1. ¿Pikunanejtataj Jehová ashkha kutispi kamachisninpa mañakusqankuman kutichin?

 ¿YACHARQANKICHU? Jehovaqa uj hermano rogakuspa mañakusqanman qannejta kutichiyta atin. Chaytataj ruwan ancianos, siervos ministeriales, precursores, publicadores, jóvenes, mayorcitos, qharis chayri warmis kajtinchejpis. Sichus pillapis Jehovata munakun, yanapantataj mañakun chayqa, Diosninchejqa ashkha kutispi ancianosnejta chayri waj kamachisninnejta ‘mayta sonqochan’ (Col. 4:11). Ajinata Jehová Diosninchejta, hermanosninchejtapis sirveyqa may sumajpuni. Chaytataj ruwayta atinchej uj wañuchej onqoy rikhurejtin, kaymanta jinalla ima llakiypis kajtin chayri qhatiykachasqa kajtinchej.

2. ¿Imaraykutaj hermanosta mana yanapariyta atillasunmanchu wañuchej onqoykuna rikhurejtin?

² Uj wañuchej onqoy rikhurejtin ichapis mana atillasunmanchu purajmanta yanapanakuyta. Ichapis hermanosta wasisninkuman visitarej riyta munasunman. Onqoy contagioso kasqanraykutaj mana atikunmanchu. Chayri ichapis qolqemanta pisisqa hermanitosta uj mikhunitaman wajyariyta munasunman. Chaypis manallataj atikunmanchu. Ichapis mayta munasunman wajkunata yanapariyta. Chaytapis manallataj atisunmanchu familianchej sufrishasqanrayku. Jinapis hermanosninchejta yanapariytapuni munanchej. Jehovataj mayta kusikun tukuy atisqanchejta kallpachakusqanchejta rikuspa (Pro. 3:27; 19:17). Chanta, ¿imaynasmantá paykunata yanaparisunman?

3. ¿Imatá yachakunchej Desij congregacionninmanta ancianosmanta? (Jeremías 23:4).

³ ¿Imatá ancianos ruwankuman? Uj congregacionpi anciano kanki chayqa, hermanosta allinta rejsiy. Paykunaqa ovejitas jina kanku (Jeremías 23:4 leey). Ñaupaj yachaqanapi hermananchej Desimanta parlarerqanchej. b Pay nin: “Predicanapaj grupoymanta  ancianosqa, noqawan waj hermanoswanpis predicajpuni kanku, waj imastapis noqaykuwan ruwajpuni kanku”, nispa. Chayta ruwasqankurayku chay ancianosqa coronavirus onqoy rikhurejtin, Desij wakin familiaresnintaj chay onqoywan wañupojtinku, yanapariyta atillarqanku.

4. ¿Imaraykutaj ancianos Desita yanapariyta atillarqanku, imatá chaymanta yachakunchej?

⁴ Desi nin: “Ancianosqa amigosniyña karqanku. Chayrayku imaynachus kashasqayta, imaschus llakichiwasqantapis paykunaman willayta atillarqani”, nispa. Ancianos, ¿imatá yachakuwajchej? Niraj ima llakiy kashajtin, hermanosta kallpacharinaykichejpaj visitariychej, amigosninkutaj kaychej. Uj wañuchej onqoy rikhurisqanrayku mana wasisninkupi visitariyta atispataj, waj jinasmanta paykunawan parlarinaykichejpaj kallpachakuychej. Desi nin: “Wakin kutisqa uj diallapi ashkha ancianos wajyarimuwaj kanku chayri mensajitosta apachimuwaj kanku. Ima textostachus leeripuwasqankutaj sonqoymanpuni chayaj, chay textosta rejserqaniña chaypis”, nispa.

5. ¿Imatá ancianos ruwankuman imatachus hermanos necesitasqankuta yachanankupaj, chanta imaynatá paykunata yanapankuman?

⁵ Imatachus hermanos necesitasqankuta ancianos yachanankupajqa, mana pʼenqachispalla tapuriyta yachananku tiyan (Pro. 20:5). Chaypajtaj kay imasta allinta qhawarinkuman: ¿Hermanospata kapullanchu mikhunitanku, jampisitusninku chayri waj necesitasqanku imaspis? ¿Mana wasiyoj, mana trabajoyoj rikhurinankupaj jinachu kashanku? ¿Ima yanapastachus gobierno qosqanta japʼikunankupaj yanaparinata necesitashankumanchu? Hermananchej Desitaqa wakin hermanos kapuyninkuwan yanaparerqanku. Jinapis payta astawan yanaparqa, ancianos munakuyninkuta payman rikuchisqanku, Bibliawantaj kallpacharisqanku. Pay nin: “Ancianosqa noqawan khuska mañakoj kanku. Mana yuyarikunichu imatapunichus nisqankuta, jinapis allinta yuyarikuni imaynatachus chay nisqanku kallpachawasqanta. Jehová kaytapis nishawanman jina karqa: ‘Mana sapallaykichu kashanki’, nispa” (Isa. 41:10, 13).

6. ¿Imaynatá congregacionpi purajmanta yanapanakusunman? (Fotosta qhawariy).

⁶ ¿Imatá congregacionmanta kajkuna ruwasunman? Yachanchej congregacionmanta hermanostaqa ancianos yanapananku kasqanta. Jinapis Jehovaqa tukuyman niwanchej wajkunata yanaparinata, kallpacharinata ima (Gál. 6:10). Uj onqosqa hermanota yanaparinapaj imitallatapis ruwapojtinchej, paypajqa may sumaj kanman. Wawasqa uj hermanota kallpacharinankupaj uj  tarjetitata chayri uj dibujitota ruwapunkuman. Jovenestaj uj hermanitapaj necesitasqanta ruwarinpunkuman chayri rantinpunkuman. Wajkunataj uj onqosqa hermanitopaj chayri hermanitapaj mikhunata waykʼupuspa apapunkuman. Jinapis uj onqoy tukuynejman chayajtenqa, congregacionmanta tukuyninchej kallpachasqa kayta necesitanchej. Chayrayku allin kanman, tantakuykuna tukukojtin tumpatawan qheparikunanchej hermanoswan parlarinapaj, Tantakuna Wasipi tantakuspapis chayri Internetnejta tantakuspapis. Ancianospis kallpacharinata necesitallankutaj. Wakin hermanosqa tarjetitasnejta ancianosman agradecekunku. Ancianosqa uj wañuchej onqoy rikhurejtin ni jaykʼaj jina aswan ocupasqa kayta yachanku. May sumajpuni tukuyninchej Bibliaj kay nisqanta kasukunapaj kallpachakunanchej: “Qankunapura sonqochanakullaychejpuni, kallpachanakuychejtaj” (1 Tes. 5:11).

7. Kaymanta jinalla ima llakiypis kajtin, ¿imaspitaj rikukusunman?

⁷ Kaymanta jinalla ima llakiypis kajtenqa, runaspa kausayninku uj ñawi chʼirmiypi cambianman. Ajinapi rikukuspaqa ichapis pierdenkuman cosasninkuta, wasinkutapis, chayri familiankumanta pillapis ichá chaypi wañupunman. Hermanosninchejpis ajinallapitaj rikukunkuman. ¿Imaynatá paykunata yanaparisunman?

8. ¿Imatataj ruwananku tiyan ancianos, tataspis niraj kaymanta jinalla ima llakiypis kashajtin?

⁸ ¿Imatá ancianos ruwankuman? Ancianos, hermanosta yanapaychej kaymanta jinalla ima llakiy kananpajpis wakichisqaña kanankupaj. Congregacionmanta tukuy hermanosta yanapaychej, ima kajtinpis salvakunankupaj imatachus ruwananku kasqanta yachanankupaj, chay ratotaj wajyamusunaykichejpaj. Ñaupaj yachaqanapi Margaretmanta parlarerqanchej. Pay nin: “Congregación imapichus llankʼananmanta uj discursopi, ancianosqa yuyarichiwarqayku montesta nina ruphaykuyta yachan chay tiempoqa niraj tukukusqanta. Niwarqaykutaj autoridades wasiykumanta ripunaykuta niwajtiyku, chayri nina astawan japʼiykukojtin chay rato ripunaykuta”, nispa. Ancianos chayta yuyarichisqankoqa may sumajpuni karqa, imaraykuchus phishqa semananman jina ninaqa astawan japʼiykukorqa. Tatas, Familiapi Diosta Yupaychanapaj tantakushaspa familiaykichejwan parlariychej kaymanta jinalla ima llakiy kajtinpis, imatachus sapa ujniykichej ruwanaykichejta. Qankunapis wawasniykichejpis wakichisqaña kankichej chayqa, ajina llakiy kajtin sonqo tiyasqa kayta atillankichej.

9. ¿Imatá ancianos ruwananku tiyan niraj kaymanta jinalla ima llakiypis kashajtin, chay llakiy pasaytapis?

⁹ Congregacionpi ujnin grupomanta encargado kanki chayqa, grupoykipi kaj tukuy hermanospa numerosninkuta japʼiypuni. Amataj suyaychu kaymanta jinalla ima llakiypis kanantaraj. Uj listata ruwakuy, hermanos numerosninkuta cambiajtinkutaj, listaykipipis chay rato cambiallaytaj. Ajinamanta kaymanta jinalla ima kajtinpis, sapa ujwan parlariyta atillanki, yachankitaj imastachus necesitashasqankuta. Chaytataj coordinador ancianoman willay, paytaj congregacionesta waturejman willanqa. Ajina ujchasqa llankʼaspaqa hermanosta sumajta yanapayta atinkichej. Nina japʼiykukusqantawan, Margaretpa circuitonmanta congregacionesta waturej hermanoqa, 36 horastapuni mana puñuspa atienderqa ancianospa ruwasqankuta. Chaypachaqa 450 hermanospuni wasisninkumanta ayqekorqanku. Chay ancianostaj paykunata wajyasharqanku, atiendesharqankutaj (2 Cor. 11:27). Ajinata ruwasqankurayku, tukuy necesitaj hermanospaj alojamientota tarerqanku.

10. ¿Imaraykutaj ancianos hermanosta ovejitasta jina qhawanankupuni tiyan? (Juan 21:15).

¹⁰ Ancianosqa Bibliawan hermanosta kallpachananku tiyan, llakisqa kashajtinkutaj sonqochananku tiyan. Chay ruwayta Jehová paykunaman qon (1 Ped. 5:2). Uj desastre natural  kajtin, ñaupajtaqa hermanosta yanapananku tiyan allillan kashanankupaj, mikhunanku, ropanku, maypichus puñukunankupis mana faltananpaj. Jinapis chay llakiypi rikukojkunaqa, ashkha killasta necesitanqanku Bibliawan kallpacharinata, sonqocharinatapis (Juan 21:15 leey). Hermanonchej Haroldqa Sucursalta Kamachejkunamanta ujnin. Payqa desastres naturales kasqanrayku llakiypi rikukoj ashkha hermanoswan parlarerqa. Pay nin: “Llakiypi rikukojkunaqa mana chay ratochu allinyapunku. Hermanosqa ichapis ruwanasninkuta watejmanta ruwayta qallarinkuman. Jinapis ichá kutin kutita yuyarikunkuman uj desastrepi familiarninku wañupusqanta, munasqa familiarninkoj regalonta pierdesqankuta, chayri casi wañusqankuta. Chaykunata yuyarikojtinkoqa watejmanta sonqonku nananman. Chaytaj mana niyta munanchu pisi creeyniyoj kasqankuta. Ajina llakiypi rikukojkunataqa chay pasanpuni”, nispa.

11. ¿Ima yanapatataj familias uj tiempota necesitanqanku?

¹¹ Bibliaqa kayta yuyaychan: ‘Waqajkunawan waqaychej’, nispa. Ancianostaj chay yuyaychayman jinapuni ruwananku tiyan (Rom. 12:15). Desastres naturalesmanta salvakoj hermanosqa, necesitanku yuyarichinata Jehovapis hermanospis paykunata munakullasqankutapuni. Ancianosqa familiasta yanapankuman orakunallankupajpuni, Bibliata estudianallankupajpuni, reunionesman, predicacionmanpis rinallankupajpuni. Chantapis tatasta yuyarichinkuman wawasninkuman entiendechinankuta mana tukuy imatachu uj desastrepi pierdesqankuta. Tatas, wawasniykichejman yuyarichiychej Jehovaqa wiñaypaj amigonku kananta, nitaj saqerparinanta. Chantapis niychej mundontinmanta hermanosninchejqa, uj familia jina chaypipuni kashanankuta yanapanankupajpacha (1 Ped. 2:17).

12. ¿Imaynatá congregacionmanta kajkuna yanapakusunman llakiypi rikukoj hermanosta? (Fotota qhawariy).

¹² ¿Imatá congregacionmanta kajkuna ruwasunman? Tiyakunchej chay qayllapi uj desastre natural kajtenqa, ancianosta tapurikuna imapichus yanapakuyta atisqanchejta. Ichá uj tiempota wasinchejpi alojasunman wasinkumanta ayqekoj hermanosta, chayri paykunata yanapaj hermanosta. Chantapis ichá yanapasunman mikhunasta chayri necesitasqanku imasta entregaspa. Tiyakunchej chaymanta karupi uj desastre natural kajtinpis, yanapakuyta atillanchejtaj. ¿Imaynasmanta? Chay llakiypi rikukojkunapaj orapuspa, jallpʼantinpi Bibliamanta yachachinapaj nisqa cajitaman qolqesitunchejta churaspa ima (2 Cor. 1:8-11; 8:2-5). Chay lugarman viajayta atinchej chaytaj, ancianosninchejta tapurikuna imapichus yanapakamuyta atisqanchejta. Invitawasun chayqa, ichá hermanosqa yachachiwasunraj maychus tiemponpi, maypichus necesitakushan chaypitaj yanapakamunanchejpaj.

13. Testigos prohibisqa kanku chay lugaresmanta hermanos, ¿ima llakiykunasniyojtaj kanku?

¹³ Qhatiykachasqa kanku chay lugarespi tiyakoj hermanosqa astawanraj sufrinku. Paykunapis qolqemanta pisichikullankutaj, onqollankutaj, familiaresninkupis wañupullankutaj. Ancianostaj testigos prohibisqa kasqankurayku mana maymanpis riyta atillankumanchu, nitaj hermanoswan parlayta atillankumanchu. Hermanonchej Andreiqa ajinapi rikukorqa, paymantaqa ñaupaj yachaqanapi parlarerqanchejña. Predicanapaj gruponmanta uj hermanaqa qolqemanta pisisqa kasharqa, jinallapitaj accidentakorqa. Chayrayku ashkha kutista operarqanku, nitaj trabajakuyta aterqachu. Autoridades testigosta prohibejtikupis, coronavirus onqoy kajtinpis, hermanosqa tukuy atisqankuta yanaparerqanku. Jehovataj chayta sumajta qhawamusharqa.

14. ¿Imaynatá ancianos rikuchinku Jehovapi atienekusqankuta?

¹⁴ ¿Imatá ancianos ruwankuman? Hermano Andreiqa Jehovaman orakorqa, imatachus ruwayta atisqantataj ruwarqa. ¿Imaynatá Jehová mañakusqanta uyarerqa? Astawan yanapayta atej hermanospa sonqonkuta kuyuricherqa, hermanitata atisqankuman jina yanaparinankupaj. Wakin hermanosqa hermanitata doctorman pusaj kanku, wakintaj qolqesitunkuwan yanaparej kanku. Jehovataj mana manchachikuspa ajinata yanaparisqankuta bendicerqa (Heb. 13:16). Ancianos, autoridades Jehovapaj llankʼajta manaña saqewajtinchejqa wajkunawan yanapachikuychej (Jer. 36:5, 6). Jinapis astawanqa Jehovapi atienekuychej. Pay yanapasonqachej hermanosta necesitasqankupi yanapariyta atinaykichejpaj.

15. ¿Imatá ruwananchej tiyan qhatiykachasqa kajtinchej ujchasqallapuni kanapaj?

¹⁵ ¿Imatá congregacionmanta kajkuna ruwasunman? Qhatiykachasqa kashaspaqa ichapis juchʼuy grupitosllapi tantakusunchej. Chayrayku ni jaykʼaj jina hermanosninchejwan allinpi kananchej tiyan. Satanaswan maqanakuna, amataj noqanchejpurachu. Hermanosninchej pantajtinku perdonana, phiñanasqa kashanchej chaytaj chay rato allinyakapuna (Pro. 19:11; Efe. 4:26). Purajmanta yanapanakunapaj wakichisqa kana (Tito 3:14). Andreipa gruponmanta chay hermanitata yanapasqankoqa tukuyninkupaj allin karqa. Paykunaqa uj familia jinalla aswan ujchasqa karqanku (Sal. 133:1).

16. Colosenses 4:3, 18 nisqanman jina, ¿imatá ruwapusunman qhatiykachasqa hermanospaj?

¹⁶ May chhika hermanosninchejqa autoridades prohibiwajtinchejpis Jehovata sirvishallankupuni. Wakin hermanosqa creeyninkurayku presochasqas kashanku. Paykunapajwan familiasninkupajwan Diosmanta mañapuna. Mañapunallataj  paykunata yanapaj hermanospajpis. Paykunaqa carcelman wisqʼaykusqa kanankuta yachaspapis, mana manchachikuspa presochasqa hermanosta Jehovapi atienekunallankupajpuni yanapanku, necesitasqanku imasta qorinku, juzgadospitaj paykunawan khuska kanku (Colosenses 4:3, 18 leey). c Amapuni qonqanachu Diosmanta mañakusqanchejqa chay hermanosta yanapayta atisqanta (2 Tes. 3:1, 2; 1 Tim. 2:1, 2).

17. ¿Imaynatá kunanmantaña wakichikusunman qhatiykachasqa kananchej tiempopaj?

¹⁷ Kunanmantapacha familiaykiwan wakichikuwaj qhatiykachasqa kasun chay tiempopaj (Hech. 14:22). Imaschus chay tiempopi pasasunaykichejpi yuyanaykichejmantaqa, Jehovaman astawan qayllaykuychej, wawasniykichejtapis chayta ruwanallankupajtaj yanapaychej. Wakin kutis mayta llakikunkichej chayqa, chay llakiyniykichejta Jehovaman willakuychej (Sal. 62:7, 8). Familiaykichejwan parlariychej imaraykuchus Jehovapi atienekuyta atisqaykichejta. d Imaynatachus kaymanta jinalla ima llakiy kananpajpis wakichikuspa wawasniykichejta yanapankichej, ajinallatataj qhatiykachasqa kanapaj wakichikuspapis paykunata yanapankichej. Ajinamanta paykunaqa mana manchachikonqankuchu, sonqo tiyasqallataj kanqanku Jehovapi atienekuyta yachachisqaykichejrayku.

18. ¿Imayna kausaytataj suyakushanchej?

¹⁸ Dios sonqo tiyaykuyta qowasqanchejrayku, mana imatapis manchachikunchejchu (Fili. 4:6, 7). Wañuchej onqoykuna rikhurejtin, kaymanta jinalla ima llakiypis kajtin, chayri qhatiykachasqa kajtinchej Jehovaqa sonqo tiyaykuyta qowasqanchejwan sonqonchejta phaj nirichin. Payqa sinchʼita llankʼaj ancianosnejta ovejitasta jina cuidawanchej. Chantapis tukuyninchej purajmanta yanapanakuyta atisqanchejta niwanchej. Kay tiempopi sonqo tiyasqa kayta atishaspa, wakichikuna qhepaman jamoj aswan jatuchaj pruebaspaj, “manchay ñakʼariy” tiempopajpis (Mat. 24:21). Chay tiempopeqa may allinpuni kanqa sonqo tiyasqalla kananchej, wajkunatapis chaypaj yanapananchej. Jinapis manchay ñakʼariy tiempo pasaytaqa manaña kunan tiempo jina problemas kanqachu, chayrayku manaña imamantapis llakikusunchu. Chaypachamá imaynatachus Jehová qallariymantapacha kausakunanchejta munarqa ajinata kausakusun: Cheqamanta wiñaypaj sonqo tiyasqa (Isa. 26:3, 4).