1. Llakiypi kashaspa, ¿imatataj rey David jina nisunman?

NI PIPIS llakisqa kayta munanchejchu. Tukuypis sonqo tiyasqa, allintataj kausakuyta munanchej. Jinapis llakiykunaqa kapuwanchejpuni. Chayrayku ichá wakin kutisqa, rey David jinallataj ninchej. Payqa Jehová Diosman nerqa: “Jaykʼajkamataj almay, sonqoytaj llakiypi, ñakʼariypitaj pʼunchaynintin kanqanku?”, nispa (Sal. 13:2).

2. ¿Imastá kay yachaqanapi yachakusun?

² Tukuypis llakiykunasniyojpuni kanchej. Jinapis chay llakiykunata aguantayta atisunman. Kay yachaqanapeqa, imaschus llakichiwasqanchejta yachakusun. Chantá sojta imasmanta parlarisun. Chaytaj problemaspi chayri llakiykunapi kashaspa, sonqo tiyasqallapuni kanapaj yanapawasun.

3. ¿Imasmantataj llakikunchej, chanta chay llakiykunata chinkachiyta atisunmanchu?

³ Runasqa ashkha imasmanta llakikusunman. Chaykunamanta wakintataj, munaspapis mana chinkachiyta atisunmanchu. Wakin imasmanta parlarina. Sapa wata mikhuna, ropa, wasi, jallpʼaspis wicharishan. Noqanchejtaj ni imata ruwayta atisunmanchu mana wicharinanpaj. Nillataj imatapis ruwayta atisunmanchu, tiyakunchej chaypi sajra ruwaykuna chinkananpaj. Chantapis trabajomanta chayri escuelamanta compañerosninchejqa, mana allin imasta ruwanapaj chayri khuchichakuypi urmanapaj tanqawasunpuni. Ajina llakiykunapi kanchej, casi tukuy runas mana Bibliaj nisqanman jinachu kausasqankurayku. Kay mundoj diosnin Satanastaj, yachan “kay tiempo kausaymanta llakiykuna” Jehová Diosmanta karunchayta atiwasqanchejta  (Mat. 13:22; 1 Juan 5:19). Chayrayku kay mundo llakiykunawan juntʼa kasqanmanta mana tʼukunchejchu.

4. Ashkha llakiykunasniyoj kaspa, ¿imastataj nisunman?

⁴ Ashkha llakiykunasniyoj kaspaqa, chay yuyaylla kasunman. Ichapis qolqe mana alcanzanawanchejmanta llakikusunman. Chayrí nisunman: “Onqoykusaj chayrí, ¿imanasajtajri? Mana sano kaspaqa, niñachá trabajayta atiymanchu ari. Trabajoymantapis wijchʼuwankuman”, nispa. Manachayrí nisunman: “Diosta mana kasukunaypaj tanqawajtinku, ¿urmasaj chayrí?”, nispa. Chantapis Satanaspa makinpi kajkunaqa, tumpamantawan Diospa llajtanta chinkachinankupaj sayaykonqanku. Chaypi piensaspataj, ichá llakikunchej chay kajtin sinchʼita sayayta atinanchejmantachus manachus. Chayrayku ichá ninchej: “Chay imasmanta llakikusqay, ¿allillanchu kashanman?”, nispa.

5. ¿Imatataj Jesús niyta munasharqa ‘amaña llakikuychejchu’ nispa?

⁵ Jesusqa yachachisqasninman nerqa: “Amaña kausayniykichejmanta llakikuychejchu”, nispa (Mat. 6:25). ¿Chaywan nisharqachu ni imitamanta llakikunanchej kasqanta? Mana. Ñaupa tiempomanta Diospa kamachisninpis, wakin kutis llakikorqanku. Jehová Diostaj paykunata allinpaj qhawallarqapuni (1 Rey. 19:4; Sal. 6:3). * Chayrayku Jesusqa ‘amaña llakikuychejchu’ nispa, kausayninchejmanta ama anchata llakikunanchejta nisharqa. Imajtinchus anchata llakikuspaqa, Jehová Diosta niña allintachu yupaychasunman. Chayrayku, ¿imatá ruwasunman mana anchata llakikunapaj? Qhepan parrafospi chayta yachakusun (“ Ni imata ruwaspalla, tukuy sonqo atienekuspataj kallpayoj kankichej” nisqa recuadrota leeriy).

6. Filipenses 4:6, 7 nisqanman jina, ¿imatá ruwasunman sonqo tiyasqa kanapaj?

⁶ Ñaupaj kaj, Diosmanta mana saykʼuspa mañakuna. Problemasninchejrayku llakisqa kaspaqa, Jehová Diosmanta tukuy sonqo yanapata mañakuna. Paytaj mana anchata llakikunapaj yanapawasun (1 Ped. 5:7). Jehovaqa orakojtinchej ‘sonqo tiyaykuyta qowasun, mayqentachus runas mana entiendeyta atinkuchu, chayta’ (Filipenses 4:6, 7 leey). Chantapis payqa, atiyninnejta mana anchata phutikunapaj yanapawasun (Gál. 5:22).

7. ¿Imaynatataj orakuna kasqa?

⁷ Orakushaspaqa Jehová Diosman imaynachus kashasqanchejta willarina. Payman tukuy llakiyninchejta willakuna, chay llakiyrayku imayna phutisqachus kasqanchejtapis sutʼita nina. Problemanchej allinchanapaj jina kajtenqa, Jehová Diosmanta yuyayta mañakuna imatachus ruwananchejta yachanapaj. Chantá chayta ruwanapaj kallpata mañakunallataj. Problemanchejta mana allinchayta atispataj, mana anchata llakikunapaj Diosmanta yanapata mañakuna. Orakushaspa llakiyninchejta Diosman sutʼita willakojtinchejqa, pay uyariwasqanchejta astawan reparasun. Mañakuyninchejman mana usqhayta kutichiwajtinchejtaj, mana saykʼuspa orakunallapuni. Jehovaqa llakiyninchejta willakunanchejta munaspapis, kutin kutita mañakunanchejta munallantaj (Luc. 11:8-10).

8. Diosman llakiyninchejta willakushaspa, ¿imatawan ruwananchej tiyan?

⁸ Llakiyninchejta Jehová Diosman willakushaspaqa, payman agradecekunallataj. Manchay llakiypi kaspapis, ima bendicioneschus kapuwasqanchejpi piensarina. Jinapis ichá sinchʼi llakisqa kashaspaqa, mana yachanchejchu imatachus orakushaspa ninata. Jina kajtin, yuyarikuna Jehová Diosqa “yanapariway Tatáy”  nejtinchejpis, uyariwasqanchejtapuni (2 Cró. 18:31; Rom. 8:26).

9. ¿Pipitaj atienekunanchej tiyan?

⁹ Iskay kaj, noqallanchejpi atienekunamantaqa, Jehová Diospi atienekuna. Profeta Isaiaspa tiemponpi, Judamanta runasqa Asiriamanta soldados maqanakoj jamunankuta manchachikorqanku. Chayrayku asiriospa makinkupi mana urmanankupaj, Egiptomanta yanapata mañakamorqanku (Isa. 30:1, 2). Jehová Diosqa chayta ruwajtinku mana allinchu rinanta nerqa (Isa. 30:7, 12, 13). Chantapis profeta Isaiasnejta nerqa, salvakunankupaj imatachus ruwananku kasqanta. Jehová nerqa: “Ni imata ruwaspalla noqapi atienekuychej. Ajinata ni imata ruwaspalla, tukuy sonqo atienekuspataj kallpayoj kankichej”, nispa (Isa. 30:15).

10. ¿Ima kutispitaj Jehová Diospi atienekusqanchejta rikuchinanchej kanqa?

¹⁰ ¿Ima kutispitaj Jehová Diospi atienekusqanchejta rikuchisunman? Ichapis sumaj pagasqa trabajota tarikunchej. Jinapis chay trabajota japʼispaqa, Jehová Diosta niña sumajtachu yupaychasunman. Chayrí ichá trabajonchejpi pillapis casarakunapaj qhawakuyta qallariwanchej. Jinapis payqa mana Jehová Diosta sirvinchu. Manachayrí ichá qaylla familianchej niwanchej: “Hermanollapuni kanki chayqa, amaña familiay niwankichu”, nispa. ¿Imatá chay kutispi ruwasun? Jehová Diosqa chay problemaspi kashajtinchej, imatachus ruwanata niwasun (Mat. 6:33; 10:37; 1 Cor. 7:39). Jinapis sapa ujninchej ajllananchej tiyan, payta kasukusunchus manachus chayta.

11. Qhatiykachasqa kashaspa, ¿pikunamantataj Bibliapi estudiasunman?

¹¹ Kinsa kaj, ñaupa tiempo runasmanta yachakuna. Bibliaqa willawanchej, Jehová Diospi atienekuspa sonqo tiyasqa kakunaqa, may allinpuni kasqanta. Chayrayku Diospa ashkha kamachisninmanta parlan, jinallataj payta mana kasukoj runasmantapis. Diospa kamachisninmanta leerishaspaqa, qhawarina imachus qhatiykachasqa kashajtinku sonqo tiyasqa kanankupaj yanapasqanta. Apostolespi piensarina. Judiospa Jatun Juntankumanta kajkuna amaña predicanankuta nejtinku, paykunaqa mana mancharikorqankuchu. Astawanpis nerqanku: “Noqaykoqa Diostapuni kamachejniykuta jina kasunayku tiyan runasta kasunaykumantaqa”, nispa (Hech. 5:29). Apostolesqa jasutʼisqa kaspapis, manapuni manchariywan kharkaterqankuchu. Imaraykuchus paykunaqa, Jehová Dios paykunawan kashasqanta yacharqanku. Jehovaqa apostoleswan kusisqa kasharqa. Chayrayku paykunaqa, sumaj willaykunata willallarqankupuni (Hech. 5:40-42). Discípulo Estebanmantañataj parlarina. Payqa wañuy patapiña kashaspapis, sonqo tiyasqa kasharqa. Chayrayku payta rikojkunaqa nerqanku “uyanqa uj angelpa uyanman rijchʼakusqanta” (Hech. 6:12-15). Estebanqa ajina kasharqa, Jehová Diosta kusichisqanta yachasqanrayku.

12. Kay 1 Pedro 3:14; 4:14 nisqanman jina, ¿imaraykutaj qhatiykachasqa kaspa kusikunanchej tiyan?

¹² Apostolesqa sutʼita yacharqanku, Jehová Dios paykunawan kashasqanta. Imaraykuchus paykunaqa, milagrosta ruwanapaj atiyta japʼerqanku (Hech. 5:12-16; 6:8). Noqanchejqa mana milagrosta ruwayta atinchejchu. Jinapis Jehová Diosqa, Palabranpi niwanchej cheqan runas kasqanchejrayku sufrejtinchej, payta kusichisqanchejta, atiynintataj qonawanchejta (1 Pedro 3:14; 4:14 leey). Chayrayku ama llakikunachu, aswan qhepaman qhatiykachasqa kajtinchej imatachus ruwananchejmanta. Astawanpis tukuy atisqanchejta kallpachakuna, Jehová Dios yanapanawanchejpi, salvanawanchejpi ima astawan atienekunapaj. Ñaupa tiempomanta discípulos jina, noqanchejpis Jesuspa kay nisqanta yuyarikuna: “Noqamin yachayta qosqaykichej, yanapasqaykichejtaj yachanaykichejpaj  imatachus ninaykichejta. Qankunaman churanakojkunataj ujchaykukuspapis, ni imata kutichikuyta atenqankuchu”. Chantapis Jesusqa nillawanchejtaj: “Sinchʼita sayasqaykichejrayku salvakunkichej”, nispa (Luc. 21:12-19). Jehová Diosqa wañupunankukama payta sirvej kamachisninmanta, mana qonqakunchu. Payqa imaynachus kasqankuta allinta yuyarikun, paykunatataj kausarichimonqa.

13. ¿Imatá yachakusunman Jehová Diospi mana atienekojkunamanta?

¹³ Jehová Diospi mana atienekuspa, imatapis ruwarparillarqanku chaykunamantapis yachakullasunmantaj. Paykunamanta yachakoyqa, mana paykuna jina ruwanapaj yanapawasun. Judá llajtapi rey Asamanta parlarina. Payqa kamachiyta qallarishaspa, may chhika soldados paywan maqanakoj rejtinku, Jehová Diosmanta yanapata mañakorqa. Jehovataj chay soldadosta atipananpaj yanaparqa (2 Cró. 14:9-12). Aswan qhepaman, Israelmanta rey Baasañataj rey Asawan maqanakoj rerqa. Baasaqa pisi soldadosnillayoj karqa. Rey Asataj ñaupajpi jina Jehová Diospi atienekunanmantaqa, siriosman qolqeta pagarqa yanapachikunanpaj (2 Cró. 16:1-3). Chantá Asaqa wañupunan qayllata sinchʼita onqoykorqa. Chay kutipipis nillataj Jehovamanta yanapata mañakorqachu (2 Cró. 16:12).

14. ¿Imatá rey Asamanta yachakusunman?

¹⁴ Rey Asaqa problemasniyoj kaspa, qallariypi Jehová Diospi atienekorqa. Jinapis chaymantaqa niña Jehovawan yanapachikorqachu. Astawanpis problemasninta payllamantaña allinchayta munarqa. Runaj piensayninman jina, Asaqa siriosmanta yanapata mañakuspa allillanta ruwasharqa. Jinapis chay ruwasqanqa, mana allinchu karqa. Jehová Diosqa ujnin profetanwan payman willacherqa: “Siriaj reynimpa soldadosnin makiykimanta lluspʼinku, imaraykuchus Siriaj reynimpi atienekorqanki Señorniyki Tata Diospi atienekunaykimantaqa”, nispa (2 Cró. 16:7). ¿Imatá chaymanta yachakusunman? Ima problema kapuwajtinchejpis, imatachus Jehová Dios nisqanta Bibliapi qhawarina, amataj yuyasqanchejman jinallachu allinchayta maskʼana. Uj problemanchejta rato allinchana kajtinpis, Jehová Diosmanta yanapata mañakuna. Paytaj imatapis allintapuni ruwanapaj yanapawasun.

15. Bibliata leeshaspa, ¿imatá ruwasunman?

¹⁵ Tawa kaj, Bibliamanta textosta umanchejpi japʼina. Ichá Bibliata leeshaspa, Jehovapi atienekuspa sonqo tiyasqa kanamanta parlaj textosta tarinchej. Jina kajtin, chay textosta umanchejpi japʼinapaj kallpachakuna. Chaypajqa ichapis chay textota jatunmanta leesunman. Chayrí kutin kutita qhawarinapaj, uj papelitopi anotakusunman. Jehová Diosqa Josueman kamacherqa Diospa Leyninta tuta pʼunchay leenanta, chaypitaj tʼukurinanta. Ajinamanta imatapis sumaj yuyaywan ruwananpaj. Chay ruwasqanqa, Josueta yanaparqa mana manchachikuspa Diospa llajtanta ñaupajman pusananpaj (Jos. 1:8, 9). Bibliaqa noqanchejtapis yanapallawasunmantaj. Chaypeqa manchay kʼachitu textos tiyan. Chaykunataj llakisqa chayri mancharisqa kashajtinchej, sonqo tiyasqallapuni kanapaj yanapawasun (Sal. 27:1-3; Pro. 3:25, 26).

16. ¿Imaynatá Jehová Dios hermanosninchejnejta yanapawanchej?

¹⁶ Phishqa kaj, Diospa kamachisninwan masichakuna. Jehová Diosqa hermanosninchejnejta yanapawanchej paypi atienekunapaj, sonqo tiyasqataj kanapaj. Reunionespeqa yachachikusqanta uyarispa kallpachakunchej. Hermanospa comentasqankupis yanapawanchej. Chantapis reunión pasayta, hermanoswan hermanaswan parlarikuspa kallpachanakullanchejtaj (Heb. 10:24, 25). Ima llakiyninchej kajtinpis, congregacionmanta uj amigonchejwan  parlarisunman. Payman imaynachus kashasqanchejta willarispaqa, mayta kallpachakusun. Amigonchej ‘miskʼi palabraswan’ kallpachariwajtinchejqa, manaña chhikata llakikusunchu (Pro. 12:25).

17. Hebreos 6:19 nisqanman jina, ¿imaynatá Diospa Gobiernonta suyakusqanchej llakiykunata aguantanapaj yanapawanchej?

¹⁷ Sojta kaj, yuyayninchejta paraisopi churana. Diospa Gobiernonta suyakusqanchejqa, “barco sayachina gancho jina”. Imaraykuchus chay suyakusqanchejqa, llakiykunata, problemastapis aguantanapaj yanapawanchej (Hebreos 6:19 leey). Jehová Dios tumpamantawan allin kausayta qonawanchejpi piensarina. Paraisopeqa imaschus kunan llakichiwanchej, chaykunata niña yuyarikusunchu (Isa. 65:17). Chayrayku mosoj mundopiñapis kashasunman jina piensarina. Chaypeqa niña imamantapis llakikusunchu, may allintataj kausakusun (Miq. 4:4). Chay sumaj kausaymanta wajkunaman willarispapis, kallpachakullasunmantaj. Chayrayku tukuy atisqanchejta runasman willamuna, yachachimunataj. Chayta ruwajtinchej, ‘imatachus suyakushanchej chayta, tukukuykama mana iskayrayaspa suyakullasunpuni’ (Heb. 6:11).

18. ¿Imastaj pisimantawan kanqa, chanta imataj yanapawasun sonqo tiyasqallapuni kanapaj?

¹⁸ Kay sajra mundoj tukukuynin astawan qayllamusqanman jina, problemaspis llakiykunapis astawan yapakonqa. Chaytaj ichá astawan llakichiwasun. Chayrayku kay 2021 watapaj ajllasqa textoqa, llakiykunapi kaspapis sonqo tiyasqallapuni kanapaj yanapawasun. Chaypajtaj mana kallpanchejpichu atienekunanchej kanqa, manaqa Jehová Diosninchejpi. Chaytataj ruwasqanchejwan rikuchina kanqa. Chayrayku kay wataqa, Jehová Diospa kay nisqanpi tukuy sonqo atienekuna: “Ni imata ruwaspalla, tukuy sonqo atienekuspataj kallpayoj kankichej” (Isa. 30:15).