1, 2. 1) ¿Maykʼajtaj wañupoj familiaresninchejmanta astawan yuyarikunchej? 2) ¿Imatataj Jesús apostolesninman kamacherqa?

 UJ FAMILIARNINCHEJ unayña wañupojtinpis, paymantaqa yuyarikullanchejpuni. Astawanraj yuyarikunchej ima fechachus wañuporqa chay diapi.

² Señorninchej Jesucristotaqa mayta munakunchej (1 Ped. 1:8). Chayrayku may chhika runas sapa wata tantakunchej paypa wañuyninta yuyarinapaj. Chay tantakuypi yuyarikunchej Jesusqa kausayninta qospa juchamanta, wañuymanta ima kacharichiwasqanchejta (Mat. 20:28). Jesusqa munarqa discipulosnin wañuyninta yuyarikunankuta. Chayrayku wañucherqanku chay ñaupaj chʼisin, apostolesninwan uj cenata ruwaytawan paykunaman kamacherqa: “Kayta ruwallaychejpuni noqamanta yuyarikuspa”, nispa (Luc. 22:19).

3. ¿Imastataj kay yachaqanapi yachakusun?

³ Jesuspa Wañuyninta Yuyarinapaj tantakuyman rejkunamanta juchʼuy grupo runasqa, cielopi kausakuyta suyakushanku. Jinapis chay tantakuyman rejkunamanta may chhika runasqa, kay jallpʼapi kausakuyta suyakushanku. Kay yachaqanapeqa yachakusun imajtinchus cielopi kausakuyta suyakojkuna, kay jallpʼapi kausakuyta suyakojkunapis, chay tantakuyman sapa wata risqankuta. Chantá yachakullasuntaj imaynatachus chay tantakuyman riy yanapawasqanchejta. Ñaupajta qhawarina imaraykuchus ajllasqa cristianos chay tantakuyman risqankuta.

4. Jesuspa Wañuyninta Yuyarinapaj tantakuypi, ¿imajtintaj ajllasqa cristianos tʼantata mikhunku, vinotapis ujyanku?

⁴ Ajllasqa cristianosqa sapa wata Jesuspa Wañuyninta Yuyarinapaj  tantakuypi tʼantata mikhunku, vinotapis ujyanku. ¿Imajtintaj paykuna chayta ruwanku? Chayta yachanapajqa, qhawarina Jesusta wañucherqanku chay ñaupaj chʼisin imatachus pay ruwasqanta. Jesusqa Pascuata mikhuytawan 11 apostolesninman tʼantata vinotawan jaywarqa. Nerqataj chayta mikhunankuta, ujyanankuta ima. Chaytaj sutikun Señorpa Cenan. Jesusqa chay chʼisi paykunawan uj ‘mosoj tratomanta’, ‘uj Gobiernopaj tratomantawan’ parlarqa (Luc. 22:19, 20, 28-30). * Jesús chay iskay tratosta ruwasqanrayku, apostolesnin, ajllasqa cristianospis cielopi “reyestaj sacerdotestaj” kanqanku (Apo. 5:10; 14:1). Kay jallpʼallapiraj kausashaj ajllasqa cristianosqa chay tratosllapitaj kanku, chayrayku Jesuspa Wañuyninta Yuyarinapaj tantakuypi tʼantata mikhuyta atinku, vinotapis ujyayta atinku.

5. ¿Imatataj yachanku ajllasqa cristianos?

⁵ ¿Imajtintaj ajllasqa cristianos Jesuspa Wañuyninta Yuyarinapaj tantakuyman rillankutaj? Paykunaqa chay tantakuyman rispa, cieloman ripunankupi piensarinku. Jehovaqa paykunaman qonqa mana ismoj cuerpota, ni jaykʼaj wañoj cuerpotataj. Paykunaqa Jesuswan khuska, cielopiña kaj ajllasqa cristianoswan khuskataj, Jehovaj ñaupaqenpi sirvenqanku (1 Cor. 15:51-53; 1 Juan 3:2). Ajllasqa cristianosqa yachanku chaypaj ajllasqa kasqankuta. Jinapis cieloman ripunankupajqa, Jehovata wañupunankukama mana wasanchaspa sirvinanku tiyan (2 Tim. 4:7, 8). Paykunaqa cieloman ripunankupi piensarispa mayta kusikunku (Tito 2:13). Waj ovejasmanta kajkunarí, ¿imaraykutaj Jesuspa Wañuyninta Yuyarinapaj tantakuyman rinku? Chayta qhawarina (Juan 10:16).

6. ¿Imajtintaj waj ovejasmanta kajkuna Jesuspa Wañuyninta Yuyarinapaj tantakuyman sapa wata rinku?

⁶ Waj ovejasmanta kajkunapis, Jesuspa Wañuyninta Yuyarinapaj tantakuyman kusisqa rillankutaj. Jinapis paykunaqa mana tʼantata mikhunkuchu, nitaj vinotapis ujyankuchu. 1938 watapi kay jallpʼapi kausakuyta suyakojkunaqa chay tantakuyman wajyarisqas karqanku. Inglés parlaypi 1 de marzo de 1938 Torremanta Qhawaj revistapi nerqa: “Waj ovejasmanta kajkunapis chay tantakuyman rispa, imatachus ruwakusqanta qhawanankoqa may allinpuni kanqa. Paykunapis chay tantakuyman tukuy sonqo rispa kusikunanku tiyan”, nispa. Imaynatachus uj matrimonioman rispa casarakojkunawan khuska kusikunchej, ajinallatataj waj ovejasmanta kajkunapis Jesuspa Wañuyninta Yuyarinapaj tantakuyman rispa kusikunku.

7. ¿Imaraykutaj waj ovejasmanta kajkuna, Jesuspa Wañuyninta Yuyarinapaj tantakuypi discursota mayta uyariyta munanku?

⁷ Waj ovejasmanta kajkunapis, Jesuspa Wañuyninta Yuyarinapaj tantakuyman rispa, imatachus suyakushasqankupi piensarillankutaj. Paykunaqa chay tantakuypi discursota uyariyta mayta suyakunku. Chay discursopeqa astawan parlakun Cristowan, 144.000 ajllasqa cristianoswan imastachus Diosta kasukoj runaspaj ruwanankumanta. Chay ajllasqa cristianosqa, Jesús 1.000 watasta kamachimushajtin kay jallpʼata uj paraisoman tukuchiypi yanapakonqanku, runastapis mana pantaj runasman tukunankupaj yanapallanqankutaj. Waj ovejasmanta kajkunaqa, chay tantakuyman rispa Bibliaj profeciasnin juntʼakunanpi tʼukurispa mayta kusikunku. Chay profeciasmanta wakenqa kashanku Isaías 35:5, 6; 65:21-23 chantá Apocalipsis 21:3, 4.  Paykunaqa chay tantakuypi piensarinku familiankuwan khuska mosoj jallpʼapiñapis kashankuman jina. Chaytaj paykunata yanapan imatachus suyakushasqankupi sinchʼita creenallankupajpuni, Jehovatataj sirvinallankupajpuni (Mat. 24:13; Gál. 6:9).

8. Waj ovejasmanta kajkuna, ¿imajtintaj Jesuspa Wañuyninta Yuyarinapaj tantakuyman rillankutaj?

⁸ Waj ovejasmanta kajkuna, ¿imajtintaj Jesuspa Wañuyninta Yuyarinapaj tantakuyman rillankutaj? Paykunaqa chay tantakuyman rinku, ajllasqa cristianosta munakusqankurayku, yanapaytataj munasqankurayku. Diospa Palabranqa ñaupajmantaña nerqa, ajllasqa cristianoswan kay jallpʼapi kausakuyta suyakojkunawan khuska sumajta llankʼanankuta. Imaynatachus chayta ruwanankumantataj qhepan parrafospi parlarisun.

9. Zacarías 8:23 profecía nisqanman jina, ¿imaynatataj waj ovejasmanta kajkuna ajllasqa cristianosman sumaj ujchasqa kashanku?

⁹ (Zacarías 8:23 leey). Kay profeciaqa sutʼita rikuchin waj ovejasmanta kajkuna, ajllasqa cristianosman imayna ujchasqachus kasqankuta. Chay profeciapi “uj judío” chantá “qankunawan” nispaqa, kay jallpʼapiraj kaj ajllasqa cristianosmanta parlashan (Rom. 2:28, 29). ‘Nacionesmanta tukuy laya parlayniyoj chunka runastaj’, waj ovejasmanta kajkunawan ninakun. Paykunaqa ajllasqa cristianosmanta ‘kallpawan japʼiykukunku’. Chaytataj ruwanku paykunawan khuska Jehová Diosllata yupaychaspa. Chayrayku waj ovejasmanta kajkunaqa, Jesuspa Wañuyninta Yuyarinapaj tantakuyman rispa, ajllasqa cristianosman sumaj ujchasqa kashasqankuta rikuchinku.

10. ¿Imaynatá Jehová juntʼashan Ezequiel 37:15-19, 24, 25 nisqanta?

¹⁰ (Ezequiel 37:15-19, 24, 25 leey). Jehová Diosqa ajllasqa cristianosta waj ovejasmanta kajkunatawan, khuska llankʼanankupaj ujchaykun. Ajinamantataj chay profeciata juntʼan. Chay profeciaqa iskay kʼaspismanta parlan. Cielopi kausakuyta suyakojkunaqa ‘Judapaj kʼaspi’ jina kanku. Israelpi reyesqa chay ayllumanta ajllasqa karqanku. Kay jallpʼapi kausakuyta suyakojkunataj, “Efrainpa kʼaspin” jina kanku. * Jehová Diosqa iskaynin gruposta “uj kʼaspilla kanankupaj” ujchaykunan karqa. Chaywan nisharqa Jesús Reyña kashajtin iskaynin grupos ujchasqa sirvinankuta. Sapa wata ajllasqa cristianoswan waj ovejasmanta kajkunawan, ‘uj tropa jinalla, uj michejniyoj’ jinallataj Jesuspa Wañuyninta Yuyarinapaj tantakuyman rinku (Juan 10:16).

11. Mateo 25:31-36, 40 nisqanman jina, ¿imaynatataj waj ovejasmanta kajkuna Cristoj hermanosninta yanapanku?

¹¹ (Mateo 25:31-36, 40 leey). Kay kikinchaypi ‘ovejasqa’ ninakun kay tiempopi kausakoj llampʼu sonqo runaswan. Paykunaqa kay jallpʼapi kausakuyta suyakushanku, tukuy sonqotaj yanapanku kay jallpʼapiraj kaj Cristoj hermanosninta. Chaytataj ruwanku jallpʼantinpi Diospa Gobiernonmanta willaspa, runastataj Jesuspa discipulosninman tukuchispa (Mat. 24:14; 28:19, 20).

12, 13. Waj ovejasmanta kajkuna, ¿imaynasmantataj Cristoj hermanosninta yanapallankutaj?

¹² Waj ovejasmanta kajkunaqa Jesuspa Wañuyninta Yuyarinapaj tantakuyman, mundontinpi tukuy runasta wajyarinku. Chaytataj sapa wata ruwanku, chay tantakuypaj semanas faltashajtin. Ajinamantataj Cristoj hermanosninta yanapasqankuta rikuchinku. (“ ¿Jesuspa Wañuyninta Yuyarinapaj tantakuypaj wakichikushanchejñachu?” nisqa recuadrota leeriy). Chantapis yanapakullankutaj, mundontinpi tukuy congregacionespi chay tantakuy  ruwakunanpaj wakichispa. Ashkha congregacionespitaj, chay tantakuypeqa mana ajllasqa cristianos kanchu. Jinapis waj ovejasmanta kajkunaqa, mayta kusikunku Cristoj hermanosninta yanapanankupaj tukuy atisqankuta ruwaspa. Paykunaqa sumajta yachanku chayta ruwaspa Jesuspaj ruwashasqankuta, Jesustaj chayta qhawamushasqanta (Mat. 25:37-40).

¹³ ¿Imasraykutaj tukuyninchej Jesuspa Wañuyninta Yuyarinapaj tantakuyman rillanchejtaj?

14. ¿Imatataj Jehovawan Jesuswan ruwarqanku mayta munakuwasqanchejrayku?

¹⁴ Jehovawan Jesuswan munakuwasqanchejmanta mayta agradecekunchej. Jehovaqa ashkha imasta ruwan mayta munakuwasqanchejrayku. Payqa munasqa Wawanta kay jallpʼaman kachamorqa noqanchejrayku kausayninta qonanpaj (Juan 3:16). Jesuspis munakuwasqanchejraykullataj kausayninta qorqa (Juan 15:13). Paykunamanqa munakuwasqanchejrayku imastachus ruwasqankumanta ni imawan pagayta atisunmanchu. Jinapis paykunaman agradecekusunman, munayninkuman jina sapa día kausakuspa (Col. 3:15). Jesuspa Wañuyninta Yuyarinapaj tantakuymanqa rinchej Jehovawan Jesuswan mayta munakuwasqanchejta yuyarikunapaj, paykunata munakusqanchejta rikuchinapajtaj.

15. Ajllasqa cristianos jinallataj waj ovejasmanta kajkunapis, ¿imaraykutaj Jesús noqanchejrayku kausayninta qosqanmanta mayta agradecekunchej?

¹⁵ Jesús noqanchejrayku kausayninta qosqanmanta mayta agradecekunchej (Mat. 20:28). Ajllasqa cristianosqa, Jesús paykunarayku kausayninta qosqanta may jatunpaj qhawanku. Imajtinchus paykunaqa, Jesús kausayninta qosqanrayku cielopi kausakuyta suyakunku. Paykunataqa Jesuspa wañuyninpi creesqankurayku, Jehová ‘cheqan runaspaj’ qhawan, ‘wawasninpajtaj reconocekapun’ (Rom. 5:1; 8:15-17, 23). Waj ovejasmanta kajkunapis, Jesús juchamanta wañuymantawan kacharichiwasqanchejmanta mayta agradecekunchej. Chantapis Jesús noqanchejrayku yawarninta jichʼasqanpi creesqanchejrayku, Diosqa llimphupaj qhawawanchej. Chayraykullataj Diosta sirviyta atinchej, suyakushanchejtaj ‘manchay ñakʼariymanta’ llojsiyta (Apo. 7:13-15). Ajllasqa cristianos jinallataj waj ovejasmanta kajkunapis, Jesuspa Wañuyninta Yuyarinapaj tantakuyman sapa wata rinchej. Chaytataj ruwanchej, Jesús noqanchejrayku kausayninta qosqanmanta mayta agradecekusqanchejrayku.

16. ¿Imaraykutaj Jesuspa Wañuyninta Yuyarinapaj tantakuyman rillanchejtaj?

¹⁶ Jesuspa Wañuyninta Yuyarinapaj tantakuyman rillanchejtaj, payta kasukuyta munasqanchejrayku. Cielopi chayri kay jallpʼapi kausakuyta suyakuspapis, imatachus Jesús kamachiwasqanchejta tukuy sonqo kasukuyta munanchej. Jesusqa japʼichisqa kanan kasharqa chay chʼisi, apostolesninman tʼantata vinotawan jaywaytawan paykunaman nerqa: “Kayta ruwallaychejpuni noqamanta yuyarikuspa”, nispa (1 Cor. 11:23, 24).

17. ¿Imaynatataj Jesuspa Wañuyninta Yuyarinapaj tantakuyman riy Jehovaman qayllaykunapaj yanapawanchej?

¹⁷ Jesuspa Wañuyninta Yuyarinapaj tantakuyman reyqa, Jehovaman astawan qayllaykuchiwanchej (Sant. 4:8). Yachakunchej jina chay tantakuyman rispaqa, piensarinchej ima suyakuytachus Jehová qowasqanchejpi.  Tʼukurillanchejtaj maytapuni munakuwasqanchejpi (Jer. 29:11; 1 Juan 4:8-10). Jehovaqa imatachus suyakushasqanchejta qowasunpuni, nitaj jaykʼajpis saqerpawasunchu. Chaypi piensareyqa yanapawanchej payta astawan munakunapaj, payman astawan qayllaykunapajtaj (Rom. 8:38, 39).

18. ¿Imatataj ruwayta munanchej Jesús noqanchejrayku imatachus ruwasqanpi tʼukurispa?

¹⁸ Jesuspa Wañuyninta Yuyarinapaj tantakuyman reyqa, Jesús jina ruwanapaj yanapawanchej (1 Ped. 2:21). Chay tantakuypa ñaupaj diasnenqa, imatachus Jesús niraj wañuchishajtinku ruwasqanmanta parlaj versiculosta leerinchej. Chantapis leerillanchejtaj wañuyninmanta, kausarimuyninmantawan parlaj versiculosta. Chay tantakuypi discursotaj Jesús mayta munakuwasqanchejta yuyarichiwanchej (Efe. 5:2; 1 Juan 3:16). Jesús imatachus noqanchejrayku ruwasqanta leerispa, chaypitaj tʼukurispaqa, “imaynatachus Jesús kausarqa ajinata” kausayta munanchej (1 Juan 2:6).

19. ¿Imastataj ruwasunman Diospa munakuynillanpipuni kanapaj?

¹⁹ Jesuspa Wañuyninta Yuyarinapaj tantakuyman reyqa, Diospa munakuyninpi kanallapajpuni yanapawanchej (Jud. 20, 21). Diosta kasukunapaj, sutinta jatunchanapaj, payta kusichinapaj ima tukuy atisqanchejta kallpachakuspaqa, munakuynillanpipuni kanchej (Pro. 27:11; Mat. 6:9; 1 Juan 5:3). Chay tantakuyman reyqa, yanapawanchej sapa día Jehovaj munayninman jina kausakunapaj. Chaywantaj nishanchej: “Munakuyniykipi wiñaypaj kayta munani”, nispa.

20. ¿Imajtintaj Jesuspa Wañuyninta Yuyarinapaj tantakuyman rinanchejpuni tiyan?

²⁰ Cielopi kausakuyta chayri kay jallpʼapi kausakuyta suyakuspapis, Jesuspa Wañuyninta Yuyarinapaj tantakuymanqa rinanchejpuni tiyan. Chay tantakuyman sapa wata rispaqa, Jesús noqanchejrayku kausayninta qosqanta yuyarikunchej. Astawanqa yuyarikunchej Jehová mayta munakuwasqanchejrayku Wawanta qosqanta. Kay wataqa Jesuspa Wañuyninta Yuyarinapaj tantakuyta ruwasunchej, viernes 15 de abril de 2022. Noqanchejqa Jehovata, Wawan Jesusta ima mayta munakunchej. Chayrayku Jesuspa Wañuyninta Yuyarinapaj tantakuymanqa ima kajtinpis risunpuni.