1. ¿Imajtintaj bautizakunapuni kasqa? (Patapi kaj fotosta qhawariy).

SAPA wata may chhika runasqa, Bibliata estudiaytawan bautizakunku. Chay bautizakojkunamantataj ashkhasqa, jóvenes, wawas ima kanku. Ichapis chay jovenesqa, cristiana familiapi uywasqa karqanku. Jóvenes, ¿bautizakunkichejñachu? Bautizakunkichejña chayqa, allinta ruwasqaykichejta niyku. Imajtinchus salvakunapajqa bautizakunapuni tiyan (Mat. 28:19, 20; 1 Ped. 3:21).

2. ¿Diospa munayninta ruway allinninchejpajchu kasqa?

² Bautizakorqanchej chay diaqa, discursota qoj hermano, jinata tapumorqa: “Jesuspa wañuyninpi creesqaykirayku, ¿juchasniykimanta pesachikuspa kutirikunkichu, chantapis Jehová Diosman kausayniykita qonkiñachu, paypa munayninta juntʼanaykipaj?”, nispa. Chay tapuymantaj, “arí” nispa kuticherqanchej. “Arí” nispaqa, Jehová Diosman nerqanchej, payta munakunanchejta, imapi rikukuspapis payllata sirvinanchejta ima. Jehová Diosman imatachus nisqanchejtataj juntʼanapuni tiyan. Jóvenes, Diospa munayninta ruwajtiykichejqa allinniykichejpajpuni kanqa, Diabloj munayninta ruwanaykichejmanta  nisqaqa. Imajtinchus Diabloqa mana allinniykichejtachu maskʼan. Astawanqa Diosta wasanchanaykichejta munan, ajinamanta wiñay kausayta mana japʼinaykichejpaj.

3. ¿Ima bendicionestataj japʼerqankichej bautizakusqaykichejmantapacha?

³ Jóvenes, Jehová Dios maytachá bendecisorqachej bautizakusqaykichejmantapacha. Qankunataj niraj bautizakushaspa Jehová Diosman nerqankichej, payllata sirvinaykichejta. Chayrayku tukuy sonqo niyta atiwajchej: “Tata Diosqa noqawan kashan; mana manchachikusajchu. Imanawanqataj runari?”, nispa (Sal. 118:6). Jehová Diosqa allin ñawiwan qhawasunkichej, paypa ladonmanta churakusqaykichejrayku. Chaytaj ni imawan kikinchakunchu.

4, 5. 1) ¿Pimantataj kashan Jehová Diosta tukuy sonqo sirvinanchej? 2) Wawas, jóvenes, machitus kaspapis, ¿imaspitaj rikukusunman?

⁴ Jóvenes, ama yuyaychejchu tatasniykichej tukuy sonqo Jehová Diosta yupaychasqankurayku, qankunapis Jehová Diosta tukuy sonqollataj yupaychanaykichejta. Tatasniykichejwan tiyakojtiykichejpis, qankunamanta kashan, Jehová Diosta tukuy sonqo yupaychanaykichejqa. Chayta yuyarikuytaj allinpuni. Imaraykuchus mana yachasunmanchu, ima llakiykunapichus aswan qhepaman rikukunanchejta. Ichapis wawallaraj kashaspa bautizakorqankichej. Kunantaj jovencitusña kaspa, waj phutiykunapi rikukunkichej, ashkha problemastataj atipanaykichej kashan. Chaymanta parlaspa, uj jovencita ajinata nerqa: “Wawallaraj kashaspaqa Jehová Diosta kasukuyta atillanchej. Escuelamanta compañerosninchej cumpleañosta ruwashajtinku tortata qoriwayta munawajtinchejpis. Jovenesña kaspataj, ichapis Jehová Diosta mana kasukuyta atillasunmanchu, qhariwarmi jina puñuykuyta munapayay aswan sinchʼi kasqanrayku. Chayrayku sonqonchejpi sutʼi kanan tiyan, Jehová Diosta kasukuy allinninchejpajpuni kasqanta”, nispa.

⁵ Chaywanpis mana jovenesllachu llakiykunapi rikukunku. Machitusña kaspa bautizakojkunapis, ashkha llakiykunallapitaj rikukunku. Paykunaqa llakikunkuman onqoykusqankurayku, chayri familiankupi, trabajonkupi ima chʼajwas kasqanrayku. Wawas, jóvenes chayri machitusña kaspapis, tukuy imaymana llakiykunata aguantananchej kanqa, Jehová Diosta mana wasanchanapaj (Sant. 1:12-14).

6. 1) ¿Imatataj jóvenes yuyarikunanku kasqa Diosta mana wasanchanankupaj? 2) ¿Imatataj yachakusunman Filipenses 4:11 al 13 versiculosmanta?

⁶ Jóvenes, imapi rikukuspapis Jehová Diosta mana wasanchanaykichejpajqa, yuyarikunaykichejpuni tiyan, imatachus Jehová Diosman nisqaykichejta. Qankunaqa Jehová Diosman nerqankichej, imapi rikukuspapis payllata sirvinaykichejta, familiaresniykichej chayri amigosniykichej paymanta karunchakojtinkupis (Sal. 27:10). Ima llakiypi rikukuspapis, Jehová Diospa yanapanta mañakuychej, payman imatachus nisqaykichejta juntʼanaykichejpaj (Filipenses 4:11-13 leey).

7. ¿Imatataj ruwananchej kasqa Jehová Diospa qayllallanpipuni kanapaj?

⁷ Jóvenes, Jehová Diosqa munan payman qayllaykunaykichejta. Payman astawan qayllaykunaykichejpajtaj, kallpachakunaykichej tiyan. Ajinamanta salvakunaykichejpaj. Chayrayku Biblia nin: ‘Kasukullaychejpuni manchachikuywan, kharkatiywantaj. Ajinamanta salvacionta tarinaykichejpaj’, nispa (Fili. 2:12). Kay versiculoqa sutʼita nin, Jehová Diospa qayllallanpipuni kanaykichejpajqa, payta kasukunaykichejpuni kasqanta, ima llakiypi rikukojtiykichejpis. Amataj qankunallapi atienekuychejchu. Yuyarikuychej imaynatachus unay tiempomanta wakin Diospa kamachisnin, paykunallapi atienekusqankurayku, Diosmanta karunchakusqankuta. Chayrayku kunanqa Diosta kasukunallaykichejpajpuni, imastachus ruwayta atisqaykichejta qhawarina. Ajinamanta salvacionta tarinaykichejpaj.

8. 1) ¿Imastataj ruwananchej kasqa Bibliata ukhunchashaspa? 2) ¿Bibliata ukhunchay uj examenpaj estudiay jinallachu kasqa?

⁸ Jóvenes, Diospa qayllallanpipuni kanaykichejpajqa, Diosta kasukunaykichej tiyan, paywantaj parlarinaykichej tiyan. Diosta kasukunaykichejpajtaj, Bibliata sumajta ukhunchanaykichej tiyan. Chaypajqa Bibliata leenaykichej tiyan, publicacionesninchejtapis. Chay leesqaykichejpitaj tʼukurinaykichej tiyan. Jinapis Bibliata estudiayqa, mana uj examenpaj estudiay jinallachu. Astawanqa, imaynatachus uj kʼachitu lugarman rispa, mosoj imasta tarinchej, ajinallatataj Bibliata ukhunchashaspaqa, reparanchej imayna kʼachapunichus Jehová Dios kasqanta. Diosta astawan rejsispataj, ‘Diosman astawan qayllaykunchej, paytaj qayllaykamuwanchej’ (Sant. 4:8).

9. ¿Ima yanapastaj Bibliata sumajta ukhunchanaykichejpaj yanapasorqachej?

⁹ Jóvenes, salvakunaykichejpajqa Bibliata ukhunchanaykichejpuni tiyan, chaypitaj tʼukurinaykichej tiyan (Salmo 119:105 leey). Diospa llajtanpitaj ashkha yanapas kan, Bibliata sumajta ukhunchanaykichejpaj. Chay yanapastataj Internetpi jw.org nisqapi tariwajchej. Chaypajqa “Jóvenes” nisqa cheqaman yaykuwajchej. Chaypitaj kan, “Actividades para estudiar la Biblia” nisqa. Chaypi kaj yanapastaj, Bibliaj nisqanman jina, imastachus wakin runas ruwasqankumanta parlan. Paykunamantataj mayta yachakuwajchej. Chantapis Internetpi jw.org nisqapi, “Guías de estudio” nisqata tarillawajchejtaj. Chaypi kaj yanapasqa, creeypi sumaj sayasqa kanaykichejpaj yanapasonqachej. Yanapallasonqachejtaj runasman sumajta predicanaykichejpaj. Bibliata sumajta estudianaykichejpaj waj yanapata tarillawajchejtaj, kay abril de 2009 watamanta ¡Despertad! revistapi. Chaypitaj leeriwajchej, “Los jóvenes preguntan. ¿Cómo disfrutar la lectura de la Biblia?” nisqa yachaqanata.

10. ¿Jehová Dios mañakuyninchejta uyarinpunichu?

¹⁰ Jehová Diosqa Biblianejta parlawanchej. Paymanta mañakojtinchejtaj, noqanchej Dioswan parlarinchej. Chaywanpis mana yuyanachu tiyan, Diosmanta mañakuy allinta rinallawanchejpaj kasqanta. Astawanpis Diosmanta mañakuspaqa, creenanchej tiyan pay uyariwasqanchejtapuni. Imajtinchus Jehová Diosqa uyariytapuni munashawanchej (Filipenses 4:6 leey). Bibliataj kayta niwanchej: “Llakiyniykita Tata  Diosman saqey”, nispa (Sal. 55:22). May chhika hermanostaj ninku, Diosman llakiyninchejta saqeyqa, allinpuni kasqanta. Arí, Diosmanta mañakoyqa tukuytapuni yanapawasunman.

11. ¿Jehová Diosman agradecekunanchejpunichu kanman?

¹¹ Diosmantaqa mana llakiykunallapi kaspachu mañakunanchej tiyan. Bibliaqa niwanchej: ‘Diosman agradecekuychejpuni’, nispa (Col. 3:15). Wakin kutisqa problemaspi tarikusqanchejrayku, qonqapunchej Diosman agradecekuyta yanapawasqanchejmanta. Diosman agradecekuyta mana qonqanapajqa, sapa día kinsa imasllamantapis Jehová Diosman agradecekusunman. Uj jovencitamanta parlarina. Payqa Abigail, 12 watasniyoj kashajtintaj bautizakusqa. Pay nin: “Ni piman jina, Jehová Diosllaman agradecekunanchej tiyan. Paymanqa tukuy tiempo agradecekunanchej tiyan, tukuy imaymanamanta yanapawasqanchejrayku. Noqaqa kayta tapurikullanipuni: ‘Imastachus Jehová Diosman agradecekusqanchej imasllawan kausakunanchej kanman chay, ¿manachu sapa día tukuy imamanta Diosman agradecekunanchej kanman?’”, nispa.

12, 13. ¿Yuyarikunkichu imaynasmantachus Jehová Dios yanapasusqanta?

¹² Jehová Diosqa, rey Davidta ashkha kutispi yanaparqa, llakiykunasninta aguantananpaj. Chayrayku Davidqa jinata nerqa: “Qhawaychej, yachaychejtaj Tata Diosqa kʼacha kasqanta. Kusikuyniyojmin paypi atienekoj runaqa”, nispa (Sal. 34:8). Arí, Jehová Dios kʼacha kasqanta yachanapajqa, Diospa makinpi churakuna tiyan. Chantapis jovenesqa, Bibliata leespa, publicacionesta leespa, tantakuykunaman rispa ima, yachakonqanku imaynatachus Jehová Dios wajkunata yanapasqanta, payta kasukunallankupajpuni. Jinapis Jehová Diosman astawan qayllaykusqankuman jina, reparananku tiyan imaynatachus Jehová Dios paykunata yanapasqanta. Chaypajqa allin kanman, yuyarikunankupuni imaynasmantachus Dios yanapasqanta.

¹³ Jehová Diosqa kʼacha kasqanrayku, saqewanchej payman qayllaykunanchejta, jinallataj Wawanmanpis. Chayrayku Jesús nerqa: “Mana pipis qhepayta jamuyta atinmanchu, manachus kachamuwaj Tatay pusamunman chayqa”, nispa (Juan 6:44). Jinapis ichá uj jovenqa yuyanman tatasninraykulla Jehová Diospa llajtanpi kasqanta. Nitaj Jehová Dios payta llajtanman pusamusqanraykuchu. Chaywanpis tukuy bautizasqa jovenesqa, creenankupuni tiyan Jehová Dios llajtanman pusamusqanta. Imajtinchus uj jovenqa, niraj bautizakushaspa Jehová Diosman nerqa payllata sirvinanta, payta munakusqanrayku. Bibliataj niwanchej: “Pillapis Diosta munakun chayqa, Diospis payta rejsin”, nispa (1 Cor. 8:3). Chayrayku Jehová Diospa llajtanpi kasqaykimanta kusikuy.

14, 15. ¿Imataj yanapasunkichejman Diosmanta mana manchachikuspa willamunaykichejpaj?

¹⁴ Jóvenes, Jehová Dios predicacionpi yanapashasusqaykichejta reparankichej chayqa, sonqoykichejpi sutʼi kanqa Jehová Dios qankunawan kʼacha kasqan. Chayta reparallawajchejtaj colegiomanta compañerosniykichejman Diosmanta willarejtiykichej. Jinapis ichá wakin kuteqa compañerosniykichejman, mana Diosmanta willariyta atillawajchejchu. Ichapis manchachikuwajchej compañerosniykichejman predicashajtiykichej, imastachus nisunaykichejmanta. Ichapis ashkha runaspa ñaupaqenpi Diosmanta parlariyta, manchachikullawajchejtaj. Chanta, ¿imataj yanapasunkichejman mana manchachikunaykichejpaj?

¹⁵ Mana manchikunaykichejpajqa, ichá tʼukuriwajchej imaraykupunichus Bibliaj nisqasninpi creesqaykichejpi. Chaypajqa “Guías de estudio” nisqa yanapas tiyan. Chaytataj Internetpi jw.org nisqapi tariwajchej. Chay yanapas parlayniykichejpi tiyan chayqa, chaywan yanapachikuychejpuni.  Chay yanapasqa Bibliaj nisqasninpi creenaykichejpaj yanapasonqachej. Yanapallasonqachejtaj sumajta predicanaykichejpaj. Bibliaj nisqasninpi creenkichej chayqa, predicanaykichejpajtaj sumajta wakichikunkichej chayqa, sonqoykichej aysasonqachej Jehová Diosmanta willamunaykichejpaj (Jer. 20:8, 9).

16. ¿Imatataj uj hermanita ruwasqa Bibliaj nisqasninmanta mana manchikuspa parlarinanpaj?

¹⁶ Wakin jovenesqa, Diosmanta runasman willamunankupaj sumajta wakichikojtinkupis, manchachikullankupuni. Uj hermanamanta parlarina. Payqa 13 watasniyoj kashajtin bautizakusqa, kunantaj 18 watasniyojña. Pay nin: “Bibliaj nisqasninta sutʼita yachani. Jinapis wakin kuteqa manchikuni Bibliamanta runasman parlariyta. Chayrayku kallpachakullanipuni compañerasniywan mana manchikuspa parlarinaypaj. Compañerasniy imastachus ruwasqankumanta mana manchachikuspa parlarisqankurayku, noqapis mana manchachikuspallataj imastachus ruwasqaymanta willarej kani. Wakin kuti, ‘chay uj diaqa Bibliamanta yachachisharqani’, nispa parlariyta qallarej kani. Compañerasniytaj tapuriwankupuni imastachus runasman yachachisqaymanta. Wakin kutistaj astawan Bibliamanta yachakuyta munanku. Bibliamanta parlariyta atillani, compañerasniyman imastachus ruwasqaymanta willarejtiy. Bibliamanta parlarispataj mayta kusikuni”, nispa.

17. ¿Imaraykutaj mana manchachikuspa Diosmanta parlarinanchej kasqa?

¹⁷ Jóvenes, wajkunata respetankichej chayqa, paykunawantaj kʼachas kankichej chayqa, paykunapis qankunawan kʼachasllataj kanqanku, respetasonqachejtaj. Hermananchej Oliviamanta parlarina. Payqa jovencitallaraj kashajtin bautizakusqa, kunantaj 17 watasniyojña kashan. Pay nin: “Maytapuni manchachikoj kani, ‘Bibliallamantapuni parlanki’ nispa ninawankuta. Jinapis tiemponman reparakorqani runasta manchikunaymantaqa, wajkunata yanapanaypaj kallpachakunay kasqanta. Imajtinchus ashkha jovenesqa, mana yachankuchu imaynachus Jehovaj testigosnin kasqanchejta. Chay jovenestaj noqallanchejta rejsiwanchej. Imaynatachus kausakusqanchejtataj qhawashawanchej. Sichus paykunaman Diosmanta mana willarisunmanchu chayqa, ichapis yuyankuman Jehovaj testigon kananchejpaj obligawasqanchejta. Sitajchus chay jovenesman mancha manchalla Diosmanta parlarisunchej chayqa, ichapis phiñakunkuman. Chaywanpis mana manchachikuspa, kʼachamantataj paykunawan parlajtinchejqa, uyarillawasunchej, respetallawasunchejtaj”, nispa.

18. ¿Imastataj ruwana kasqa salvacionta tarinapaj?

¹⁸ Jóvenes, yachakorqanchej salvacionta tarinapajqa, Diosta kasukunapuni kasqanta. Chaypajqa Bibliata leena tiyan, leesqanchejpitaj tʼukurina tiyan. Chantapis Jehová Diospa yanapayninta mañakunallapuni tiyan. Yuyarikunanchejtaj tiyan, imaynasmantachus Jehová Dios yanapawasqanchejta. Chaykunata ruwajtinchejtaj, Jehová Diosman astawan qayllaykusunchej. Diosman astawan qayllaykojtinchejtaj, sonqonchej aysawasunchej wajkunaman Bibliamanta willamunapaj (Salmo 73:28 leey).

19. ¿Jehová Dios bendeciwasunmanchu payta sirvinapaj kallpachakojtinchej?

¹⁹ Jesús nerqa: “Sichus pipis qhepayta jamuyta munan chayqa, pay kikinta chejnikuchun, kʼaspin lijrarisqataj qhepayta jamullachunpuni”, nispa (Mat. 16:24). Arí, Jesuspa qhepanta rinapajqa, niraj bautizakushaspa Jehová Diosman payllata sirvinanchejta ninanchej tiyan. Bautizakuspañataj Diosta sirviyta qallarinchej. Jehová Diostaj tukuy imaymanamanta bendeciwanchej, tumpitamantawantaj paraisopi sumaj kausayta qowasunchej. Chayrayku tukuy atisqanchejta kallpachakunallapuni salvacionta tarinapaj.