BIBLIAMANTA tukuy sonqo yachakojkunaqa, qorita maskʼajkunaman rijchʼakusqankuta nisunman. Imaraykuchus Jehovaj yachayninta tarinankupaj mayta kallpachakunanku tiyan, mayqenchus Bibliapi kashan. Qorita kinsa imaynasmanta maskʼakusqanta, imaynatatajchus Bibliata estudiaywan kikinchakusqanta ima qhawarina.

Mayu kantuta puriykacharishasqaykipi tʼukuriy. Jinallapi uj juchʼuy rumisitu lliphipimushasqanta rikunki. Oqharispataj reparanki qori kasqanta. Chay qoreqa fósforo umitamanta aswan juchʼuysitu, diamantemanta nisqataj mana tariyta atikullanchu. Astawan qorita tarinaykipajtaj maskʼallankipuni.

Bibliamanta yachakuypis kikillantaj. Ichapis ñaupaj wataspi, Jehovaj testigon wasiykiman rerqa Bibliamanta yachachisunanpaj. Ichapis yuyarikunki ñaupaj kutirayku Bibliamanta uj sumaj yachachiyta yachakusqaykita. Ichapis Bibliapi Diospa sutinta chayri Diospa amigon kayta atisqaykita yachakorqanki (Sal. 83:18; Sant. 2:23). Chaykunata yachakuspaqa repararqanki qorimanta nisqa, aswan valorniyoj imata tarisqaykita. Astawantaj yachakuyta munarqanki.

Wakin kutis, qoreqa mayuspi tantakun juchʼuy rumisitus jina chayri challwaj qaritasnin jina. Chaytaj oro aluvial nisqa sutikun. Qorita maskʼajkunaqa uj mashkha killasllapi ashkha kilos qorita tarinkuman. Chaytaj may chhika dólares valen.

Jehovaj testigosninwan Bibliamanta yachakuyta qallarishaspaqa, ichapis qorita maskʼaj runa jina sientekorqanki, pichus qorita tarinanpaj tʼiyuta yakuwan mayllan. Bibliaj versiculosninta leesqaykipi tʼukureyqa, Diosmanta astawan yachakunaykipaj yanapasorqa. Cheqa kajta astawan entiendespataj, Jehovaman astawan qayllaykorqanki, munakususqantataj repararqanki, wiñay kausayta japʼinaykipaj (Sant. 4:8; Jud. 20, 21).

Qorita maskʼaj runasqa mayta kallpachakunku mayuspi qorita tarinankupaj. Ichá qanpis kikillantataj cheqa kajta tarinaykipaj kallpachakunki.  Chaytaj ichapis Bibliamanta cheqa kajta yachakunaykipaj, Diosman kausayniykita qonaykipaj, bautizakunaykipaj ima yanapasorqa (Mat. 28:19, 20).

Qorita maskʼaj runasqa, wakin kutis rumipipis qorita tarillankutaj. Wakin rumispeqa ashkha qori tiyan, chayrayku qorita orqhonankupaj chay rumita tʼunananku tiyan. Ichapis chay rumipi qoreqa pisilla kaspa jinan. Imaraykuchus ashkha rumimanta uj chhika qorillata orqhonku. Jinapis qorita maskʼajpaj, chay ruwasqanqa mana qhasipajchu.

‘Cristomanta qallariypi yachakusqanchejmanta’ astawan yachakunapajqa mayta kallpachakuna tiyan (Heb. 6:1, 2). Bibliata estudiaspaqa, mayta kallpachakuna tiyan sumaj yachachiykunata tarinapaj. Bibliata watastaña estudiaspapis, ¿imatá ruwawaj sumaj yachachiykunata tarinallaykipajpuni?

Ama saykʼuychu, imastachus mana yachankirajchu chaykunamanta yachakunaykipaj kallpachakullaypuni. Kallpachakullaypuni, Diospa yachayninta, yuyaychayninta imataj qorita jina tarinki (Rom. 11:33). Bibliamanta astawan yachakunki, parlayniykipi ima yanapaschus kasqanwan yanapachikuspa. Imaschus Bibliamanta tapuykunasniykipaj yanapasonqa, chaykunata maskʼay. Hermanosta tapuriy, ima yachaqanaschus, ima versiculoschus paykunata yanapasqanta chayri kallpacharisqanta. Qanpis willariy Bibliata estudiashaspa imatachus yachakusqaykimanta.

Chaywanpis mana ashkhata yachakuyllachu. Apóstol Pablo nerqa: “Yachayqa runata umanta oqharichin”, nispa (1 Cor. 8:1). Chayrayku kallpachakullaypuni llampʼu sonqo kanaykipaj, creeyniykita kallpachanaykipaj ima. Familiapi Diosta Yupaychanapaj tantakuy, sapallaykipi Bibliata sumajta estudiay ima yanapasonqa, Jehová Diospaj leyesninman jina kausakunaykipaj, jinallataj wajkunata yanapanaykipajpis. Astawanpis mayta kusikunki, qorimanta nisqa aswan valorniyoj imata tarisqaykimanta (Pro. 3:13, 14).