1, 2. ¿Imaraykutaj wajkunata yanapananchej tiyan Diospa llajtanpi ruwaykunata japʼinankupaj?

JESUSQA Diospa gobiernonmanta willaspa mayta llankʼarqa. Jinapis yachachisqasninta yachachinanpaj tiempochakorqa. Yachacherqa imaynatachus wajkunaman yachachinankuta, imaynatachus Diospa llajtanta qhawanankuta ima. Yachachisqasnintaj sumaj yachachejkuna, sumaj michejkuna ima kayta yachakorqanku (Mat. 10:5-7). Felipe hermanoqa Diosmanta willananpaj tukuy tiemponta churarqa, warmi wawasnintapis kikinta ruwanankupaj yanaparqa (Hech. 21:8, 9). Kunanpis wajkunata yanapananchej tiyan. ¿Imaraykú?

² Tukuy congregacionespi mosoj yachakojkuna tiyan, pikunachus manaraj bautizasqaschu kanku. Paykunaqa yanapanata necesitanku. Yanapananchej tiyan, sapallankumanta Bibliata leey, estudiay ima may sumaj kasqanta entiendenankupaj. Chantapis Diosmanta willamunankupaj, yachachimunankupaj ima yanapanallanchejtaj tiyan. Kunallanraj bautizakoj hermanospis siervos ministeriales, ancianos ima kanankupaj yanapananchejta  necesitanku. Tukuy congregación mosojkunata yanapayta atisunman (Pro. 4:2).

3, 4. 1) Pablo nisqanman jina, ¿imaynatá Bibliata leey willayninchejpi yanapawanchej? 2) ¿Imatá ruwananchej tiyan yachakojta Bibliata estudiananta niraj nishaspa?

³ Sapa ujninchej Bibliata leeyta, estudiayta ima necesitanchej, imachus Diospa munaynin kasqanta yachanapaj. Apóstol Pabloqa chayta Colosasmanta cristianosman sutʼincharqa, nerqataj: “Mana saqeykuchu Diosmanta mañakuyta, Diospa munayninta rejsispa juntʼa kanaykichejpaj”, nispa. ¿Imaraykú may sumaj karqa Bibliata leenanku, estudiananku ima? Imaraykuchus chayqa yachayniyoj kanankupaj yanaparqa, “Señorpa munayninman jina purina[nku]paj, tukuy imapi Diosta kusichispa”. Chantapis yanapallarqataj Jehovaj munayninta ‘ruwanankupaj’, astawantaj sumaj willaykunata willanankupaj (Col. 1:9, 10). Pillamanpis Bibliamanta yachachishanchej chayqa, yanapananchej tiyan entiendenanpaj Bibliata sapa pʼunchay leey, estudiay ima Jehovata sirvinanpaj yanapayta atisqanta.

⁴ Noqanchej Bibliata mana estudiasunchu chayqa, yachakojkunata mana yanapayta atisunchu Bibliata sapallankupi estudiay sumaj kasqanta yachakunankupaj. Bibliata sapa pʼunchay leey, chaypitaj tʼukureyqa cheqamantapuni kausayninchejpi, willaypi ima yanapawasun. Sutʼincharinapaj, willaypi kashajtinchej pillapis mana kutichiyta atinapaj jina tapuwajtinchej, Bibliawan kutichiyta atillasun. Chantapis Jesús, Pablo, wajkuna ima mana saykʼuspa willasqankumanta Bibliapi leespaqa, kallpachakusunchej, mana atikojtinpis Diosmanta willallasunpuni. Bibliapi yachakusqanchejta, imaynatachus yanapawasqanchejta ima wajkunaman willarejtinchej, paykunata kikinta ruwanankupaj yanapasunman. Ajinamanta paykunatapis allin renqa.

5. ¿Imaynatataj Bibliamanta yachakojta sapallanpi Bibliata estudiananpaj yanapasunman?

⁵ Ichapis tapurikunki: “¿Imaynatá estudioyta yanapayman Bibliata sapallanpi estudiananpaj?”, nispa. Bibliamanta yachachishanki chay runata, ñaupajmantaña wakichikunanpaj yanapariwaj. Chaypajtaj imaynatachus chayta ruwananta yacharichiwaj. Chantapis chaymanta parlaj yachaqanata ¿Imatapunitaq Biblia yachachin? libroj yapanpi leenanta niwaj, rikhurej versiculosta maskʼananta ima. Chantá yanapallawajtaj wakichikunanpaj tantakuykunapi tapuykunaman kutichinanpaj. Torremanta Qhawaj, ¡Despertad! revistasta leenanta nillawajtaj. Chantapis Bibliaj tapuyninman kutichiykunata tarinanpaj yanapariwaj. Ichapis chaypajqa Watchtower Library chayri INTERNETPI BIBLIOTECA nisqaman yaykunman. Yachakoj imaymanasmanta Bibliata sapallanpi estudianqa chayqa,  ichapis estudiashaspa kusikonqa, astawantaj yachakuyta munanqa.

6. 1) ¿Imaynatá Bibliamanta yachakojta yanapawaj Bibliata tukuy sonqo jatunpaj qhawananpaj? 2) Yachakoj Bibliata jatunpaj qhawayta qallarenqa chay, ¿imatá ichapis ruwanqa?

⁶ Uj runaman Bibliamanta yachachishanchej chayqa, munanchej chay runa reparananta Biblia may valorniyoj kasqanta. Imaraykuchus Biblia Jehovata sumajta rejsinanpaj yanapashan. Bibliata estudiananpaj tanqanamantaqa, estudiaspa kusiyta tarinanpaj yanaparina. Ajinamanta salmista jina nenqa: “Noqapajqa chaymin aswan sumajqa. Tukuy Atiyniyoj Tata Dios, qanmin pakakunay kanki”, nispa (Sal. 73:28). Jehovaqa payman qayllaykuyta munajkunata cheqamantapuni atiyninwan yanapanqa.

7. ¿Imaynatá Jesús yachachisqasninta wakicherqa? (25 paginapi dibujota qhawariy).

⁷ Mateo 10 capituloqa, Jesús 12 apostolesninman kamachiykunata qosqanmanta parlashan. Payqa tukuy imamanta parlananmantaqa, imaschus paykunata yanapananmanta parlarqa. ^[1] Apostolesqa Jesús imaynatachus runasman willamunata yachachishajtin, sumajta uyarerqanku. Chantá paykunaqa willayman llojserqanku. Imaynasmantachus Jesús runasman willasqanta rikuspataj, apostolesqa pisi tiempollapi sumaj willajkunaman tukorqanku (Mat. 11:1). Noqanchejpis yachakojkunata sumaj willajkuna kanankupaj yanapasunman. Kunantaj qhawarinachej, ima iskaynejmantachus yanapayta atisqanchejta.

8, 9. 1) ¿Imaynatá Jesús runaswan parlarej? 2) ¿Imaynatataj mosoj willajkunata yanapasunman Jesús jina runaswan parlarinankupaj?

⁸ Runaswan parlariy. Jesusqa mana ashkha runaswanpunichu parlaj. Manaqa kʼachamanta sapa uj runawanpis parlarej. Sutʼincharinapaj, uj warmiwan sumajta parlarerqa, chay warmi Sicar nisqa llajtaj qayllanpi pujyumanta yakuta orqhoj jamojtin (Juan 4:5-30). Mateo Leví sutiyoj runawanpis parlallarqataj. Chay runaqa impuestota cobraj, Jesustaj “qhepayta jamuy” nerqa. Mateotaj qhepanta rerqa, chantá Jesuspaj, wajkunapaj ima jatun mikhuyta wakicherqa. Chaypitaj Jesusqa ashkha runaswan Diosmanta parlarqa (Mat. 9:9; Luc. 5:27-39).

⁹ Natanaelqa Nazaret llajtayoj runasmanta mana allintachu parlarqa. Jesusrí Nazaretpi nacekuspapis paywan kʼachamanta parlarqa. Chaytaj Natanaelta yanaparqa Jesusta jatunpaj qhawananpaj, paymanta astawan yachakuyta munananpaj ima (Juan 1:46-51). Jesuspa ruwasqanmanta kayta yachakunchej: runaswan kʼachamanta parlajtinchej, ichapis runasqa Diosmanta willajtinchej uyariwasunchej. ^[2] Mosoj willajkunata wajkunaman kʼachamanta parlarinankuta yachachejtinchej, paykunaqa kusiywan willaj llojsiyta munanqanku.

10-12. 1) ¿Imaynatá Jesús yanaparqa sumaj willaykunata uyariyta munajkunata? 2) ¿Imaynatá mosoj willajkunata yanapasunman Bibliamanta sumaj yachachejkuna kanankupaj?

¹⁰ Uyariyta munajkunaman yachachina. Jesusqa ashkha ruwanasniyoj karqa. Chaywanpis runas uyariyta munajtinku, chay runaswan parlananpaj tiempochakoj, Diosmantataj yachachej. Sutʼincharinapaj, uj kuti Genesaret Qocha kantupi kashajtin, maytapuni runas payman kʼiskikamorqanku Diospa Palabranta uyarinankupaj. Jesustaj Pedrowan uj boteman wichariykuspa chay runasman yachacherqa. Chantá Pedroman uj imata yachachiyta munarqa. Chayrayku Jesusqa uj milagrota ruwarqa ashkha challwata Pedro japʼinanpaj. Chantá nerqa: “Kunanmantaqa runastañataj challwata jina japʼinki”, nispa. Pedrotaj, paywan kajkuna ima “botesta qocha kantuman aysaytawan, tukuy imata saqerparispa, Jesuswan rerqanku” (Luc. 5:1-11).

 ¹¹ Nicodemo sutiyoj runapis, Jesuspa yachachisqanta uyariyta munarqa. Jinapis judiospa ujnin kamachejninku kasqanrayku, manchachikorqa imatachus wajkuna Jesuswan parlajta rikuspa ninankumanta. Chayrayku chʼisisnin Jesuspaman rej. Jinapis Jesusqa mana nerqachu ripunanta, astawanpis sumaj imasmanta sutʼinchananpaj tiempochakorqa (Juan 3:1, 2). Jesusqa tiempochakojpuni cheqa kajmanta runasman yachachinanpaj, creeyninkuta kallpachananpaj ima. Noqanchejpis pay jina ruwananchej tiyan. Ima horastachus runas atinku, chay horaspi wasinkuman rinanchej tiyan. Bibliaj yachachiyninta entiendeyta yanapanapajtaj tiempochakunanchej tiyan.

¹² Mosoj willajkunawan willaj llojsispaqa, astawan yachakuyta munajkunaman kutinankupaj yachachisunman. Chantapis paykunata revisitasninchejman chayri estudiosninchejman noqanchejwan rinankupaj wajyarisunman. Ajinamanta paykunapis yachakonqanku wajkunaman Bibliamanta yachachiyta. Chantapis reparanqanku, wajkunata Diosmanta yachakunankupaj yanapay may sumaj kasqanta. Ajinamanta paykunaqa revisitasta ruwayta munanqanku, Bibliamanta yachachiytapis. Chantapis yachakuyta munajkunata wasinkupi mana taripaspa kutiyta munallanqankupuni, pacienciatataj rikuchenqanku (Gál. 5:22, 23; “ Mana saykʼuspa kutillarqapuni”, nisqa recuadrota qhawariy).

13, 14. 1) ¿Imatá yachakunki ñaupa tiempomanta runas imastachus wajkunarayku ruwasqankumanta? 2) ¿Imaynasmantá yanapawaj mosoj willajkunata, jovenesta ima, hermanosta yanapayta yachakunankupaj?

¹³ Jehovaqa munan kamachisnin munanakunankuta, yanapanakunankuta ima (1 Pedro 1:22; Lucas 22:24-27 leey). Bibliaqa sutʼinchan Jesús wajkunarayku tukuy imata qosqanta, kausaynintapis (Mat. 20:28). Dorcasqa “sumaj ruwanasta ruwaspapuni kaj, wajchastapis” yanapaj (Hech. 9:36, 39). Romamanta Mariapis hermanospaj “ashkhata [...] trabajarqa” (Rom. 16:6). ¿Imaynatataj mosoj willajkunata yanapasunman, hermanosta yanapay may sumaj kasqanta yachanankupaj?

¹⁴ Mosoj willajkunata wajyarisunman, machitu hermanosta chayri onqosqa hermanosta waturikamoj rinapaj. Tataspis onqosqasta chayri machitu hermanosta waturikamoj rejtinku, allin kanman wawasninkuta pusananku. Chantapis ancianosqa, jovenesta chayri mosoj willajkunata ninkuman machitu hermanospa wasinkuta allinchanankuta chayri waykʼupunankuta. Jóvenes, mosoj willajkuna ima, hermanos purajmanta yanapanakusqankuta rikuspa, kikinta ruwayta munanqanku. Sutʼincharinapaj, uj cheqapi willashaspa uj anciano chay lugarpi tiyakoj hermanosta imaynachus kashasqankuta waturiyta yachaj. Chay ancianowan rej joventaj yachakorqa imaynasmantachus hermanosta yanapananpi (Rom. 12:10).

15. ¿Imaraykú ancianos hermanosta congregacionpi ñauparinankupaj yanapananku may sumaj?

¹⁵ Jehovaqa hermanosta kamachin congregacionpi Bibliamanta yachachinankupaj. Chayrayku may allin kanman hermanos sumajta umallirichiyta yachakunanku. Qan anciano kanki chayqa, ichapis uyariwaj uj siervo ministerial umallirichiyninta imaynatachus wakichishasqanta. Ajinamanta sumajta umallirichinanpaj yanapayta atinki (Neh. 8:8). ^[3]

16, 17. 1) ¿Imatataj Pablo ruwarqa Timoteota wakichinanpaj? 2) ¿Imaynatataj ancianos wakichinkuman siervos ministerialesta?

¹⁶ Congregacionpi ancianosqa, wajkunata wakichinanku tiyan ancianos kanankupaj. Pabloqa Timoteota ñauparinanpaj wakicherqa, nerqataj wajkunatapis kikinta yanapananta.  Pablo nerqa: “Kallpachakuy, Cristo Jesuspi kashan, chay qhasilla kʼacha yanapayninwan. Ashkha runaspa ñawpaqempi imatachus yachachishajta uyariwarqanki, chaytaqa yachachiy kʼacha kawsayniyoj allin ruwaj hermanosman, paykuna wajkunamampis yachachiyta atinankupaj”, nispa (2 Tim. 2:1, 2). Pabloqa anciano karqa, apostoltaj. Timoteotaj ashkha imasta paymanta yachakorqa: sumajta willayta, hermanosta yanapaytapis (2 Tim. 3:10-12).

¹⁷ Pabloqa tukuy tiemponta churarqa Timoteota sumajta wakichinanpaj (Hech. 16:1-5). Ancianospis Pablo jina ruwankuman, hermanosta waturej rispa siervos ministerialesta pusankuman. Ajinamanta paykunaqa yachakonqanku: imaynatachus ancianos yachachisqankuta, pacienciayoj, munakuyniyoj ima kayta. Yachakullanqankutaj Jehovapi atienekuyta paypa ovejitasninta qhawashajtinku (1 Ped. 5:2).

18. ¿Imaraykú wajkunata yanapanapaj kallpachakunanchej tiyan?

¹⁸ Kay qhepa pʼunchaykunapi, ashkha mosoj willajkuna yanapanata necesitanku sumaj willajkuna kanankupaj. Chantapis hermanosqa, yachakunallankutaj tiyan congregacionmanta hermanosta yanapayta. Jehovaqa munan tukuy kamachisnin sumaj wakichisqas kanankuta, mosoj willajkunata yanapananchejta ima. Chayrayku Jesús jina, Pablo jinataj mayta kallpachakuna tiyan waj hermanosta yanapanapaj. Niraj kay pachaj tukukuynin chayamushajtin, maytaraj willamuspa llankʼananchej tiyan. Chayrayku wajkunata sumajta willamunankupaj yanapanallapuni.

19. ¿Imaynatá yachanchej wajkunata yanapanapaj kallpachakusqanchej mana qhasipajchu kasqanta?

¹⁹ Mosoj willajkunata yachachinapaj mayta kallpachakuna, tiempochakuna ima. Chaywanpis yachanchej Jehovawan, Jesuswan yanapanawanchejta wajkunata sumajta yanapanapaj. Yanapanchej chay hermanos congregacionpi, willaypi ima “mayta kallpakuspa, sinchʼita trabaja[shasqankuta]” rikuspa, mayta kusikunchej (1 Tim. 4:10). Chantapis mayta kallpachakushanchej, Diospa llajtanpi ñauparinallapajpuni, kʼacha kaykunata rikuchinallapajpuni, Jehovaman qayllaykunallapajpuni ima.