1, 2. ¿Imatá tatas ruwankuman imapichus creesqanchejmanta wawasninku tapukojtinku?

 ASHKHA tatamamasqa ninku wawasta uywayqa trabajo kasqanta. Sichus juchʼuy wawasniykita sinchʼi creeyniyoj kanankupaj yanapashanki chayqa, mayta felicitayku (Deu. 6:6, 7). Wiñasqankuman jina wawasqa creenciasninchejmanta wakin imasta tapukonqankupuni. Ichapis yachayta munanqanku imaraykuchus Biblia wakin imasta juchachasqanta.

² Chay imasta tapukojtinku tatasqa ichapis yuyankuman wawasninkoj creeynin pisiyashasqanta, llakikunkumantaj. Chaywanpis wawasqa chay imasta tapukunankupuni tiyan creeyninku sinchʼi kananpaj (1 Cor. 13:11). Chayrayku tatasqa mana llakikunankuchu tiyan imatapis tapukojtinku. Astawanpis chay tapuykunasninkumanta valekuspa yachachinkuman paykuna kikin sumajta tʼukurinanku kasqanta.

 3. ¿Imatá kay yachaqanapi yachakusun?

³ Kay yachaqanapi yachakusun imaynatachus tatas wawasninkuta yanapankuman kay kinsa imaspi: 1) sinchʼi creeyniyoj kanankupaj, 2) imachus allin, imatajchus mana allin kasqanmanta Bibliaj nisqanta kasukunankupaj, 3) imaynatachus creenciasninkumanta sutʼinchayta ima. Chantapis yachakullasuntaj imaraykuchus wawas wakin imasta tapukunankupuni kasqanta. Chanta, ¿imastá paykunawan khuska ruwawajchej Diospi creesqanchejmanta parlarinaykichejpaj? Chaytawan kaypi yachakusun.

SINCHʼI CREEYNIYOJ KANANKUPAJ YANAPAYCHEJ

 4. ¿Imastataj wawas tapukunkuman, chanta imaraykutaj?

⁴ Cristiano tatasqa yachanku Diospi creeyta mana wawasninkuman herenciata jina saqeyta atisqankuta. Qankunapis tatas,  mana Jehovapi creespañachu nacerqankichej, wawasniykichejpis manallataj. Chayrayku wawasqa tiempowan kay imasta tapukunkuman: “¿Imaynapí yachayman Dios kasqantapuni? ¿Imaraykú Bibliaj nisqanpi atienekuyman?”, nispa. Bibliallataj nin cristianosqa ‘tukuy yuyayninchejwan’ ‘tukuy imata allinta qhawaykunata’ (Rom. 12:1; 1 Tes. 5:21). ¿Imaynatá wawasniykichejta yanapawajchej sinchʼi creeyniyoj kanankupaj?

 5. ¿Imaynatá wawasniykichejta yanapawajchej Bibliapi sinchʼita creenankupaj? (Romanos 12:2).

⁵ Wawasniykichejta yachachiychej Bibliaj nisqan cheqapuni kasqanta paykunapuni allinta qhawaykurinankupaj (Romanos 12:2 leey). Wawasniykichej imatapis tapukojtinku, yachachiychej paykuna kikinkupuni kutichiykunata maskʼananku kasqanta kay publicacionesmanta valekuspa: Índice de las publicaciones Watch Tower nisqamanta, chantá Jehovaj testigosnin yachaqanasta maskʼanankupaj nisqamantawan. Yachaqanasta maskʼanankupaj nisqa publicacionpi “Biblia” nisqata maskʼankuman, chaymantataj “Diospa yuyaychasqan” nisqata. Chaypeqa sutʼinchashan Bibliataqa mana runasllachu qhelqasqankuta, manachayqa Diospa Palabranpuni kasqanta (1 Tes. 2:13). Chantapis publicacionesninchejpi maskʼankuman Asiriapi kaj Nínive llajtamanta. Ñaupa tiempopeqa Bibliamanta yachaj runas nej kanku, chay llajta ni jaykʼaj kasqanta. Chaywanpis 1850 watas chaynejta allaspa chay llajtata tarerqanku, chaytaj sutʼita rikuchin Bibliaqa maychus kajllata parlasqanta (Sof. 2:13-15). Chantapis Nínive thuñisqa kasqanmanta Bibliaj profeciasnin maychus kajsitupuni juntʼakusqanmanta ukhuncharinkuman Torremanta Qhawaj noviembre de 2021 watamanta revistapi, “¿Yacharqankichu?” nisqa yachaqanapi. Wawasniykichejqa publicacionesninchejpa nisqanta, waj atienekunapaj librospa nisqanwan kikinchaspa Bibliaj nisqanpi astawan creenqanku.

 6. ¿Imaynatá tatas wawasninkuta yanapankuman sumajta tʼukuriyta yachanankupaj? (Fototawan qhawariy).

⁶ Wawasniykichejta yanapaychej imajtinchus Bibliaj nisqan cheqapuni kasqanpi tʼukurinankupaj. Tatasqa wawasninkuwan ashkha kutispi parlariyta atinkuman Bibliamanta, Diospi creeymantawan. Wawasninkuwan sumajta parlarinkuman uj museoman rispa chayri internetnejta uj museota visitarispa, parquesman plantasta qhawaj rispa, chayri Jehovaj testigosninpa sucursalesninkupi kaj museosta qhawaj rispa. Museospeqa Bibliaj nisqan cheqapuni kasqanmanta wakin imas kanman, chayri unay tiempopi imaschus pasasqanmanta willakushanman. Chaykunamanta parlarispa wawasninkuta yanapankuman aswan sinchʼi creeyniyoj kanankupaj. ¿Wawasniykichej yachankuchu Diospa sutin moabita rumipi rikhurisqanta? Chayqa 3.000  watas ñaupajta jinaña qhelqasqa karqa. Chay rumeqa Franciapi kashan, París llajtapi, Museo del Louvre nisqapi. Chay rumimanta uj copia tiyan Warwick centralninchejpi (Nueva Yorkpi). Chayqa museopi kashan, “Diospa sutinta Bibliapi churaykapunku” nisqa partepi. Chay rumipeqa nishan Moabmanta rey Mesá Israelpa contranta oqharikusqanta. Chaytaj Bibliaj nisqanman jinapuni kashan (2 Rey. 3:4, 5). Sichus wawasniykichej paykunapuni sutʼita reparanqanku Bibliaj nisqan cheqapuni kasqanta chayqa, creeyninku astawan sinchʼiyanqa (2 Crónicas 9:6, kikinchay).

7, 8. 1) Tukuy imapis may sumaj ruwasqa kashasqan, ¿imatá sutʼita rikuchiwanchej? (Fotostawan qhawariy). 2) ¿Ima tapuykunataj wawasniykichejta yanapanman Diospuni tukuy imata ruwasqanpi creenankupaj?

⁷ Jehovaj ruwasqasninpi tʼukurinankupaj yanapariychej. Campopi pasearishaspa chayri jallpʼata llankʼashaspa, reparachiychej ashkha imasqa kikin formitayoj kasqanta. Ajina ruwasqa kasqanqa sutʼita reparachiwanchej pichus chayta ruwajqa sumaj yachayniyoj, sumaj yuyayniyojtaj kasqanta. Cientificosqa ashkha watasta chʼuwisqeta jina formitayoj imasta mayta estudiarqanku. Biofísico Nicola Fameli nin chay chʼuwisqeta jina kaj imas mashkha muyitusniyojchus kasqankuta yupajtinchej, numerosnenqa kikillanpuni llojsisqanta. Chay numerostaqa sutichanku sucesión de Fibonacci nispa. Chay jina formitastaj rikhurin wakin galaxiaspi, chʼuruspi, wakin plantaspa hojasninpi, girasol tʼikapi, waj imaspiwan. a

⁸ Wawasqa clasespi Cienciasta pasashaspa yachakonqanku, ashkha imaspaj leyes jina kasqanta kikin formitayojpuni kanankupaj. Sapa ritʼisitoqa sumaj sukʼasqa formitasniyoj, jatunmanta juchʼuykama, chay formitasnintaj tukuysitun kikillan. Chayta sutichanku fractales nispa. Sachʼaspis waj imaspis chayman rijchʼakoj formitasnillayojtaj. ¿Pitaj ajina formitasniyoj kananpaj leyesta jina rikhuricherqa? ¿Pitaj sumaj yuyaywan ajina kʼachituta ruwarqa? Sichus wawasniykichej ajina tapuykunata ruwakonqanku chayqa, Diospuni tukuy imata ruwasqanpi astawan creenqanku (Heb. 3:4). Wawasniykichej jatunña kajtinkutaj kayta tapuriwajchej: “Sichus Dios ruwawarqanchej chay, ¿nichu payqa kamachiykunata churapuwasunman karqa kusisqa kausakunanchejpaj?”, nispa. Chantataj chay kamachiykuna Bibliapi kashasqanta niwajchej.

BIBLIAJ KAMACHIYKUNASNIN MAY VALORNIYOJ KASQANTA ENTIENDECHIYCHEJ

 9. ¿Imaraykutaj wawas Bibliaj kamachiykunasninmanta wakin imasta tapukunkuman?

⁹ Sichus wawasniykichej imajtinchus Biblia wakin imasta juchachasqanta tapusonqachej chayqa, entiendeyman riychej imaraykuchus chayta tapushasusqaykichejta.  ¿Chay kamachiykuna paykunaman mana allinchu rijchʼasqanraykuchu tapushasunkichejman chayri creenciasninkumanta mana sutʼinchayta atisqankuraykullachu? Imayna kajtinpis, sumaj kanman Wiñaypaj kusisqa kausakuy librota estudiananku. Chay yanapanqa Bibliaj kamachiykunasnin may valorniyoj kasqanta reparanankupaj. b

10. ¿Imaynatá wawasniykichejta yanapawajchej Jehovaman astawan qayllaykunankupaj?

¹⁰ Jehovaman astawan qayllaykunankupaj yanapaychej. Wawasniykichejwan Bibliata estudiashaspa, Wiñaypaj kusisqa kausakuy libropi rikhurej tapuykunata ruwaychej, chaypi rikhurej kikinchaykunamantapis parlariychej. Ajinamanta imatachus yuyasqankuta willarisunaykichejpaj (Pro. 20:5). Chay libroj 8 kaj leccionninpi Jehovata uj sumaj amigowan kikinchan, pichus sapa kuti yuyarichiwanchej imatachus ruwananchej kasqanta allin rinawanchejpaj, nitaj imapis pasanawanchejpaj. 1 Juan 5:3 versiculota ukhunchariytawan tapuriwajchej: “Sichus Jehová sumaj amigonchej chay, ¿imaynatá qhawananchej kanman kamachiwasqanchejta?”, nispa. Chay tapuy mayqen tapuy jinalla kajtinpis, wawasniykichejta yanapanman Diosninchejqa munakuwasqanchejrayku leyesta churapuwasqanchejta entiendenankupaj (Isa. 48:17, 18).

11. ¿Imatá ruwawajchej wawasniykichej Bibliaj yuyaychaykunasninta aswan jatunpaj qhawanankupaj? (Proverbios 2:10, 11).

¹¹ Bibliaj yuyaychaykunasninta kasukuy sumaj kasqanmanta parlariychej. Bibliata chayri chay pʼunchaypaj textota leeshaspa, imaynatachus Bibliaj yuyaychaykunasnin familiaykichejpi yanapasusqaykichejmanta parlariwajchej. ¿Wawasniykichej reparankuchu sumaj trabajadores kay, mana suwakuy, mana llullakuypis may sumajpuni kasqanta? (Heb. 13:18). Paykunaman parlarillawajchejtaj imaynatachus Bibliaj yuyaychaykunasnin sanitos kanapaj, mana anchata llakikunapaj yanapawasqanchejmanta (Pro. 14:29, 30). Chayta ruwankichej chayqa, paykunaqa Bibliaj yuyaychaykunasninta aswan jatunpajraj qhawanqanku (Proverbios 2:10, 11 leey).

12. ¿Imatá uj qhariwarmi ruwan wawanku Bibliaj yuyaychaykunasninta jatunpaj qhawananpaj?

¹² Stevewan señoranwanqa Franciapi tiyakunku, wawanku Ethantaj jovenyashanña. Jehovaqa munakuwasqanchejrayku leyesta churapuwasqanchejta wawankuman entiendechinankupaj kayta ruwasqankuta ninku: “Kaykunasta tapuriyta yachayku: ‘¿Imaraykutaj Jehová niwanchej kay yuyaychayninta kasukunanchejta? ¿Imaynatataj kay yuyaychaynin rikuchiwanchej munakuwasqanchejta? ¿Imataj kanman mana chayta kasukojtiyki?’, nispa”. Ajinamanta wawanku Ethanqa mana iskayrayanchu Jehovaj kamachiykunasnin allinpuni kasqanmanta. Steve nin: “Munayku wawayku reparananta Bibliapi Diospa yachaynin kashasqanqa, aswan sumaj kasqanta runaspa yachayninmanta nisqaqa”, nispa.

13. ¿Imaynatá tatas wawasninkuman yachachinkuman Bibliaj yuyaychaykunasninman jina kausakuyta? Sutʼinchariy.

¹³ Bibliaj yuyaychaykunasninman jina kausakuyta yachachiychej. Ichapis profesorninku uj librota leenankuta ninman. Chay librotaj parlashanman Jehovaj chejnisqan imasta ruwaj runasmanta, ichapis khuchichakojkunamanta chayri maqanakojkunamanta. Yuyachishanmantaj chay imasta ruwayqa allillan kasqanta. Tatasqa wawasninkuta tapurinkuman: “¿Imaynataj Jehová sientekunman chay imasta ruwajkunata rikuspa?”, nispa (Pro. 22:24, 25; 1 Cor. 15:33; Fili. 4:8). Ajinamanta wawasninkoqa reparanqanku Jehovata kasukuypuni aswan allin kasqanta. Profesorninku chayri compañerosninku  chay libromanta tapojtinkutaj, imapichus creesqankuta sutʼinchayta atillanqanku.

CREENCIASNINKUMANTA SUTʼINCHAYTA YACHACHIYCHEJ

14. ¿Imamanta parlarejtinkutaj uj joven cristiano parlayta manchikunman, chanta imaraykutaj?

¹⁴ Ichapis wakin cristiano jovenesqa, wakin kutis manchachikunkuman creenciasninkumanta sutʼinchariyta. Clasesninkupi evolucionmanta parlajtinku, ichapis parlayta manchikunkuman. Ashkha profesoresqa evolucionmanta yachachispa ajinapunipis kanman jina parlanku. ¿Imaynatá tatas wawasninkuta yanapankuman imapichus creesqankumanta mana manchachikuspa sutʼinchanankupaj?

15. ¿Imatá jóvenes ruwankuman creeyninkumanta mana iskayrayanankupaj?

¹⁵ Imapichus creesqankumanta mana iskayrayanankupaj yanapaychej. Wawasniykichejqa mana pʼenqakunankuchu tiyan Dios tukuy imata ruwasqanpi creesqankumanta (2 Tim. 1:8). Ashkha cientificospis reparallankutaj kausayqa mana jinallamantachu rikhurisqanta. Chay cientificosqa kausay may tʼukunapaj jina kasqanta rikuspa, pichus chayta ruwajqa may yachayniyoj kasqanta reparanku. Chayrayku mundontinpi ashkha escuelaspi, colegiospi evolucionmanta yachachisqankupi mana creenkuchu. Wawasniykichej tʼukurinkuman imaraykuchus waj hermanospis Diospuni tukuy imata ruwasqanta creesqankupi. Ajinamanta paykunapis aswan sinchʼi creeyniyoj kanankupaj. c

16. ¿Imaynatá tatas wawasninkuta yanapankuman Diospuni tukuy imata ruwasqanmanta sutʼinchanankupaj? (1 Pedro 3:15; fototawan qhawariy).

¹⁶ Dios tukuy imata ruwasqanpi creesqankumanta sutʼinchanankupaj yanapaychej (1 Pedro 3:15 leey). Jw.org paginanchejpi chaymanta parlaj yachaqanasta maskʼawajchej. Chantá tapuriwajchej: “¿Kaykunamanta mayqentaj aswan allin rijchʼasunki? ¿Imaynatá chaywan wajkunaman explicariwaj Diospuni tukuy imata ruwasqanta?”, nispa. Chantá yuyarichiychej compañerosninkuwan chaymanta parlashaspa ama siminakunankuta. Mayqen compañeronkupis astawan yachakuyta munajtintaj, entiendenanpaj jinalla sutʼincharinkuman, Diospuni tukuy imata ruwasqanpi creeyta atinanpaj. Ichapis uj compañeron ninman: “Noqaqa rikusqay imasllapi creeni, Diostataj ni jaykʼaj rikorqanichu”, nispa. Paytaj ninman: “Montepi kashawaj, chaypitaj ni pi kanchu. Jinallapitaj uj sumaj ruwasqa  pozota tarinki, tukuy imitayojta. Kay pozota, ¿pichá ruwarqa niwajcharí? Sichus uj pozollataraj uj runa ruwarqa chayqa, ¿nichu tukuy imata Diospuni ruwanman karqa?”, nispa.

17. ¿Imaynatá wawasniykichejta yanapawajchej atikusqanman jina predicarinankupaj? Sutʼinchariy.

¹⁷ Yanapariychej sapa atikojtin Bibliamanta parlarinankupaj (Rom. 10:10). Bibliamanta parlareyqa kikinchakunman charangota chayri waj tocanata yachakuywan. Reciellanraj yachakushaspaqa mana tocayta atillanchejchu, aswan fácil kajllataraj tocanchej. Tiempo pasasqanman jinataj siga practicasqanchejrayku atillanchejña tocayta. Creeyninchejmanta wajkunaman willariypis kikillantaj. Qallariypeqa facilito kaj imasllamanta parlarisunman. Uj joven cristianoqa compañeronta tapunman: “¿Yacharqankichu cientificosqa animalesta, waj imastawan qhawaspa kikinta imatapis ruwasqankuta? Chaymanta kʼachitu videota rikurichisqayki”, nispa. “¿Pitaj ruwanman karqa?” nisqa partemanta ujnin videota rikuchinman, chaymantataj tapurinman: “Cientificostaqa mayta alabanku imata ruwajtinkupis. Pero paykunaqa copiaspaña chayta ruwanku. Pero, ¿pitaj ruwanman karqa kay jallpʼapi kaj tukuy imata? ¿Pitá chaymanta alabananchej kanman?”, nispa. Chay pisi imasllata nejtin, compañeronqa ichapis astawan yachakuyta munanqa.

YANAPALLAYCHEJPUNI CREEYNINKUTA ASTAWAN SINCHʼIYACHINANKUPAJ

18. ¿Imaynatá wawasniykichejta yanapawajchej Diospi creesqanku siga wiñananpaj?

¹⁸ Jehovapi mana creej runaswan muyurisqa kashanchej (2 Ped. 3:3). Chayrayku tatas, wawasniykichejwan Bibliata estudiashaspa, paykunata niychej ima yachachiykunachus Diospa Palabranta, kamachiykunasnintapis aswan jatunpaj qhawanankupaj yanapanman, chayta ukhuncharinankuta. Paykunata yanapariychej Jehovaj ruwasqasnin tʼukunapaj jina kasqanta reparanankupaj, chaypitaj piensarinankupaj. Bibliaj ima profeciasninchus juntʼakunña chaykunata entiendenankupaj yanapariychej. Chantapis amapuni qonqakuychejchu wawasniykichejwan khuska Diosmanta mañakuyta, paykunapajpis mañapuyta. Ajinamanta wawasniykichejta yanapankichej creeyninku astawan sinchʼiyananpaj. Jehovataj mayta bendecisonqachej chayta ruwanaykichejpaj kallpachakusqaykichejmanta (2 Cró. 15:7).