NOQA nacekorqani, kay 29 de julio de 1929 watapi, provincia Bulacanpi. Chaytaj Filipinas suyupi kashan. Hermanosneyqa kinsa kanku, hermanasniytaj tawa. Pusaj watitasniyoj kashajtiy awelitosneyqa pusakapuwarqanku, paykunawan tiyakunaypaj. Familiaypi tukuyniyku católicos kajtiykupis, awelitoyqa waj runasta uyarillaj Bibliamanta parlarejtinku. Bibliamanta parlaj librostapis japʼikullaj. Uj pachataj awelitoyqa, tagalo parlaypi Bibliata rikuchiwarqa, kinsa folletostawan. Chay folletosqa llulla religionesmanta parlasharqa. Noqaqa Bibliata leespa, mayta miskʼichikoj kani. Maytataj gustawaj Jesuspa kausayninmanta leey. Chayta leespaqa, Jesús jinapuni ruwayta munarqani (Juan 10:27).

Jovencituña kashajtiytaj suyuypi guerra qallarerqa, Japón suyuwan. Jinapis chay guerramantaqa, mana anchata uyarerqaykuchu, campopi tiyakusqaykurayku. Noticiasta uyarinaykupajpis, mana kapuwarqaykuchu radio, tele, nitaj periodicopis. Chay guerramantaqa runaslla willariwaj kayku.

Chay guerraqa, 1945 watapi tukukorqa. Chay pasaytataj tatasneyqa paywan tiyakunaypaj wajyachiwarqanku. Awelitoytaj tatasniyta kasukunayta niwarqa. Jinapitaj tatasniypaman kutiporqani.

Kay 1945 watallapitaj diciembre killapi, Angat comunidadmanta Jehovaj testigosnin ranchituykuman predicaj jamorqanku. Wasiykumantaj uj kuraj hermanito chamorqa. Payqa Bibliawan kay ‘qhepa pʼunchaykunamanta’ parlariwarqayku (2 Tim. 3:1-5). Chantapis niwarqayku chay qayllapi kaj ranchituman rinaykuta, chaypi waj runaswan khuska Bibliamanta yachakunaykupaj. Chay tantakuymanqa sapallay rerqani. Chay tantakuypeqa 20 runas jina karqayku, wakintaj Bibliamanta mayta tapukusharqanku.

Noqataj mana allinta entiendespa, sonqoypi “ripusaj” nisharqani. Jinallapi Diosman takiyta qallarerqanku. Chay takiy gustawasqanraykutaj qhepakullarqaniña. Chay tantakuy tukukojtintaj qhepan domingopaj uj tantakuyman wajyariwarqayku. Chaytaj ruwakunan karqa Angatpi.

Angat comunidadman chayanaykupajtaj, casi 8 kilometrostapuni rerqayku. Chay tantakoyqa uj hermanoj wasinpi ruwakorqa. Chay hermanoj apellidonqa Cruz karqa. Chay tantakuypeqa 50 runas jina karqayku. Chaypitaj wawasqa, mana atinapaj jina tapuykunaman kutichisharqanku. Chaytaj tʼukuchiwarqa. Ashkha kutistaña tantakuykunaman risharqani. Uj pachataj hermano Damian Santos wasinpi puñukunayta niwarqa. Payqa machituña karqa, precursortaj. Ñaupajtaqa alcalde kasqa. Paywantaj chay tuta, casipuni sutʼiyarqayku Bibliamanta parlaspa.

 Chay tiempopi runasqa, Bibliamanta pisita yachakuspalla bautizakoj kanku. Chayrayku wakin tantakuykunaman risqaytawan, hermanos niwarqanku: “¿Manachu bautizakuyta munawaj?”, nispa. Noqataj nerqani: “Bautizakuytapuni munani”, nispa. Noqaqa ‘Cristota esclavo jinapuni sirviyta’ munarqani (Col. 3:24). Jinapi chay qayllapi kaj mayuman pusawarqanku. Chaypitaj iskay bautizakorqayku. Chayqa karqa 15 de febrero de 1946 watapi.

Chanta reparakorqani Jesús jina predicamunay kasqanta. Chayrayku tatayman nerqani Diosmanta runasman willamunayta. Jinapis tatayqa niwarqa: “Predicamunaykipaj wawallaraj kanki, mayuman chʼultiykusojtinkupis niraj wakichisqachu kanki”, nispa. Noqataj nerqani: “Diosqa munan sumaj willaykunata willamunanchejta. Chantapis Diosman nerqani payllata sirvinayta, chaytataj juntʼanay kashan”, nispa (Mat. 24:14). Tataytaj niwarqa: “Predicaj rinki chayqa, ama kutimuwankichu, kutimuwankichus chayqa, chakisniykita pʼakisqayki”, nispa. Tatayqa manapuni munarqachu predicamunayta. Chayrayku wasimanta riporqani, Jehová Diospa munayninta ruwanaypaj. Chay kutipajqa 16 watasniyojllaraj karqani.

Jinapi hermano Cruzqa, paykunawan tiyakunaypaj wajyarikuwarqa. Uj pachataj hermano Cruzqa, noqata, sullkʼa wawan Noratawan niwarqayku: “Precursores kawajchej”, nispa. Iskayniykutaj 1 de noviembre de 1947 watapi, precursores jina llankʼayta qallarerqayku. Noraqa waj comunidadman riporqa precursora jina. Noqataj Angat comunidadpi qhepakorqani.

Kinsa watata precursor regular jina llankʼashajtiy, hermano Earl Stewartqa Betelmanta chayamorqa, uj discursota qonanpaj. Payqa Angat plazapi chay discursota qorqa, chaypitaj 500 runasmanta astawan tantakorqayku. Hermano Earlqa discursonta inglespi qorqa. Tukusqantawantaj discursonta tagalo parlayman tijracherqani. Chaypacha uj discursota primera vez inglesmanta, tagalo parlayman tijracherqani. Escuelaman qanchis watasllata rejtiypis, inglestaqa tumpata yachakorqani profesoresniy casi inglesllapipuni yachachiwasqaykurayku. Jinapis inglestaqa astawan yachakorqani, publicacionesninchejta inglespi estudiaspa. Imajtinchus tagalo parlaypeqa pisi publicacioneslla kaj. Inglesta yachakusqayqa yanapawarqa ashkha discursosta inglesmanta, tagalo parlayman tijrachinaypaj.

Hermano Earlqa plazapi dicursota qorqa chay día, hermanosman jinata niwarqayku: “Betelmanta hermanosqa ujta chayri iskay precursoresta maskʼashanku, Betelpi yanapakunankupaj. Imajtinchus Betelpi trabajaj misionerosqa uj jatun tantakuyman rinanku kashan”, nispa. Chay tantakoyqa “Aumento de la Teocracia” nisqa karqa. Chaytaj ruwakorqa Estados Unidospi, 1950 watapi. Betelmanta hermanostaj wajyarimuwarqanku, Betelpi yanapakunaypaj. Chaypachataj watejmanta saqepunay karqa imasmanchus yachasqa kasharqani, chaykunata.

Kay 19 de junio de 1950 watapi, Betelpi trabajayta qallarerqani. Betelqa uj hectaria lotepi kasharqa, jatun maukʼa wasipi, sachʼas chaupipitaj. Betelpeqa 12 jina, soltero hermanos trabajaj kayku. Sutʼiyaytaqa cocinapi yanapakoj kani. Las nueve chaytataj ropasta planchaj kani. Tardenpipis chaykunallapitaj yanapakoj kani. Jatun tantakuymanta misioneros kutimojtinkuñapis, Betelpi yanapakushallarqanipuni. Noqaqa tukuy imapi yanapaysikoj kani. Revistasta maytʼoj kani congregacionesman apachikunanpaj, jinallataj revistasninchejta leeyta munajkunaman apachikunanpajpis. Betelman visitaj jamojkunatapis atiendej kani.

Kay 1952 watapi, Filipinasmanta qanchis hermanos Galaad escuelaman invitasqa karqayku, clase 20 nisqaman. Chayrayku Estados Unidosman viajarqayku. Chaypeqa tukuy imapis noqaykupaj mosoj karqa, campomanta jatun llajtaman chayasqaykurayku.

Jaqaypeqa yachakunayku karqa, imaynatachus wakin aparatosta apaykachayta. Wakin aparatostaqa mana rejsillarqaykupischu. Chantapis jaqaypi primera vez ritʼita rikorqani. Ritʼeqa manchay qhasapuni kasqa.

 Estados Unidosman yachaykukunay kajtinpis, Galaad escuelapeqa sumajtapuni yachakorqani. Chaypeqa yachachiwarqanku imaynatachus Bibliata sumajta estudianayta. Chaypi yachakusqaytaj, yanapawarqa Jehová Diosman astawan qayllaykunaypaj.

Galaad escuelamantataj, precursor especialta jina, Bronx llajtaman kachawarqanku. Chaytaj Estados Unidospi kashan. Kay julio de 1953 watapitaj, Bronx llajtapi uj jatun tantakuy ruwakorqa, chaymantaj rerqani. Chay jatun tantakoyqa sutichasqa karqa, “Sociedad del Nuevo Mundo” nisqa. Chay jatun tantakuy pasaytataj, Filipinasman kachawarqanku.

Filipinaspi kaj Betelmanta hermanosqa, congregacionesta waturispa llankʼanayta niwarqanku. Chayqa yanapawarqa Jesús jina ruwanaypaj. Imajtinchus ranchosman, llajtitasman viajanay karqa, hermanosta waturikamunaypaj (1 Ped. 2:21). Noqaqa uj jatun islapi kaj congregacionesta waturikamunay karqa. Chay congregacionestaj kasharqanku kay provinciaspi: Bulacanpi, Nueva Ecijapi, Tarlacpi, Zambalespi ima. Wakin congregacionesman chayanaypajqa qaqarara orqosta wasaykunay karqa. Chay orqospa sutenqa Sierra Madre nisqa. Wakin congregacionesman rinaypajtaj mana flota kajchu, nitaj trenpis. Chayrayku wakin camionerosta pusarinawankuta nej kani. Camionerostaj pusarillawaj kanku, tronco patapipis. Camionpi viajaytaj mana flotapi viajay jinapunichu karqa.

Ashkha congregacionesqa juchʼuysituslla karqanku, wakintaj mosojsitus. Chayrayku hermanosta yuyaycharej kani, imaynatachus tantakuykunata ruwanankuta, imaynatatajchus predicamunankutapis. Hermanostaj yanapasqaymanta, mayta agradecekuwaj kanku.

Chaymantataj Bicol lugarpi kaj congregacionesta waturikamunayta niwarqanku. Chaypeqa karu lugarespi ashkha grupitos karqa. Chay grupitospitaj precursores especiales kasharqanku. Paykunaqa predicaj kanku maypichá ni jaykʼaj Diosmanta willakorqachu, chay lugaresta. Uj kutitaj alojakorqani chay wasipi, bañonkuman urmaykorqani. Imajtinchus bañonkoqa uj tʼoqolla karqa, iskay kʼullus trankaykusqataj. Chay kʼullustaj saruykusqaytawankama pʼakikorqa. Jinapi chay tʼoqoman chinkaykorqani. Llojsimuytawantaj unaypi llimphuchakorqani, chantaraj desayunamorqani.

Bicol lugarpi kaj congregacionesta waturishajteyqa, Norapi piensariyta qallarerqani. Piwanchus precursores jina llankʼayta qallarerqayku. Payqa chay tiempopaj, precursora especial jina llankʼasharqa Dumaguete llajtapi. Noqataj visitarej rerqani. Chaymantataj cartasta apachinakorqayku. Kay 1956 watapitaj casarakorqayku. Casarakusqaykutawanqa, Rapu Rapu islaman rerqayku uj congregacionta  waturikamunaykupaj. Chay islapeqa jatuchaj orqosta wasaykunayku karqa, karutataj purinayku karqa. Jinapis chay congregacionta waturikuspaqa, sonqo juntʼasqa kasharqayku.

Tawa watastaña congregacionesta waturispa llankʼashajtiyku, Betelman wajyariwarqayku. Betelpeqa enero de 1960 watapi trabajayta qallarerqayku. Chaypi trabajaspaqa, hermanosmanta mayta yachakorqani. Señoraytaj Betelpi tukuy imaymana trabajosta ruwarqa.

May kusisqa kashani Filipinaspi astawan runas Diospa llajtanman yaykunpusqankumanta. Imajtinchus 1950 watapaj, Filipinas suyupeqa 10.000 hermanoslla karqayku, kunantaj 200.000 hermanosmanta astawan kayku. May chhika hermanostaj Betelpi yanapakushanku, sumaj willaykuna willakunallanpajpuni.

Betelpi ashkhas kasqaykuraykutaj Betelqa jatunyachikunan karqa. Diospa Llajtanta Kamachejkunataj, niwarqayku uj jatun loteta maskʼanaykuta. Imprentamanta encargado hermanowantaj, wasimanta wasi loteta maskʼamorqayku, Betelpa muyuyninpi. Nitaj pipis vendeyta munawarqaykuchu. Ujnin vecinoykutaj jinata nirpawarqayku: “Chinosqa mana vendeykuchu, astawanqa rantiyku”, nispa.

Jinapis uj diaqa, ujnin vecinoyku jinata niwarqayku: “Nichu loteyta rantikapuyta munawajchej”, nispa. Chayta niwasqayku Estados Unidosman ripushasqanrayku. Uj runapis, payta rikuspa lotenta vendellawarqaykutaj. Chay runataj vecinosninman nisqa: “Jallpʼasninchejta vendepunachej”, nispa. Ajinamanta ashkha lotesta ranterqayku. Chantapis, “chinosqa mana vendeykuchu, astawanqa rantiyku” nispa niwarqayku chay runapis, lotenta vendepullawarqaykutaj. Jinamanta Betelpa jallpʼasnenqa, kinsa hectareasman jina chayarqa. Chaypi repararqani Jehová Diospuni yanapawasqaykuta.

Yuyarikuni 1950 watapi, Betelpi noqalla aswan joven kasqayta. Kay tiempopitaj Betelpeqa, señoraywan tukuymanta nisqa aswan awelitos kayku. Jesús jina Diosta yupaychasqaymanta, imastachus saqesqaymantataj manapuni pesachikunichu. Tatasniy wasimanta wijchʼuwajtinkupis, Jehová Diosqa ashkha hermanosta qowarqa. Achhayrayku niyman Diosqa ni imata faltachinawanchejta, makinpi churakojtinchej. Señoraywanqa Diosman maytapuni agradecekuyku yanapawasqaykumanta (Mal. 3:10).

Uj pacha Jesusqa, impuestota cobraj Leví sutiyoj runaman nerqa: “Qhepayta jamuy”, nispa. Levitaj sayariytawan, tukuy imata saqerparispa Jesuspa qhepanta rerqa (Luc. 5:27, 28). Noqapis Leví jina tukuy imata saqerqani, Jesuspa qhepanta rinaypaj. Jinamanta may chhika bendicionesta japʼerqani. Chayrayku tukuyman niykichejman may bendecisqa kanaykichejta, Jesuspa qhepanta rinaykichejpaj tukuy imata saqejtiykichej.