¿Wakichisqachu kashanki ‘kay jallpʼata herenciata jina japʼinaykipaj’?
TUKUYNINCHEJ mayta suyakushanchej Jesuspa kay nisqan juntʼakunanta: “Kusisqa kanku llampʼu sonqoyojkunaqa, paykunaqa kay jallpʼata herenciankupaj japʼenqanku” (Mat. 5:5). Ajllasqa cristianosqa kay jallpʼata herenciankupaj japʼenqanku Jesuswan khuska cielopi reyes kajtinku (Apo. 5:10; 20:6). Casi tukuy cristianostaj kay jallpʼata herenciata jina japʼiyta suyakushanku, chaypi wiñaypaj kausakunankupaj. Paykunaqa mana pantaj runas kanqanku, kusisqas, ni imata manchachikuspataj kausakonqanku. Chaypajtaj ashkha imasta ruwananku kanqa. Kay yachaqanapeqa kinsa imasta ruwanankumanta parlarisun: kay jallpʼata uj paraisoman tukuchinankumanta, kausarimojkunaman imatachus necesitasqankuta qonankumanta, paykunaman yachachinankumanta ima. Paraisopi chay imasta ruwayta munasqanchejta rikuchinapaj, ¿imastataj kunanña ruwashasunman? Kay yachaqanapeqa chaymantapis parlarillasuntaj.
¿WAKICHISQACHU KASHANCHEJ JALLPʼATA PARAISOMAN TUKUCHINAPAJ?
Jehovaqa runasman kayta kamacherqa: “Jallpʼantinman juntʼaykuychej, tarpuychejtaj”, nispa. Chaywanqa nisharqa uj pʼunchay jallpʼantin paraisoman tukunanta (Gén. 1:28). Wiñaypaj kausakonqanku chaykunaqa, chay kamachiyta kasukunanku kanqa. Jallpʼaqa mana qallariymantapachachu uj paraíso kanqa. Edén huertaqa unay watasña chinkaporqa. Chayrayku Armagedón pasajtinkama ashkha ruwana kanqa, runas jallpʼata pierdecherqanku chay partesta llimphuchanapaj. Maytapuni trabajananchej kanqa.
Israelitasqa chayman rijchʼakojta ruwarqanku Babiloniamanta jallpʼankuman kutipuspa. Jallpʼankupeqa 70 watastapuni ni pi tiyakorqachu. Isaiastaj ñaupajmantaña nerqa, Jehovaj yanapayninwanqa chay jallpʼankuta watejmanta kʼachituman tukuchinankuta. Pay nerqa: “Chʼaki jallpʼasnintaqa Edén huertaman jina tukuchenqa, chʼaki pampasnintapis Jehová Diospa huertanman jina tukuchenqa”, nispa (Isa. 51:3). Jehovaqa israelitasta yanaparqapuni jallpʼankuta kʼachituman tukuchinankupaj. Kay jallpʼata herenciata jina japʼejkunapis, Jehovaj bendicionninwanqa uj kʼachitu paraisoman tukuchiyta atenqanku. Chay llankʼaypi yanapakuyta munasqanchejta rikuchinapajqa, kunanmantaña wakin imasta ruwashasunman.
¿Imastá ruwasunman? Tukuy atisqanchejta kallpachakusunman wasinchejta, wasinchej qayllastapis llimphuta, kʼuchunchasqatataj japʼinapaj. Chaytataj ruwasunman vecinosninchej mana ajinata ruwajtinkupis. Chantapis yanapakusunman Tantakuna Wasita, Jatun Tantakuna Wasitapis llimphuchaspa, allinchaspa ima. Atinchej chaytaj, desastres naturales kajtin yanapakunapaj socilitudtapis juntʼachillasunmantaj. Ajinamanta rikuchisunchej yanapata necesitajkunata yanapariytapuni munasqanchejta. Kayta tapurikusunman: “¿Imastá kunanña yachakushayman paraisopi Jehová kausakojta saqewajtin chaypi yanapakunaypaj?”, nispa.
¿WAKICHISQACHU KASHANCHEJ KAUSARIMOJKUNATA YANAPANAPAJ?
Jesusqa Jairoj imillitanta kausarichimuytawanpacha mikhunata jaywarinankuta nerqa (Mar. 5:42, 43). Chay 12 watitayoj imillitata cuidayqa atinapaj jinallachá karqa. Jinapis Jesús wañusqasta kausarichimojtin, may chhikachus ruwananchej kanqa. Jesús nerqa: “Sepulturaspi tukuy kajkunaqa wajyasqayta uyarenqanku, kausarimonqankutaj”, nispa (Juan 5:28, 29). Bibliaqa mana ninchu imaynapunichus chay kananta, jinapis kausarimojkunaqa mikhunata, wasita, ropatapis necesitanqanku. ¿Kunanmantapacha rikuchiwajñachu chaypi kashaspa yanapakuyta munasqaykita? Jina kajtenqa kay tapuykunapi tʼukuriwaj.
¿Imaynatá kunanña rikuchiwaj jallpʼata herenciata jina japʼinaykipaj wakichisqaña kashasqaykita?
Congregacionniykipi waturikoj hermano jamunanta willakojtin, ¿mikhunata invitarinaykipaj anotachikunkichu? Ichapis uj betelitata congregacionniykiman kachanpushankuman, chayri congregacionesta waturej hermano asignacionninta tukuchashanman. ¿Paykunata yanapariwajchu wasita tarinankupaj? Tiyakunki chaypi kinsa pʼunchaypaj jatun tantakuy chayri asamblea especial ruwakojtin, ¿yanapakuwajchu niraj chay tantakuykuna ruwakushajtin chayri chay tantakuykuna tukukojtin? ¿Anotachikuwajchu chay asambleaman invitados jina jamojkunata yanaparinaykipaj?
¿WAKICHISQACHU KASHANCHEJ KAUSARIMOJKUNATA YACHACHINAPAJ?
Imatachus Hechos 24:15 nisqanpi reparanchej may chhika waranqa waranqa runas kausarimunankuta. Paykunamanta ashkhasqa, niraj wañupushaspa mana Jehovata rejsiyta aterqankuchu. Paraisopi kausarimuspataj rejsiyta atenqanku. a Jehovata ashkha watastaña sirvejkunaqa, chay runasman yachachiypi yanapakuyta atenqanku (Isa. 11:9). Charlotte sutiyoj hermana chay pʼunchay chayamunanta maytapuni suyakushan. Payqa predicarqa Europapi, Sudamericapi, Africapi ima. May kusisqataj kay jinata nerqa: “Maytapuni munashani kausarimojkunata yachachiyta. Unay tiempopi kausakoj runamanta leespa kay jinata niyta yachani: ‘Jehovatachus rejsinman karqa chayqa, kausaynenqa uj jina kanman karqa’, nispa. Kausarimojkunaman willariytaña munashani Jehovamanta, payta sirvejtinku imayna sumajchus kausayninku kananmantapis”.
Jehovaj ñaupa tiempo kamachisninpis, pikunachus Jesús niraj kay jallpʼaman jamushajtin kausakorqanku chaykunapis, ashkha imasllatataj yachakunanku kanqa. May kusiypuni, may sumajpuni kanqa Danielman sutʼinchay imaynatachus qhelqasqan profecías juntʼakusqanta. Payqa mana chay profeciasta entienderqachu (Dan. 12:8). May sumajllatajchá kanqa Rutman, Noemimanpis mirayninkumanta Mesías jamusqanta willariy. Jallpʼantinpi runasman yachacheyqa ima sumajchus kanqa. Chantapis manaña kay tiempopi jina imapis llakichiwasunchu, nitaj imapis pantachiwasunchu.
¿Imaynatá rikuchisunman paraisopi runasman yachachiypi yanapakuyta munasqanchejta? Sumaj yachachejkuna kanapaj kallpachakuspa, jallpʼantinpi willakusqanpipis yanapakuspapuni (Mat. 24:14). Mayorcitusña kasqanchejrayku, chayri waj imasrayku mana munasqanchejman jina ruwayta atispapis, tukuy atisqanchejta ruwaspaqa rikuchisunchej kausarimojkunaman yachachinapaj wakichisqaña kashasqanchejta.
¿Cheqamantapunichu kay jallpʼata herenciata jina japʼiyta munashanchej? ¿Maytachu munashanchej kay jallpʼata uj paraisoman tukuchiyta, kausarimojkunatapis yanapayta, yachachiyta ima? Allin kanman chay tapuykunapi piensarinanchej. Jallpʼata herenciata jina japʼejtinchej imastachus ruwakonqa chayman rijchʼakoj imasta kunanña ruwaspaqa, chaypaj wakichisqaña kashasqanchejta rikuchisunchej.
a Torremanta Qhawaj septiembre de 2022 watamanta revistapi “‘Cheqan kajta ruwanankupaj ashkhasta’ yanapakun” nisqa yachaqanata leeriy.
