Apóstol Pabloqa Timoteoman, pichus pay jina ancianollataj karqa chayman, nerqa: “Diospa ñaupaqenpi, Cristo Jesuspa ñaupaqenpi, ajllasqa angelespa ñaupaqenkupipis kamachiyki chay kamachiykunata kasukunaykita, ama pitapis ñaupajmanta sajrapaj qhawaspa, nitaj pimanpis kutikuspa”, nispa (1 Tim. 5:21). ¿Pikunataj chay ‘ajllasqa ángeles’ kanku?

Ñaupajtaqa parlarina pikunachus mana chay ‘ajllasqa angeleschu’ kasqankumanta. Pabloqa mana 144.000 ajllasqa cristianosmantachu parlasharqa. Chayta Timoteoman qhelqashajtin, ajllasqa cristianosqa manaraj cieloman ripunankupaj kausarichisqachu kasharqanku. Apostolespis waj ajllasqa cristianospis manaraj cieloman riporqankuchu, chayrayku mana paykunachu chay ‘ajllasqa ángeles’ kankuman karqa (1 Cor. 15:50-54; 1 Tes. 4:13-17; 1 Juan 3:2).

Nillataj Jatun Para kashajtin Diospa contranta oqharikorqanku chay angeleschu kankuman. Chay angelesqa Satanasman ujchaykukuspa demoniosninman tukorqanku, jinapitaj Jesuspa enemigosnin karqanku (Gén. 6:2; Luc. 8:30, 31; 2 Ped. 2:4). Tumpamantawan Jesusqa paykunata chinkay ukhuman wijchʼuykonqa 1.000 wataspaj, chantataj Satanaswan khuska chinkachisqa kanqanku (Jud. 6; Apo. 20:1-3, 10).

1 Timoteo 5:21 versiculopeqa chay ‘ajllasqa angelesmanta’ parlashaspa, Diosmantawan Cristo Jesusmantawan parlakullantaj. Chayrayku chay angelesqa cielopi paykunawan khuska llankʼaj angeleschá kanku.

Cielopi may chhika kasukoj ángeles tiyan (Heb. 12:22, 23). Mana nisunmanchu tukuynin ángeles kikin ruwayniyoj kasqankuta (Apo. 14:17, 18). Uj kutipeqa Jehová uj angelllata kamacherqa 185.000 asirio soldadosta wañuchinanpaj (2 Rey. 19:35). Jesustaj nerqa uj grupo ángeles ‘juchallichejkunata, sajra imasta ruwajkunatawan Gobiernonmanta orqhonankuta’ (Mat. 13:39-41). Ichapis waj grupo ángeles cieloman ripunankupaj ‘ajllasqasninta tantanqanku’ (Mat. 24:31). Waj angelestaj tukuy ñankunasninchejpi cuidanawanchejpaj churasqa kanku (Sal. 91:11; Mat. 18:10; Mateo 4:11; Lucas 22:43, kikinchay).

1 Timoteo 5:21 versiculomanta ‘ajllasqa angelesqa’ congregacionesta yanapaj angeleschá karqanku. Chay capitulopi Pabloqa ancianosmanta parlasharqa, hermanosmantaj nisharqa paykunata respetanankuta. Chantapis nishallarqataj ancianosqa “ama pitapis ñaupajmanta sajrapaj qhawaspa, nitaj pimanpis kutikuspa” ruwayninkuta juntʼanankuta, imatapis ruwakunanta ninankupajtaj sumajtaraj tʼukurinankuta. Pabloqa Dios yuyaychasqanman jina sutʼita nerqa imaraykuchus chayta ruwanankupuni kasqanta. Payqa nerqa ancianosqa hermanosninkuta sirvishasqankuta “Diospa ñaupaqenpi, Cristo Jesuspa ñaupaqenpi, ajllasqa angelespa ñaupaqenkupipis”. Chaywanqa nisharqa Jehovapis, Jesuspis, ajllasqa angelespis imaynatachus congregacionta cuidasqankuta sumajta qhawamushasqankuta. Chayrayku sutʼita reparanchej wakin angelesqa congregacionpi yanapakunankupaj kashasqankuta. Paykunaqa Diospa kamachisninta cuidanku, predicacionpi yanapashawanchej, imatachus rikusqankutataj Jehovaman willanku (Mat. 18:10; Apo. 14:6).