1, 2. 1) ¿Imaraykutaj llakikunchej? (Patapi kaj dibujota qhawariy). 2) ¿Imastá kay yachaqanapi ukhunchasunchej?

KAY tiempopi, Satanasqa “phiña león jina qhaparirispa muyuykacha[shan], mayqellantapis oqoykunampaj” (1 Ped. 5:8; Apo. 12:17). Chayrayku kausayqa may llakiy. Jehovaj kamachisninpis llakikullankutaj. Ñaupa tiempomanta Diospa kamachisninpis, wakin kutis llakikullarqankutaj. Biblia nisqanman jina, rey Davidqa wakin kutis llakikorqa (Sal. 13:2). Apóstol Pablopis ‘tukuy congregacionespi yuyaspa llakikullarqataj’ (2 Cor. 11:28). ¿Imatá ruwasunman manchay llakisqa kaspa?

² Munakuyniyoj Tatanchej Jehová Diosqa, ñaupa tiempomanta kamachisninta yanaparqa llakiykunasninkuta atipanankupaj. Kay tiempopipis yanapallaytataj munawanchej. Biblia niwanchej: “Diosman saqeychej tukuy phutikuyniykichejta, imaraykuchus payqa qankunamanta dakun”, nispa (1 Ped. 5:7). ¿Imaynatá chayta ruwasunman? Kay jinamanta: 1) Diosmanta mañakuna, 2) Bibliata leena, chaypitaj tʼukurina, chantá 3) Jehovaj atiyninwan yanapachikuna, 4) pipichus atienekunchej chaywan parlarina. Kay yachaqanapi chay tawa imasta ukhunchasun. Chaykunata ukhunchashaspataj, reparana imastachus astawan ruwananchej kasqanta.

3. ¿Imaynatataj llakiyninchejta Jehovaman saqesunman?

³ Jehová Diosman llakiykunasninchejta saqesunman, ñaupajtaqa paymanta tukuy sonqo mañakuspa. Llakisqa kashajtinchej, Tatanchej Jehová Diosqa munan payman phutiyninchejta willakunanchejta. David Jehovamanta mañakorqa: “Diosníy, mañakususqayta uyariway”, nispa. Chantá chay salmollapitaj nerqa: “Llakiyniykita Tata Diosman saqey. Payqa sinchʼita sayachisonqa”, nispa (Sal. 55:1, 22). Uj chʼampayta allinchanapaj tukuy atisqanchejta ruwaytawan, amaña anchata llakikunachu, astawanqa Diosmanta mañakuna. ¿Imaynatataj Diosmanta mañakuy yanapawasunman ashkha llakiykunasniyoj kashajtinchej? (Sal. 94:18, 19).

4. Llakisqa kashaspa, ¿imaraykú Diosmanta mañakunanchej tiyan?

⁴ (Filipenses 4:6, 7 leey). ¿Imaynatataj Jehová tukuy sonqo mañakusqanchejta kutichiwanchej? Payqa sonqo tiyaykusqa kanapaj, mana anchata llakikunapaj ima yanapawasun. Chayrayku ama llakikunachu, nitaj manchachikunachu. Imaraykuchus “Diosqa chay mana unanchay atina sonqo tiyaykuyninta” sonqosninchejman churayta atin. Ashkha hermanosninchejqa chayta kausayninkupi rikorqanku, noqanchejpis yanapachikullasunmantaj. Diospa sonqo tiyaykuynenqa, ima llakiyta atipanapajpis yanapawasun. Jehová niwanchej: “Ama sonqoyki qʼenaqakuchunchu, imaraykuchus noqaqa Diosniyki kani. Noqa kallpachasqayki, yanapallasqaykitaj”, nispa. Chayta juntʼananpi atienekuna (Isa. 41:10).

5. ¿Imaynatá Biblia sonqo tiyasqa kanapaj yanapawasunman?

⁵ Sonqo tiyaykusqa kanapaj, Bibliata leey, chaypi tʼukuriy ima yanapallawasunmantaj. ¿Imaynatá? Bibliaqa Diospa Palabran, chaypitaj Ruwawajninchejpa sumaj yuyaychaykunasnin kashan. Chayrayku llakisqa kashaspaqa, Diospa nisqanpi tʼukurina, imaynatachus yuyaychaykunasnin kallpachawasqanchejpi ima. Chayqa yanapawasun llakiykunasninchejta atipanapaj, pisiyachinapaj chayri mana llakikunapaj. Jehovaqa Palabranta leejtinchej, “sumaj kallpasapa, waputaj” kananchejta niwanchej. Chantapis mana manchachikusunchu, nitaj qʼewakusunchu (Jos. 1:7-9).

6. ¿Imaynatá Jesuspa parlasqan yanapawasunman?

⁶ Diospa Palabranpeqa, imaynatachus Jesús runaswan parlarisqanmanta leeyta atinchej. Runasqa Jesuspa parlasqanta mayta uyariyta munaj kanku, astawanraj saykʼusqa chayri llakisqa kajkuna. Imaraykuchus payqa kallpacharinapaj jina, sonqochanapaj jinataj parlaj (Mateo 11:28-30 leey). Jesusqa runasmanta llakikoj (Mar. 6:30-32). Payqa paywan rej apostolesninta yanapananta nerqa. Noqanchejtapis yanapallawasunchejtaj. Chaypajqa mana Jesuswan khuskapunichu kananchej tiyan. Imaraykuchus Reyninchej Jesusqa munakushallawanchejpuni. Chayrayku llakisqa kashaspaqa, ama iskayrayanachu maychus tiemponpi yanapanawanchejmanta. Jesusqa llakiykunasninchejta atipanapaj kallpachawanchej, uj suyakuytataj qowanchej (Heb. 2:17, 18; 4:16).

7. ¿Imaynatá Diospa atiyninwan yanapachikusunman?

⁷ Jesús nerqa: “Janaj pachapi kaj Tataykichejqa Espíritu Santota qonqa mañakojkunaman”, nispa (Luc. 11:10-13). ¿Imaynatataj Diospa espíritu santon chayri atiynin llakiykunasninchejta pisiyachinanpaj yanapawanchej? Diospa atiynenqa, Pay jina kʼacha kaykunasniyoj kanapaj yanapawanchej (Col. 3:10). Bibliaqa chay kʼacha kaykuna, Diospa atiyninmanta “poqoy jina” kasqanta nin (Gálatas 5:22, 23 leey). Diospa atiyninwan yanapachikojtinchej, wajkunawan aswan allinta kausakusun, manataj imapis anchata llakichiwasunchu. Qhawarina imaynasmantachus Diospa atiynin yanapawasqanchejta.

8-12. ¿Imaynasmantá Diospa atiynin yanapawanchej?

⁸ “Munakuyniyoj kay, kusikuyniyoj kay, sonqo tiyaykusqa kay”. Wajkunata jatunpaj qhawajtinchej, aswan pisi llakiykunasniyoj kasun. ¿Imaynataj chay kanman? Hermanos jina tukuy sonqo munanakojtinchej, wajkunata aswan allinpaj qhawajtinchej ima, mana phiñakusunchu, nitaj llakikusunchu. Ajinamantataj wajkunawan allinta kausakuyta atisunchej (Rom. 12:10).

⁹ “Pacienciayoj kay, khuyakuyniyoj kay, kʼacha kay”. Biblia nin: “Ujkuna ujkunawan kʼachas kaychej, khuyakuyniyojtaj. Sapa uj perdonanakuychej”, nispa (Efe. 4:32). Chay yuyaychayman jina kausakuspaqa, wajkunawan allinta kausakusunchej, manataj imapis llakichiwasunchu. Chantapis juchasapas kasqanchejrayku ima chʼampaypis rikhurejtenqa, allinchayta atillasun.

¹⁰ “Creeyniyoj kay, [NM]”. Kay tiempopi qolqerayku chayri waj imasta necesitasqanchejrayku wakin kuti llakikunchejpuni (Pro. 18:11). ¿Imatá ruwasunman mana anchata llakikunapaj? Apóstol Pabloj yuyaychasqanta kasukuna tiyan. Pay nerqa: “Imachus kunan kapususqaykichejllawan sonqo juntʼasqa kaychej”, nispa. Sinchʼi creeyniyoj kaspaqa, Jehová imatachus necesitasqanchejta qonawanchejpi atienekusunchej. Pay nerqa: “Mana wijchʼurparisqaykichu, nitaj saqerparisqaykichu”, nispa. Chayrayku tukuy sonqo Pablo jina niyta atinchej: “[Jehovaqa] yanapawajniy, manataj manchachikusajchu. Imanawanqataj runa kasqari?”, nispa (Heb. 13:5, 6).

¹¹ “Llampʼu sonqo kay, sajra munaynin[chej]wan mana atipachikoj kay”. Ajina kajtinchejqa allinpuni riwasun. Imaraykuchus mana imatapis ruwarparillasunchu chayri parlarparillasunchu. Jinaspataj mana llakikusunchu. Chantapis sonqonchejmanta wijchʼusunchej “tukuy jaya sonqo kayta, phiñakuyta, rabiakuyta, qhaparqachayta, runaj contranta sajra parlakuyta” ima (Efe. 4:31).

¹² “Atiyniyoj Diospa makimpi” churakunapajqa, kʼumuykukuyniyoj kananchej tiyan, jinallataj phutiyninchejta payman saqenapajpis (1 Ped. 5:6, 7). Kʼumuykukoj sonqo kasunchej chayqa Jehová yanapawasunchej, jarkʼawasunchejtaj. Maykamallachus ruwayta atisqanchejta reparaspaqa, mana noqallanchejpichu atienekusun, manaqa Jehovapi atienekusun. Ajinamantataj pisillataña llakikusunchej (Miq. 6:8).

13. ¿Imatá Jesús niyta munasharqa “ama phutikuychejchu” nispa?

¹³ Jesusqa Mateo 6:34 (leey), versiculopi yuyaycharqa: “Ama phutikuychejchu”, nispa. Ichapis chay yuyaychayman  jina mana ruwayta atillanchejchu. Jinapis, ¿imatá Jesús niyta munasharqa? Yachakorqanchej jina, Davidwan Pablowanpis wakin kutis llakikorqanku. Chayrayku Jesusqa, Diospa kamachisnin mana ni jaykʼaj llakikunankumantachu parlasharqa. Astawanpis Jesusqa yachachisqasninta entiendechisharqa, anchata llakikoyqa ni imapi yanapakusqanta. Sapa día llakiykuna kanqapuni. Chayrayku mana allinchu kanman imaschus karqa chaykunamanta chayri imachus qhepaman kananmanta llakikunanchej. ¿Imaynatá Jesuspa yuyaychasqan mana anchata llakikunapaj yanapawasunman?

14. ¿Imaynatataj llakiyninchejta David jina pisiyachisunman?

¹⁴ Wakin kuti runasqa, ñaupa juchasninkumanta yuyarikuspa llakikullankupuni. Ashkha watasña pasajtinpis, ruwasqankumanta sonqonku juchachallanpuni. Wakin kutis rey Davidpis, imatachus ruwasqanmanta manchayta llakikoj. Pay nerqa: “Sonqoy wawayasqanmanta waqani”, nispa (Sal. 38:3, 4, 8, 18). Ajinapi rikukuspa, Davidqa Jehová perdonananpi, khuyakunanpi ima atienekorqa. Jehová perdonasqanta yachaspataj kusikorqa (Salmo 32:1-3, 5 leey).

15. 1) ¿Imatawantaj Davidmanta yachakusunman? 2) ¿Imatá ruwasunman llakiyninchejta pisiyachinapaj? (“ Llakiyninchejta pisiyachinapaj”, nisqa recuadrota leey).

¹⁵ Wakin kutis, imapichus rikukushasqanchejmanta llakikusunman. Davidqa Salmo 55 qhelqashajtin, wañuchinankumanta mancharisqa kasharqa (Sal. 55:2-5). Ajina llakisqa kaspapis, Diospi atienekullarqapuni. Davidqa Jehovamanta mayta mañakorqa yanapananta. Paypis chay llakiyninta atipananpaj, mayta kallpachakullarqataj (2 Sam. 15:30-34). ¿Imatataj Davidmanta yachakusunman? Llakiykunasninchejwan atipachikunamantaqa, tukuy imata ruwana chʼampaykunasninchejta allinchanapaj. Chantataj Jehová yanapanawanchejpi atienekuna.

16. Diospa sutin imachus niyta munasqan, ¿imaynatá paypi atienekunapaj yanapawanchej?

¹⁶ Wakin kutis, cristianosqa imachus qhepaman kananmanta llakikunku. Jinapis imachus manaraj kasqanmanta llakikoyqa qhasilla. ¿Imaraykú? Imaraykuchus mana yuyasqanchejman jinapunichu imapis kanqa. Chantapis yuyarikuna, tukuy ima Jehovaj makinpi kashasqanta. Diospa sutinpis niyta munan, “Pay Munayninta Juntʼachin” (Éxo. 3:14, NM). Chayrayku mana allinchu kanman, imachus qhepaman kanamanta llakikunanchej. Imaraykuchus Diospa sutin nin jina, Payqa imatachus runapaj ruwayta munasqanta juntʼanqapuni. Chayrayku ama iskayrayanachu, Diosqa cheqa sonqo kamachisninta bendecinanmanta, jinallataj tukuy llakiyninkuta chinkachinanmantapis.

17, 18. ¿Imaynatataj wajkunawan sutʼita parlariy yanapawanchej?

¹⁷ Pipichus atienekunchej chaywan sutʼita parlarispaqa, llakiyninchejta pisiyachillasunmantaj. Qosayki, warmiyki, amigoyki chayri congregacionmanta uj anciano, maychus kajllata llakikunaykipaj yanapasunkiman. Bibliaqa nin: “Phuteyqa runata mana allinman tukuchin, miskʼi palabrasrí sonqonta tʼikarichin”, nispa (Pro. 12:25). Chantá nillantaj: “Mana yuyaychachikuspa, ima ruwanatapis wakichikusqaqa mana allinchu rin; allin rinanqa ashkha yuyaychajkunapi kashan”, nispa (Pro. 15:22).

¹⁸ Tantakuykunapis mana anchata llakikunapaj yanapallawanchejtaj. Chaypeqa hermanoswan hermanaswan sapa semana kashanchej. Paykunaqa noqanchejmanta llakikunku, kallpachaytataj munawanchej (Heb. 10:24, 25). ‘Purajmanta kallpachanakusqanchejtaj’, mana anchata llakikunapaj yanapawanchej (Rom. 1:12).

19. Jehovawan sumaj amigos kasqayki, ¿imaynatá yanapasunkiman niña anchata llakikunaykipaj?

¹⁹ Canadá suyumanta uj ancianoqa, llakiyninta Jehovaman saqey may allin kasqanta yachakorqa. Payqa profesor, uj onqoyniyojtaj. Chay onqoyqa mayta llakichin. ¿Imataj payta yanaparqa? Pay nin: “Niña anchata llakikunaypajqa, Jehovawan sumaj amigos kanaypaj kallpachakusqay astawan yanapawarqa. Llakiypi kashajtiy sumaj amigosniy, hermanos ima mayta yanapawarqanku. Warmiyman sutʼita willarerqani imaynachus kashasqayta. Congregacionesta waturej hermano, ancianospis mayta yanapallawarqankutaj. Paykunaqa chʼampaykunasniypi mana anchata yuyanaypaj yanapawarqanku. Chantapis doctorpaman rerqani, wakin imastataj waj jinamanta ruwarqani. Tiempochakorqanitaj samarinaypaj, ejerciciosta ruwanaypaj ima. Chantá pisimanta pisi niña anchata llakikorqanichu. Imatapis mana ruwayta atejtiytaj, Jehovaj makinpi saqepuni”, nispa.

20. 1) ¿Imaynatá Jehovaman llakiykunasninchejta saqenchej? 2) ¿Imatá qhepan yachaqanapi yachakusunchej?

²⁰ Kay yachaqanapi llakiykunasninchejta Jehovaman saqena kasqanta yachakorqanchej. ¿Imaynatá? Diosmanta mañakuspa, Palabranta leespa, chaypi tʼukurispa ima. Chantá yachakullarqanchejtaj, Jehovaj atiyninwan yanapachikunanchejta, pipichus atienekunchej chaywan parlarinanchejta, tantakuykunamanpis rinanchejta. Qhepan yachaqanapeqa, yachakusunchej Jehová uj sumaj suyakuyta qospa yanapawasqanchejta (Heb. 11:6).