1, 2. ¿Imajtintaj tatas llakikunkuman wawasninku bautizakuyta munajtinku?

KAY tiempopeqa, may chhika runas Bibliata estudiaytawan, uj mañakuypi Diosllapaj kausanankuta ninku, chantataj bautizakunku. Chay bautizakojkunamantataj ashkhasqa jóvenes kanku, cristiano familiaspi wiñakojkuna. Chay jovenesqa allintapuni ruwanku bautizakuspa (Sal. 1:1-3). Tata kanki chayqa, ichapis mayta suyashanki wawayki bautizakunanta (3 Juan 4 kikinchay).

² Chaywanpis ichá wawaykimanta llakikuwaj, bautizakojtin allinta rinanmantachus manachus. Imaraykuchus ichá repararqanki, wakin jóvenes bautizakuytawan Diospa kamachiykunasninta mana tukuy sonqochu kasukusqankuta. Chantapis ichá reparallarqankitaj, wakin jóvenes Diosmanta karunchakusqankuta. Chayrayku ichapis yuyawaj wawayki tiemponman Diosmanta karunchakunallantataj. Imaynatachus ñaupa tiempomanta wakin cristianos munakuyninkuta chiriyacherqanku, ajinata. Uj kuti Jesusqa, Éfeso congregacionman jinata nerqa: “Qanqa manaña ñaupajta jinachu Diosta munakunki”, nispa (Apo. 2:4). Kunantaj  yachakusunchej imaynatachus tatas wawasninkuta yanapanankuta, Diospa qayllallanpipuni kanankupaj, salvacionta tarinankupajtaj (1 Ped. 2:2). Chaypajqa Timoteoj kausayninmanta parlarina.

3. 1) ¿Maykʼajtaj Timoteo Jesusmanta yachakusqa? 2) ¿Yachakusqanman jinachu Timoteo kausakusqa? 3) Pablo, ¿imastataj Timoteota reparachisqa?

³ Kay 47 watapi, apóstol Pablo ñaupaj kutirayku Listra llajtapi kaj congregacionta waturikorqa. Ichapis chay kutipi Timoteoqa Jesusmanta yachakorqa. Timoteotaj jovencitullaraj kajtinpis, yachakusqanman jina kausakorqa. Chantá iskay watasninman Pablowan congregacionesta waturispa llankʼarqa. Chaymanta 16 watasninman jina, Pabloqa Timoteoman jinata nerqa: “Imastachus yachakusqaykiman jinallapuni ruway. Chay yachakusqaykipi creenaykipajqa wajkuna yanapasorqanku. Qantaj yachanki, imayna runaschus chay imasta yachachisusqankuta. Qanqa wawitamantapacha Diospa qhelqasqa palabranta rejserqanki. Chayqa yachayniyojman tukuchiyta atisunki, Cristo Jesuspi creesqaykinejta salvacionta tarinaykipaj”, nispa (2 Tim. 3:14, 15). Pabloqa Timoteota reparacherqa, Diospa qhelqasqa palabranta rejsisqanta, yachakusqanpi creenanpajtaj wajkuna yanapasqankuta, yachayniyojmantaj tukusqanta, Cristo Jesuspi creesqannejta salvacionta tarinanpaj.

4. Tatas, ¿imaswantaj wawasniykichejta yachachishankichej?

⁴ Uña wawitasqa, Bibliaj nisqasninta sumajta japʼeqayta atinku. Arí, yachakunku wakin runaspa kausayninkumanta, ruwasqasninkumantawan. Chayrayku cristiano tatasqa, kallpachakunkupuni wawasninku Diospa Palabranta sumajta rejsinankupaj. Diospa llajtanpitaj ashkha libros, folletos, videos ima tiyan. Tatasqa, parlayninkupi kaj publicacioneswan chayri videoswan wawasninkuta yachachinkuman. Imajtinchus wawasqa Bibliata sumajta rejsinanku tiyan, Diospa qayllallanpipuni kanankupaj.

5. Timoteo, Jesús Mesías kasqanpi creesqanrayku, ¿imatataj ruwasqa?

⁵ Wawasmanqa mana Bibliaj nisqasninta rejsichinallachu tiyan. Manaqa imatachus yachakusqankupi creenankupaj yanapananchej tiyan. Imaynatachus Timoteota yachakusqanpi creenanpaj yanaparqanku, ajinata. Timoteoqa wawitamantapacha Diospa qhelqasqa palabranta rejserqa. Wajkunataj yanaparqanku, Jesús, Mesías kasqanpi creenanpaj. Timoteotaj chaypi creesqanrayku bautizakorqa. Tiemponmantaj Pablowan misionero jina llankʼarqa.

6. ¿Wawasta yanapanapaj pacienciayojchu kana kasqa?

⁶ Wawasta ‘yachakusqankupi creenankupaj’ yanapanapajqa, pacienciayoj kananchej tiyan. Imajtinchus wawasqa, mana uj ñawi chʼirmiypichu imapipis creenku. Nitaj yuyananchejchu tiyan, imapichus creesqallanchejpitaj, wawasninchejpis creenankuta. Wawasqa, Bibliaj nisqasninta ‘tukuy yuyayninkuwan’ sumajta entiendenanku tiyan. Ajinamanta chay yachakusqankupi creenankupaj (Romanos 12:1 leey). Wawas imatapis tapukojtinkoqa, tatas sumajta yuyaychakusparaj kutichinanku tiyan. Ajinamanta wawasninkuta yanapanqanku, yachakusqankupi sinchʼita creenankupaj. Kunantaj uj tatamanta parlarinachej.

7, 8. 1) ¿Imatataj Thomas reparasqa imillitanta yachachinanpaj? 2) ¿Maykʼajllapis wawaykiwan pacienciakunaykichu karqa?

⁷ Hermano Thomasmanta parlarina. Payqa uj imillitayoj, imillitanqa 11 watitasniyoj. Thomas nin: “Wawitayqa kay jinasta tapuwan: ‘¿Jehová Diosninchej kausayta  jinallamantachu rikhuricherqa? ¿Imaraykutaj ni mayqen partidota apoyanchejchu?’, nispa. Noqataj mana chay ratochu imillitayman nini imapichus creenanta. Manaqa sumajta reparachini, imajtinpunichus Bibliaj nisqanpi creesqayta”, nispa.

⁸ Tukuyninchej imata ruwanapajpis pacienciakunanchejpuni tiyan (Col. 3:12). Thomaspis reparakorqa imillitanta yachachinanpaj pacienciakunan kasqanta. Chantapis reparakullarqataj imillitanwan sapa kuti parlarinanpaj, tiempochakunan kasqanta. Jinamanta imillitanta reparachinanpaj, Bibliaj nisqasnin maychus kajpuni kasqanta. Thomas nillantaj: “Señoraywanqa kallpachakuyku reparanaykupaj, imillitayku Bibliamanta yachakusqanpi creesqanpipunichus manachus. Chaytaqa reparayku tapuwajtiyku. Noqayku munaykupuni tapurinawaykuta”, nispa.

9. ¿Imaynatataj wawasninchejman Diospa Palabranta yachachina kasqa?

⁹ Wawasninchejman mana saykʼuspa yachachejtinchejqa, creeypi sumaj sayasqa kanqanku. Ajinamanta creeypa “anchonta, largonta, sayayninta, ukhunta ima”, sumajninmanta entiendenqanku (Efe. 3:18). Chantapis wawasninchejmanqa edadninkuman jina, entiendeyta atisqankuman jinallataj yachachina. Wawas yachakusqankupi creenqanku chayqa, pillapis imapichus creesqankumanta tapurejtinku, kutichiyta atillanqanku (1 Ped. 3:15). Ichapis wawasqa wañusqas maymanchus risqankumanta sutʼinchananku kanqa. Chayta wawas Bibliawan sutʼinchanankupajqa, creenanku tiyan imatapunichus Biblia wañusqasmanta nisqanta. * Wawasninchejpa sonqonman Bibliaj nisqanta churanapajqa, pacienciawan yachachinallanchejpuni tiyan. Chaytaj mana qhasipajchu kanqa (Deu. 6:6, 7).

10. ¿Tatas ruwasqasninkuwan wawasninkuta yachachinankupunichu kasqa?

¹⁰ Tatasqa, ruwasqasninkuwan wawasninkuta yachachinallankutaj tiyan. Ajinamanta wawasninku creeypi sumaj sayasqa kanqanku. Hermana Stephaniemanta parlarina. Payqa kinsa warmi wawasniyoj. Pay nin: “Wawasniy juchʼuysitusllaraj kashajtinku, sonqoypi jinata nikoj kani: ‘¿Wawasniyman ninichu imaraykupunichus Jehová Diospi creesqayta? ¿Nillanitajchu imaraykuchus Diosta kasukuy allinninchejpaj kasqanta creesqaytapis? Chanta, ¿wawasniy reparankuchu Jehová Diosta munakusqayta?ʼ, nispa. Chaypajqa noqaraj imatachus yachakusqaypi creenay karqa. Ajinamanta wawasniypa sonqonman chayanaypaj”, nispa.

11, 12. 1) ¿Imaynataj yachayniyoj runa kasqa? 2) Jovencitos wiñay tukusqa cristianos kanankupaj, ¿machuyanankupunichu kasqa?

¹¹ Yachakorqanchej Timoteo wawitamantapacha “Diospa qhelqasqa palabranta” rejsisqanta. Yachakusqanpi creenanpajtaj wajkuna yanapasqankuta. Chantapis Pabloqa Timoteoman nerqa: ‘Qanqa Diospa qhelqasqa palabranta rejserqanki. Chayqa yachayniyojman tukuchiyta atisunki, ajinamanta salvacionta tarinaykipaj’, nispa. Chanta, ¿imaynataj yachayniyoj runa?

¹² Kay Perspicacia volumen 2 nisqa libropi, ajinata nin: “Yachayniyoj runaqa, sumajta tanteayta yachan. Sumajtataj yuyaycharikun imata ruwananpajpis. Ajinamanta imata ruwajtinpis allinpuni rin, nitaj ima llakiykunapi rikukunchu. Wajkunata yuyaycharinanpajpis, allintaraj umachakun. Chantapis yachayniyoj runaqa, mana wampu runa jinachu, imatapis ruwarparillan”, nispa. Bibliataj  nin: “Wampu kayqa wawajpa sonqompi kashan”, nispa (Pro. 22:15). Jinapis uj wawa yachayniyoj kajtenqa, mana imatapis wampu jina ruwarpallanchu. Astawanqa wiñay tukusqa runa jina, Jehová Diosta manchachikun, kamachisqasnintataj kasukun. Chayrayku nisunman, jovencitos wiñay tukusqa cristianos kanankupajqa, mana machuyanankupunichu kasqanta (Salmo 111:10 leey).

13. ¿Imaynataj wiñay tukusqa jóvenes kasqanku?

¹³ Wiñay tukusqa jovenesqa, mana sajra munayninkuwan atipachikunkuchu, nitaj waj joveneswan inkitachikullankuchu. Imaraykuchus inkitachikunkuman chayqa “wayrawan, yakoj qhollchoqeyasqanwan ima kayman jaqayman apaykachachikoj barco” jina kankuman (Efe. 4:14). Chantapis wiñay tukusqa jovenesqa, “yuyayninkuta sapa día yachachisqankurayku, imachus allin, imatajchus mana allin kasqanta reparanankupaj wakichisqa kanku” (Heb. 5:14). Paykunaqa tukuy tiempo Bibliaj nisqanman jina kausakunku, manataj tatasninkoj ladollankupichu (Fili. 2:12). Ajinata kausakoj jovenestaj, salvacionta tarenqanku (Proverbios 24:14 leey). Chanta, ¿imaynatataj wawasninchejta yanapasunman wiñay tukusqa cristianosman tukunankupaj? Imaynatachus kausakusqanchejwan yanapasunman. Chaypajtaj wawasninchej reparananku tiyan parlasqanchejpi, ruwasqanchejpi ima, Bibliaj nisqanman jinapuni kausakusqanchejta (Rom. 2:21-23).

14, 15. 1) ¿Imaynatá wawasninchejta reparachisunman bautizakuy mana pujllakuy jinallachu kasqanta? 2) Tatas, ¿imaynatá wawasniykichejta reparachiwajchej Diosta kasukuy allinninchejpaj kasqanta?

¹⁴ Wawasninchejmanqa mana ninallanchejchu tiyan, imachus allin imatajchus mana allin kasqanta. Astawanqa sumajta tʼukurichinanchej tiyan, kay jinasta tapuspa: “¿Imaraykutaj Biblia niwanchej wakin imasta mana ruwanata allillanman rijchʼakojtinpis? ¿Creenkichu Bibliaj nisqasnin allinninchejpajpuni kasqanta?”, nispa (Isa. 48:17, 18).

¹⁵ Wawasninchej bautizakuyta munanku chayqa, reparachinanchej tiyan, bautizakuy  mana pujllakuy jinallachu kasqanta. Chayta reparachinapaj, ichapis kay jinata tapurisunman: “¿Imajtintaj bautizakuyta munanki wawáy? ¿Bautizakuytawan ima llakiykunapitaj rikukuwaj? Chanta bautizakuspa, ¿ima bendicionestataj japʼinki?”, nispa (Mar. 10:29, 30). Chaykunata wawasninchejta tapurinapuni tiyan, niraj bautizakushajtinku. Chantapis wawasninchejta reparachinanchej tiyan, Diosta kasukuy allinninchejpajpuni kasqanta. Diosmanta karunchakuytaj llakiykunallata apamunawanchejta. Chayta wawasninchej reparajtinkoqa, yachanqanku Bibliaj nisqanman jina kausakoyqa allinninchejpajpuni kasqanta (Deu. 30:19, 20).

16. ¿Imatataj ruwananchej kanman wawasninchej mana allinta yuyayta qallarejtinku?

¹⁶ Ichapis wawasninchejqa, bautizakusqankumanta tiemponman, mana tukuy sonqochu Bibliaj nisqasninpi creenkuman. Chayrayku ichapis kay mundoj imasninta munapayayta qallarinkuman. Chayri yuyankuman, Bibliaj nisqanman jina kausakuy qhasilla kasqanta (Sal. 73:1-3, 12, 13). Ajinata wawanchej yuyayta qallarejtinkoqa, ama kʼamispa sienterpachinachu, wawallaraj chayri jovenesña kajtinkupis. Astawanqa reparachunku munakusqanchejta, yanapayta munasqanchejtapis. Imajtinchus phiñakojtinchejqa Diosmanta karunchakunkuman. Kʼachamanta parlapayajtinchejtajrí, Diosta sirvillaytapuni munanqanku.

17, 18. ¿Imaynatataj tatas wawasninkuta yanapankuman niña tukuy sonqochu Diosta sirvejtinku?

¹⁷ Cristiano jovenesqa niraj bautizakushajtinku, uj mañakuypi Jehová Diosman nerqanku, payta munakunankuta, payllatataj sirvinankuta (Marcos 12:30 leey). Jehová Diostaj munan nisqanchejta juntʼananchejtapuni (Ecl. 5:4, 5). Chaytataj wawasninchejman yuyarichinanchej tiyan, manaña Diosta tukuy sonqochu sirvejtinku. Chaypajqa ñaupajta imatachus Diospa llajtan qowanchej chaykunataraj leena, sumajtataj estudiana. Chantá wawanchejman kʼachamanta sutʼinchana, imaraykuchus Diosman nisqanchejta juntʼananchejpuni kasqanta. Nisqanchejta juntʼajtinchejtaj ima bendicionestachus japʼinanchejta.

¹⁸ Wawasninchejta yanapanapajqa sumaj yuyaychaykunata tarisunman, Los jóvenes preguntan volumen 1 nisqa libropi, 289 al 318 paginaspi. Chaypi nin: ‘Wawayki manaña tantakuykunaman, nitaj predicacionman riyta munajtin, ama yuyaychu Diospa llajtanmanta karunchakuyta munasqanta. Wakin wawasqa manaña tantakuykunaman, nitaj predicacionman riyta munankuchu, sapayakusqankurayku chayri colegionmanta compañerosninku molestasqankurayku. Manachayri mana waj jóvenes jinachu Diospa llajtanpi usqhayllata ñauparisqankuta reparakusqankurayku’, nispa. Chantapis chay libroqa, tatasta yuyaychallantaj imaynatachus wawasninkuta yanapanankuta, wawasninku manaña Diosta tukuy sonqochu sirvejtinku.

19. ¿Imastataj kay yachaqanapi yachakorqanchej?

¹⁹ Bibliaqa nin, tatas wawasninkuta uywanankuta, “Jehová Dios nisqanman jina cheqanchaspa, yachachispataj” (Efe. 6:4). Kay yachaqanapeqa, yachakorqanchej tatas wawasninkuman Bibliamanta yachachinanku kasqanta, chay yachakusqankupi wawasninku creenankupajtaj yanapananku kasqanta. Wawastaj chay yachakusqankupi creejtinkoqa, bautizakonqanku, Jehová Diosllatataj sirvenqanku. Chayrayku tatas, Diospa atiyninwan, Palabranwan ima yanapachikuychej, wawasniykichejta ‘yachayniyojman tukuchinaykichejpaj, ajinamanta wawasniykichej salvacionta tarinankupaj’.