1-3. ¿Imatá Judamanta profeta mana ruwarqachu, chantá imapitaj tukorqa? (Patapi kaj dibujota qhawariy).

ISRAELMANTA rey Jeroboamqa, llulla diosesninta yupaychananpaj Betel llajtapi uj altarta ruwacherqa. Chayrayku Jehovaqa Judamanta uj profetata kacharqa, Jeroboamta juchachananpaj. Chay llampʼu sonqo profetataj, Jehovaj nisqanta Jeroboamman willamorqa. Reytajrí profetapaj mayta phiñakorqa. Jinapis Jehovaqa profetanta jarkʼarqa (1 Rey. 13:1-10).

² Jehovaqa profetanta kamacherqa, Israel llajtapi ni imata mikhunanta, nitaj ujyananta. Chantá nillarqataj, waj ñanta wasinman kutipunanta. Jinata kutipushajtin, ñanpi uj machu runawan tinkorqa. Chay runatajrí, Jehovamanta uj willayta japʼisqanta nispa llullaykukorqa. Chantá profetata wasinman wajyakorqa, mikhunanpaj, ujyananpajtaj. Profetatajrí Jehovata mana kasukuspa, chay machu runaj wasinman rerqa. Jehovataj mayta phiñakorqa. Chayrayku profeta ripushajtin, ñanpi uj león wañurpacherqa (1 Rey. 13:11-24).

³ Mana yachanchejchu, imaraykuchus chay profeta Jehovata kasukunanmanta, chay runata kasukusqanta. Kayllata yachanchej:  Chay profetaqa manaña ‘llampʼu sonqochu karqa, nitaj Diostapis kasukorqachu’ (Miq. 6:8, Qheshwa Biblia). Llampʼu sonqo runaqa, Diosmanta sapa kuti mañakunan kasqanta yachan. Chay profeta llampʼu sonqo kanman karqa chayqa, machu runata kasunanmantaqa Jehovataraj tapurinman karqa. Wakin kutisqa, noqanchejpis kausayninchejpi uj jatun imata ajllananchej tiyan. Jinapis ichá mana sutʼita yachanchejchu, imatachus Jehová ruwananchejta munasqanta. Llampʼu sonqo kaspaqa, mana pantaykunanchejpaj Jehovaj yuyaychayninta mañakusun.

4. ¿Imatá kay yachaqanapi yachakusun?

⁴ Ñaupaj yachaqanapi, yachakorqanchej maychus kajllata noqanchejmanta yuyanata, jinallataj imaraykuchus cristianos llampʼu sonqo kananchejtapis. Jinapis, ¿imataj yanapawasunman astawan llampʼu sonqo kanapaj? ¿Imaspi rikukuspataj mana llampʼu sonqo kayta atillasunmanchu? Kay yachaqanapi kinsa imasmanta parlarisun (Pro. 11:2).

5, 6. ¿Imaynatá Barzilai llampʼu sonqo kasqanta rikucherqa?

⁵ Kausayninchejpi imallapis niña kikinchu kajtin, chayri congregacionpi waj ruwanasta japʼejtinchej, ichá mana llampʼu sonqollapuni kayta atisunchu. Rey Davidpa sumaj amigon Barzilaimanta, mayta yachakusunman. Barzilai 80 watasniyojña kashajtin, Davidqa kamachina wasinman pusakapuyta munarqa. Reypa wasinman ripuy sumaj kajtinpis, Barzilaiqa Quimam sutiyoj runata pusananta nerqa. Paytaj ichá Barzilaipa wawan karqa (2 Sam. 19:31-37).

⁶ ¿Imaraykú Barzilai mana Davidwan riyta munarqachu? ¿Nichu ima ruwanatapis japʼiyta munarqa? ¿Llasa qʼepiyoj kaytachu manchachikorqa? Mana. Astawanpis Barzilaiqa llampʼu sonqo karqa. Payqa niña jovenchu kasqanta yacharqa, reparakorqataj niña imatapis ñaupajta jinachu ruwayta atisqanta (Gálatas 6:4, 5 leey). Noqanchejpis, Barzilai jina llampʼu sonqo kananchej tiyan. Imastachus munasqanchejpi anchata yuyanamanta chayri wajkunawan kikinchakunamantaqa, tukuy atisqanchejta Jehovapaj ruwana. Chayqa aswan sumaj, congregacionpi uj sumaj llankʼayta japʼinamanta chayri may rejsisqa kanamanta nisqaqa (Gál. 5:26). Llampʼu sonqo kaspaqa, Jehovata jatunchanapaj, wajkunata yanapanapaj ima, hermanosninchejwan khuska llankʼasun (1 Cor. 10:31).

7, 8. ¿Imaynatá llampʼu sonqo kay yanapawasunman mana noqallanchejpi atienekunapaj?

⁷ Diospa llajtanpi astawan ruwanasta chayri mosoj llankʼaykunata japʼejtinchej, nillataj llampʼu sonqo kayta atisunmanchu. Nehemiasmanta yachakuna. Payqa Jerusalenpi runas llakiypi kashasqankuta uyariytawan, Jehovaj yanapayninta mañakorqa (Neh. 1:4, 11). Jehovataj Nehemiaspa mañakuyninta uyarerqa. Ajinamanta rey Artajerjesqa, Nehemiasta Judá suyuta kamachinanpaj churarqa. Nehemiasqa atiyniyoj, qhapajtaj kaspapis, mana paypichu atienekorqa. Payqa Jehovaj yuyaychayninta maskʼarqa, sapa pʼunchaytaj Diospa Leyninta leerqa (Neh. 8:1, 8, 9). Nehemiasqa ashkha runasta kamachinanpaj atiyniyoj karqa. Jinapis mana allinnillantachu maskʼarqa, nitaj runastapis ñakʼaricherqachu (Neh. 5:14-19).

⁸ Diospa llajtanpi mosoj llankʼayta chayri astawan ruwanasta japʼejtinchej, Nehemías jina llampʼu sonqollapuni kanapaj kallpachakuna. Ama noqallanchejpichu, nitaj yachasqallanchejpichu atienekuna. ¿Imaynatá uj runa payllapi atienekuyta qallarinman? Uj ancianoqa ichapis congregacionpaj imatapis ruwanman Diosmanta mana  mañakuspalla. Manaqa ichá uj hermano chayri hermana, imatapis ruwayta ajllaytawanraj Jehovaj bendicionninta mañakunman. Jinapis llampʼu sonqo runaqa, imallatapis ashkha kutistaña ruwaspapis, mana payllapichu atienekun. Nitaj qonqanchu imatachus ruwayta atisqanqa, Jehovaj ruwasqanwan mana kikinchakusqanta (Proverbios 3:5, 6 leey). Kay tiempopi runasqa, paykunallapi yuyanku, wajkunamanta aswan sumaj kasqankutataj rikuchiyta munanku. Jehovaj kamachisninrí mana paykuna jinachu kanchej. Diospa llajtanpi ashkha ruwanasniyoj kaspapis, mana yuyanchejchu familianchejmanta chayri hermanosmanta aswan sumaj kasqanchejta. Astawanpis hemanosninchejwan khuska Diospaj llankʼanchej, llajtanpi ima ruwanayojchus kasqanchejtataj yachanchej (1 Tim. 3:15).

9, 10. ¿Imaynatá llampʼu sonqo kay yanapawasunman pillapis phiñachiwajtinchej?

⁹ Pillapis qhasimanta kʼamiwajtinchej ichá rabiakunchej. Anaqa ajinapi rikukorqa. Qosan mayta munakojtinpis, Anaqa mana kusisqachu kausakorqa. Qosanpa ujnin warmin Peninaqa, Anata sapa kuti asipayaj. Anaqa wawasniyoj kayta munarqa, nitaj aterqachu. Anaqa uj kuti may llakisqa kasharqa, chayrayku Dioswan tinkukuna toldoman mañakoj rerqa. Kuraj kaj sacerdote Elitaj, Anata waqajta rikuspa nerqa: “Maykʼajkamataj machasqa kankiri?”, nispa. Anaqa phiñakuyta atinman karqa. Jinapis imaraykuchus ajina kashasqanta kʼachallamanta Eliman sutʼincharqa. Chaymanta qhepaman, Anaqa Jehovamanta mañakorqa. Chaywantaj Paypi creesqanta, munakusqanta ima rikucherqa (1 Sam. 1:5-7, 12-16; 2:1-10).

¹⁰ LLampʼu sonqo kayqa, “sajra kajta allin kajwan” atipanapaj yanapawasunman (Rom. 12:21). Satanaspa sajra mundonqa, sajra ruwaykunawan juntʼa kashan. Chayrayku pipis qhasimanta juchachawasunpuni. Ajinapi rikukuspa phiñakuspapis, chayta sonqonchejmanta orqhonanchej tiyan (Sal. 37:1). Hermanoswan chʼampaykuna  kapuwajtinchej, astawanraj sonqonchej nanawasunman. Ajinapi rikukuspa, Jesús jina ruwanachej. Biblia nin: “Cristota runas maldicejtinku, payqa mana maldecillarqatajchu. [...] Astawanqa cheqanta juzgaj Juezpa makisninman churakorqa”, nispa (1 Ped. 2:23). Jesusqa llampʼu sonqo karqa, yacharqataj sajra ruwaykunata Jehová cheqanchananta (Rom. 12:19). Noqanchejpis llampʼu sonqo kayta munanchej, nitaj “sajramanta sajrallatataj” kutichiyta munanchejchu (1 Ped. 3:8, 9).

11, 12. 1) ¿Imaynatá llampʼu sonqo kay yanapawasunman wajkuna jatunchawajtinchej? 2) ¿Imaynatá llampʼu sonqo kasqanchejta rikuchisunman, pʼachallikusqanchejwan, ruwasqanchejwan ima?

¹¹ Runas jatunchawajtinchej chayri alabawajtinchej, nillataj llampʼu sonqo kayta atillanchejchu. Estertaqa manchayta jatuncharqanku, alabarqankutaj. Payqa Persiapi warmismanta aswan kʼachita karqa. Estertaqa, waj sipaskunatawan khuska, wata juntʼata tukuy imawan kʼachancharqanku, reypa ñaupaqenman pusanankupaj. Reytajrí Esterta ajllarqa reina kananpaj. Jinapis Esterqa llampʼu sonqollapuni karqa, nitaj payllapichu yuyarqa. Payqa kʼachallapuni karqa, wajkunatataj sumajpaj qhawaj (Est. 2:9, 12, 15, 17).

¹² Llampʼu sonqo kaspaqa, maychus kajta pʼachallikusun, nitaj imatapis ruwarpallasunchu. Ajinamanta noqanchej kikinchejta, wajkunata ima jatunpaj qhawasqanchejta rikuchisun. Alaraco kanamanta chayri allinpaj qhawachikuyta maskʼanamantaqa, “llampʼu sonqoyoj” kayta munanchej (1 Pedro 3:3, 4 leey; Jer. 9:23, 24). Imatachus noqanchejmanta yuyasqanchejqa, parlasqanchejpi, ruwasqanchejpitaj rikukonqa. Ichá sumaj runaspaj qhawachikuyta munasunman, ruwasqanchejmanta, yachasqanchejmanta, chayri pikunatachus rejsisqanchejmanta parlaspa. Manachayqa runasta creechisunman, imapis sumaj llojsinanpaj noqallanchej yanapakusqanchejta, wajkuna yanapawajtinchejpis. Jesuspi tʼukurina, may yachayniyoj kasqanwan runata tʼukuchinman karqa. Jinapis payqa yachachishaspa Diosmanta Qhelqasqapi nisqanta oqharej. Jesusqa mana runaswan jatunchachikuytachu maskʼarqa. Astawanqa Jehovatapuni jatunchayta munarqa (Juan 8:28).

13, 14. ¿Imaynatá llampʼu sonqo kay yanapawasunman imatapis sumajta ajllanapaj?

¹³ Kausayninchejpi imatapis ajllashaspa, chayri wajkunaj ajllasqanku noqanchejpajwan kajtin, llampʼu sonqo kananchej tiyan. Apóstol Pablo Cesareapi kashajtin, Jehovaj qosqan llankʼayta tukuchananpaj Jerusalenman riyta munarqa. Jinapis profeta Agaboqa, Pablo Jerusalenman rejtin presochanankuta, wañuchiyta atisqankuta ima nerqa. Hermanosqa Pablota mayta nerqanku, ama rinanta. Pablorí Jerusalenman rerqapuni. ¿Payllapi atienekusqanraykuchu rerqa? Mana. Pabloqa llampʼu sonqo karqa, Jehovapitaj atienekorqa. Hermanospis llampʼu sonqo kasqankurayku, Pablota Jerusalenman rejta saqerqanku (Hech. 21:10-14).

¹⁴ Llampʼu sonqo kayqa, imatapis allinta ajllanapaj yanapawasun, chay ajllasqanchej imapichus tukunanta mana yachajtinchejpis. Ichá Diospaj astawan llankʼayta munashanchej. Jinapis, ¿imatá ruwasun onqoykojtinchej? ¿Imatá ruwasun tatanchej chayri mamanchej onqoykuspa yanapata necesitajtinku? ¿Imatá ruwasun machitusña kaspa? Diosmanta mañakuspapis, imatachus ruwananchejpi tʼukurispapis, mana chay tapuykunaman kutichisunmanchu  (Ecl. 8:16, 17). Jehovapi atienekuspaqa, atisqanchejman jinalla imatapis ruwasun, allinta tʼukurisun, wajkunaj yuyaychayninkutataj maskʼasun. Astawanqa Diosmanta mañakuspa, paypa atiyninwan pusachikusun (Eclesiastés 11:4-6 leey). Jehovaqa ima ruwaytachus ajllasqanchejta bendecinman, chayri waj jinamanta ruwanapaj yanapawasunman (Pro. 16:3, 9).

15. ¿Imaynatá Jehovapi tʼukuriy llampʼu sonqollapuni kanapaj yanapawasunman?

¹⁵ ¿Imaynatá astawan llampʼu sonqo kasunman? Tawa yanapasta ukhuncharisun. Uj kaj, Jehová imayna Dioschus kasqanpi sumajta tʼukurina. Paywan kikinchakuspaqa, reparasunchej ladonpi ni imapis kasqanchejta, nitaj imata yachasqanchejta (Isa. 8:13). Yuyarikuna, Tukuy Atiyniyoj Diospa munayninman jina kausashanchej, nitaj runaspa chayri angelespa munayninkuman jinachu. Chaypi tʼukurispaqa, “atiyniyoj Diospa makimpi” kʼumuykukusun (1 Ped. 5:6).

16. ¿Imaynatá Jehovaj munakuyninpi tʼukuriy llampʼu sonqo kanapaj yanapawanchej?

¹⁶ Iskay kaj, llampʼu sonqo kanapaj Jehová imaynatapunichus munakuwasqanchejpi tʼukurisunman. Pabloqa congregacionta runaj cuerponwan kikincharqa. Jehovaqa cuerpoj tukuy imasninta, “sumajta wakicherqa” (1 Cor. 12:23, 24). Ajinallatataj Payqa sapa ujninchejta may valorniyojpaj qhawawanchej. Jehovaqa mana wajkunawan kikinchawanchejchu, pantajtinchejpis munakullawanchejpuni. Chayraykutaj may kusisqa kanchej.

17. ¿Imaynatá yanapawasunman wajkunapi allin kajta maskʼay?

¹⁷ Kinsa kaj, wajkunapi allin kajta maskʼayqa, aswan llampʼu sonqo kanapaj yanapawasun. Noqallanchej sumajpaj qhawachikunamantaqa chayri wajkunata kamachinamantaqa, paykunata tapurikuna, yuyaychariwasqanchejtataj japʼikuna (Pro. 13:10). Hermanosninchej congregacionpi sumaj llankʼaykunata japʼejtinku kusikuna. Chantapis Jehovaman mayta agradecekuna, payta yupaychajta saqewasqanchejmanta (1 Ped. 5:9).

18. ¿Imaynatá sonqo yuyayninchejta yachachiy aswan llampʼu sonqo kanapaj yanapawanchej?

¹⁸ Tawa kaj, sonqo yuyayninchejta Bibliaj nisqanman jina yachachejtinchej, aswan llampʼu sonqo kasunchej. Bibliaqa Jehovaj yuyayninmanta, munayninmanta ima yachachiwanchej. Jehová jina yuyayta yachakuspaqa, payta kusichinapaj jina imatapis ajllasun. Sonqo yuyayninchejta sumajta yachachinapaj, Diosmanta mañakuna, Bibliata estudiana, yachakusqanchejman jinataj kausakuna (1 Tim. 1:5). Chantapis wajkunaj allinninkuta maskʼayta yachakunchej. Chay imasta ruwajtinchejqa, Diosqa wiñay tukusqa runasman tukuchiwasun, aswan llampʼu sonqo kanapajtaj yanapawasun (1 Ped. 5:10).

19. ¿Imataj yanapawasun llampʼu sonqollapuni kanapaj?

¹⁹ Ñaupaj parrafospi, Judá llajtayoj profetamanta parlarqanchej. Payqa niña llampʼu sonqo kasqanrayku, Jehovawan qhesachachikorqa, wañorqataj. Noqanchejqa mana atikullajtinpis, llampʼu sonqollapuni kasunman. Diospa ashkha kamachisnin, chayta ruwayta aterqanku. Jehovata astawan sirvisqanchejman jina, astawan paypi atienekunanchej tiyan (Pro. 8:13). Kausayninchejpi imapi rikukuspapis, Jehovata kasukuyta atillasunmanpuni. Payta kasukuytaj may sumajpuni. Chayrayku tukuy atisqanchejta kallpachakuna llampʼu sonqollapuni kanapaj, jinallataj Jehovaj munayninman jina wiñaypaj kausanapaj.