanankupaj kallpachakojkunata sumajta ruwashasqankuta nerqa. Pabloj nisqanman jina, imata tarinapajpis imaynatachus kallpachakunchej, ajinallatataj uj hermano siervo ministerial kananpaj kallpachakunan tiyan. Chay hermanoqa reparan kʼacha kaykunata rikuchinanpaj kallpachakunallanpuni kasqanta. Siervo ministerial kaspataj, anciano kananpajñataj kallpachakun.

⁴ Wakin hermanosqa, Jehovata astawan sirviyta munaspa kausayninkuta tijrachishanku. Sutʼincharinapaj, ichapis chay hermanosqa precursores kayta, Betelpi llankʼayta chayri Tantakuna Wasista ruwaysikuyta munanku. Kunantaj qhawarinachej, imaynatachus Biblia Diospa llajtanpi ñauparinapaj yanapawasqanchejta.

5. ¿Imaynatataj jóvenes Jehovapaj llankʼayta atinkuman?

⁵ Jovenesqa kallpayoj kasqankurayku, Jehovapaj mayta llankʼayta atinku (Proverbios 20:29 leey). Betelpi wakin jovenesqa, librosta, Bibliasta ima imprimispa llankʼanku. Waj jovenestaj, Tantakuna Wasista ruwaspa chayri allinchaspa llankʼanku. Wakintaj sinchʼi llakiykunapi yanapakunku. Wakintaj precursores kanku, yachakushankutaj waj qalluta parlayta chayri pisi willajkuna kanku chayman ripunku.

6-8. 1) ¿Imatá uj hermano ruwarqa, chantá imaynataj rerqa? 2) ¿Imaynatá reparasunman ‘Jehová kʼacha kasqanta’?

⁶ Jehovata munakuspapis, payta yupaychaypi tukuy atisqaykita ruwayta munaspapis, ichá Aaron sutiyoj hermano jina kashanki. Payqa Diosta yupaychaspa kusisqa kayta munarqa, jinapis mana kusisqachu karqa. Wawamantapacha tantakuykunaman, willayman ima rerqa. Pay nin: “Tantakuykunaman, Diosmanta willayman riy ima mayta saykʼuchiwaj”, nispa. ¿Imatá ruwarqa kusiyta tarinanpaj?

⁷ Mayta kallpachakorqa Bibliata sapa pʼunchay leenanpaj, tantakuykunapaj wakichikunanpaj, tapuykunaman kutichinanpaj ima. Chantapis Diosmanta astawan mañakorqa. Chayta ruwasqanqa Diospa llajtanpi ñauparinanpaj yanaparqa. Jehovata astawan rejserqa, astawantaj munakorqa. Chantá precursor jina llankʼarqa, sinchʼi llakiykunapi yanapakorqa, waj suyumantaj Diosmanta willaj rerqa. Kunantaj payqa anciano, Betelpitaj llankʼashan. ¿Imatá kunan pay nin? Payqa nin: “Jehová ‘Dios kʼacha kasqanta yachani’. Mayta bendeciwasqanrayku, Jehovaman manu jina kani. Paypaj astawan llankʼayta munani. Imajtinchus chayqa mana qhasichu kanqa”, nispa.

⁸ Salmista nerqa: “Qhawaychej, yachaychejtaj Tata Diosqa kʼacha kasqanta. [...] Diosta maskʼajkunarí ni imamanta pisichikonqankuchu”, nispa (Salmo 34:8-10 leey). Arí, Jehovata yupaychanapaj tukuy atisqanchejta ruwasun chayqa, cheqamantapuni kusisqas kasunchej. Imaraykuchus yachanchej chayta ruwasqanchej Jehovata kusichisqanta. Paytaj qhawanawanchejta nisqanta juntʼanqa.

9, 10. ¿Imaraykutaj pacienciakunanchej tiyan?

⁹ Ichapis Jehovapaj astawan llankʼayta munanchej. Chaywanpis, ¿imataj kanman congregacionpi unaytaña uj ruwayta suyashanchej chay, chayri kausayninchej manaña ñaupajta jinachu chay? Pacienciakunanchej kanqa (Miq. 7:7). Ichapis Jehová saqellanqa chaykuna ajina kananta. Chaywanpis pay yanapanawanchejpi atienekunallapuni. Abrahampa kausayninpi tʼukurina. Paymanqa Jehová wawayoj kananta nerqa, chaywanpis ashkha watasninmanraj Isaac nacekorqa. Tukuy chay tiempopi, Abrahamqa pacienciakorqa, nitaj Jehovapi creeyninta pisiyacherqachu (Gén. 15:3, 4; 21:5; Heb. 6:12-15).

¹⁰ Suyakoyqa mana atikullanchu (Pro. 13:12). Chaywanpis imapichus rikukushasqanchejpi yuyallasunpuni chayqa, mayta llakikusunman. Chayta ruwanamantaqa, allin kanman congregacionpi yanapakunapaj, kʼacha kaykunata wiñachinapaj ima tukuy tiemponchejta churananchej.

11. 1) ¿Ima kʼacha kaykunata wiñachinapajtaj kallpachakusunman? 2) ¿Imaraykú chayta ruway may sumaj?

¹¹ Kʼacha kaykunata wiñachinapaj kallpachakunallapuni. Bibliata leesun, leerisqanchejpitaj tʼukurisun chayqa, yachayniyoj kasun, tʼukuriyta yachakusun, imatapis sumajta ajllasun. Congregacionta ñaupajman apaj hermanosqa, chay imasta ruwananku tiyan (Pro. 1:1-4; Tito 1:7-9). Bibliata estudiaspaqa, Jehovaj yuyayninta rejsisun. Sapa pʼunchaytaj chay yachakusqanchejman jina imatapis ajllayta atisunchej,  Jehovata kusichinapaj. Sutʼincharinapaj, yachakusunchej kʼachamanta wajkunata parlapayayta, qolqeta allinta apaykachayta, imawanchus sonqonchejta kusirichiyta, imaynatachus pʼachallikuyta ima.

12. ¿Imaynatá atienekunapaj jina kasqanchejta rikuchisunman?

¹² Atienekunapaj jina kana. Jehovaj llajtan watejmanta Jerusalén templota sayarichishajtin, Nehemiasqa ashkha imasta ruwanankupaj kʼacha runasta necesitarqa. ¿Pikunatataj ajllarqa? Atienekunapaj kaj runasta. Imaraykuchus yacharqa chay runas Jehovata munakusqankuta, ima llankʼayta qojtinpis sumajta juntʼanankuta ima (Neh. 7:2; 13:12, 13). Kunanpis kikillantaj. Uj hermano cheqa sonqo, sumajtataj llankʼan chayqa, allinpaj qhawasqa kanqa. Ajinamantataj ichá Diospa llajtanpi astawan ruwaykunata japʼenqa (1 Cor. 4:2). Chayrayku qharis chayri warmis kaspapis, Diospa llajtanpi ima ruwayta qowajtinchejpis, sumajta juntʼana (1 Timoteo 5:25 leey).

13. Pillapis sonqonchejta nanachiwajtinchej, ¿imatá José jina ruwasunman?

¹³ Jehová yanapanawanchejta saqena. ¿Imatá ruwasunman pillapis sonqonchejta nanachiwajtinchej? Paywan parlarisunman. Chaywanpis noqanchej mana juchayoj kasqanchejta nillasunpuni chayqa, ichapis chay chʼampay astawan sinchʼiyanqa. José ruwasqanpi tʼukurina. Paytaqa hermanosnin mayta llakicherqanku. Chantá qhasimanta tumpasqa kasqanrayku carcelman yaykorqa. Jinapis Joseqa Jehovapi atienekorqa. Jehová imatachus ruwananpi yuyarqa, cheqa sonqotaj payman karqa (Sal. 105:19). Chay llakiy tiempopi, Joseqa kʼacha kaykunata astawan wiñacherqa, chaytaj aswan qhepaman uj sumaj llankʼayta ruwananpaj yanaparqa (Gén. 41:37-44; 45:4-8). Pillapis sonqonchejta nanachiwanchej chayqa, Jehovamanta yachayta mañakuna. Payqa yanapawasunchej mana llakikunapaj, chay runata kʼachamanta parlapanapaj ima (1 Pedro 5:10 leey).

14, 15. 1) ¿Imaraykutaj qhawarikunanchej tiyan imaynatachus willashasqanchejta? 2) ¿Imatataj ruwasunman waj jinasmanta willanapaj? (20 paginapi dibujota qhawariy, “ ¿Waj jinasmanta willasunmanchu?”, nisqa recuadrotawan).

¹⁴ Pablo, Timoteota nerqa Diosmanta Qhelqasqasta sutʼinchananpaj kallpachakunallantapuni. Chantapis nillarqataj: “Kawsayniykita allinta qhawakuy, jinallataj imatachus yachachisqaykitapis”, nispa (1 Tim. 4:13, 16). Timoteoqa ashkha watastaña Diosmanta willasharqa. Chantá, ¿imaraykutaj imaynatachus yachachisqanta qhawarikunan karqa? Runas, kausayninku ima, niña ñaupajta jinachu kasqanrayku. Timoteo runas uyarinallankutapuni munarqa chayqa, waj jinasmanta yachachinanpaj kallpachakunallanpuni karqa. Noqanchejpis Diosmanta willamunapaj, pay jina ruwananchej tiyan.

¹⁵ Wakin lugarespi wasimanta wasi willashaspa, reparanchej runas mana wasinkupichu kashasqankuta. Wakin lugarespitaj, runasqa wasinkupi kashanku, jinapis edificiospi tiyakusqankurayku mana paykunawan parlariyta atinchejchu. Willanchej chaypi ajina kajtenqa, waj jinasmanta willasunman.

16. ¿Imaynatá ashkha runas kanku chaypi sumajta willasunman?

¹⁶ Ashkha hermanosqa mayta kusikunku, autos, trenes sayanku chaypi, mercadospi, parquespi ima willaspa. ¿Imaynatá runaswan parlariyta qallarinku? Wakin hermanosqa noticiaspi uyarisqankumanta parlarinku. Waj hermanostaj, wawasmanta  chayri llankʼaymanta parlarinku. Runas parlarillaytapuni munajtinkutaj, Bibliawan sutʼincharinku, imatachus chaymanta yuyasqankutataj tapurinku. Ajinamanta runaswan sumajta Bibliamanta parlarinku.

17, 18. 1) ¿Imataj yanapawasun callepi mana manchachikuspa willanapaj? 2) ¿Imaynatá Davidpa nisqan willaypi yanapawasunman?

¹⁷ Ichapis mana atillanchejchu mana rejsisqa runawan callepi Diosmanta parlariyta. Ajinapi rikukorqa Nueva Yorkmanta uj precursor, Eddie sutiyoj. ¿Imataj manchachikuyninta atipananpaj yanaparqa? Pay nin: “Familiapi Diosta Yupaychanapaj tantakuypi wakin yachaqanasta warmiywan maskʼayku, ajinamanta runaj tapuyninman, mana uyariyta munajkunaman ima kutichinaykupaj. Waj hermanostapis tapurerqayku imachus paykunata yanapasqanta”, nispa. Kunanqa Eddie mayta kusikun, ashkha runas kanku chaypi willaspa.

¹⁸ Runasman willaspa astawan kusikojtinchej, paykunawan sumajta parlarinapaj kallpachakojtinchej ima, Diospa llajtanpi ñauparishasqanchej sutʼi rikukonqa (1 Timoteo 4:15 leey). Ichapis uj runallatapis Jehovaj testigonman tukunanpaj yanapasunman. David nerqa: “Tukuy tiempo Tata Diosta bendecisaj, simiytaj payta yupaychallanqapuni. Noqaqa Tata Diospi jatunta kusikuni; uyariychej, kusikuychejtaj, llampʼu sonqoyoj runas”, nispa (Sal. 34:1, 2).

19. ¿Imaraykutaj Jehovaj kamachisnin wasimanta wasi mana willayta atispapis kusikunkuman?

¹⁹ David nillarqataj: “Tukuy ruwasqasniyki, Tata Dios, jatunchasuchunku; qhatisojkunapis yupaychallasuchunkutaj. Reinoykej jatun kayninmanta parlachunku, atiyniykimantawan, tukuy runasman rejsichinankupaj jatun atiywan ruwasqasniykita, reinoykej jatun kaynintawan”, nispa (Sal. 145:10-12). Jehová Diosta tukuy sonqonkuwan munakojkunaqa, mayta paymanta runasman willamuyta munanku. Chaywanpis machitus chayri onqosqas kasqanchejrayku, ichá mana wasimanta wasi willayta atillanchejchu. ¿Imatataj ruwasunman? Allin kanman muyuyninchejpi kaj runasman willarinanchej, nisunman doctoresman, enfermerasman ima. Ajinata ruwaspaqa Jehovata jatunchallanchejtaj. Diospi creesqanchejrayku carcelpi kaspapis, carcelpi kajkunaman Diosmanta willayta atisunman. Chaypis Jehovata mayta kusichillantaj (Pro. 27:11). Chantapis Jehovaqa kusikullantaj payta sirvejtinchej, familiaresninchej mana payta yupaychajtinkupis (1 Ped. 3:1-4). Llakiypi kaspapis, Jehovata jatunchayta, llajtanpi ñaupariyta ima atinchej.

20, 21. Diospa llajtanpi ñauparisqanchej, ¿imaynatá wajkunata yanapanman?

²⁰ Jehovaqa paywan amigosllapuni kajtinchej, payta sirvinapaj tukuy atisqanchejta ruwajtinchej ima bendeciwasun. Uj sumaj horariota ruwakojtinchej, imatachus Jehová qhepaman ruwananmanta ichá astawan willamuyta atisun. Hermanostapis astawanraj yanapayta atisunchej. Paykunataj congregacionpi llankʼasqanchejta rikuspa, astawanrajchá munakuwasunchej.

²¹ Unaytaña Diosta sirvispapis, tukuyninchej Jehovawan sumaj amigos kanapaj, llajtanpi ñauparinapaj ima kallpachakullasunmanpuni. Qhepan yachaqanapeqa, yachakusunchej imaynatachus wajkunata Diospa llajtanpi ñauparinankupaj yanapananchejta.