1, 2. ¿Imaspi rikukuspataj waqasunman?

 ¿PITAJ mana waqayta yachanchu? Wakin kutisqa kusiymanta waqarikunchej, ichapis wawitanchej nacekojtin. Wakin kutistaj imata yuyarikuspa, chayri munasqa amigonchejwan unaymanta tinkuspa kusiymanta waqarikullanchejtaj.

² Chaywanpis astawanqa sonqonchej nanawajtinchej waqanchej. Ichapis pi wasanchawarqanchej chayri sinchʼi onqosqa kashanchej, tukuy imanchejtaj nanawanchej chayri familianchejmanta ichá pillapis wañuporqa. Ajina kajtenqa ichapis Jeremías jina sientekusunman. Payqa Jerusalenta babilonios thuñishajtinku may llakisqa karqa. Chayrayku nerqa: “Ñawisniymanta waqayqa mayus jinapuni jamurin [...]. Ñawisneyqa mana saykʼuspa waqallanqapuni, mana samarispa”, nispa (Lam. 3:48, 49).

 3. ¿Imaynataj Jehová sientekun llakisqa kashasqanchejta rikuspa? (Isaías 63:9).

³ Jehová yachan mashkha kutitachus tukuy kausayninchejpi waqasqanchejta. Bibliaqa niwanchej payqa sufrisqanchejta sumajta qhawamushasqanta, yanapanta mañakojtinchejtaj uyarimuwasqanchejta (Sal. 34:15). Jinapis mana chay imasllatachu ruwan. Payqa Tatanchej, maytataj munakuwanchej. Payqa waqasqanchejta rikuspa mayta llakikun, chayrayku chay rato yanapawanchej (Isaías 63:9 leey).

 4. ¿Pikunamantataj kay yachaqanapi parlarisun, chanta imatá Jehovamanta yachakusun?

⁴ Bibliaqa willawanchej imatachus Jehová ruwasqanta kamachisnin waqajtinku. Piensarina Anapi, Davidpi, rey Ezequiaspi ima. ¿Imaraykutaj paykuna waqarqanku? ¿Imatá Jehová paykunarayku ruwarqa? Imatachus Jehová chay kutispi  ruwasqan, ¿imaynatá sonqochawanchej llakisqa kashajtinchej, pipis wasanchawajtinchej chayri ima pasajtin ni imanakuyta atispa waqajtinchej?

LLAKIYMANTA WAQARIKOJTINCHEJ

 5. Llakiyninrayku, ¿imaynataj Ana sientekunman karqa?

⁵ Anaqa wakin kutis may llakisqa kashaspa mayta waqarikorqa. Qosanqa mana payllawanchu casarasqa karqa, manaqa Peninawanpis. Chay warmitaj payta mayta chejnikoj, llakichejtaj. Chantapis Anaqa mana wawasniyoj kayta aterqachu, Peninataj ashkha wawasniyoj karqa (1 Sam. 1:1, 2). Chayraykutaj Peninaqa mayta Anamanta burlakoj. Anachus kawaj karqa chay, ¿imayná sientekuwaj karqa? “Anaqa waqallajpuni, nitaj mikhojchu” “sonqon ukhupi may phutisqa kasqanrayku” (1 Sam. 1:6, 7, 10).

 6. ¿Imatá Ana ruwarqa manaña anchata llakikunanpaj?

⁶ ¿Imatá Ana ruwarqa manaña anchata llakikunanpaj? Ñaupajtaqa Diosta yupaychana toldoman rerqa, chaypeqa Diosllata yupaychaj kanku. Chaypitaj “waqaspa Jehová Diosmanta mañakorqa”. Ichapis chayta ruwarqa toldoj pationman yaykuna qayllapi. Anaqa Diosmanta mañakorqa paymanta yuyarikunanpaj, nerqataj: “Qhawarimuway kay jina llakisqa kashani”, nispa (1 Sam. 1:10 tukukuynin, 11). Payqa Jehovaman willakorqa imaynachus sonqon kashasqanta. Maytachá Jehová llakikorqa munasqa wawan Ana ajinata waqajtin.

 7. ¿Imaynataj Ana sientekorqa Jehová Diosman llakiyninta willakuytawan?

⁷ Ana Jehovaman tukuy llakiyninta willakojtin, sacerdote Eliqa nerqa Jehová mañakuyninta uyarinanta. ¿Imaynataj Ana sientekunman karqa? Biblia nin: “Chaymanta Anaqa kutiporqa. Chantá mikhorqa, manañataj llakisqa uyachu karqa”, nispa (1 Sam. 1:17, 18). Llakiynin manaraj chinkajtinpis, sonqonqa phaj nirerqa. Llakiynintaqa Jehovaj makinman saqeporqa. Jehovataj chay llakiyninta entienderqa, mañakusqanta uyarerqa, chaymantataj wawasniyoj kananpaj yanaparqa (1 Sam. 1:19, 20; 2:21).

8, 9. Hebreos 10:24, 25 nisqanman jina, ¿imajtintaj tukuy atisqanchejta kallpachakunanchej tiyan tantakuykunaman rinapaj? (Fototawan qhawariy).

⁸ ¿Imatá yachakunchej? Qanpis ichá llakiypi rikukushanki, chayraykutaj waqashanki. Ichapis uj familiarniyki chayri uj amigoyki wañuporqa. Ajina llakiypi rikukuspaqa nichá ni piwan kayta munankichu, chayqa tukuyta pasawasunman. Chaywanpis Anamanta yuyarikuy. Payqa Diosta yupaychana toldoman rerqa, Jehovataj chaypi sonqocharqa. Sichus llakisqa kashaspa, mana kallpayoj kashaspa tantakuykunasman rillankipuni chayqa, Jehová qantapis sonqochallasonqataj (Hebreos 10:24, 25 leey). Chaypeqa sonqochanawanchejpaj jina textosta uyarinchej. Ajinamanta Jehová yanapawanchej  manaña llakiykunasninchejpi yuyananchejpaj, manachayqa kusisqa kananchejpaj. Chaywanqa manaña anchata llakikunchejchu, llakiyninchej mana chay ratochu allinchakojtinpis.

⁹ Reunionespi hermanosninchejqa mayta sonqochawanchej, mayta munakuwasqanchejtataj rikuchiwanchej. Chaytaj manaña anchata llakikunanchejpaj yanapawasunman (1 Tes. 5:11, 14). Uj precursor especialmanta parlarina. Señoranqa wañuporqa, nintaj: “Paymanta yuyarikuspa waqallanipuni. Wakin kutis uj kʼuchupi chukuykuspa jikʼun jikʼunta saykʼunaykama waqarikuni. Reunionesman rispataj necesitasqay kallpata japʼispa ñaupajllamanpuni rini. Tantakuykunapi hermanos comentarisqanku, may miskʼi palabraswan parlapayariwasqankoqa sonqoyta mayta tiyaykuchin. Tantakuna Wasiman chayaspaqa wakin kutis may llakisqaraj sientekuni, chaymanta llakiyneyqa chinkaripun”, nispa. Jehovaqa tantakuykunasman rejtinchej hermanosmanta, hermanasmanta valekunman yanapanawanchejpaj.

10. ¿Imaynatá Ana jina ruwasunman sinchʼi llakisqa kashaspa?

¹⁰ Anaqa Jehovaman llakiyninta willakuspa aswan allin sientekorqa. Qanpis 1 Pedro 5:7 nisqanman jina ruwawaj, ‘llakiyniykita Diospa makinman saqepuwaj’, paytaj uyarisonqapuni. Uj hermanataj nin imaynachus sientekusqanta qosanta suwas wañuchejtinku: “May sonqo pʼakisqapuni kasharqani, yuyarqanitaj niña ujtawan kusisqa kayta atinayta”, nispa. ¿Imataj yanaparqa? Pay nillanpuni: “Tatanchej Jehovamanta mañakorqani, repararqanitaj sapa mañakojtiy sonqochawasqanta. Wakin kutisqa imaynachus sientekusqayta mana willarikuyta atillarqanichu, jinapis pay entiendewarqa. May llakisqapuni kaspa, chantá ni imanakuyta atispa, sonqoyta tiyaykuchinanta mañakoj kani. Chay ratopacha sonqoy tiyaykoj, kallpatataj japʼej kani ñaupajllamanpuni rinaypaj”, nispa. Jehovaman llakiyninchejta willakojtinchej, payqa mayta llakikun, sumajtataj entiendewanchej imaynachus sientekusqanchejta. Llakiyninchej mana chinkajtinpis, Jehovaqa calmakunanchejpaj, sonqo tiyasqastaj kananchejpaj yanapawasunman (Sal. 94:19; Fili. 4:6, 7). Chantapis aguantasqanchejrayku bendeciwasunpuni (Heb. 11:6).

WASANCHASQA KASPA WAQAJTINCHEJ

11. ¿Imaynataj David sientekorqa wakin runas mayta llakichejtinku?

¹¹ Davidqa kausayninpi ashkha llakiykunaspi rikukorqa, chayraykutaj waqarqa. Ashkhas mayta chejnikorqanku. Wakin familiaresnin, amigosnin ima wasancharqanku, wañuchiytataj munarqanku (1 Sam. 19:10, 11; 2 Sam. 15:10-14, 30). Uj kuti pay nerqa: “Jikʼun jikʼunta waqasqaypi saykʼuniña. Tutantin waqasqaypi camaypis chʼaranllaña. Chay jinata waqasqaypi puñunaypis qochallaña”, nispa. ¿Imajtín ajina sientekorqa? Payllataj nerqa: “Enemigosniy chay jinata ñakʼarichiwasqankurayku”, nispa (Sal. 6:6, 7). Davidqa chay jinasta ruwasqankumanta waqanallanta waqarikorqa.

12. Salmo 56:8 nisqanman jina, ¿imatataj David sutʼita yacharqa?

¹² Davidqa ajina llakiykunaspi rikukojtinpis, sutʼita yacharqa Jehová mayta munakusqanta, qhelqarqataj: “Jehová Diosqa waqasqayta uyarenqapuni”, nispa (Sal. 6:8). Waj kutipitaj Salmo 56:8 (leey) versiculopi kaj kʼachitu palabrasta escriberqa. Chay palabrasqa sutʼita rikuchiwanchej Jehová mayta munakuwasqanchejta, imaynachus sientekusqanchejtapis yachasqanta. Davidqa nerqa Jehovaqa waqasqanchejta sapa sutʼuyta botellanpi  waqaychasqanta chayri waqasqanchejta libronpi qhelqasqanta. Davidqa sutʼita yacharqa Tatanchej Jehová tukuy llakiykunasninta qhawamushasqanta, yuyarikusqantataj. Chantapis yachallarqataj mana llakiykunasnillantachu qhawamushasqanta, manaqa imaynachus sientekusqantapis sumajta yachasqanta.

13. ¿Imataj sonqochawasunman pipis wasanchawajtinchej chayri llakiypi rikhurichiwajtinchej? (Fototawan qhawariy).

¹³ ¿Imatá yachakunchej? Uj de confianza runa wasanchasojtin chayri llakiypi rikhurichisojtin, ¿imayná sientekorqanki? ¿Sonqo pʼakisqachu kashanki qosayki chayri señorayki saqerparisusqanrayku, chayri noviazgoyki tukukapusqanrayku, chayri ujnin familiarniyki, amigoyki niña Jehovata sirvishasqanrayku? Uj hermanomanta parlarina. Pay nin imaynachus sientekusqanta señoran wajwan saqerpajtin: “Nipuni chay ruwawasqanta creerqanichu, ni imanakuyta aterqanichu. Ni imapaj valesqayta yuyaspataj llakisqalla, phiñasqalla kasharqani”, nispa. ¿Imataj sonqochasunkiman pillapis wasanchasojtin chayri de confianza runa llakiypi rikhurichisojtin? Yuyarikuy Jehová ni jaykʼaj saqerpasunanta. Chay hermano nerqa: “Repararqani runasqa llakiypi rikhurichiyta atiwasqanchejta, jinapis Jehovaqa ni jaykʼaj chayta ruwawasunmanchu. Jehovaqa Pakakunanchej Chhanka, ima kajtinpis chaypipuni kanqa yanapanawanchejpaj, ni jaykʼajpis payta kasukojkunata saqerparenqachu”, nispa (Sal. 37:28). Yuyarikuy Jehová ni pi jina munakususqanta. Ichapis imata ruwasusqankurayku mayta llakichisorqanku. Jinapis yuyarikuy Jehovapajqa mayta valesqaykita (Rom. 8:38, 39). Wajkuna imata ruwasojtinkupis, Jehovaqa mayta munakusunki.

14. ¿Imatataj niwanchej Salmo 34:18?

¹⁴ Pillapis wasanchasorqa chayqa, David imatachus kay Salmo 34:18 (leey) versiculopi nisqan mayta sonqochasunkiman. Uj libro nin chay versiculopi ‘llakisqa kajkuna’ nisqantaqa traducikullanmantaj “ni ima allin kajta suyakojkuna” nispa. ¿Imaynatá Jehová yanapan ajina llakiypi kajkunata? Chay textollataj nin Diosqa sonqo pʼakisqa runaspa “qayllallanpi” kashasqanta. Ichapis ajina llakisqa kashankuman wasanchasqankurayku chayri uj de confianza runa llakiypi rikhurichisqanrayku. Uj tataqa wawitan waqashajtin nin: “Ama waqaychu, wawitáy”, nispa. Ajinallatataj Jehovapis llakiyninchejta llakiyninta jina qhawaspa, chay rato yanapawanchej. Payqa sonqonchejta tiyaykuchiyta munan, llakiyninchejtapis pisiyachiyta munan.  Chantapis ashkha imasta qowanchej sumaj suyakuyniyoj kananchejpaj. Ajinamanta llakiykunasninchejta aguantanapaj yanapawanchej (Isa. 65:17).

MANA NI IMANAKUYTA ATISPA WAQAJTINCHEJ

15. ¿Imaraykutaj Ezequías sonqo nanayta waqarikorqa?

¹⁵ Judá llajtamanta rey Ezequiasqa, 39 watasniyoj kashajtin sinchʼita onqoykorqa. Jehovataj profeta Isaiasnejta nerqa chay onqoyninwan wañupunanta (2 Rey. 20:1). Ajinapi nisina ni ima suyakuypis Ezequiaspaj karqachu. Payqa Isaiaspa nisqanta uyarispa sonqo nanayta waqarikorqa, Jehovamantataj yanapata mañakorqa (2 Rey. 20:2, 3).

16. Jehová Ezequiaspa mañakusqanta uyarispa, waqasqantapis rikuspa, ¿imayná sientekorqa, chanta imatataj payrayku ruwarqa?

¹⁶ Jehovaqa Ezequiaspa mañakusqanta uyarispa, waqasqantapis rikuspa mayta llakikorqa, Isaiaswantaj willacherqa: “Mañakuwasqaykita uyarini. Waqasqaykita rikuni. Noqa sanoyachisqayki”, nispa. Jehovaqa paymanta khuyakusqanrayku ashkha watastawan kausananta nerqa, chantapis Jerusalenta asiriospa makinmanta librananta nerqa (2 Rey. 20:4-6).

17. ¿Imaynatá Jehová yanapawanchej sinchʼi onqosqa kajtinchej? (Salmo 41:3; fototawan qhawariy).

¹⁷ ¿Imatá yachakunchej? ¿Imatá ruwawaj onqoyniykipaj mana jampi kajtin? Jehovaman waqaspa willarikuy imaynachus sientekusqaykita. Bibliaqa Jehovamanta niwanchej: “Paymin may khuyakuyniyoj Tata, tukuy imapi sonqochaj Diostaj. Paymin sonqochawanchej tukuy llakiyninchejpi”, nispa (2 Cor. 1:3, 4). Mana suyasunmanchu Jehová tukuy llakiykunasninchejta, problemasninchejtapis kunan chinkachinanta. Chaywanpis aguantananchejpaj yanapawasunpuni (Salmo 41:3 leey). Payqa espíritu santota qowanchej, chaytaj necesitasqanchej kallpata, yachayta, sonqo tiyaykuyta ima qowanchej (Pro. 18:14; Fili. 4:13). Chantapis niwanchej tukuy onqoykunata chinkachinanta (Isa. 33:24).

18. ¿Ima textotaj yanapasorqa sinchʼi llakiypi kashajtiyki? (“ Jehovaqa kay palabraswan waqayninchejta pichan” nisqa recuadrota qhawariy).

¹⁸ Jehovaj nisqasnenqa Ezequiasta mayta sonqocharqa. Noqanchejtapis imatachus Jehová Biblianejta niwasqanchej sonqochallawasunmantaj. Jehovaqa sonqochanawanchejpaj palabrasta Bibliapi qhelqachipuwarqanchej. Chaytaj yanapawanchej ima llakiypi kashajtinchejpis (Rom. 15:4). África Occidentalpi tiyakoj hermananchejmanta parlarina. Paytaqa cancerniyoj kasqanta nerqanku, chayraykutaj mayta waqaj. Pay nin: “Isaías 26:3 mayta kallpachawan. Wakin kutisqa llakiykunasninchejta mana chinkachiyta atinchejchu. Jinapis chay versiculoqa niwanchej  Jehová sonqo tiyaykuyta qonawanchejta, chay llakiyninchejta aguantanapajtaj yanapawasqanchejta”, nispa. ¿Yuyarikunkichu uj texto llakiypi kashajtiyki mayta yanapasusqanmanta? Chay kutipi ichá yuyarqanki chay llakiyniyki ni jaykʼaj chinkananta.

19. ¿Ima sumaj suyakuytaj kapuwanchej?

¹⁹ Tukukuy pʼunchay qayllitapiña kashasqanrayku astawan llakiykunaraj kanqa, chayrayku waqasunpuni. Chaywanpis Anamanta, Davidmanta, rey Ezequiasmanta yachakorqanchej jina, Jehovaqa waqasqaykita sumajta qhawamushan, llakisqa kajtiyki paypis llakikullantaj. Payqa waqajtiyki sapa sutʼuyta yuyarikun. Chayrayku llakiypi rikukuspaqa, Jehovaman willarikuy imaynachus kashasqaykita. Ama karunchakuychu hermanosmanta, imaraykuchus paykunaqa mayta munakusunku. Jehovaqa Biblianejta sonqochawanchej, chaywantaj yanapachikullaypuni. Sichus tukuy imata aguantaspa payta sirvikullankipuni chayqa, payqa mayta bendecisonqa. Tumpamantawanqa ‘ñawisninchejmanta tukuy waqayta pichanqa’ (Apo. 21:4). Paraisopeqa kusiyllamantaña waqarikusunchej.