Mana. Payqa maychus kajllata nerqa.

Qhawarina chay versiculopi, chayman rijchʼakoj waj versiculospiwan imatachus qhelqasqanta. Pay qhelqarqa: “Sutiykita jatunchaspa wiñaypaj takisaj. Imatachus ruwasaj nisqaytapis sapa día juntʼasaj”, “Jehová Diosníy, tukuy sonqo jatunchayki. Sutiykita wiñaypaj jatunchasaj”, “sutiykita jatunchasaj wiñaypaj wiñaynintinpaj” (Sal. 61:8; 86:12; 145:1, 2).

Davidqa chayta qhelqashaspa mana nisharqachu ni jaykʼaj wañunanta. Payqa yacharqa uj pʼunchay wañupunanta, jucharayku wañuy jamusqanrayku. Yachallarqataj paypis juchasapa kasqanta (Gén. 3:3, 17-19; Sal. 51:4, 5). Chantapis yachallarqataj ñaupa tiempomanta Diospa allinpaj qhawasqan runaspis wañupullasqankutataj. Paykuna karqanku Abrahán, Isaac, Jacob ima. Chantapis yacharqa kausaynin pisi tiempollapaj kasqanta (Sal. 37:25; 39:4). Chaywanpis imatachus Salmo 61:8 versiculopi nisqanqa reparachiwanchej Davidqa Diosta wiñaypaj jatunchayta munasqanta, nisunman wañupunankama (2 Sam. 7:12).

Wakin kutispi Davidqa kausaynillanmantataj qhelqarqa. Chaytataj tarisunman Salmo 18, 51, chantá 52 capitulospa qallariyninpi. Davidqa 23 Salmopi Jehovata uj michejwan kikinchaspa nerqa ovejitasninta pusasqanta, samarichisqanta, jarkʼasqanta ima. Davidpis ajinallatataj ovejasninta cuidaj. Chayrayku ‘kausashaspaqa’ Jehová Diosta sirviyta munarqa (Sal. 23:6).

Yuyarikunallataj chay imasta David qhelqananpaj Jehová yuyaychasqanta. Wakin qhelqasqasninpeqa kashallarqataj imachus aswan qhepaman kananmanta profecías. Davidqa 110 Salmopi kayta qhelqarqa: “Diosqa Señorniyta nerqa: ‘Pañayman tiyaykukuy’”, nispa. Chaytaj kanan karqa cielopi atiyta japʼinan karqa chaypacha. Ajinamanta chay atiyta japʼisqanwan, jallpʼapi Diospa enemigosninta chakisnin uraman churananpaj, ‘nacionesta juzgaspa castigananpaj’ ima. Davidqa Mesiaspa ñaupa tatan karqa. Mesiastaj cielomantapacha kamachimunan karqa, ‘wiñaypajtaj sacerdote kanan’ karqa (Sal. 110:1-6). Jesuspis sutʼita nerqa 110 Salmopi profeciaqa paymanta parlasqanta, aswan qhepamantaj juntʼakunanta (Mat. 22:41-45).

Reparanchej jina, Davidqa Dios yuyaychasqanman jina qhelqarqa tiemponmanta, imatachus qhepaman ruwananmantapis, maypachachus kausarimuspa wiñaypaj Jehovata jatunchayta atenqa. Chayrayku nisunman Salmo 37:10, 11, 29 versiculosqa, qhelqakorqa chay tiempomanta, aswan qhepamantawan parlashasqanta. Chay versiculosqa ñaupa Israelpa tiemponpi juntʼakorqa, qhepamanpis juntʼakullanqataj Dios jallpʼantinpi nisqasninta juntʼajtin (kay revistapi “Noqawan Paraisopi kanki” nisqa yachaqanapi 8 parrafota leeriy).

Chayrayku Salmo 61:8 versículo, chayman rijchʼakoj waj versiculospis rikuchin Davidqa ñaupa tiempopi wañupunankama Jehovata jatunchayta munasqanta. Chaytaj sutʼita rikuchiwanchej Davidqa aswan qhepaman Jehová kausarichimojtin, payta wiñaypaj jatunchayta atinallantapuni.