1. ¿Imatataj ashkha jovencitos ruwankuña?

 SAPA wataqa may chhika jovencitos bautizakunku. Jovencito, qanpis kunallanraj bautizakunki chayqa, congregacionniykimanta hermanos mayta kusikunku, Jehovapis mayta kusikullantaj (Pro. 27:11). Kunankamaqa ashkha imastaña ruwarqanki, Bibliata sumajta estudiarqanki, ichapis ashkha watasta. Chaytaj yanapasorqa Bibliaqa Diospa Palabranpuni kasqanta reparanaykipaj. Mana chayllachu, Diostapis sumajtaña rejsinki, munakunkitaj. Jehovata mayta munakusqaykiraykutaj kausayniykita payman jaywaporqanki, bautizakorqankitaj. Chayta ruwasqaykeqa may sumajpuni.

2. ¿Imatá kay yachaqanapi yachakusun?

 ² Niraj bautizakushaspaqa ichapis ashkha pruebaspi rikukorqanki. Jinapis wiñasqaykiman jina waj pruebas kallanqapuni. Satanasqa tukuy imata ruwanqa Jehovata munakusqayki pisiyananpaj, paymantataj karunchakunaykipaj (Efe. 4:14). Ama gustunta qoychu. ¿Imatá ruwawaj Jehovata kasukunallaykipajpuni, payta sirvinaykita nisqaykitapis juntʼanaykipaj? Ñauparinallaykipuni tiyan, nisunman “wiñay tukusqa” cristianoman tukunaykipaj kallpachakunallaykipuni tiyan (Heb. 6:1). Kay yachaqanapi yachakusun imaynatachus chayta ruwanaykita.

3. ¿Imatataj tukuy cristianos bautizakuytawan ruwananchej tiyan?

³ Bautizakojkunaqa imatachus apóstol Pablo Efesomanta cristianosman yuyaycharqa, chayta kasukunanchej tiyan. Paykunata nerqa cristiano kausayninkupi “wiñay tukusqa runas”  kanankuta (Efe. 4:13). Chaywantaj “ñauparillaychejpuni” nishanmanpis jina karqa. Pabloqa cristiano jina ñaupariyta uj wawitaj wiñasqanwan kikincharqa. Uj wawita nacekojtenqa tatasnin maytapuni kusikunku. Jinapis mana tukuy tiempochu wawitallapuni kanman. Tiempowanqa “wawa jina” kayta saqepunan tiyan (1 Cor. 13:11). Ajinallatataj cristianospis bautizakuytawanqa ñauparinallanchejpuni tiyan. ¿Imastataj chaypaj ruwasunman? Chayta qhawarina.

4. ¿Imataj yanapasunkiman astawan ñauparinaykipaj chanta imaraykutaj? (Filipenses 1:9).

⁴ Jehovata astawan astawan munakuy. Jehovata mayta munakuspañapis astawan munakuyta atiwaj. Apóstol Pablo nerqa imaynatachus chayta ruwanata. Chay nisqan kashan Filipenses 1:9 (leey) versiculopi. Pabloqa Jehovamanta mañakorqa Filiposmanta cristianospa munakuyninku “astawan astawan wiñananta”. Chaypi reparanchej Jehovataqa astawan munakuyta atisqanchejta. Chaypajqa necesitanchej ‘cheqa yachayta, sumajta reparayta ima’. Jehovata astawan rejsispaqa astawan payta munakunchej. Maytataj kusikunchej Jehová kʼacha kasqanmanta, imata ruwasqanpis may sumaj kasqanmanta. Mayta munanchej payta kusichiyta, ni imarayku munanchejchu sonqonta nanachiyta. Mayta kallpachakunchej imatachus ruwananchejta munasqanta entiendenapaj, chayman jinataj ruwanapaj.

5, 6. ¿Imatawantaj ruwasunman Jehovata astawan munakunapaj?

⁵ Jehovataqa astawan munakullasunmantaj Wawanta aswan sumajta rejsispa. Payqa Tatan jinapuni imatapis ruwan (Heb. 1:3). Jesustaqa aswan sumajta rejsisunman Mateo, Marcos, Lucas, Juan librosta estudiaspa. ¿Yachasqachu kanki sapa día Bibliata leeyman? Manaraj yachasqachu kanki chayqa, kunanmantapacha qallariwaj. Jesuspa ruwasqasninmanta, nisqasninmanta leeshaspataj imaynachus kasqanpi piensariwaj. Jesusqa qayllaykunapaj jinalla karqa, wawitastapis marqʼarikorqa (Mar. 10:13-16). Payqa may kʼacha karqa. Chayrayku discipulosnenqa mana manchachikuspa imatachus yuyasqankuta niyta atillaj kanku (Mat. 16:22). Jesusqa ajina karqa Tatan Jehovapuni qayllaykunapaj jina kasqanrayku. Chayrayku Diosmanta mañakuyta atinchej, imachus sonqonchejpi kasqantataj willakuyta atinchej. Yachanchejtaj chayta willakojtinchej Jehovaqa mana juzganawanchejta. Payqa munakuwanchej, noqanchejmantataj llakikun (1 Ped. 5:7).

⁶ Jesusqa runasta khuyakoj. Apóstol Mateo nerqa: “Ashkha runasta rikuspaqa mayta khuyakoj, paykunaqa mitharasqas, tʼaqa tʼaqallataj kasharqanku, mana michejniyoj ovejas jina”, nispa (Mat. 9:36). Jehovarí, ¿imaynatá runasta qhawan? Jesús nerqa: ‘Cielopi kashaj Tatayqa, mana munanchu kay juchʼuykunamanta ni ujpis chinkananta’, nispa (Mat. 18:14). Jehová chay jinatapuni munakuwasqanchejqa mayta kusichiwanchej. Jesusta astawan rejsispaqa Jehovata astawanraj munakunchej.

7. ¿Imaynatá yanapasunkiman wiñay tukusqa cristianoswan masichakuy?

⁷ ¿Imatawantaj ruwallawajtaj Jehovata astawan munakunaykipaj, wiñay tukusqa cristianomantaj tukunaykipaj? Congregacionniykimanta wiñay tukusqa cristianoswan masichakuy. Paykunaqa kusisqapuni kanku, Jehovata sirviyta ajllakusqankumantataj mana arrepientekunkuchu. Paykunata niwaj wakin experienciasninkuta willarisunankuta. Kausayniykipi imatachus ruwayta ajllanayki kajtintaj, paykunawan parlariwaj yuyaycharisunankupaj. Biblia nin: ‘Ashkha yuyaychajkuna kajtin imallapis allinta ruwakun’, nispa (Pro. 11:14).

8. ¿Imatá ruwawaj Bibliaj yachachisqanmanta iskayrayashanki chay?

 ⁸ Imamantapis iskayrayashanki chayqa ama jinalla qhepakuychu.  Iskay parrafopi yachakorqanchej jina, Satanasqa tukuy imata ruwanqa creeyniyki ama sinchʼiyananpaj, nitaj Jehovaman astawan qayllaykunaykipaj. Chayrayku payqa Bibliaj yachachiykunasninmanta iskayrayachiyta munasunki. Ichapis wakin runasqa creechiytapuni munasonqanku mana Dioschu ruwawasqanchejta, manachayqa jinallamanta rikhurisqanchejta. Wawallaraj kashaspaqa ichapis mana chaypi anchata yuyajchu kanki. Kunantaj jovencitoña kasqaykirayku, ichapis profesoresniyki kausay jinallamanta rikhurisqanta yachachisonqanku. Chayta yachachisusqankutaj ajinapuni kaspa jinanman, creenapaj jinataj kanman. Jinapis ichá paykunaqa ni jaykʼaj ukhuncharqankuchu Dios kasqantapunichus manachus. Yuyarikuy imatachus Proverbios 18:17 versiculopi nisqanta. Chaypi nin: “Juiciopi ñaupajta parlajqa cheqanta parlaspa jinan, contrariontaj allin allinta tapurispa sutʼiman orqhon ajinachus manachus kasqanta”, nispa. Chayrayku mana creenallaykichu tiyan escuelapi tukuy ima yachachisusqankuta. Astawanpis Bibliata sumajta estudianayki tiyan. Imatachus yachayta munasqaykimanta publicacionesninchejpi maskʼay. Ñaupajta wakin hermanosqa kausay jinallamanta rikhurisqanta creej kanku. Chay hermanosta tapuriy imaraykuchus Diospuni ruwawasqanchejpi creeyta qallarisqankuta. Chayta ruwayqa yanapasonqa Diospuni tukuy imata ruwasqanta sutʼita reparanaykipaj.

9. ¿Imatá Melissamanta yachakunki?

⁹ Melissa sutiyoj hermanamanta parlarina. b Paytaqa Diospuni tukuy imata ruwasqanmanta estudiay mayta yanaparqa. Pay nin: “Profesoresqa kausay jinallamanta rikhurisqanta, creenapaj jinapuni yachachinku. Noqataj qallariypeqa mana munarqanichu chaymanta astawan ukhunchayta. Manchachikorqani ukhunchaspaqa chay imaspi creeyta qallarinayta. Jinapis Jehovaqa mana munanchu paymanta mana allinta yachaspalla sirvinanchejta. Chayrayku astawan ukhuncharerqani. Chaypajtaj leererqani ¿Existe un Creador que se interese por nosotros? nisqa librota, chantá  ¿Es la vida obra de un Creador?, El origen de la vida. Cinco cuestiones dignas de análisis nisqa folletostawan. Chaykunata estudiaytapuni necesitashasqani. Aswan ñaupajllamantapis chayta estudiayman karqa”.

10, 11. ¿Imataj yanapasunkiman sajra munayniykiwan mana atipachikunaykipaj? (1 Tesalonicenses 4:3, 4).

¹⁰ Ama sajra munayniykiwan atipachikuychu. Jovencito, sipasita kasqaykirayku ichapis qhariwarmi jina puñuykuyta mayta munawaj. Wajkunapis khuchichakuy juchaman urmanaykipaj tanqasunkuman. Satanasqa munan sajra munayniykiwan atipachikunaykita. ¿Imataj yanapasunkiman mana chaypi urmanaykipaj? (1 Tesalonicenses 4:3, 4 leey). Jehovaman orakushaspaqa willariy imaynachus kashasqaykita, kallpata qosunantataj mañakuy (Mat. 6:13). Yuyarikuy, Jehovaqa yanapasuyta munan, manataj juzgasuytachu (Sal. 103:13, 14). Bibliapis yanapallasunkimantaj. Melissaqa millay imaspi yuyasqanwan mana atipachikunanpaj kallpachakorqa. Pay nin: “Bibliata sapa día leesqayrayku mana chay sajra yuyaykunasniywan atipachikorqanichu. Chay leesqayqa yuyarichiwarqa kausayniy Jehovajta kasqanta, payllata sirviyta munasqaytataj”, nispa (Sal. 119:9).

¹¹ Ama sapallayki sufrikuychu. Imachus pasashasusqanta tatasniykiman willariy. Chayqa mana atikullanchu, jinapis allin kanman tatasniykiwan parlarinaykipuni. Melissa nillantaj: “Jehovamanta mañakorqani mana manchachikunaypaj yanapanawanta. Chaymantataj tatayman willarqani imachus pasashawasqanta. Chaytaj mayta kusichiwarqa. Yacharqani Jehovatapis mayta kusichisqayta”, nispa.

12. ¿Imataj yanapasonqa allin kajta ruwayta ajllanaykipaj?

¹² Bibliaj yuyaychaykunasninwan yanapachikuy. Astawan jovenyasqaykiman jina sapallaykimantaña imatapis ruwayta ajllayta atinki. Jinapis manaraj tukuy imatachu yachanki. Ima pantaypi urmaspaqa Jehovamanta karunchakuwaj. ¿Imatá ruwawaj mana ajinapi rikukunaykipaj? (Pro. 22:3). Kari sutiyoj hermanita yuyarikun imachus payta yanapasqanta allin kajtapuni ajllananpaj. Payqa repararqa wiñay tukusqa cristianosqa mana tukuy imapajchu uj kamachiyta necesitasqankuta. Kari nin: “Kamachiykunallata kasukunaymantaqa, entiendenay karqa imatachus Jehová imamantapis yuyasqanta”, nispa. Bibliata leespaqa kay tapuykunapi piensariy: “Kay leesqay, ¿imatá yachachiwan imatachus Jehová yuyasqanmanta? Kay leesqaypi, ¿ima yuyaychaypis kanchu allin kajta ruwanaypaj jina yanapanawanpaj? Kay yuyaychayman jina ruwajtiy, ¿imaynataj riwanqa?” (Sal. 19:7; Isa. 48:17, 18). Sichus Bibliata leerinki, yuyaychaykunasninpitaj tʼukurinki chayqa, atillanki Jehovata kusichinaykipaj jina imatapis ruwayta. Imaynatachus Jehová yuyasqanta astawan entiendesqaykiman jinataj, reparanki mana tukuy imapajchu uj kamachiyta necesitasqaykita. Chaypi yachakun ñauparishasqayki.

13. ¿Imaynatataj sumaj amigos yanapasunkuman? (Proverbios 13:20).

¹³ Jehovata munakoj amigosta maskʼakuy. Qanchis parrafopi yachakorqanchej jina amigosniyki yanapasonqanku wiñay tukusqa cristianoman tukunaykipaj (Proverbios 13:20 leey). Sara sutiyoj hermanamanta parlarina. Payqa niña kusisqachu Jehovata sirvisharqa, jinapis willariwanchej imachus yanapasqanta. Pay nin: “Astawan necesitashajtiypuni sumaj amigasta tarikorqani. Uj amiguitaywan sapa semana Torremanta Qhawaj revistata estudiaj kayku. Waj amigaytaj yanapawarqa reunionespi comentanaypaj.  Amigasniy yanapawasqankurayku repararqani sapallaypi Bibliata estudianaypuni kasqanta, Diosmantapis mañakunaypuni kasqanta. Pisimanta pisi Jehovaqa sumaj amigoyman tukorqa, watejmantataj kusisqa karqani”, nispa.

14. ¿Maypitaj Julián sumaj amigosta tarerqa?

¹⁴ ¿Imatataj ruwawaj sumaj amigosta tarinaykipaj? Julián sutiyoj hermanomanta parlarina. Payqa anciano, nintaj: “Aswan joven kashaspaqa sumaj amigosta tarerqani predicacionpi. Paykunaqa sonqo kʼajaywan willaj kanku, chaypi rikorqani predicaspaqa may kusisqa kayta atisqanchejta. Chayrayku Jehovapaj astawan llankʼayta munarqani. Chantapis reparakorqani amigosneyqa edadnillaymanta kasqankuta, chayrayku sumaj amigosneyqa pisilla karqanku. Aswan qhepaman Betelpi yanapakuspa sumaj amigosta tarillarqanitaj. Paykunamanta yachakorqani imawanchus kusirikunayta allinta ajllanay kasqanta, chaytaj Jehovaman astawan kʼaskaykuchiwarqa”.

15. ¿Imatataj Pablo Timoteoman nerqa? (2 Timoteo 2:20-22).

¹⁵ Sichus congregacionmanta pillawanpis masichakushawaj, reparawajtaj Jehovamanta karunchasunanpaj jina kasqanta chay, ¿imatá ruwawaj? Apóstol Pabloqa yacharqa chay tiempopi congregacionmanta wakenqa mana cristianos jinachu yuyasqankuta, ruwasqankutapis. Chayrayku Timoteota nerqa paykunamanta karunchakunanta (2 Timoteo 2:20-22 leey). Tatanchej Jehovawan amigos kasqanchejqa may sumajpuni. Chaypajtaj mayta kallpachakunchej. Chayrayku amapuni saqenachu pipis paymanta karunchanawanchejta (Sal. 26:4).

16. ¿Imastataj ruwawaj astawan ñauparinaykipaj?

¹⁶ Allin imasta ruwanaykipaj kallpachakuy. Chay imasqa kanku imaschus creeyniykita astawan sinchʼiyachin, aswan sumaj cristiano kanaykipajtaj yanapasunku chaykuna (Efe. 3:16). Kallpachakuwaj mana qonqaspa sapallaykipi Bibliata estudianaykipaj, leenaykipajpis (Sal. 1:2, 3). Chantapis Jehovamanta astawan mañakuwaj, tukuy sonqotaj. Ichapis qhawarikunayki kanqa imaswanchus kusirikushasqaykita, tiempoykitataj mana usuchinallaykita (Efe. 5:15, 16). Jehovaqa mayta kusikun ñauparinaykipaj kallpachakushasqaykita rikuspa.

17. ¿Imasta ruwaspataj aswan kusisqa kawaj?

 ¹⁷ Wajkunata yanapaspaqa wiñay tukusqa cristianoman tukunki. Jesús nerqa: “Aswan kusisqa kanchej wajman qorispa, qorichikunamanta nisqaqa”, nispa (Hech. 20:35). Wajkunata yanapanaykipaj tiempochakunki, kallpachakunki chayqa, aswan kusisqa kanki. ¿Imaynatá wajkunata yanapawaj? Kallpachakuwaj congregacionniykimanta machitu hermanospaj, onqosqa hermanospajpis necesitasqanku imasta rantirinpunaykipaj chayri celularninkuta, tabletninkuta apaykachayta yachachinaykipaj. Bautizasqaña kanki chaytaj kallpachakuwaj siervo ministerial kanaykipaj, ajinamanta hermanosta astawan yanapariyta atinki (Fili. 2:4). Mana testigoschu kanku chay runasta munakusqaykitapis rikuchillawajtaj, Diospa Gobiernonmanta sumaj willaykunata paykunaman willarispa (Mat. 9:36, 37). Atikojtenqa kallpachakuy Jehovapaj tiempo juntʼasqata llankʼanaykipaj.

18. Precursor kaspa, ¿imastataj ruwayta atiwaj?

¹⁸ Precursor kaspaqa riyta atiwaj Diospa Gobiernonmanta Willajkunapaj Escuelaman chayri Betelman, construccionpipis yanapakuyta atiwaj. Uj sipas precursora, Katalina sutiyoj nin: “Unayña testigos kaj hermanoswan, hermanaswan predicayqa yanapawarqa bautizakuytawan astawan ñauparinaypaj. Paykunamantaqa yachakorqani Bibliata sumajta ukhunchayta, aswan sumaj yachachej kaytapis”, nispa.

19. Cristiano kausayniykipi ñauparillankipuni chay, ¿ima bendicionestataj japʼinki?

¹⁹ Cristiano kausayniykipi ñauparillankipuni chayqa, ashkha bendicionesta japʼinki. Mana joven kasqaykita usuchinkichu qhasi manakaj imasta ruwaspa (1 Juan 2:17). Allin imasta ruwaytapuni ajllaspa mana llakiykunapi rikukunkichu. Chantapis kusisqa kausakunki, allintaj risonqa kausayniykipi (Pro. 16:3). Ruwasqaykita rikuspa congregacionmanta jóvenes, kuraj hermanospis qan jinallataj ruwayta munanqanku (1 Tim. 4:12). Chantapis Jehová allinpaj qhawasusqanta yachaspa, sumaj amigontaj kasqaykita yachaspa sonqo tiyasqa kanki, kusisqataj (Pro. 23:15, 16).