33 YACHAQANA
Jehová Diosqa kamachisninta sumajta cuidan
‘Jehová Dios payta manchikojkunata cuidan’ (SAL. 33:18).
4 TAKIY Jehová Diosmin Michiwajniy
¿IMATÁ KAYPI YACHAKUSUN? a
1. ¿Imajtintaj Jesús Jehovamanta mañakorqa discipulosninta jarkʼananta?
JESUSQA wañupunan ñaupaj chʼisita Tatanmanta mañakorqa discipulosninta jarkʼananta (Juan 17:15, 20). Jehovaqa kamachisninta jarkʼanpuni, cuidanpunitaj. Jinapis Jesusqa yacharqa Satanasqa discipulosninta ni jaykʼaj jina astawan qhatiykachananta, chayraykutaj Jehovaj yanapayninta necesitanankuta.
2. Salmo 33:18-20 nisqanman jina, ¿imajtintaj mana manchachikunanchejchu tiyan problemaspi kaspa?
2 Satanaspa mundonqa cristianosta tukuy imaymanamanta matʼin. Problemaspi rikukojtinchejqa kallpanchej pisiyanman, Jehovatapis niña kasukuyta atisunmanchu. Kay yachaqanapi yachakusun jinataj, mana manchachikunanchejchu tiyan. Jehovaqa cuidawanchejpuni. Payqa qhawamushan imapichus rikukushasqanchejta, yanapanawanchejpajtaj wakichisqapuni kashan. Kay yachaqanapeqa parlarisun Eliasmantawan Jobmantawan. Reparasuntaj ‘Jehová Dios payta manchikojkunata cuidasqanta’ (Salmo 33:18-20 leey).
SAPITALLANCHEJ KASQANCHEJTA YUYASPA
3. ¿Ima kutispitaj sapallanchej kashasqanchejta yuyasunman?
3 Congregacionpi ashkha hermanosninchej, hermanasninchej kajtinpis, wakin kuteqa sapitallanchej kasqanchejta yuyasunman. Jovencitosqa creeyninkumanta cursonkupi sutʼinchananku kajtin chayri waj congregacionman ripojtinku, ichapis sapallanku kashasqankuta yuyankuman. Wakinninchejqa ichapis llakisqas chayri desanimasqas kashasunman, yuyasunmantaj sapallanchej chayta aguantananchej kasqanta. Ichapis wajkunaman llakiyninchejta willarikuyta manchachikusunman, mana entiendenawanchejta yuyaspa. Wakin kutitaj ni pi noqanchejmanta llakikusqanta yuyasunman. Imamanta sapayakojtinchejpis, ni pi yanaparinawanchejpaj kasqanta yuyasunman, llakisqallataj kasunman. Jehovatajrí mana munanchu ajina sientekunanchejta. Imaraykuchus chayta nisqanchejta qhawarina.
4. ¿Imajtintaj profeta Elías nerqa “noqa sapallayña kausashani” nispa?
4 Profeta Eliasmanta parlarina. Payqa 40 días kurajta ayqeykachakorqa Jezabel payta wañuchinanpaj jurasqanrayku (1 Rey. 19:1-9). Uj cuevapi sapallan kashaspa Jehovata nerqa: “Noqa sapallayña kausashani”, nispa (1 Rey. 19:10). Chay nacionpi payllaña profeta kasqanta yuyarqa, nitaj jinachu karqa. Abdiasqa 100 profetasta pakaykusqa Jezabel mana wañurachinanpaj (1 Rey. 18:7, 13). Chanta, ¿imajtín Elías sapallan kasqanta yuyarqa? Ichapis yuyarqa Abdías salvarqa chay tukuynin profetasta wañuchisqankutaña. Chayri ichá ajinata yuyarqa Carmelo orqopi Jehovapuni cheqa Dios kasqanta rikuchishajtinpis, ni pi Diospa ladonman churakusqanta rikuspa. Chayri ichapis yuyarqa wañuy patapi kashasqanta ni pi yachasqanta, ni pitaj paymanta llakikusqanta. Bibliaqa mana ninchu imajtinchus Elías sapallan sientekusqanta. Jinapis yachanchej Jehovaqa sumajta entiendesqanta imajtinchus Elías sapallan sientekusqanta, sumajtataj yacharqa imaynatachus yanapananta.
Sapallanchej sientekojtinchej, ¿imaynatá sonqochawanchej Eliasta Jehová yanapasqanta yuyarikuy? (5, 6 parrafosta qhawariy).
5. ¿Imatataj Jehová ruwarqa Elías mana sapallanchu kashasqanta reparananpaj?
5 Jehovaqa ashkha imaynasmanta Eliasta yanaparqa. Payta iskay kutita taporqa: “Elías, ¿imatá kaypi ruwashanki?”, nispa (1 Rey. 19:9, 13). Iskaynin kutipitaj Jehovaqa Eliaspa nisqanta sumajta uyarerqa. Chaymantataj reparacherqa chaypi kashasqanta, may atiyniyojtaj kasqanta. Chantapis nerqa Israelpeqa ashkha runasraj payllata yupaychashasqankuta (1 Rey. 19:11, 12, 18). Eliaspa sonqonqa maytachá tiyaykorqa Jehová Diosman willakusqantawan, kutichisqantataj uyarisqantawan. Chantapis Jehovaqa Eliasman kay sumaj ruwaykunata ruwananta kamacherqa: Hazaelta Siriapi rey kananpaj churananta, Jehuta Israelpi rey kananpaj churananta, Eliseotataj profeta kananpaj churananta (1 Rey. 19:). Jehovaqa chay ruwaykunata qospa Eliasta yanapasharqa allin imaspi yuyananpaj. Chantapis Eliseota sumaj compañeron kananpaj churarqa. Noqanchejrí, ¿imatá ruwasunman sapallanchej kashasqanchejta yuyaspa, Jehovaj yanapantataj necesitaspa? 15, 16
6. ¿Imatá Jehovaman nisunman sapallanchej sientekuspa? (Salmo 62:8).
6 Jehovaqa paymanta mañakunanchejta munan. Payqa yachan ima llakiyniyojchus kashasqanchejta, niwanchejtaj ima ratollapis paymanta mañakuyta atisqanchejta, uyarinawanchejtataj (1 Tes. 5:17). Kamachisninpa mañakusqankoqa paypa sonqonta kusichin (Pro. 15:8). Sapallanchej sientekuspa, ¿imatá Jehovaman nisunman? Elías jina tukuy imata payman willakusunman (Salmo 62:8 leey). Willakuna imachus llakichiwasqanchejta, imaynachus sonqonchej kashasqantapis. Mañakuna imatachus ruwananchejta reparachinawanchejta. Jovencito kanki chay, ¿imatá ruwawaj sapallayki kasqaykita yuyaspa, cursoykipitaj Jehovamanta parlayta manchachikuspa? Kallpata, yachayta mañakuwaj creeyniykimanta respetowan sutʼincharinaykipaj (Luc. 21:14, 15). Desanimasqa kashanki chayrí, ¿imatá ruwawaj? Jehovamanta mañakuy creeypi sinchʼi sayasqa hermanowan parlarinaykipaj yanapasunanta, chay hermanotataj entiendesunanpaj yanaparinanta. Mana sapallanchej sientekunapajqa, imaynachus kashasqanchejta Jehovaman willakuna, imaynatachus kutichiwasqanchejta sumajta reparana, wajkunawantaj yanapachikuna.
¿Kallpachakunchejchu hermanosninchejwan astawan predicanapaj? (7 parrafota qhawariy).
7. ¿Imatá Mauriciomanta yachakunchej?
7 Jehovaqa tukuyninchejman qowanchej sumaj llankʼayta. Payqa rikun tukuy imata congregacionpi, predicacionpipis ruwasqanchejta, chaytataj allinpaj qhawan (Sal. 110:3). Jehovata astawan sirvinapaj tiempochakuspaqa, mana sapallanchej sientekusunchu. ¿Imajtin? Mauricio sutiyoj jovencitomanta parlarina. b Bautizakusqanmanta pisi tiemponman, ujnin sumaj amigon Jehovamanta pisimanta pisi karunchakusharqa. Pay nin: “Amigoy Jehovamanta karunchakushasqanta rikuspa noqapis ichá kikillantataj ruwanayta yuyarqani. Nerqanitaj: ‘¿Jehovata sirvisaj nisqayta juntʼayta atisajchu? ¿Llajtallanpipunichu kasaj?’, nispa. Yuyarqani sapallay kashasqayta, nitaj ni pi entiendenawanta”. ¿Imataj Mauriciota yanaparqa? Pay nin: “Astawan predicay yanapawarqa mana noqallapi, nitaj llakiynillaypi yuyanaypaj. Hermanoswan predicaspaqa kusisqa karqani, niñataj sapallaychu sientekorqani”, nispa. Mana hermanosninchejwan khuskapunichu predicaspapis, paykunawan cartanejta, telefononejta predicaspaqa kallpachasqasllataj kanchej. ¿Imataj Mauriciota yanapallarqataj? Pay nillanpuni: “Congregacionpi astawan yanapakorqani. Asignacionesniyta allinta ruwanaypaj sumajta wakichikoj kani. Ajinamanta repararqani Jehová munakuwasqanta, hermanospis munakuwasqankuta”, nispa.
SINCHʼI LLAKIYKUNA PHUTICHIWAJTINCHEJ
8. ¿Imaynataj sientekusunman sinchʼi llakiykunapi kashajtinchej?
8 Yachanchej qhepa pʼunchaykunapeqa llakiykunapi rikukunanchejta (2 Tim. 3:1). Jinapis mana suyasqanchej llakiy mana yuyashajtillanchej chayamuwasunman. Ichapis jinallamanta mana qolqeyoj rikhurisunman, sinchʼi onqoyniyoj kasqanchejta yachasunman chayri pinillanchejpis wañupunman. Ajinapi rikukuspaqa mayta llakikusunman, nitaj ni imanakuyta atisunmanchu, astawanraj uj llakiyniyoj kashajtinchej waj llakiyñataj chayamuwajtinchej, chayri ashkha llakiykuna ujllapi chayamuwajtinchej. Jinapis yuyarikuna Jehová cuidashawasqanchejta. Yanapayninwanqa ima llakiytapis aguantayta atisun.
9. ¿Ima llakiykunataj Jobta qhatirerqa?
9 Qhawarina imaynatachus Jehová Jobta yanapasqanta. Paytaqa pisi tiempollapi ashkha sinchʼi llakiykuna qhatirerqa. Uj diallapi yacharqa tukuynin uywasninta, kamachisninta, munasqa wawasninta ima pierdesqanta (Job 1:13-19). Pisi tiemponmantaj lastimay llakisqa kashajtillanraj, payñataj uj millay onqoywan sinchʼita onqoykorqa (Job 2:7). Chay jina llakiypipuni rikukusqanrayku nerqa: “Amisqaña kani kausayniywan. Niña kausayta munanichu”, nispa (Job 7:16).
Jehovaqa Jobman nerqa tukuy ima ruwasqanta sumajta cuidasqanta. Chaywantaj reparacherqa kamachisninta munakuywan cuidasqanta (10 parrafota qhawariy).
10. ¿Imaynatataj Jehová Jobta yanaparqa llakiykunasninta aguantananpaj? (Kay revistaj tapanpi dibujota qhawariy).
10 Jehovaqa imachus Jobta qhatirishasqanta sumajta yacharqa. Payqa Jobta munakusqanrayku llakiykunasninta aguantananpaj, paymantataj mana karunchakunanpaj tukuy ima necesitasqanpi yanaparqa. Jehovapuni Jobwan parlarerqa, yuyaricherqataj manchay yachayniyoj kasqanta, tukuy wawasnintataj munakuywan cuidasqanta. Diosqa tʼukuna animalesmanta parlarerqa (Job 38:1, 2; 39:9, 13, 19, 27; 40:15; 41:1, 2). Chantapis Jehovaqa joven Elihuta kacharqa Jobta kallpacharinanpaj, sonqocharinanpaj ima. Elihuqa Jobta yuyaricherqa Jehovaqa payta sirvejkunata aguantasqankumanta bendecisqantapuni. Jinapis Jehovaqa munallarqataj wakin imitaspi Jobta yuyaycharinanta. Elihuqa munakuywan Jobta yuyaricherqa runasqa tukuy imata Ruwaj Jehová Dioswan kikinchasqaqa ni imapis kasqanchejta. Ajinamanta yanaparqa amaña payllapi anchata yuyananpaj (Job 37:14). Chantapis Jehovaqa Jobman uj ruwayta qollarqataj: Kinsantin juchallikoj amigosninpaj orapunanta nerqa (Job 42:8-10). Kay tiempopirí, llakiykunapi kashajtinchej, ¿imaynatataj Jehová yanapawanchej?
11. ¿Imaynatataj Biblia sonqochawanchej pruebaspi kashajtinchej?
11 Jehovaqa mana Jobwan jinachu noqanchejwan kay tiempopi parlan. Jinapis Palabran Biblianejta parlawanchej (Rom. 15:4). Aswan qhepapaj uj suyakuyta qowasqanchejwan sonqochawanchej. Qhawarina ima versiculoschus sonqochawasunman llakiykunapi kashajtinchej. Jehovaqa Palabranpi sutʼita niwanchej, ni aswan sinchʼi pruebaspis ‘tʼaqayta atinawanchejta paypa munakuyninmanta’ (Rom. 8:38, 39). Nillawanchejtaj pikunachus payman qhaparikunku chaykunaj qayllankupi kashasqanta, nisunman mañakusqanchejta uyarisqanta (Sal. 145:18). Jehovaqa niwanchej paypi atienekuspa ima pruebatapis aguantayta atisqanchejta, sufrispapis kusisqa kayta atisqanchejta (1 Cor. 10:13; Sant. 1: 2, 12). Chantapis Diospa Palabranqa yuyarichiwanchej pruebasninchejqa uj tiempollapaj kasqanta. Chaykunaqa ni imapischu Jehová wiñay kausayta qonawanchejta niwasqanchejwan (2 Cor. 4:16-18). Jehovaqa niwanchej pikunachus problemasta apamuwanchej chaykunata chinkachinanta: Satanasta, tukuy pay jina kajkunatawan (Sal. 37:10). ¿De memoriachu textosta yachanki qhepaman pruebaspi rikukuspa kallpachasunanpaj?
12. ¿Imatá ruwasunman Bibliawan sumajta yanapachikunanchejpaj?
12 Jehovaqa munan sapa día Bibliata estudiananchejta, leesqanchejpitaj tʼukurinanchejta. Yachakusqanchejman jina kausakojtinchejqa creeyninchej astawan sinchʼiyanqa, Jehovamantaj astawan qayllaykusun. Chaytaj kallpata qowasun aguantanapaj. Chantapis Palabranpi atienekusun chayqa, Jehová espíritu santonta qowasun. Chay espirituntaj ima pruebatapis aguantanapaj ‘sumaj atiyta’ qowasun (2 Cor. 4:7-10).
13. ¿Imaynatá yanapawanchej “allin kamachi yuyayniyoj” sumaj yachachiykunata mikhunata jina qowasqanchej?
13 ‘Allin kamachi yuyayniyojqa’ Jehovaj yanapayninwan ashkha yachaqanasta, videosta, takiykunata ima qowanchej. Chaykunataj yanapawanchej sinchʼi creeyniyoj kanapaj, Jehovaj qayllallanpipunitaj kanapaj (Mat. 24:45). Tukuy chay yanapas tiemponpi chayamuwasqanchejta sumajta aprovechana. Estados Unidosmanta uj hermana chay yanapasmanta kunallanraj mayta agradecekorqa. Pay nerqa: “40 watastaña Jehovata sirvisqaypi kutin kutita pruebaspi rikukorqani”, nispa. Kay hermanaqa sinchʼi llakiykunapipuni rikukorqa. Uj machasqa chofer awelitonta chocaspa wañucherqa, tatasnin sinchʼita onqoykuspa wañuporqanku, paytaj iskay kutipi cancerwan onqoykorqa. ¿Imataj aguantananpaj yanaparqa? Pay nin: “Jehovaqa cuidawarqapuni. Allin kamachi yuyayniyojnejta sumaj yachachiykunata mikhunata jina qowasqanchejqa aguantanaypaj yanapawarqa. Chayrayku Job jina ruwayta munani, Jehovaj ñaupaqenpitaj mana juchayojllapuni kayta munani tukuy sonqo payta kasukuspa”, nispa (Job 27:5).
¿Imaynamantá congregacionmanta hermanosninchejta yanapasunman? (14 parrafota qhawariy).
14. ¿Imaynatá Jehová hermanosninchejwan yanapachiwanchej llakiy patapi kajtinchej? (1 Tesalonicenses 4:9).
14 Jehovaqa kamachisninman yachachin purajmanta munanakuyta, llakiy tiempospitaj purajmanta sonqochanakuyta (2 Cor. 1:3, 4; leey). Hermanosninchejqa Elihú jina kanku. Paykunaqa llakiykunapi kashajtinchej creeypi sinchʼi sayasqallapuni kanapaj yanapariwanchej ( 1 Tesalonicenses 4:9Hech. 14:22). Diane sutiyoj hermana chayta kausayninpi rikorqa. Qosan sinchʼita onqoykojtenqa congregacionmanta hermanos kallpacharqanku, yanaparqankutaj mana Jehovamanta karunchakunanpaj. Pay nin: “Chay killasqa manchay llakiypipuni rikukorqayku. Jinapis repararqayku Jehovaqa atiyniyoj makisninwan munakuywan japʼishawasqaykuta. Congregacionmanta hermanospis mayta yanapallawarqaykutaj. Paykunaqa necesitashajtiykupuni waturikuwarqayku, wajyarimuwarqayku, abrazaykuwarqayku ima. Mana autota manejayta yachasqayraykutaj hermanosqa tukuy imata ruwaj kanku reunionesman, predicacionmanpis ima diaschá atej kani chay días rinaypaj”, nispa. May sumajpuni Jehovaj llajtanpi chay jina munakuyniyoj familiamanta kayqa.
AGRADECEKUNCHEJ JEHOVÁ MUNAKUYWAN CUIDAWASQANCHEJMANTA
15. ¿Imajtintaj nisunman llakiykunata aguantayta atisqanchejta?
15 Tukuyninchej ima pruebapipis rikukusunpuni. Yachakunchej jinataj, chay pruebastaqa ni jaykʼaj sapallanchejchu aguantananchej kanqa. Jehovaqa uj munakuyniyoj tata jina cuidawanchejpuni. Payqa noqanchejwanpuni kashan, wakichisqataj kashan yanapata mañakojtinchej uyarinawanchejpaj, yanapanawanchejpajtaj (Isa. 43:2). Jehovaj yanapayninwanqa ima llakiytapis aguantayta atinchej. Payqa aguantanapaj yanapasta maki juntʼata qowanchej. Chay yanapastaj kaykuna kanku: Diosmanta mañakuyta atisqanchej, Biblia, mikhuna jina ashkha sumaj yachachiykuna, llakiy tiempopi munakuywan yanapawanchej chay hermanosninchejpis.
16. ¿Imastá ruwananchej tiyan Jehová cuidanallawanchejpajpuni?
16 Mayta agradecekunchej Tatanchej Jehová sumajta cuidawasqanchejmanta. “Sonqonchejqa kusikun imatachus Dios ruwapuwasqanchejmanta” (Sal. 33:21). ¿Imatá ruwasunman Jehová munakuywan cuidawasqanchejmanta agradecekunapaj? Tukuy yanapasta qowasqanchejta sumajta aprovechana. Jehová cuidanallawanchejpajpuneqa noqanchejpis mana jinalla kakunanchejchu tiyan. Kallpachakunallapuni payta kasukunapaj, imatachus allinpaj qhawan chayta ruwanapajpis. Chayta ruwajtinchejqa Jehová wiñaypaj cuidallawasunpuni (1 Ped. 3:12).
30 TAKIY Jehová: Tatay, Diosniy, Amigoy