1. ¿Ima llakiypitaj David rikukorqa?

 ISRAELMANTA atiyniyoj rey Saulqa Davidta wañuchiytapuni munarqa. Chayrayku Davidqa ayqekorqa. Payqa ni ima mikhunanpaj kapusqanrayku Nob llajtaman rerqa. Chaypitaj phishqa tʼantasta Ahimelecmanta mañakorqa (1 Sam. 21:1, 3). Chaymanta ripuytawantaj, Davidwan paywan kasharqanku chay runaswanqa uj cuevapi pakakamorqanku (1 Sam. 22:1). ¿Imajtintaj Davidta Saúl wañuchiyta munarqa?

2. ¿Imasta ruwaspataj Saúl Diospa contranpi oqharikusharqa? (1 Samuel 23:16, 17).

² Davidqa may rejsisqa runaman tukorqa, ashkha guerraspitaj atiparqa. Chayraykutaj rey Saulqa Davidmanta mayta envidiakorqa. Chantapis Saulqa yacharqa, mana kasukusqanrayku Jehovaqa paypa cuentanmanta Davidta Israelpi rey kananpaj ajllasqanta (1 Samuel 23:16, 17 leey). Jinapis Saulqa Israelpi reyllapuni kasqanrayku, ashkha soldadosniyoj karqa, ashkha runastaj payman kutisqa karqanku. Chayrayku Davidqa Saulmanta ayqeykachakorqa. Jehovaqa nerqaña David rey kananta. Jinapis Saúl, ¿yuyanmanchu karqa Jehovaj nisqanman churanakuyta atisqanta? (Isa. 55:11). Bibliaqa mana imatapis willanchu. Jinapis payqa Jehovaj contrallanpi oqharikusharqa. Jehová Diospa contranpi oqharikojkunatajrí mana allinpipuni tukunku.

3. David llakiykunapi kaspapis, ¿imatataj ruwarqa?

³ Davidqa kʼumuykukoj sonqo karqa. Paytaqa Jehová Israelmanta rey kananpaj ajllarqa, manataj pay kikinchu ajllakorqa (1 Sam. 16:1, 12, 13). Chayraykutaj Saulqa Davidta  maytapuni chejnikorqa. Davidqa chay jina llakiykunapi kasqanmanta mana Jehovata juchacharqachu, nitaj phiñakorqachu pisi mikhunallayoj kasqanmanta, cuevapi pakakusqanmantapis. Astawanpis payqa ichapis chay cuevapi kashaspa Jehovata jatunchananpaj uj sumaj takiyta qhelqarqa. Chay takiymanta uj partecitontaj, kay watapaj ajllasqa textonchej kashan. Chaypi nin: “Jehová Diosta maskʼajkunapajrí allin imasqa kanqapuni”, nispa (Sal. 34:10).

4. ¿Ima tapuykunamantaj kay yachaqanapi kutichisunchej, chanta imaraykutaj kay tapuykunaman kutichinanchejpuni tiyan?

⁴ Ashkha Jehovaj kamachisnenqa mikhunamanta chayri waj imasmanta pisichikunku. * Kunallanraj kay sinchʼi onqoy rikhurisqanrayku, ajinapi ashkha hermanos rikukunku. Manchay ñakʼariy qayllaykamusqanman jinataj aswan llakiykunapiraj rikukusun (Mat. 24:21). Chayraykutaj kay yachaqanapeqa, kay tawa tapuykunaman kutichisun. ¿Ima ‘allin imastaj’ Davidman mana faltarqachu? ¿Imaraykutaj kapuwasqanchej imasllawan sonqo juntʼasqas kausakunanchej tiyan? ¿Imajtintaj nisunman Jehová cuidanawanchejtapuni? ¿Imaynamantataj kunanmantapacha jamoj tiempopaj wakichikusunman?

5, 6. David Jehovaj kamachisninpaj “allin imasqa” kanqapuni nisqanta entiendenapaj, ¿imaynatá Salmo 23:1-6 yanapawanchej?

⁵ Jehová Diospa kamachisninpaj ‘allin imas’ kanqapuni nispa, ¿imamantataj David parlasharqa? Payqa 23 Salmota qhelqashaspa chayman rijchʼakoj palabrasllatataj oqharerqa. Chayrayku chay Salmoqa yanapawasunman imatachus David niyta munasqanta yachanapaj (Salmo 23:1-6 leey). Davidqa 23 Salmota ajinata nispa qallarerqa: “Jehová Diosqa ovejitanta jina michikuwan. Ni ima faltawanchu”, nispa. Chay Salmoj wakin versiculosninpitaj ima allin imastachus japʼisqanmanta parlarqa. Nisunman Jehová michejnin kasqanrayku,  ima bendicionestachus japʼisqanmanta. Payqa nerqa Jehová ‘cheqan ñanninta pusasqanta’, tukuy imapitaj paywanpuni kasqanta. Davidqa yacharqa Jehovaj ‘qʼomer pampasninpi’ kajtinpis, llakiykunapi rikukunantapuni. Chay llakiykunataj paypajqa karqa ‘manchay laqha wayqʼosta’ puriy jina. Chantapis payqa nillarqataj enemigosniyoj kananta. Davidqa Jehovata Michejninta jina qhawarqa. Chayraykutaj nerqa: “Mana manchachikunichu”, nispa.

⁶ Kunanqa ñaupaj kaj tapuyman kutichiyta atisunman. ¿Ima ‘allin imastaj’ Davidman mana faltarqachu? Paymanqa Jehovaj qayllallanpipuni kananpaj ni ima faltarqachu. Davidqa kusisqa kananpaj mana tukuy imayoj kaytachu necesitarqa. Payqa Jehová imastachus qosqanwan sonqo juntʼasqa kasharqa. Chantapis Davidpajqa aswan importante karqa Jehovaj bendicionnin, payta cuidasqan ima.

7. Lucas 21:20-24 nisqanman jina, ¿imapitaj rikukorqanku Judeapi tiyakoj cristianos?

⁷ Davidpa nisqasnenqa yachachiwanchej mana kapuyniyoj kaytachu ñaupajman churananchej kasqanta. Imaschus kapuwasqanchejwanqa kusisqas kayta atisunman. Jinapis mana chay imaschu kausayninchejpi ñaupajpi kanan tiyan. Chaytataj Judeapi tiyakoj cristianosqa sutʼita entienderqanku (Lucas 21:20-24 leey). Jesusqa cristianosman ñaupajta willarqaña “Jerusalenta soldadoswan muyurisqata” rikunankuta. Paykunaqa chayta rikuspa orqosman ayqekunanku karqa. Ajinallamanta salvakuyta atinkuman karqa. Jinapis ashkha imasninkuta saqenanku karqa. Pasaj wataspi La Atalaya revistapi ajinata nerqa: “Paykunaqa wasisninkuta, jallpʼasninkuta saqespa riporqanku. Wasinkumantapis ni imata aparqankuchu. Paykunaqa Jehová cuidananpi, yanapananpitaj atienekorqanku. Chayrayku tukuy imamanta nisqa Jehovata sirviyta ñaupajman churarqanku”.

8. Judeapi tiyakoj cristianos imapichus rikukusqankumanta, ¿imatá yachakusunman?

⁸ Judeapi tiyakoj cristianos imapichus rikukusqankumanta, ¿imatá yachakusunman? Chay kikin revistallapitaj nin: “Ichá noqanchejpis aswan qhepaman Judeamanta cristianos jina, imastachus kausayninchejpi ñaupajman churasqanchejta rikuchinanchej kanqa”, nispa. Chay tiempopi noqanchejpaj, ¿imastaj aswan importante kanqa? ¿Kapuwasqanchej imaschu chayrí Jehovata kasukusqanchejrayku salvasqa kananchejchu? Ichapis kay mundoj tukukuynin chayamojtenqa ashkha llakiykunapi rikukusun, imaschus kapuwasqanchejtataj saqenanchej kanqa. Noqanchejpis tukuy atisqanchejta kallpachakunanchej tiyan, Judeamanta ayqekoj cristianos jina wakichisqa kanapaj. *

9. Apóstol Pablo hebreo cristianosman imatachus yuyaychasqan, ¿imaynatá yanapawanchej?

⁹ Judeapi tiyakoj cristianospajqa, tukuy imankuta saqespa waj ladopi tiyakuy nichá facilchu karqa. Paykunaqa Jehová tukuy ima necesitasqankuta qonanpi confiananku karqa. Jinapis romano soldados Jerusalenta muyuykunankupaj phishqa watas faltashajtin, apóstol Pabloqa hebreo cristianosman sumaj yuyaychaykunata qorqa. Chaytaj paykunata maytachá yanaparqa. Pablo nerqa: “Kausayniykichejpi amapuni qolqemanta wañusqa kaychejchu. Astawanpis imaschus kapusunkichej chaywan kusisqa kaychej. Imaraykuchus Diosqa nerqa: ‘Mana jaykʼajpis saqerparisqaykichu. Nitaj jaykʼajpis wijchʼurparisqaykichu’, nispa. Chayrayku mana manchachikuspa niyta atinchej: ‘Jehová Diosmin yanapawajneyqa, mana manchachikusajchu. ¿Imanawanqataj runari?’”, nispa (Heb. 13:5, 6). Apóstol Pabloj yuyaychasqanta kasukoj cristianosqa, waj  lugarpi pisi imasllawan kausakuyta atillarqankuchá. Paykunaqa Jehová tukuy ima necesitasqankuta qonanta yacharqanku. Apóstol Pabloj yuyaychasqanqa, noqanchejtapis yanapallawanchejtaj paykuna jina Jehovapi atienekunapaj.

10. ¿Imatataj apóstol Pablomanta yachakunchej?

¹⁰ Apóstol Pabloqa Timoteoman hebreo cristianosman jinallataj yuyaycharqa. Chay yuyaychasqantaj noqanchejtapis mayta yanapallawasunmantaj. Pay nerqa: “Mikhunayoj, ropayojtaj kaspaqa, chaywan sonqo juntʼasqa kausakuna”, nispa (1 Tim. 6:8). Jina kajtin, ¿nichu atinchej sumaj mikhunasta mikhuriyta, allin wasipi tiyakuyta chayri ropasta rantikuyta? Apóstol Pabloqa mana chaymantachu parlasharqa. Astawanpis payqa parlasharqa, kapuwasqanchej imaswan sonqo juntʼasqas kausakunamanta (Fili. 4:12). Pabloqa chaytapuni yachakorqa. Noqanchejpajqa Jehovaj amigosnin kasqanchej aswan importante, kapuwasqanchej imasmanta nisqaqa (Hab. 3:17, 18).

11. ¿Imatá yachakunchej Moisés imatachus israelitasman nisqanmanta?

¹¹ Ichapis noqanchejqa wakin imasta necesitasqanchejtapuni yuyasunman. Jinapis Jehovaqa ichá mana kikintachu yuyan. Qhawarina imatachus Moisés israelitasman nisqanta. Moisesqa israelitas 40 watastaña chʼin jallpʼaspi purisqankutawan ajinata nerqa: “Qankunataqa Jehová Diosniykichej bendecisunkichej tukuy ima ruwasqaykichejpi. Pay kay jatun chʼin jallpʼaspi pusaykachasorqachej. Jehová  Diosniykichejqa kay 40 watasta qankunawan karqa, manataj imatapis pisichisorqachejchu”, nispa (Deu. 2:7). Jehová Diosqa israelitasman 40 watasta maná nisqa mikhunata qorqa. Ropasninkupis Egiptomanta llojsisqankumantapacha mana thantakorqachu (Deu. 8:3, 4). Wakin israelitasqa chay imasta ichá pisipaj qhawarqanku. Jinapis Moisesqa yuyaricherqa, Jehová paykunaman ni imata faltachisqanta. Jehovaqa mayta kusikonqa, kapuwasqanchej imasllawan sonqo juntʼasqas kausakojtinchej. Payqa munan tukuy imata qowasqanchejmanta agradecekunanchejta, paypa bendicionninta jinataj qhawananchejta.

12. ¿Imaynamantá yachanchej David Jehová Diospi atienekusqanta nitaj payllapichu?

¹² Davidqa yacharqa Jehová ni jaykʼaj saqerparinanta, payta munakojkunatataj yanapanantapuni. Davidqa 34 Salmota qhelqashajtin wañuy patapiña kasharqa, jinapis creeynenqa sinchʼillapuni karqa. Chayrayku paypajqa ‘Jehová Diospa angelnin muyuyninpipis sayashanman’ jina karqa (Sal. 34:7). Davidqa Jehovaj angelninta uj soldadowansina kikinchasharqa. Chay angelqa muyuyninpi sayasharqa, ima enemigo rikhurimojtinpis chay rato jarkʼananpaj. Davidqa wapu soldado karqa, Jehovataj nerqaña rey kananta. Jinapis payqa mana sumajta warakʼayta yachasqanpichu, nitaj enemigosninwan espadawan sumajta maqanakuyta yachasqanpichu atienekorqa (1 Sam. 16:13; 24:12). Astawanpis Jehová Diospi, angelnin payta manchachikojkunata librananpi ima atienekorqa. Noqanchejqa kay tiempopi mana uj milagronejtachu jarkʼasqas kayta suyakunchej. Jinapis noqanchejqa sutʼita yachanchej, Jehová Diospi atienekojkunaqa, wañuchisqas kaspapis wiñay kausayta japʼinankutapuni.

13. Magogmanta Gog contranchejpi oqharikojtin, ¿imajtintaj atipanawanchejta yuyanqanku, chanta imajtintaj mana manchachikunachu kanqa? (Kay revistaj tapanpi dibujota qhawariy).

¹³ Tumpamantawanqa Jehová Dios jarkʼayta atiwasqanchejpi atienekusqanchej pruebaman churasqa kanqa. Magogmanta Gog, nisunman uj qotu naciones contranchejpi oqharikojtinku, ichapis yuyasunman chinkachinawanchejta. Chaypachataj noqanchejqa, tukuy atisqanchejta atienekunanchej kanqa Jehová libranawanchejpi. Chay nacionesqa mana piniyoj runasta jina qhawawasun (Eze. 38:10-12). Paykunaqa mana armasniyoj kasqanchejrayku, nitaj maqanakuyta yachasqanchejrayku chay rato chinkarparichinawanchejta yuyanqanku. Paykunaqa mana reparanqankuchu Jehovaj angelesnin jarkʼanawanchejta. Jinapis noqanchejqa sinchʼi creeyniyoj kasqanchejrayku yachanchej jarkʼanawanchejtapuni. Chay qotu nacionesqa tʼukulla qhepakonqanku, Jehovaj angelesnin yanapaj jamuwasqanchejta rikuspa (Apo. 19:11, 14, 15).

14. ¿Imastá kunanmantapacha ruwasunman jamoj tiempopaj wakichisqa kanapaj?

¹⁴ ¿Imastá kunanmantapacha ruwasunman jamoj tiempopaj wakichisqa kanapaj? Ama yuyanachu kapuwasqanchej imasqa kausayninchejpi aswan importante kasqanta. Imaraykuchus uj diaqa chay imasta saqepunanchej kanqa. Chantapis kapuwasqanchej imaswan sonqo juntʼasqa kausakuna, Jehovawan amigos kasqanchejmantataj kusikuna. Tukuy atisqanchejta kallpachakuna Jehová Diosninchejta astawan rejsinapaj. Ajinamanta Magogmanta Gog contranchejpi sayaykojtin, Jehová jarkʼanawanchejmanta mana iskaychakusunchu.

15. ¿Imaspi rikukusqantaj Davidta yanaparqa Jehová yanapanallanpipuni atienekunanpaj?

¹⁵ ¿Imataj Davidta yanapallarqataj llakiykunata  aguantananpaj? Pay nerqa: “Jehová Diosta allinta rejsiychej, reparaychejtaj imayna kʼachachus kasqanta. Kusisqamin paypi pakakoj runaqa”, nispa (Sal. 34:8). Chay palabrasqa sutʼita rikuchiwanchej imaraykuchus David Jehová yanapananpi atienekusqanta. Davidqa Jehovapipuni atienekorqa, Jehovataj ni jaykʼaj saqerparqachu. Payqa jovencitollaraj kashaspa, filisteo Goliat sutiyoj wapu soldadowan maqanakorqa, nerqataj: “Kunanpacha Jehová Diosqa qanta makisniyman churasonqa”, nispa (1 Sam. 17:46). Aswan qhepamantaj Davidtaqa rey Saulpaj llankʼashajtin, Saúl ashkha kutispi wañuchiyta munarqa. Jinapis Jehovaqa Davidwanpuni kasharqa (1 Sam. 18:12). Davidqa ñaupajpiña rikorqa imaynatachus Jehová yanapasqanta. Chayrayku sutʼita yacharqa yanapanallantapuni. Chayta yachayqa noqanchejtapis yanapawasunman, qhepaman jamoj llakiykunapaj wakichisqa kanapaj.

16. ¿Imaspí reparasunman Jehová yanapawasqanchejtapuni?

¹⁶ Kay tiempopi Jehovaj yanapanta maskʼasun chayqa, qhepamanpis yanapanallawanchejpipuni atienekusun. Kaypi piensarina. Uj asambleaman rinanchejpajqa patronninchejmanta permisota mañakunanchej kanqa. Chayrí tukuynin reunionesman rinapaj, astawan predicanapajpis, wakin horariosta cambianawanchejta ninanchej kanqa. Chaykunata ruwanapajqa sinchʼi creeyniyoj kananchej tiyan, Jehovapitaj atienekunanchej tiyan. Patronninchej mana uyariwajtinchej, trabajomantataj kachapuwajtinchej, ¿imatá ruwasun? ¿Atienekusunchu Jehová ni jaykʼaj saqerparinawanchejpi, necesitasqanchej imastataj qonawanchejpipuni? (Heb. 13:5). Ashkha hermanosqa Jehovapaj astawan llankʼanankupaj, ashkha tiemponkuta churanku. Paykunaqa sutʼita rikorqanku, imaynatachus Jehová necesitashajtinkupuni yanapasqanta. Arí, Jehovaqa ni jaykʼaj saqerpariwasunchu.

17. ¿Mayqentaj kay 2022 watapaj texto chantá imapí yanapawasun?

¹⁷ Noqanchejqa Jehovawan kashanchej, chayrayku amapuni manchachikunachu imachus aswan qhepaman kananmanta. Jehovata kausayninchejpi ñaupajman churasun chayqa, payqa ni jaykʼaj saqerpawasunchu. Diospa Llajtanta Kamachejkunaqa munanku, jamoj llakiykunapaj wakichisqa kananchejta, Jehová ni jaykʼaj saqerparinawanchejpitaj atienekunanchejta. Chayrayku paykunaqa kay 2022 watapaj textota Salmo 34:10 versiculota ajllanku. Chaypi nin: “Jehová Diosta maskʼajkunapajrí allin imasqa kanqapuni”, nispa.