1. ¿Imatataj ashkha hermanos ruwashanku Jehovata astawan sirvinankupaj?

  KAY mundoqa tukukuyninman chayashanña. Jehovaj llajtanpi llankʼayninchejtaj astawan yapakushan (Mat. 24:14; Luc. 10:2; 1 Ped. 5:2). Tukuyninchej Jehovata tukuy atisqanchejta sirviyta munanchej. Ashkhasqa Jehovapaj astawan llankʼashanku. Wakenqa kallpachakushanku precursores kanankupaj. Wakintaj Betelpi sirviyta chayri Diosta yupaychana wasista ruwaysikuspa yanapakuyta munashanku. Ashkha hermanostaj kallpachakushanku siervos ministeriales chayri ancianos kanankupaj (1 Tim. 3:1, 8). Jehovaqa maytachá kusikun kamachisnin paypaj astawan llankʼayta munasqankuta rikuspa (Sal. 110:3; Isa. 6:8).

2. ¿Imaynataj sientekusunman mana Jehovapaj munasqanchejman jinachu llankʼayta atisqanchejmanta?

² Tiempoqa pasashallanpuni, nirajpunitaj Jehovapaj astawan llankʼayta atishanchejchu. Chaytaj mayta llakichiwasunman. Chayri mayorcitosña kasqanchejrayku manachayri waj imasrayku mana Diospa llajtanpi astawan yanapakuyta atinchejchu. Chaypis llakichillawasunmantaj (Pro. 13:12). Hermana Melissamanta parlarina. * Payqa mayta munan Betelpi sirviyta chayri Diospa Gobiernonmanta Willajkunapaj Escuelaman riyta. Jinapis edadninrayku mana atinchu, chaymantataj mayta llakikun. Pay nin: “Ancha viejitaña kasqayrayku niña Betelman sirvej riyta atinichu, nillataj Diospa Gobiernonmanta Willajkunapaj Escuelamanpis”, nispa.

3. ¿Imatataj wakin hermanos ñaupajta ruwankuman Diospa llajtanpi astawan ruwaykunata japʼiyta atinankupaj?

³ Wakin hermanosqa jóvenes kanku, kallpankupitaj kashanku. Jinapis Diospa llajtapi astawan ruwanasta japʼinankupajqa  mana wawas jinallapunichu kananku tiyan. Paykunaqa aswan kʼacha cristianos kanankupaj kallpachakunanku tiyan. Ichapis paykunaqa sumaj yuyayniyoj kankuman, imata ruwaytapis mana manchachikunkumanchu, imapi trabajaytapis mana qhellakunkumanchu. Jinapis ichá paykunamanqa faltarinmanraj pacienciayoj kananku, ruwanasninkuta sumajta ruwayta yachananku, wajkunata respetayta yachananku ima. Sumaj cristianos kanankupaj kallpachakojtinkoqa, ichapis mana yuyashajtillanku Diospa llajtanpi uj ruwayta japʼinkuman. Hermano Nicolasmanta parlarina. Payqa 20 watayoj kashaspa mayta llakikorqa mana siervo ministerialta jina churasqankurayku. Pay nin: “Imatachus mana allinta ruwashasqayta yuyarqani”, nispa. Jinapis payqa ñauparinanpaj kallpachakullarqapuni. Payqa congregacionpi, predicacionpi ima astawan yanapakunanpaj kallpachakorqa. Kunantaj uj Sucursalta Kamachejkunamanta ujnin.

4. ¿Imatá kay yachaqanapi yachakusun?

⁴ Ichapis llakisqa kashanchej Jehovapaj mana astawan llankʼayta atisqanchejmanta. Jina kajtenqa payman willakusunman imaynachus kashasqanchejta (Sal. 37:5-7). Chantapis experienciayoj hermanoswan parlarisunman imapichus astawan kallpachakunanchej kasqanta yuyaycharinawanchejpaj, chayman jina ruwanapajtaj kallpachakusunman. Chayta ruwaspaqa ichá imapichus yanapakuyta munashanchej chaypi yanapakuyta atisun. Jinapis ichá niñapuni Diospa llajtanpi wakin ruwanasta japʼiyta atinchejchu, hermana Melissa jina. Jina kajtin, ¿imatá ruwasunman kusisqallapuni kanapaj? Chay tapuyman kutichinapajqa kay yachaqanapi parlarisun: imachus kusichinawanchejmanta, Jehovaj llajtanpi imastachus ruwanamanta aswan kusisqa kanapaj, Diospa llajtanpi ñauparinapaj kallpachakuspa aswan kusisqa kanamanta ima.

5. Kusisqa kayta munanchej chay, ¿imatataj ruwananchej tiyan? (Eclesiastés 6:9).

⁵ Kusisqa kanapajqa imatachus Eclesiastés 6:9 (leey) nisqan yanapawasunman. Imatachus ‘rikusqan’ imaswan kusikoj runaqa, kapusqan imaswan sonqo juntʼasqa, nisunman imastachus ruwashasqanwan. ‘Qhasi manakaj imasta’ munapayaj runatajrí mana ruwayta atisqan imasllatapuni munapayan. ¿Imatá kaywan yachakunchej? Kusisqa kayta munanchej chayqa, imatachus ruwashanchej chaywan sonqo juntʼasqa kana kasqanta. Manataj imatachus mana ruwayta atisqanchejpi musphaykachanata.

6. ¿Ima kikinchaytataj qhawarisun chanta imatá chaymanta yachakusun?

⁶ Ni pipis tukuy kausayninpi kikin imasllatapuni ruwayta munanchu. Jinapis imachus kapuwasqanchejwan, ¿sonqo juntʼasqa kayta atisunmanchu? Arí. Imastachus ruwashasqanchejwanpis kusisqa kayta atisunman. ¿Imaynapí chayta yachanchej? Chaypajqa Jesuspa qolqe talentosmanta kikinchayninta qhawarisun. Chaytaj kashan Mateo 25:14-30 versiculospi. Chay kikinchaymantaqa yachakusun imatachus kusisqa kanapaj ruwanata, ruwashasqanchej imaswanpis imaynatachus aswan kusisqa kanata.

7. Jesús qolqe talentosmanta kikinchasqanta pisi parlayllapi sutʼinchariy.

⁷ Jesusqa kikinchayninpi parlarqa viajananpajña kashaj runamanta. Chay runaqa niraj viajashaspa kamachisninta wajyachispa sapa ujninkuman qolqe talentosta qosqa. Ajinamanta paykuna chay qolqeta llankʼachinankupaj. Sapa ujmantaj ruwayta atisqankuman jina qosqa. *  Ujmanqa phishqa talentosta, ujmantaj iskayta, ujninmantaj ujta. Phishqa talentosta japʼej kamachiwan iskay talentosta japʼej kamachiwanqa sumajta yuyaychakuspa, patronninkupaj astawan mirachipusqanku. Uj talentota japʼej kamachitaj mana mirachisqachu. Chayrayku patronnenqa payta kachapusqa.

8. ¿Imaraykutaj kusikunman karqa phishqa talentosta japʼej kamachi?

⁸ Phishqa talentosta japʼej kamacheqa, maytachá kusikorqa chay chhikata japʼisqanmanta. Imaraykuchus chayqa ashkha qolqe karqa. Chayta ruwasqanwanqa reparanchej patronnenqa kamachinpi mayta atienekusqanta. Iskay talentosllata japʼej kamachirí, ¿imaynataj kashanman karqa? Ichapis payqa llakikunman karqa chaysitullata japʼisqanmanta. Jinapis, ¿imatá ruwarqa? Chayta qhepan parrafospi qhawarisun.

9. ¿Imatataj Jesús mana nerqachu iskay talentosta japʼej kamachimanta? (Mateo 25:22, 23).

⁹ (Mateo 25:22, 23 leey). Jesusqa mana nerqachu iskay talentosllata japʼej kamachi pisillata japʼisqanmanta llakikusqanta, phiñakusqantataj. Chay kamacheqa kay jinata niyta atinman karqa: “¿Kaysitullatachu noqaman qowanqa? Noqapis phishqa talentosta japʼej jinallataj trabajani. Patronniy mana sumaj trabajadorta jinachu qhawawan chayqa, kay iskay talentosta pʼampaykuytawan ruwanasniyta ruwakamusaj”, nispa. Jinapis payqa mana chayta nisqachu.

10. ¿Imatataj iskay talentosta japʼej kamachi ruwarqa?

¹⁰ Iskay talentosta japʼej kamacheqa, phishqa talentosta japʼej kamachi jinallataj sumajta llankʼanan kasqanta yacharqa, patronninpajtaj tukuy atisqanta ruwarqa. Ajinamanta iskay talentostawan mirachiporqa. “Patronnintaj nisqa:  ‘Sumajta ruwanki allin kamachi. Qanqa pisi kajpi allinta juntʼarqanki. Kunantaj ashkha imasta qhawanaykipaj churasqayki’”, nispa.

11. ¿Imastá ruwasunman aswan kusisqa kanapaj?

¹¹ Noqanchejpis iskay talentosta japʼej kamachi jina, Jehovaj llajtanpi ima ruwanallatapis sumajta ruwanapaj kallpachakusun chayqa, aswan kusisqa kasun. Tukuy atisqanchejta predicana, congregacionpipis tukuy atisqanchejta yanapakuna (Hech. 18:5; Heb. 10:24, 25). Reunionespi comentariosninchejwan wajkunata kallpachanapaj sumajta wakichikuna. Cristiano Kausayninchej tantakuypaj asignacionta japʼinchej chayqa, sumajta juntʼanapaj kallpachakuna. Congregacionpi imallapipis yanapakunata niwajtinchejqa, tiemponpi tukuna, niwasqanchejman jinataj ruwana. Ama pisipaj qhawanachu wakin ruwanasninchejta, nitaj yuyanachu uj ratollapi ruwarpananchej kasqanta. Imatapis aswan sumajta ruwanapaj mayta kallpachakuna (Pro. 22:29). Jehovapaj astawan llankʼasun chayqa, paywan sumaj amigos kasunchej, aswan kusisqataj (Gál. 6:4). Waj hermanosninchej munasqanchej cargota japʼejtinkupis, mana phiñakusunchu, astawanqa kusikusun (Rom. 12:15; Gál. 5:26).

12. ¿Imatataj ruwarqanku Melissa, Nicolás ima aswan kusisqa kanankupaj?

¹² Hermana Melissamanta párrafo dospi parlarqanchejña. Payqa Betelpi sirviyta munarqa chayri Diospa Gobiernonmanta Willajkunapaj Escuelaman riyta munarqa. Jinapis manaña aterqachu. Pay nin: “Mayta kallpachakuni precursora jina sumajta yanapakunaypaj, tukuy imaymanamantataj predicanaypaj. Chaytaj mayta kusichiwan”, nispa. Párrafo trespitaj Nicolasmanta parlarerqanchej. Payqa, mana siervo ministerialta jina churasqankumanta mayta llakikorqa. ¿Imatá ruwarqa llakiyninta atipananpaj? Pay nin: “Astawan predicanaypaj, reunionespi comentaspa wajkunata kallpachanaypaj ima mayta kallpachakorqani. Chantapis Betelman rinaypaj uj solicitudta juntʼacherqani, watanmantaj wajyariwarqanku”, nispa.

13. Imatachus ruwashasqanchejta sumajta ruwanapaj kallpachakusun chay, ¿imaynataj sientekusun? (Eclesiastés 2:24).

¹³ Ruwanasninchejta sumajta ruwanapaj kallpachakusun chay, ¿japʼisunpunichu aswan qhepaman waj ruwanasta? Ichapis, Nicolás jina. Hermana Melissa jina manaña waj ruwanasta ruwayta atispataj, imastachus Jehovapaj ruwashasqanchejwan kusisqa, sonqo juntʼasqataj kasun (Eclesiastés 2:24 leey). Chantapis astawanraj kusikusun kallpachakusqanchej Señorninchej Jesucristota kusichisqanta yachaspa.

14. ¿Imaspajtaj kallpachakunallanchejpuni tiyan?

¹⁴ Jehovata sirvinapaj tukuy atisqanchejtaña kallpachakushanchej chaypis, ¿niñachu waj imastawan ruwanapaj kallpachakunanchej kanman? Kallpachakunallapuni aswan sumajta predicanapaj, yachachinapaj, hermanosninchejta sumajta yanapanapaj ima. Chay imastataj ruwayta atisun sumaj yuyaywan, atisqanchejman jinataj wajkunata yanapanapaj kallpachakuspa. Manataj noqallanchejpichu yuyasun (Pro. 11:2; Hech. 20:35).

15. ¿Imasta ruwaspataj aswan kusisqas kasun?

¹⁵ ¿Imaynasmantataj astawan Diospa llajtanpi yanapakusunman? Jehovamanta mañakuna imaynasmantachus paypaj astawan llankʼayta atisqanchejta reparachinawanchejpaj (Pro. 16:3; Sant. 1:5).  Párrafo unopi nerqa jina, precursor auxiliar chayri regular kanapaj, Betelpi chayri construccionpi yanapakamunapaj kallpachakusunman. Chantapis astawan ashkha runasman, chayri predicanapaj, chayri maypichá pisillata predicakun chayman  predicaj rinapaj waj parlayta yachakusunman. Imatachus chaypaj ruwanata astawan yachanapajqa, Organizados para hacer la voluntad de Jehová nisqa libropi 10 capitulonta leerisunman chantapis congregacionninchejmanta ancianosninchejwan parlarisunman. * Chay imasta ruwanapaj astawan kallpachakusun chayqa, aswan kusisqas kasun, wajkunapis reparanqanku ñauparishasqanchejta.

16. Manaña Jehovapaj astawan ruwayta atispa, ¿imapitaj piensarisunman?

¹⁶ Kay yachaqanapeqa imastachus Jehovapaj astawan ruwayta atisqanchejmanta parlarerqanchej. Chay imaspi mana yanapakuyta atinchejchu chayqa, waj imaspi yanapakuyta atisqanchejpi piensarina. Chayta qhepan parrafospi qhawarisun.

17. 1 Timoteo 4:13, 15 nisqanman jina, ¿imastataj uj hermano ruwanan tiyan sumaj yachachej kananpaj?

¹⁷ (1 Timoteo 4:13, 15 leey). Bautizasqa hermano kanki chayqa, kallpachakuwaj discursashaspa sumajta parlanaykipaj, yachachinaykipaj ima. Imajtinchus sumajta leespa, sumajta parlaspa, sumajta yachachispa ima, uyarisojkunata sumajta yanapanki. Leellaypuni, yachachillaypunitaj nisqa folletoj sapa yachaqananta estudianaykipaj, chayman jinataj ruwanaykipaj kallpachakuy. Chay folletoj sapa yachaqananta estudiay, yachakusqaykiman jina wasiykipi wakichikuy, discursashaspataj chayman jina ruwanaykipaj kallpachakuy. Chantapis yuyaychaj ancianota * chayri waj ancianosta tapurikuwaj imapichus astawan kallpachakunayki kasqanta yachanaykipaj. Paykunaqa “Diospa  palabranmanta parlanankupaj, yachachinankupaj ima, sinchʼita llankʼanku” (1 Tim. 5:17). Yachachillaypuni nisqa folletopi yachakusqaykiman jina ruwanaykipaj kallpachakojtiykipis, uyarisojkunaj creeyninkuta kallpachanaykipaj, yachakusqankuman jinataj kausakunankupaj yanapay. Chayta ruwaspaqa aswan kusisqa kanki, uyarisojkunapis kusisqallataj kanqanku.

18. ¿Imatataj ruwasunman sumaj yachachejkuna kanapaj?

¹⁸ Tukuy cristianosqa predicananchejpuni tiyan, runastataj Jesuspa yachachisqasninman tukuchinanchej tiyan (Mat. 28:19, 20; Rom. 10:14). Sumaj yachachejkuna kayta munanchej chayqa, Yachachillaypuni nisqa folletota estudiasunman, yachakusqanchejman jina ruwanapajtaj kallpachakusunman. Chantapis sumaj yuyaychaykunata tarillasunmantaj Cristiano Kausayninchej tantakuypaj nisqa folletopi, willanapaj videospi ima. Chay videostaqa Cristiano Kausayninchej nisqa tantakuypi rikuchikun. Chay yuyaychaykunaman jina ruwaspa, reparana mayqenchus sumajta yanapawasqanchejta. Chayta ruwajtinchejqa, aswan sumaj yachachejkuna kasun, aswan kusisqataj (2 Tim. 4:5).

19. ¿Imataj yanapawasun aswan kʼacha cristianos kananchejpaj?

¹⁹ Diospaj astawan llankʼayta munaspapis, astawanqa mayta kallpachakunanchej tiyan aswan kʼacha cristianos kananchejpaj (Gál. 5:22, 23; Col. 3:12; 2 Ped. 1:5-8). ¿Imatá chaypaj ruwasunman? Por ejemplo, sinchʼi creeyniyoj kayta munanchej chayqa, creeymanta parlaj yachaqanasta publicacionesninchejpi leerisunman. Chantá qhawarillasunmantaj wakin hermanos llakiykunapi kashaspa sinchʼi creeyniyoj kasqankumanta rikuchej videosta. Chaytaj JW Broadcasting^® nisqapi kashan. Chantá piensarisunman imaspi rikukuspachus paykuna jina sinchʼi creeyniyoj kananchejpi.

20. ¿Imatá ruwasunman aswan kusisqa kanapaj, manataj anchata llakikunapaj?

²⁰ Jehovapaj llankʼashanchejña chaypis, tukuy cristianos astawanpuni paypaj ruwayta munanchej. Mosoj pachapeqa ni ima jarkʼawasunchu Jehovata tukuy atisqanchejta sirvinapaj. Chay día chayamunankama Jehovata sirvinapaj mayta kallpachakusun chayqa, aswan kusisqa kasun, nitaj anchata llakikusunchu. Chantapis astawanqa kusikuyniyoj Jehová Diosninchejta jatunchasun, yupaychasuntaj (1 Tim. 1:11). Chayrayku, imatachus kay tiempopi Jehovapaj ruwayta atisqanchejmanta kusikuna.