1. ¿Imatá Diosmanta yachanchej?

 TESTIGO familiapi uywasqa karqanchej chayqa, ichá wawitamantapacha tatasninchej Jehovamanta yachachiwarqanchej. Ajinamantataj yachakorqanchej Dios tukuy imata ruwasqanta, kʼacha kasqanta, kay Jallpʼapitaj uj paraisopi kausakunanchejta munasqanta (Gén. 1:1; Hech. 17:24-27).

2. ¿Imatataj ninku wakin runas Diospi creejkunamanta?

² Ashkha runasqa mana creenkuchu Dios kasqanta, nitaj pay tukuy imata ruwasqantapis. Paykunaqa creenku kausay jinallamanta rikhurisqanta, juchʼuy khuritusmantataj jatun kausaj imasman unayninman tukusqanta. Chayta nejkunamanta wakenqa profesionales kanku. Ichapis paykunaqa ninkuman cientificospa nisqankuman jina Bibliaqa pantasqa kasqanta. Nillankumantaj Diospi creejkunaqa wampus, mana yachayniyojtaj kasqankuta.

3. ¿Imaraykutaj sapa ujninchej creeyninchejta kallpachananchej tiyan?

³ Wakin profesionales Diospi mana creesqankuta nejtinku, ¿paykuna jinallatajchu yuyasun? Mana paykuna jina yuyanapajqa, sutʼita yachananchej tiyan imaraykuchus creesqanchejta Jehová Dios tukuy imata ruwasqanpi. Jinapis, ¿imaraykutaj Diospi creenchej? ¿Wajkuna chayta creenata niwasqanchejraykuchu chayri noqanchejpunichu kallpachakorqanchej Diospuni tukuy imata ruwasqanta yachanapaj? (1 Cor. 3:12-15). Mashkha unaytaña Jehovata sirvispapis, creeyninchejta kallpachanallanchejpuni tiyan. Ajinamantaqa mana creellasunchu runas Bibliaj yachachisqan llulla kasqanta niwajtinchej (Col. 2:8; Heb. 11:6). Kay yachaqanapeqa yachakusun: imajtinchus ashkha runas Diospi mana creesqankuta, imaynatachus Jehová Diospi astawan creenapaj kallpachakunanchejta,  chantá imatachus ruwanata creeyninchej sinchʼillapuni kananpaj.

4. Hebreos 11:1 nisqanman jina, ¿imaynataj creeyniyoj runa?

⁴ Wakin runasqa yuyanku creeyniyoj kaspaqa, imapipis creenalla kasqanta. Biblia nisqanman jinataj mana ajinachu (Hebreos 11:1 leey). Biblia sutʼinchasqanman jina creeyniyoj runaqa Jehová Diospi, Jesuspi, Diospa Gobiernonpi ima creenpuni, chay imasta mana rikuspapis (Heb. 11:3). Uj científico Jehovaj testigonman tukorqa. Paytaj nin: “Noqanchejqa yachanchej imapichus creesqanchej cheqapuni kasqanta. Cientificospa wakin imasta nisqankumanpis mana churanakunchejchu”, nispa.

5. ¿Imaraykutaj ashkha runas mana creenkuchu Dios tukuy imata ruwasqanpi?

⁵ Diospuni tukuy imata ruwasqan sutʼi kajtinpis, ¿imaraykutaj ashkha runas mana creenkuchu? Imaraykuchus wakin runasqa ni jaykʼaj kallpachakorqankuchu paykunapuni jinachus manachus kasqanta yachanankupaj. Robertmanta parlarina. Payqa Jehovaj testigon. Nintaj: “Escuelapeqa ni jaykʼaj Diosmanta parlawajchu kayku. Chayraykutaj mana Diospi creejchu kani. 22 watasniyoj kashajtiytaj Jehovaj testigosninwan parlarerqani. Paykunaqa Bibliawan sumajta sutʼinchariwarqanku Diospuni tukuy imata ruwasqanta”, nispa. * (“ Tataspaj uj sumaj yuyaychay” nisqa recuadrota leeriy).

6. ¿Imaraykutaj ashkha runas nipuni Dios kasqanpi creenkuchu?

⁶ Ashkha runasqa nipuni creenkuchu Dios  tukuy imata ruwasqanpi. Imaraykuchus paykunaqa imatachus rikusqallankupi creesqankuta ninku. Por ejemplo, paykunaqa creenku wayra kasqantapuni, mana wayrata rikuspapis. Biblia nisqanman jina, creeyniyoj runaqa yachan “imapichus creesqan cheqapuni kasqanta, chayta mana rikojtinpis” (Heb. 11:1). Imapichus creesqanchejta sutʼita yachanapajqa tiempochakuna, kallpachakunataj tiyan. Ashkha runastaj mana chayta ruwayta munankuchu. Chayraykutaj ashkha runasqa ninku Dios mana kasqanta.

7. ¿Imajtintaj ninchej ashkha científicos Dios tukuy imata ruwasqanpi creesqankuta?

⁷ Ashkha cientificosqa sumajta estudiaytawan Diospuni jallpʼata, cielota ima ruwasqanta sutʼita repararqanku. * Robertmanta párrafo cincopi parlarerqanchejña. Ichá wakin runasqa pay jinallataj universidadespi mana  Diosmanta yachachisqankurayku, mana Diospi creenkuchu. Jinapis ashkha cientificosqa Jehovamanta yachakuyta, paytataj munakuyta qallarerqanku. Noqanchejpis paykuna jinallataj Diospa ruwasqasninta sumajta estudiananchej tiyan. Ajinamanta creeyninchejta kallpachasun sumajta leeyta yachaspapis manapis. Arí, Diospi astawan creenanchejpajqa sapa uj kallpachakunanchej tiyan.

8, 9. 1) ¿Ima tapuymantaj kutichisunchej? 2) ¿Imapajtaj Diospa ruwasqasninmanta yachakuy yanapawasun?

⁸ ¿Imaynamantá Diospi creesqanchejta astawan kallpachasunman? Tawa imasta ruwaspa. Chayta qhepan parrafospi qhawarisun.

⁹ Diospa ruwasqasninmanta yachakuna. Animalesta, plantasta, chʼaskasta ima allinta qhawarisun chayqa, Diospi creeyninchejta astawan kallpachasun (Sal. 19:1; Isa. 40:26). Chaykuna imayna ruwasqapunichus kasqankuta sutʼita yachaspaqa, mana iskayrayasunchu Diospuni ruwasqanmanta. Publicacionesninchejpeqa wakin yachaqanas Diospa ruwasqasninmanta wakin imasta sutʼinchan. Ichá yuyasunman chay yachaqanas mana entiendey atina kasqanta. Jinapis mayta kallpachakuna leenapaj, chaykunamanta yachakunapaj ima. Kay pasaj wataspi jatun tantakuykunasninchejpeqa Diospa ruwasqasninmanta videos llojsimorqa. Chay videostataj Internetpi jw.org nisqapi watejmanta qhawarisunman.

10. ¿Imataj rikuchiwanchej Dios kasqantapuni? (Romanos 1:20).

¹⁰ Diospa ruwasqasninmanta yachakushaspaqa, allinta reparana imastachus Diosmanta yachachiwasqanchejta (Romanos 1:20 leey). Yachanchej jina Inteqa kʼanchayta, calorta ima qowanchej. Ajinamanta Jallpʼapi kausay kananpaj. Jinapis Inteqa rayos ultravioleta nisqata wijchʼullantaj. Chaytaj kausayninchejpaj ni imarayku allinchu. ¿Imaynatá chaymanta runas jarkʼasqas kanchej? Jallpʼaqa sumaj jarkʼachasqa kashan, mana chay rayos ultravioletas nisqa pasamunanpaj. Chay jarkʼachataj capa de ozono nisqa sutikun. Rayos ultravioletas nisqa sinchʼiyajtenqa, capa de ozono nisqapis sinchʼiyallantaj. Chaytaj sutʼita reparachiwanchej tukuy ima kajtaqa Diospuni ruwasqanta.

11. ¿Imastaj yanapawasunman astawan Jehová Diospi creenapaj? (“ Creeyninchejta kallpachanapaj yanapas” nisqa recuadrota qhawariy).

¹¹ Índice de las publicaciones Watch Tower, Internetpi jw.org nisqapi ima Diospa ruwasqasninmanta ashkha yachachiykunata tarisunman. Chaykunata estudiaytaj astawan sinchʼi creeyniyoj kanapaj yanapawasun. Internetpi jw.org nisqaman yaykusunman, chaypitaj maskʼasunman “¿Pitaj ruwanman karqa?” nisqata. Chaypajqa yaykusunman “Bibliaj yachachiykunasnin” nisqaman, chaypitaj maskʼasunman “Bibliawan cienciawan” nisqata. Chaypeqa ashkha yachaqanas, juchʼuy videos ima tiyan, animalitosmanta, plantitasmanta ima wakin imasta sumajta sutʼinchashan. Chaypi tarillasunmantaj imaynatachus científicos Diospa ruwasqasninmanta copiakuspa ashkha imasta ruwasqankuta.

12. Bibliata estudiaspa, ¿imastataj reparananchej tiyan?

¹² Bibliata estudiana. Párrafo cuatropi uj cientificomanta parlarerqanchej. Payqa mana Diospi creejchu. Jinapis tiemponwanqa Diospi creerqaña. Pay nin: “Noqaqa mana Diospa ruwasqasninta estudiasqayraykullachu Diospi creeni. Manaqa Bibliata sumajta estudiasqayrayku”, nispa. Ichapis imatapunichus Biblia yachachisqanta sumajtaña yachanchej. Jinapis Diospa Palabranta estudianallanchejpuni tiyan Diospi creesqanchejta  astawan kallpachanapaj (Jos. 1:8; Sal. 119:97). Bibliaqa ñaupa tiempo runasmanta parlaspa maychus kajtapuni parlan. Bibliata ashkha runas qhelqajtinkupis uj yuyaylla kashan, chaypi nisqantaj juntʼakunpuni. Chayta yachaspaqa ni imarayku iskayrayasunchu yachayniyoj, munakuyniyoj Diospuni ruwawasqanchejmanta, Biblia qhelqakunanpajpis payllataj yuyaychasqanmanta (2 Tim. 3:14; 2 Ped. 1:21).

13. ¿Imatataj Biblia nin qolqeta munakuymanta?

¹³ Diospa Palabranta estudiashaspaqa, reparana yuyaychasqanqa maytapuni yanapawasqanchejta. Bibliaqa unayña nerqa qolqeta munakuy mana allinchu kasqanta, ‘imaymana llakiykunatataj’ apamusqanta (1 Tim. 6:9, 10; Pro. 28:20; Mat. 6:24). Biblia chayta nisqanqa kunankamapis yanapallawanchejpuni. Uj libro nin: “Qolqeyoj kaspalla kusisqa kayta yuyaj runasqa mana kusisqachu kanku, llakiywantaj atipachikunku. Astawan qolqeyoj kayta munajkunapis nillataj kusisqachu kanku, llakiywan onqoykunku ima”, nispa. Arí, Biblia manapuni qolqeta munakunanchejta yuyaychawasqanchejqa may sumajpuni. Ichá yuyarikullanchejtaj Bibliapi waj imasta yuyaychasqanpis yanapawasqanchejta. Diosninchej Palabrannejta yuyaychawasqanchejta japʼikusun chayqa, astawan paypi atienekusun (Sant. 1:5). Ajinamantataj aswan kusisqa kausakusun (Isa. 48:17, 18).

14. ¿Imatataj Jehovamanta yachakusun Bibliata estudiaspa?

¹⁴ Bibliataqa estudiana Jehovata allinta rejsiyta munaspa (Juan 17:3). Bibliata estudiaspaqa reparanchej Jehová may kʼachapuni kasqanta, ruwasqasninta qhawarispapis chayllatataj reparanchej. Chayta yachaytaj yanapawanchej Jehová kasqantapuni creenapaj (Éxo. 34:6, 7; Sal. 145:8, 9). Astawan Jehová Diosta rejsispaqa astawan paypi creesun, astawan munakusun, sumaj amigosnintaj kasun.

15. ¿Imaynatataj yanapawasunman Diospi creesqanchejmanta wajkunaman willariy?

¹⁵ Diospi creesqanchejmanta wajkunawan parlarina. Ajinamantaqa astawan creeyninchejta kallpachasun. Predicashajtinchej pillapis Diospi mana creesqanta niwajtinchejrí, ¿imatá ruwasunman? Mana kutichiyta atispaqa publicacionesninchejpi maskʼasunman imatachus chaymanta nisqanta. Maskʼaytawantaj chayman jina chay runawan parlarisunman (1 Ped. 3:15). Chantá uj experienciayoj hermanowan yanapachikullasunmantaj. Chay runa Bibliaj nisqanta creejtinpis manapis estudiasqanchejqa, creeyninchejta astawan kallpachanapaj yanapawasun. Ajinamantataj mana creellasunchu kay mundomanta yachayniyoj runas, yuyaysapa runas ima, Dios mana kasqanta niwajtinchej.

16. ¿Imaraykutaj creeyninchejta kallpachanallanchejpuni tiyan?

¹⁶ Mashkha unaytaña Diosta sirvispapis, creeyninchejta kallpachanallapuni. Mana chayta ruwajtinchejqa creeyninchej chiriyapunman. Yachakorqanchej jina creeyniyoj runaqa, imapichus creesqan cheqapuni kasqanta yachan, mana chayta rikuspapis. Imastachus mana rikusqantataj chay rato qonqapun. Chayrayku apóstol Pablo nerqa mana creeyniyoj runataqa ‘jucha chʼipaykunanta’ (Heb. 12:1). Jinapis, ¿imastá ruwasunman creeyninchej sinchʼillapuni kananpaj? (2 Tes. 1:3).

17. ¿Imataj yanapawasun sinchʼi creeyniyojllapuni kanapaj?

¹⁷ Jehová Diosmanta atiyninta mana saykʼuspa mañakuna. Imaraykuchus creeyniyoj kanapajqa Diospa atiynin yanapawanchej  (Gál. 5:22, 23). Yanapallawanchejtaj Diospi creeyninchej sinchʼillapuni kananpaj. Chayrayku Jehová Diosmanta atiyninta mañakunallapuni, paytaj qowasunpuni (Luc. 11:13). Diosmanta mañakushaspaqa ajinata nisunman: “Yanapawayku astawan creenaykupaj”, nispa (Luc. 17:5).

18. Salmo 1:2, 3 nisqanman jina, ¿imamantataj mayta agradecekunchej?

¹⁸ Sapa día Diospa Palabranta estudiana (Salmo 1:2, 3 leey). Kay salmo qhelqakushajtin mana tukuy israelitaspatachu kaporqa Diospa Leyninmanta tukuynin qhelqasqas. Jinapis reyeswan sacerdoteswanqa tukuyninku uj copiata conseguiyta atej kanku. Sapa qanchis watataj Israelpi ‘qharis, warmis, wawas, forasteros ima’ Diospa Leyninta leekusqanta uyarinankupaj tantakunanku karqa (Deu. 31:10-12). Jesuspa tiemponpipis mana tukuy runaspatachu Diosmanta Qhelqasqa kʼuyuna libros kaporqa. Ashkha kʼuyuna librosqa sinagogaspi kasharqa. Jinapis kay tiempopeqa casi tukuypata kapuwanchej tukuynin Biblia, chayri wakin librosnillanpis. ¿Imatá ruwasunman chaymanta may agradecesqas kasqanchejta rikuchinapaj? Chayta qhepan parrafopi qhawarisun.

19. ¿Imatá ruwananchej tiyan creeyninchej sinchʼillapuni kananpaj?

¹⁹ Diospa Palabran kapuwasqanchejmanta may agradecesqas kasqanchejta rikuchisunman sapa día leerispa. Mana allinchu kanman tiemponchej kajtillan sapallanchejpi Bibliata estudiananchej. Bibliata estudianapaj uj horario kapuwajtinchejqa, creeyninchej sinchʼillapuni kanqa.

20. ¿Imatataj ruwanallanchejpuni tiyan?

²⁰ Noqanchejpa creeyninchejqa Diospa Palabranpi sinchʼi sayachisqa kashan, manataj kay mundomanta ‘yachayniyojkunajta, yuyaysapaspata’ jinachu (Mat. 11:25, 26). Bibliata estudiasqanchejrayku yachanchej imaraykuchus kay mundo aswan mana allinman tukushasqanta, imatachus Jehová ruwanantapis. Chayrayku creeyninchejta kallpachanallapuni, tukuy laya runastataj yanapana Diospi creenankupaj (1 Tim. 2:3, 4). Kusiywantaj suyakunallapuni Jallpʼapi tukuy kausakojkuna Jehovata jatunchananku pʼunchay chayamunanta. Chaypachamá tukuyninchej nisun: ‘Atiyniyoj Jehová Diosniyku, qanllamin jatunchanapaj jina kanki, imaraykuchus qanmin tukuy imata ruwarqanki’, nispa (Apo. 4:11).