1, 2. Salmo 34:8 nisqanman jina, ¿imatá ruwananchej tiyan Jehová kʼacha kasqanta yachanapaj?

 PILLAPIS ni jaykʼaj mikhusqanchej mikhunata qoriwasqanchejpi piensarina. Chay mikhuna ima saborniyojchus kasqantaqa yachasunman, allinta qhawarispa, muskhirispa, imaswanchus ruwasqa kasqanta yachaspa chayri wajkunata tapurispa. Jinapis imaynachus kasqantaqa llamirispapuni yachasunman.

² Jehová may kʼacha kasqantapis Bibliata, publicacionesninchejta ima leerispa yachasunman. Imaynatachus Jehová wajkunata bendecisqanta uyarispa yachallasunmantaj. Jinapis imayna kʼachapunichus Jehová Dios kasqanta yachanapajqa, noqanchejpuni “llamirisunman” mikhunata jina (Salmo 34:8 leey). Jehovapaj astawan llankʼayta munashasqanchejpi piensarina. Jinapis chaypajqa wakin imasninchejta pisiyachinanchej tiyan. Ichapis ashkha kutista leererqanchej, Jesús, Diospa Gobiernonta kausayninchejpi ñaupajman churajtinchej, Jehová tukuy ima necesitasqanchejta qonawanchejta nisqanta. Jinapis ichá chay nisqantaqa ni jaykʼaj kausayninchejpi juntʼakojta rikorqanchejchu (Mat. 6:33). Chaywanpis Jesuspa nisqanta creesqanchejrayku, gastosninchejta pisiyachinchej, pisi horasllataña trabajanchej, Diosmanta willanapajtaj tukuy tiemponchejta churanchej. Chayta ruwaspaqa ñawisninchejwanpuni rikusun Jehová mayta cuidawasqanchejta. Ajinamantataj noqanchejpuni yachasun Jehová may kʼacha kasqanta.

3. Salmo 16:1, 2 nisqanman jina, ¿pikunatataj Jehová bendecin?

³ Jehovaqa ‘tukuypaj kʼacha’, nisunman “sajra runaspaj, kʼacha runaspajpis” (Sal. 145:9; Mat. 5:45). Jinapis payta munakojkunata, tukuy sonqotaj sirvejkunataqa astawanraj bendecin (Salmo 16:1, 2 leey). Qhepan parrafospi qhawarisun ima allin imastachus Jehová noqanchejpaj ruwasqanta.

4. ¿Imaynamantá Jehová, payman qayllaykojkunaman kʼacha kasqanta rikuchin?

 ⁴ Jehovamanta yachakusqanchejman jina kausakojtinchejqa allin riwanchej. Paymanta yachakusqanchej, munakusqanchej imataj, yuyayninchejta, kausayninchejta ima cambianapaj yanapawarqanchej. Imajtinchus mana allin imasta yuyaspa, ruwaspa imaqa Diosmanta karunchasqa karqanchej (Col. 1:21). Chantapis Diosman kausayninchejta qopojtinchej, bautizakojtinchej ima, astawanraj Diosqa kʼacha kasqanta rikuchiwarqanchej. Imajtinchus llimphu sonqoyoj kayta, paymantaj astawan qayllaykuyta atinchej (1 Ped. 3:21).

5. ¿Imaynasmantá Jehová predicacionpi yanapawanchej?

⁵ Predicacionpeqa Jehová may kʼacha kasqanta tukuy imapi reparanchej. Jehovaj kamachisninmanta ashkhasqa manchalis kanchej. Niraj Diosmanta yachakushaspaqa ichá ni jaykʼaj yuyarqanchejchu mana rejsisqa runaspa punkunkuta takayta Bibliamanta willarinapaj. Chaywanpis kunanqa chayta sapa kuti ruwanchej. Jehová yanapawasqanchejraykutaj mayta predicay gustawanchej. Jehovaqa waj jinasmanta yanapallawanchejtaj. Predicacionpi runas kʼamiykuwajtinchejpis sonqo tiyasqalla kanapaj yanapawanchej. Diosmanta yachakuyta munaj runawan parlarishajtinchejtaj chay runata yanapananpaj jina textota yuyarikunapaj yanapawanchej. Chantapis maypichus predicanchej chaypi runas mana uyariwajtinchejqa, kallpata qowanchej predicanallapajpuni (Jer. 20:7-9).

6. ¿Imaynamantataj Jehová kʼacha kasqanta rikuchiwanchej sumajta wakichiwasqanchejpi?

⁶ Jehovaqa sumajta wakichiwanchej predicanapaj. Ajinamanta kʼacha kasqanta rikuchillawanchejtaj (Juan 6:45). Cristiano Kausayninchej tantakuypeqa aswan sumajta predicanapaj, yachachinapaj ima yachakunchej. Ichapis qallariypeqa waj jinasmanta predicananchej kasqanta yachaspaqa tumpata manchachikusunman. Jinapis chayman jina ruwajtinchejqa allin riwanchej. Ichapis ni jaykʼaj waj jinasmanta predicarqanchejchu. Jinapis reunionespi, asambleaspi imaqa waj jinasmanta predicanapaj kallpachawanchej. Chayta ruwaytapis ichá manchachikullasunmantaj. Jinapis chayta ruwajtinchejqa Jehová bendeciwasun. Kay yachaqanapi yachakusun imaynasmantachus Jehová tukuyta yanapawasqanchejta, imaymanamanta payta sirvinapaj kallpachakojtinchej. Yachakullasuntaj imatachus ruwananchejta Jehovapaj astawan llankʼayta munasqanchejta juntʼanapaj.

7. Jehovata sirvinapaj astawan kallpachakojtinchej, ¿ima bendicionestataj japʼinchej?

⁷ Jehovaman astawan qayllaykunchej. Samuel sutiyoj ancianomanta parlarina. * Payqa señoranwan khuska Colombiapi Diosta sirvinku. Paykunaqa congregacionninkupi kusisqa precursores jina sirvisharqanku. Jinapis astawan yanapata necesitakoj congregacionpi yanapakuyta munarqanku. Chaypajtaj wakin imasta cambiananku karqa. Samuel nin: “Mateo 6:33 nisqanman jina ruwarqayku. Necesitasqayku imasllatañataj rantikorqayku. Jinapis wasisituykutaqa mana saqeyta atillarqaykuchu. Imaraykuchus munasqaykuman jina ruwachikorqayku. Nitaj manuchu karqayku”, nispa. Mosoj congregacionninkupiña kashaspaqa repararqanku pisi qolqellawan kausakuyta atisqankuta. Samuel nillanpuni: “Sutʼita repararqayku Jehová yanapawasqaykuta, mañakusqaykutapis uyariwasqaykuta. Reparallarqaykutaj Jehovaqa tukuy ima ruwasqaykuwan kusisqa kashasqanta, munakuwasqaykutataj”,  nispa. Noqanchejpis ichá Jehová Diospaj astawan llankʼayta atisunman. Chayta ruwajtinchejtaj astawan Jehovaman qayllaykusun, paytaj ni imata faltachiwasunchu (Sal. 18:25).

8. ¿Imatá yachakunchej Ivanmanta Victoriamanta ima?

⁸ Jehovata sirvispaqa kusisqa kanchej. Hermanosninchej Ivanmanta Victoriamantawan parlarina. Paykunaqa precursores jina Kirguistán suyupi sirvishanku. Ajllarqankutaj pisi imasllawan kausakuyta Jehovapaj astawan llankʼayta munaspa. Construccionpipis yanapakorqanku. Iván nin: “Imaspichus yanapakusqaykupeqa maytapuni kallpachakorqayku. Diantinta trabajasqaykumanta saykʼusqas kaspapis sonqo tiyasqa, sonqo juntʼasqastaj kasharqayku. Imajtinchus yacharqayku Jehovapaj tukuy atisqaykuta ruwashasqaykuta. Chantapis kusikuyku ashkha amigosniyoj kasqaykumanta, ashkha imasta ruwasqaykumanta yuyarikuspa ima”, nispa (Mar. 10:29, 30).

9. ¿Imatataj uj hermana ruwarqa onqosqa kaspapis chanta imaynataj payta rerqa?

⁹ Kausayninchej mana facilchu kajtinpis Jehovapaj astawan llankʼayqa kusichiwanchej. Hermananchej Merymanta parlarina. Payqa Africapi tiyakun, doctora jinataj llankʼaj. Kunanqa viejitaña, viudataj. Jubilakuytawantaj precursora kayta qallarerqa. Hermana Meryqa artritis onqoyniyoj kasqanrayku mana allinta purikuyta atinchu. Wasimanta wasi predicaj llojsispataj uj horallata qhepakuyta atin. Jinapis carritowanqa aswan unayta predican. Chantapis payqa ashkha revisitasniyoj, ashkha runasmantaj Bibliamanta yachachin. Wakinmanqa telefononejta yachachin. ¿Imaraykutaj pay Jehovapaj astawan llankʼananpaj kallpachakorqa? Pay nin: “Jehovata Jesucristotawan maytapuni munakuni. Sapa kuti Jehovamanta mañakuni tukuy atisqayta paypaj ruwanaypaj yanapanawanta”, nispa (Mat. 22:36, 37).

10. 1 Pedro 5:10 nisqaman jina, ¿imaynatá Jehová yanapan astawan payta sirvinankupaj kallpachakoj kamachisninta?

¹⁰ Jehovaqa wakichillawanchejpuni. Hermanonchej Kennymanta parlarina. Payqa Mauricio suyupi precursor regular jina sirvishan. Kausayninpitaj repararqa Jehová wakichillasqantapuni. Bibliamanta yachakusqantawan universidadmanta llojsiporqa, chantá bautizakorqa, precursor regular kaytataj qallarerqa. Pay nin: “Mayta kallpachakuni profeta Isaías jina kanaypaj, Isaías nerqa: ‘Kaypi kani, noqata kachaway ari’”, nispa (Isa. 6:8). Kennyqa construccionpi kashaspa ashkha proyectospi yanapakorqa. Yanapakullarqataj parlayninpi kaj publicacionesta traducispa. Pay nin: “Sumajta wakichiwarqanku. Ajinamanta Diospa llajtanpi ruwanasniyta allinta juntʼanaypaj”, nispa. Payqa mana trabajonta imaynatachus ruwanallantachu yachakorqa. Pay nillanpuni: “Yachakullarqanitaj maykamallachus imatapis ruwayta atisqayta, aswan kʼacha cristiano kanaypajtaj waj imaspiwan kallpachakunay kasqanta. Ajinamanta Jehovata sirvinaypaj, hermanostataj yanapanaypaj”, nispa (1 Pedro 5:10 leey). Ichá noqanchejpis wakin ruwanasninchejta saqesunman Jehová astawan yachachinawanchejpaj.

11. ¿Imatataj kinsa hermanas Corea del Surpi predicanankupaj ruwarqanku chanta imaynataj paykunata rerqa? (Kay revistaj tapanpi fotosta qhawariy).

¹¹ Ashkha watastaña testigos kajkunatapis, Jehovaqa waj jinasmanta sirvinankupaj wakichillanpuni. Kay jatun onqoy COVID-19 nisqa kashajtin, Corea del Surpi uj congregacionmanta ancianos kayta nerqanku: “Wakin hermanosqa niraj kay onqoy rikhurishajtin, yuyarqanku onqosqas kasqankurayku mana predicacionman riyta atinankuta. Jinapis kunanqa Internetnejta sumajta predicashanku. Kinsa hermanasqa 80 watas kurajniyojña kanku.  Paykunataj computadorata sumajta apaykachayta yachakorqanku. Kunantaj chaynejta casi sapa día predicashanku”, nispa (Sal. 92:14, 15). Ichá noqanchejpis munasunman Jehovapaj astawan llankʼayta, may jina kʼacha kasqantataj yachayta. Qhepan parrafospi yachakusun imastachus chaypaj ruwananchej kasqanta.

12. ¿Imatá Jehová ruwanqa paypi confiajtinchej?

¹² Jehovapi confiana. Jehovapi confiajtinchej, payta sirvinapaj tukuy atisqanchejta ruwajtinchej ima, mayta payqa bendeciwasun (Mal. 3:10). Hermana Fabiolamanta parlarina. Payqa Colombiamanta. Jehová bendecisqantataj kausayninpi sutʼita rikorqa. Hermananchejqa bautizakusqanmanta pisi tiemponman precursora regular kayta munarqa. Jinapis qosanta, kinsa wawasnintawan yanapananpaj trabajanan karqa. Jubilakuyta atispañataj maytapuni Jehovamanta mañakorqa yanapananta. Pay nin: “Runasqa jubilakusqankumanta unayninmanraj rentankuta japʼinku. Jinapis noqamanqa killanmanpacha qowarqanku. Chaytaj mana creenapaj jina karqa”, nispa. Hermana Fabiolaqa iskay killanman precursora kayta qallarerqa. Kunantaj 70 watas kurajniyojña, 20 watas kurajtañataj precursora jina sirvishan. Tukuy chay wataspitaj pusaj warmista bautizakunankupaj yanaparqa. Pay nin: “Wakin kuteqa mana kallpitay kanchu. Jinapis Jehovaqa sapa día precursorallapuni kanaypaj yanapawan”, nispa.

13, 14. ¿Pikunamantataj yachakusunman Jehovapi astawan confiayta, paypajtaj astawan llankʼayta?

 ¹³ Jehová Diospa kamachisninmanta paypi confiayta yachakuna. Bibliata leerispaqa reparanchej ashkha runas Diosta tukuy atisqankuta sirvinankupaj mayta kallpachakusqankuta. Jinapis wakenqa Jehovaj bendicionninta japʼinankupaj paykunaraj Diospi confiasqankuta rikuchinanku karqa. Por ejemplo, Abrahanqa “maymanchus rishasqanta mana yachaspapis” wasinmanta riporqa. Jehovataj chayta ruwajtinraj bendicerqa (Heb. 11:8). Jacobtataj bendicerqa uj angelwan maqanakusqantawanraj (Gén. 32:24-30). Israelitas Sumaj Jallpʼaman yaykunankupajña kashajtinkutaj Jehovaqa paykunata yanaparqa, Jordán mayuta chimpanankupaj, sacerdotes yakuman saruykuspa chakisninkuta joqʼochakojtinkuraj (Jos. 3:14-16).

¹⁴ Kay tiempomanta hermanospis Jehovapi confianku, tukuy imaymanamantataj llankʼanankupaj kallpachakunku. Paykunamantapis mayta yachakullasunmantaj. Hermano Pablomanta señoran Dianamantawan parlarina. Paykunaqa hermanospa kausayninkumanta experienciasta leespa mayta gustachikoj kanku. Paykunaqa leerej kanku “Tukuy sonqo ruwarqanku” * nisqa yachaqanasta. Pablo nin: “Chay yachaqanasta leespaqa uj miskʼi mikhunata jina antojakoj kayku. Astawan leespataj noqaykupuni Jehová kʼacha kasqanta yachayta munarqayku”, nispa. Tiemponmantaj paykunaqa maypichá aswan yanapa necesitakun chayman yanapakoj riporqanku. Allin kanman noqanchejpis chay yachaqanasta leerinanchej. Chantapis Internetpi jw.org nisqapi, Karu lugarespi willayku: Australiapi nisqa videota chantá Predicación en lugares apartados: Irlanda nisqa videota qhawarillasunmantaj. Chaykunataj yanapawasunman astawan Jehovapaj llankʼananchejpaj.

15. ¿Imaynatá yanapawasunman Diospa Gobiernonta ñaupajman churajkunawan masichakuy?

¹⁵ Diosta sirviyta yanapanawanchejpaj jina amigosta ajllakuna. Wajkunawan kaspaqa, paykunaman gustasqan mikhunata llamiriyta munallasun. Ajinallatataj Diosta sirviyta ñaupajman churajkunawan kaspaqa, paykuna jina Diosta sirviyta munasun. Hermanosninchej Kevinmanta Veronicamantawan parlarina. Kevin nin: “Amigosniykuwan familiaresniykuwanqa Jehovata astawan sirvinaykupaj mayta kallpachawaj kayku. Diospa Gobiernonta ñaupajman churajkunawan masichakuspaqa, noqaykupis paykuna jina ruwayta munarqayku” nispa. Kunantaj iskayninku Serbia suyupi precursores especiales jina sirvishanku.

16. Lucas 12:16-21 nisqanman jina, ¿imajtintaj Jehovata sirvinapaj astawan kallpachakunanchej tiyan?

¹⁶ Jehovata sirvinapaj tukuy atisqanchejta kallpachakuna. Jehovata kusichinapajqa mana tukuy imasninchejtapunichu saqepunanchej tiyan (Ecl. 5:19, 20). Jinapis wakin imasninchejta mana saqeyta munasqanchejraykulla Jehová Diosta astawan sirvinapaj mana kallpachakusunmanchu chayqa, Jesuspa kikinchayninmanta qhapaj runa jina pantasunman. Payqa allinta kausakunanrayku Diosmanta ni yuyarikullarqapischu (Lucas 12:16-21 leey). Hermano Christianmanta parlarina, payqa Francia suyupi tiyakun, nintaj: “Jehovata sirvinaypaj, familiayta yanapanaypajpis mana anchata tiempochakusharqanichu, nitaj kallpachakusharqanichu”, nispa. Paywan señoranwanqa precursores kayta qallarerqanku, chaypajtaj trabajosninkuta saqeporqanku. Kausakunankupajtaj wasista, oficinasta ima llimphuchaspa trabajaj kanku.  Chaypi ganakusqankuwantaj sonqo juntʼasqa kausakorqanku. Paykunaqa kusisqas kashanku precursores kanankupaj wakin imasta saqepusqankumanta. Christian nillanpuni: “Mayta kusikuyku predicaspa, estudiosniykuta, revisitasniykuta ima astawan Jehovamanta yachakushasqankuta rikuspa”, nispa.

17. ¿Imajtintaj wakin hermanos waj jinasmanta predicayta mana atillankuchu?

¹⁷ Diospaj waj jinasmanta llankʼayta ama manchachikunachu (Hech. 17:16, 17; 20:20, 21). Hermananchej Shirleymanta parlarina. Payqa Estados Unidosmanta, precursora jinataj sirvishan. Kay jatun onqoy COVID-19 rikhurisqanrayku waj jinamanta predicanan karqa. Payqa qallariypi telefononejta predicayta manchachikorqa. Jinapis congregacionesta waturej hermano congregacionninta waturishajtin, telefononejta predicayta yachakorqa. Chaymantapachataj telefononejta predicashallanpuni. Pay nin: “Qallariypeqa telefononejta predicayta manchachikorqani. Jinapis kunanqa mayta gustawan. Wasimanta wasi rispaqa pisi runasllawan parlarej kayku, kunantaj ashkha runaswan parlariyku”, nispa.

18. ¿Imataj yanapawasunman imallapis Jehovata astawan sirvinapaj jarkʼawajtinchej?

¹⁸ Diospaj imatachus ruwayta munasqanchejta juntʼanapaj kallpachakuna. Llakiypi kashaspaqa Jehovaman orakunchej, imaynatachus chay llakiyninchejta atipanapajpis sumajta yuyaychakunchej (Pro. 3:21). Hermananchej Soniamanta parlarina. Payqa Europapi, romaní parlaypi precursora regular jina sirvishan. Pay nin: “Imatachus ruwayta munasqaytaqa anotakuni, rikunaypaj jinataj sutʼiman churani. Mesitaypeqa uj dibujo tiyapuwan, chay dibujoqa iskayman tʼaqasqa ñanmanta. Kausayniypi ima ruwaytapis ajllayta munashaspaqa, chay dibujota qhawarini, piensarinitaj mana allinta ajllajteyqa mana allinchu rinawanpi”, nispa. Hermananchej Soniaqa problemasniyoj kaspa mana llakiywan atipachikunchu. Pay nillanpuni: “Kausayniypi imapis cambiajtenqa uj perqa jina jarkʼawanman imatachus ruwayta munasqayta mana juntʼanaypaj. Chayrí uj puente jina yanapawanman imatachus ruwayta munasqayta juntʼayta atinaypaj. Jinapis chayqa noqallamanta kashan”, nispa.

19. ¿Imaynatá Jehovaman agradecekusunman tukuy imata qowasqanchejmanta?

¹⁹ Jehovaqa imaymanamanta bendeciwanchej. Chaymanta agradecekusqanchejtataj rikuchisunman payta jatunchanapaj tukuy atisqanchejta ruwaspa (Heb. 13:15). Ichapis Jehovata sirvinapaj waj imastawan ruwasunman. Ajinamantaqa Jehová astawan bendeciwasun. Chayrayku sapa día kallpachakuna imaynallamantapis Jehová kʼacha kasqanta reparanapaj. Ajinamantataj Jesús jina kayta nisun: “Mikhunayqa kachamuwajniypa munayninta ruwanay, kamachiwasqantataj tukuchanay”, nispa (Juan 4:34).