Kay 2022 watamanta Torremanta Qhawaj revistasta leerqanki chayqa, kay tapuykunaman kutichiyta atiwaj.

Jehovawan parlarinapaj, payta uyarinapaj, imaynachus kasqanpitaj tʼukurinapaj tiempochakuspa, ¿ima bendicionestataj japʼisun?

Kausayninchejpi allin imastapuni ajllasun, aswan sumaj yachachejkuna kasun, creeyninchej astawan sinchʼiyanqa, astawantaj Jehovata munakusun (w22.01, páginas 30, 31).

¿Imaynatataj yanapawasunchej Jehovapi, llajtanta ñaupajman apajkunapipis atienekusqanchej?

Kunan tiempo kashan Jehovapi atienekunapaj, llajtannejta, ancianosnejta imastachus kamachiwasqanchejtapis kasukunapaj, allinpajtaj qhawanapaj. Ajinamanta manchay ñakʼariy tiempopipis kamachiykunata kasukuyta atillasunpuni, chay kamachiykuna mana allinchu rijchʼawajtinchejpis, nitaj kasukuyta atillajtinchejpis (w22.02, páginas 4-6).

Jehovaj angelnin ‘Zorobabelpa makinpi plomadata rikonqanku’ nispa, ¿imatá niyta munasharqa? (Zac. 4:8-10).

Plomadamanta parlaspaqa niyta munasharqa, mosoj templo mana ñaupaj templo jinachu kajtinpis tukuchasqapuni kananta, Jehovaj munayninman jinataj ruwasqa kananta (w22.03, páginas 16, 17).

¿Imaynatá wajkuna yachakunankupaj jina parlasunman? (1 Tim. 4:12).

Predicashaspa kʼachamanta, respetowantaj parlarispa, reunionespi tukuy sonqo takirispa, comentaspa, wajkunata kallpachanapaj jinapuni parlarispa, nitaj sonqota nanachinapaj jinachu parlaspa (w22.04, páginas 6-9).

¿Imaraykutaj Daniel 7 capitulopi tawa jatuchaj animalespa (gobiernospa) rijchʼayninku, Apocalipsis 13:1, 2 versiculospi uj millay phiña animalllapi rikukun?

Apocalipsis 13 capitulopi parlan chay millay phiña animalqa mana uj atiyniyoj gobiernollawanchu ninakun, Romawan jina. Kay millay phiña animalqa ninakun jallpʼantinpi “runa masinta chakisnin uraman” churan, chay tukuynin gobiernoswan (w22.05, página 9).

¿Imatá ruwasunman Jehová justiciata ruwananpi atienekunapaj?

Ichá pillapis insultawasunman, sonqonchejta nanachiwasunman, chayri contranchejpi jatun juchata ruwanman. Jina kajtenqa kallpachakusunman mana paywan phiñasqallapuni kanapaj, nitaj rabiasqa kanapaj, Jehovaj makinmantaj tukuy imata saqepunapaj. Jehovaqa jucharayku tukuy llakiykuna kasqanta chinkachenqa (w22.06, páginas 10, 11).

¿Imatataj yuyarikunan tiyan reunionpi oracionta ruwaj hermano?

Oracionta ruwayqa mana wajkunata yuyaychanapajchu, nitaj imata willanapajchu. Oracionta ruwaj hermanoqa ama ‘ashkhata parlananchu’ tiyan, astawanpis tantakuyta qallarinapaj orashaspa (Mat. 6:7) (w22.07, páginas 24, 25).

¿Imaynamantataj ‘sajra imasta ruwajkuna’ “juzgasqa” kanqanku? (Juan 5:29).

Paykunataqa mana niraj wañupushaspa ruwasqasninkumantachu juzgakonqa. Juzgasqa kanqanku nispaqa parlashan, kausarimusqankumanta qhepaman ruwasqanku, imaynachus kasqankupis sumaj qhawaykusqa kananmanta (w22.09, página 18).

¿Imatataj hermano Rutherford septiembre de 1922 watapi nerqa uj jatun tantakuypi?

Payqa Cedar Pointpi (Ohio) apakusqan asambleapi kayta nerqa: “¡Reyqa kamachishan! Qankunataj willajkunasnin kankichej. Chayrayku Reymanta, Reinonmantawan, willamuychej, willamuychej, willamuychejpuni”, nispa (w22.10, páginas 3-5).

Isaías 30 capítulo nisqanman jina, ¿imaynasmantá Jehová aguantanapaj yanapawanchej?

Chaypeqa nin Jehovaqa 1) mañakusqanchejta sumajta uyariwasqanchejta, kutichiwasqanchejtapis, 2) pusaykachawasqanchejta, 3) kunan bendeciwasqanchejta, qhepamanpis bendecinawanchejta (w22.11, página 9).

¿Imaraykú nisunman Salmo 37:10, 11, 29 versículos ñaupa tiempopiña juntʼakusqanta, qhepamanpis juntʼakunallantataj?

Davidpa qhelqasqanqa rikuchin Salomón kamachishajtin Israelpi allinta kausakusqankuta. Jesuspis paraisomanta parlashaspa imatachus versículo 11 nisqanta oqharerqa (Mat. 5:5; Luc. 23:43) (w22.12, páginas 8-10 chantá 14).