Kay 2024 watamanta Torremanta Qhawaj revistasta leerqanki chayqa, kay tapuykunaman kutichiyta atiwaj.

¿Imaynatá Jehová rikuchin warmista jatunpaj qhawasqanta?

Jehovaqa qharista jinallataj, warmista jatunpaj qhawan, uj rejllatataj. Warmistaqa uyarin, llakikuntaj imaynachus sientekusqankumanta, problemasninkumantapis. Warmispi confian, ruwaykunatataj paykunaman qon (w24.01, páginas 15, 16).

Efesios 5:7 nin: “Ama paykuna jina ruwaychejchu”, nispa. ¿Imatá ruwasunman chay nisqanta kasukunapaj?

Apóstol Pabloqa nerqa ama sajra runaswan masichakunanchejta. Paykunawan masichakuspaqa Jehovaj kamachiykunasninta mana kasukuyta atisunmanchu. Kay tiempopitaj chayta ruway mana atikullanmanchu. ¿Imarayku? Runaswanqa mana uyapurallachu parlanchej, manaqa redes socialesnejtapis, nitaj yachasunmanchu piwanchus parlashasqanchejta (w24.03, páginas 22, 23).

¿Ima llulla cuentosmantataj cuidakunanchej tiyan?

Wakin kutis amigosninchej allinninchejpaj kasqanta yuyaspa mensajesta apachimuwasunman, chayri mana rejsisqanchej runasmanta mana allin correos chayamuwasunman, Diospa contranpi oqharikoj runaspis Bibliamanta yachakuyta munasqankuta niwasunman, chaykunamantaqa allinta qhawarikunanchej tiyan (w24.04, página 12).

Rey Salomonta, jinallataj Sodomapi, Gomorrapi, Jatun Parapipis wañorqanku chay runasta Dios juzgananmanta, ¿imatá mana yachanchejchu chanta imatá yachanchej?

Mana nisunmanchu Jehová chay runasta wiñaypaj chinkachisqanta, nillataj kausarichimunantapuni. Jehovaqa may khuyakuyniyoj, pi runallatapis khuyakunan kajtenqa khuyakunpuni (w24.05, páginas 3, 4).

Jehová uj chhanka jina kasqan, ¿imatá paymanta yachachiwanchej? (Deu. 32:4).

Kayta yachachiwanchej: Jehovapi pakakusunman. Payqa atienekunapaj jina, nisqasninta juntʼanpuni. Jehovaqa kasqan jinallapuni, imatachus ruwayta munasqanpis kikillanpuni, nitaj cambianchu (w24.06, páginas 26-28).

¿Imaynatá mosoj congregacionniykiman yachaykukuwaj?

Jehovapi atienekuy, payqa yanapasonqa ñaupa tiempomanta kamachisninta yanaparqa ajinata. Ama mosoj congregacionniykita, ñaupa congregacionniykiwan kikinchaychu. Mosoj congregacionniykiman ujchaykukuy, mosoj amigostataj ruwakuy (w24.07, páginas 26-28).

¿Imatá yachakunchej Mateo 25 capitulopi kinsa kikinchaykunasmanta?

Ovejasmanta cabrasmantawan kikinchayqa yachachiwanchej Jehovata tukuy sonqo kasukunanchejta. Chunka doncellasmanta kikinchayqa yachachiwanchej wakichisqas, rijchʼarisqastaj kananchejta. Talentosmanta kikinchaytaj yachachiwanchej mana qhellaschu kananchejta (w24.09, páginas 20-24).

Salomonpa templonpa corredornin, ¿altonman mashkha metrosniyojtaj karqa?

Wakin ñaupa qhelqasqaspi 2 Crónicas 3:4 versiculopi nin temploj ñaupaqenpi corredorqa altonman “120 codos” kasqanta, chaytaj kanman 53 metros. Atienekunapaj jina waj ñaupa qhelqasqaspitaj altonman “20 codos” kasqanta nin, chaytaj 9 metros jina. Temploj perqasnenqa mana ancha anchochu karqa, chayrayku altonmanqa 9 metrosllachá kanman karqa (w24.10, página 31).

¿Imá niyta munan uj siervo ministerial ‘uj warmiyojlla’ kanan? (1 Tim. 3:12).

Niyta munan uj warmillawan casarakuyta atisqanta, nitaj khuchichakuy juchapi urmananchu kasqanta. Chantapis mana waj warmista qhawakunanchu kasqanta (w24.11, página 19).

Juan 6:53 versiculopi nisqan, ¿imajtintaj mana Señorpa Cenanmantachu parlashan?

Juan 6:53 versiculopi Jesús nerqa aychanta mikhuna kasqanta, yawarnintapis ujyana kasqanta. Jesusqa chayta Galileapi nerqa, 32 watapi. Chaywantaj judiosta reparachisharqa paypi creenanku kasqanta. Señorpa Cenantarí Jesusqa watanmanraj Jerusalenpi rikhuricherqa. Chaypacha payqa apostolesninwan uj tratota ruwasharqa, paywan khuska cielopi kamachimunankupaj (w24.12, páginas 10, 11).