1, 2. 1) Jesuspa kausayninmanta, ruwasqanmantapis leesqanchejpi tʼukurispa, ¿imayná sientekunchej? 2) ¿Imatá kay yachaqanapi qhawarisun?

 MAY munasqa familiarninchej chayri amigonchej wañupojtenqa mayta faltachanchej. Qallariypeqa mayta sonqonchej nanawanchej wañupusqan ñaupaj diaspi piensarejtinchej, astawanraj mayta sufrispa wañuporqa chayqa. Tiempowanraj paymanta wakin imasta yuyarikuspa watejmanta kusisqa kayta atisunman. Ichapis yuyarikusunman kallpacharinawanchejpaj chayri asirichinawanchejpaj uj imata yachachiwasqanchejta, uj imata ruwasqanta chayri nisqanta.

² Ajinallatataj llakikusunman Jesús mayta sufrisqanmanta, wañusqanmanta ima leespa. Jesuspa Wañuyninta Yuyarinapaj tantakuy semanaspeqa, astawanraj tiempochakunchej Jesuspa wañuynin may valorniyoj kasqanpi tʼukurinapaj (1 Cor. 11:24, 25). Chaywanpis Jesús kay jallpʼapi kashaspa imatachus ruwasqanpi, imatachus nisqanpi tʼukurispaqa mayta kusikunchej. Chantapis kallpata japʼinchej imatachus kunan ruwashasqanpi, imatachus aswan qhepamanpis noqanchejpaj ruwananpi tʼukurispa. Chay imaspi tʼukurisqanchej, Jesús munakuwasqanchejpi tʼukurisqanchejpis, tanqanawanchej tiyan tukuy imaynasmanta agradecekusqanchejta rikuchinapaj. Chaytataj kay yachaqanapi qhawarisun.

3. ¿Imaraykutaj kacharichisqa kasqanchejmanta agradecekusunman?

³ Jesuspa kausayninpi, wañusqanpi ima tʼukurispaqa mayta agradecekunchej. Jesusqa kay jallpʼapi kashaspa runasman yachacherqa Diospa Gobiernon sumaj imasta ruwananta. Chay cheqa yachachiykunatataj may sumajpaj qhawanchej. Kacharichisqa kasqanchejmantaqa mayta agradecekunchej, imaraykuchus  chaynejta Jehovaj sumaj amigosnin kayta atinchej, Jesuspatapis. Mana chayllachu, Jesuspi creejkunaqa suyakushallanchejtaj wiñaypaj kausakuyta, munasqa wañupoj familiaresninchejtapis watejmanta rikukapuyta (Juan 5:28, 29; Rom. 6:23). Chay sumaj bendicionesta japʼinapajtaj ni imata ruwarqanchejchu. Ni jaykʼaj Diosman, Cristomanpis pagayta atisunchu imatachus noqanchejrayku ruwasqankumanta (Rom. 5:8, 20, 21). Jinapis, ¿imaynatá rikuchisunman paykunaman may agradecesqa kashasqanchejta? Chayta qhawarina.

4. ¿Imatá María Magdalena ruwarqa imatachus Jesús ruwapusqanmanta agradecekusqanta rikuchinanpaj? (Dibujota qhawariy).

⁴ María Magdalenapi piensarina. Payqa judía karqa, qanchis supaykunataj mayta sufrichisharqanku. Payqa ichapis yuyarqa ni pi yanapariyta atinanta. Chayrayku, ¿imaynataj kashanman karqa Jesús chay supaykunata paymanta qharqojtin? Maytachá agradecekorqa. Chayrayku Jesusta qhaterqa, payta yanapananpajtaj tiemponta, kallpanta, kapuyninta ima churarqa (Luc. 8:1-3). María imatachus Jesús payrayku ruwasqanmanta mayta agradecekojtinpis, ichapis mana sumajta entienderqachu Jesusqa tumpamantawan aswan sumajtaraj ruwananta. Jesusqa kausayninta runasrayku qonan karqa, “ajinamanta pillapis paypi creejqa” wiñay kausayta japʼinanpaj (Juan 3:16). Chayta mana sumajta entiendejtinpis, Mariaqa may agradecesqa kasqanta rikucherqa Jesusta mana saqerparispa. Jesús kʼaspipi clavasqa kashajtin, payqa chay qayllapi qhepakorqa Jesusta, chaypi kajkunatawan sonqochananpaj (Juan 19:25). Jesús sepulturapi kashajtintaj, Mariawan iskay warmiswan, sumaj qʼapayniyoj qhorasta aparqanku Jesuspa ayanman churamunankupaj (Mar. 16:1, 2). Jehovaqa chayta ruwasqanmanta Mariata mayta bendicerqa. Paypajqa may jatun kusiypuni karqa Jesusta kausarisqata rikusqan, paywantaj parlarisqan. Chaytaqa Jesuspa uj mashkha discipulosnillan ruwayta aterqanku (Juan 20:11-18).

5. ¿Imatá ruwasunman Jehovaman, Jesusmanwan agradecekusqanchejta rikuchinapaj?

 ⁵ Jehovawan Jesuswan noqanchejrayku tukuy imata ruwasqankumanta agradecekusqanchejta rikuchiyta atillasunmantaj. ¿Imaynamanta? Tiemponchejta, kallpanchejta, kapuyninchejta ima Jehovata sirvinapaj churaspa. Ichapis tiempochakusunman Diosta yupaychanapaj wasista ruwaypi, allinchaypi ima yanapakamunapaj.

6. ¿Imaraykutaj nisunman kacharichisqa kasqanchej sapa ujninchejpaj uj regalo jina kasqanta?

⁶ Jehovawan Jesuswan maytapuni munakuwasqanchejpi piensarejtinchejqa, sonqonchej aysawanchej noqanchejpis paykunata munakunallapajtaj (1 Juan 4:10, 19). Astawanraj paykunata munakunchej Jesús sapa ujninchejrayku wañusqanta entiendespa. Apóstol Pabloqa mayta chay regalomanta agradecekorqa. Chayrayku Galatasman Cartanpi nerqa: ‘Diospa Wawanqa munakuwarqa, noqaraykutaj kausayninta qorqa’, nispa (Gál. 2:20). Qantapis Jesús wañusqanrayku Jehová pusamusorqa amigon kanaykipaj (Juan 6:44). Jehová qanpi allin imasta rikusqanta yachaspa, amigoyki kananpajtaj may chhikata pagasqanta yachaspa, ¿imayná sientekunki? ¿Nichu sonqoyki kuyurin? ¿Nichu chayrayku Jehovatawan Jesustawan astawan munakunki? Chayrayku tukuyninchej kay tapuypi piensarina kanman: “¿Imata ruwanaypajtaj chay munakuy tanqawanqa?”.

7. Fotopi rikunchej jina, ¿imaynamantataj Jehovatawan Cristotawan munakusqanchejta rikuchisunman? (2 Corintios 5:14, 15; 6:1, 2).

⁷ Diostawan Cristotawan munakusqanchejqa wajkunata munakunapaj tanqawanchej (2 Corintios 5:14, 15; 6:1, 2 leey). Runasta munakusqanchejtataj rikuchinchej sonqo kʼajaywan tukuymanpuni predicaspa. Tukuy runasman predicanchej, imayna colorniyoj kajtinkupis, maymanta kajtinkupis, qhapaj chayri wajcha kajtinkupis, manachayrí profesionniyoj kajtinkupis  manapis. Ajinamanta Jehovawan khuska llankʼanchej. “Payqa munan tukuy laya runas salvakunankuta, cheqa kajtataj allinta rejsinankuta” (1 Tim. 2:4).

8. ¿Imaynatataj hermanosninchejta munakusqanchejta rikuchisunman?

⁸ ¿Imaynamantataj Diostawan Cristotawan munakusqanchejta rikuchillanchejtaj? Hermanosninchejta munakuspa (1 Juan 4:21). Paykunamanta maytapuni llakikunchej, llakiykunapi rikukojtinku yanaparinchej, ujnin familiarninku wañupojtin sonqocharinchej, onqosqa kajtinku visitarinchej, sinchʼi llakisqa kashajtinkutaj tukuy atisqanchejta ruwanchej kallpacharinanchejpaj (2 Cor. 1:3-7; 1 Tes. 5:11, 14). Chantapis yachanchej “cheqan runaj mañakuynenqa manchay atiyniyoj” kasqanta. Chayrayku paykunapaj mañapunchej (Sant. 5:16).

9. ¿Imaynamantá rikuchillasunmantaj hermanosninchejta munakusqanchejta?

⁹ ¿Imaynamantataj rikuchillasunmantaj hermanosninchejta munakusqanchejta? Paykunawan allinta apanakunapaj tukuy atisqanchejta kallpachakuspa. Jehová jina perdonanapaj kallpachakunchej. Kaypi piensarina: Sichus Jehová juchasninchejrayku Wawan wañunanta saqerqa chay, ¿nichu hermanosninchejta contranchejpi juchallikojtinku usqhayllata perdonananchej kanman? Mana munasunmanchu Jesuspa ujnin rijchʼanachinanmanta sajra kamachi jina kayta. Paytaqa patronnin may chhika manunta perdonasqa. Paytajrí kamachi masinta manun may pisisitulla kajtinpis mana perdonayta munasqachu (Mat. 18:23-35). Qan mayqen hermanollawanpis phiñanasqa kashanki chayqa, allin kanman niraj Señorpa Cenanta ruwana día chayamushajtin, chay hermanowan allinyakapunaykipaj parlarinayki (Mat. 5:23, 24). Chayta ruwanki chayqa, Jehovatawan Jesustawan maytapuni munakusqaykita rikuchinki.

10, 11. ¿Imaynatataj ancianos rikuchinkuman Jehovatawan Jesustawan munakusqankuta? (1 Pedro 5:1, 2).

¹⁰ Ancianosrí, ¿imaynatataj Jehovatawan Jesustawan mayta munakusqankuta rikuchinkuman? Jesuspa ovejitasninta munakuywan cuidaspa (1 Pedro 5:1, 2 leey). Diospa Wawanqa chayta sutʼisituta nerqa apóstol Pedroman. Pedroqa kinsa kutita Jesusta mana rejsisqanta nisqanrayku, maytachá munarqa Jesusta munakusqanta rikuchiyta. Jesustaj kausarimuytawan payta taporqa: “Juanpa wawan Simón, ¿munakuwankichu?”, nispa. Pedroqa tukuy imatachá ruwanman karqa munakusqanta rikuchinanpaj. Jesustaj nerqa: “Ovejitasniyta michipuway”, nispa (Juan 21:15-17). Chaymantapacha Pedroqa Señorpa ovejitasninta munakuywan cuidarqa. Ajinamanta Jesusta munakusqanta rikucherqa.

¹¹ Señorpa Cenanta yuyarinapaj semanaspi, ¿imaynatataj ancianos rikuchinkuman Jesús imatachus Pedroman nisqan paykunapaj may importante kasqanta? Jehovatawan Jesustawan mayta munakusqankuta rikuchinkuman, hermanosta kallpacharinankupaj tiempochakuspa, chiriyapoj hermanosta yanaparinankupajtaj mayta kallpachakuspa (Eze. 34:11, 12). Chantapis Bibliamanta yachakojkunata, primera vez Señorpa Cenanman jamojkunatapis kallpacharinkuman. Ancianosqa munanku paykuna Jesuspa discipulosninman tukunankuta. Chayrayku paykunaman rikuchinkuman jamusqankumanta mayta kusikusqankuta.

12. Jesús niraj wañupushaspa mañakusqan, ¿imaraykutaj mana manchachikunapaj yanapawanchej? (Juan 16:32, 33).

¹² Jesusqa wañucherqanku chay ñaupaj chʼisin discipulosninman nerqa: “Kay mundopeqa ñakʼarinkichej. Chaywanpis kallpachakuychej, noqaqa kay mundota atipani”, nispa (Juan  16:32, 33 leey). ¿Imataj Jesusta yanaparqa enemigosninta mana manchachikunanpaj, wañupunankamataj Diosta kasukunallanpajpuni? Jehovapi atienekusqan. Jesusqa yacharqa discipulosnin pay jinallataj pruebasta pasanankuta. Chayrayku Jehovamanta mañakorqa paykunata cuidananta (Juan 17:11). ¿Imaraykutaj chayta yachay mana manchachikunapaj yanapawanchej? Imajtinchus Jehovaqa mayqen enemigonchejmanta nisqapis aswan atiyniyoj (1 Juan 4:4). Payqa tukuy imata sumajta qhawamushan. Chayrayku Jehovapi atienekusun chayqa mana imatapis manchachikusunchu, wapustaj kasun.

13. Arimateamanta José, ¿imaynatataj mana manchachikusqanta rikucherqa?

¹³ Arimateamanta Josepi piensarina. Payqa judíos ukhupi may respetasqa runa karqa, judiospa Jatun Juzgadonkupi kajkunamantataj ujnin karqa. Jinapis Jesús kay jallpʼapi kashajtenqa manchachikoj runalla karqa. Juan nerqa: “Joseqa Jesuspa discipulon karqa, judiosta manchachikuspataj mana pimanpis willarqachu Jesuspi creesqanta”, nispa (Juan 19:38). Diospa Gobiernonmanta yachakuyta munaspapis, ni piman willarqachu Diospa Wawanpi creesqanta. Manchachikunmanchá karqa runas niña respetanankuta. Imayna kajtinpis, Bibliaqa nin Jesús wañupusqantawan “Joseqa mana manchachikuspa Pilatomanta Jesuspa ayanta mañamorqa” nispa (Mar. 15:42, 43). Ajinamanta Joseqa Jesuspi creesqanta manaña pakarqachu.

14. ¿Imatá ruwananchej tiyan runas qhawaranawanchejta manchachikuspa?

¹⁴ ¿Qanpis Arimateamanta José jinallatajchu manchachikunki wajkuna qhawarasunankuta? Wakin kutis trabajopi chayri escuelapi, ¿pʼenqakunkichu Jehovaj testigon kasqaykita niyta? ¿Nishankichu “aswan qhepallaman publicador kasaj” chayri “aswan qhepallaman bautizakusaj” nispa? Ama manchachikuychu wajkuna qhawarasunankuta. Astawanpis allin kajtapuni ruway. Jehovamanta rogakuy yanapasunanpaj, munayninta ruwanaykipajtaj kallpata qosunanpaj. Jehová uyarisusqanta rikuspataj, astawan kallpayojman tukunki, astawan mana manchachikojtaj kanki (Isa. 41:10, 13).

15. Jesús kausarimusqanmanta kusikusqanku, ¿imata ruwanankupajtaj discipulosninta tanqarqa? (Lucas 24:52, 53).

¹⁵ Jesús wañupojtenqa discipulosnin mayta llakikorqanku. Qanrí, ujnin discipulon kawaj karqa chay, ¿imaynataj sientekuwaj karqa? Paykunajtaqa mana sumaj amigollankuchu wañuporqa, manachayqa manañapis suyakuyniyojchu kankuman jina sientekorqanku (Luc. 24:17-21). Aswan qhepamantaj Jesusqa paykunaman  rikhurerqa, tiempochakorqataj Bibliamanta profeciasta juntʼashasqanta sutʼinchananpaj. Chantapis uj sumaj ruwayta paykunaman qorqa (Luc. 24:26, 27, 45-48). Jesús 40 diasninman cieloman ripushajtintaj, discipulosninpa llakiyninkoqa jatun kusiymanña tukorqa. Paykunaqa may kusisqa kasharqanku Jesús kausakushasqanta yachaspa, mosoj llankʼayninkuta juntʼanankupajtaj yanapananta yachaspa. Chay kusiyninkutaj paykunata tanqarqa Jehovata mana saykʼuspa jatunchanankupaj (Lucas 24:52, 53 leey; Hech. 5:42).

16. ¿Imaynatataj Jesuspa discipulosnin jina ruwasunman?

¹⁶ Noqanchejrí, ¿imaynatataj Jesuspa discipulosnin jina ruwasunman? Jehovata sapa día kusiywan sirvispa, manataj Jesuspa wañuyninta yuyarinapaj semanasllapichu. Chaypajqa Diospa Gobiernonta kausayninchejpi ñaupajman churananchej tiyan. Wakenqa astawan tiempoyoj kanankupaj trabajonkupi horariota cambianku, ajinamanta predicanankupaj, reunionesman rinankupaj, sapa semanataj familiapi Diosta yupaychanankupaj. Wakintajrí runas ashkha kapuyniyojpuni kanata nejtinkupis, kapusqanku imasllawan kausakuyta ajllanku congregacionninkupi astawan yanapakunankupaj, chayri pisi testigoslla kanku chaypi predicamunankupaj. Jehovataqa mana saykʼuspa sirvinallanchejpuni tiyan. Chaytaj mana qhasillachu. Payqa niwanchej Gobiernonta kausayninchejpi ñaupajman churajtinchej mayta bendecinawanchejta (Pro. 10:22; Mat. 6:32, 33).

17. ¿Imatataj ruwananchej tiyan Jesuspa wañuyninta yuyarikunapaj semanaspi? (Fotota qhawariy).

¹⁷ Martes 4 de abril día chayamunallantaña munashanchej Jesuspa Wañuyninta Yuyarinapaj tantakuyta ruwanapaj. Chaywanpis Jesuspa kausayninpi, wañuyninpi ima tʼukurinapaj, chantá Jesuswan Jehovawan munakuyninkuta rikuchiwasqanchejpi tʼukurinapajpis, mana chay día chayamunantarajchu suyananchej tiyan. Jesuspa wañuyninta yuyarinapaj semanaspeqa ima ratollapis chaypi tʼukurisunman. Tiempochakusunman Diospa Palabran Bibliapi, yanapa B12 nisqapi “Qhepa kaj semanata Jesús jallpʼapi kasqan” nisqata ukhuncharinapaj. Maskʼana ima textoschus yanapawasunman astawan agradecekunapaj, astawan munakuyniyoj kanapaj, aswan wapus kanapaj, astawan kusikuyniyoj kanapaj ima. Chantá piensarina imaynasmantachus tukuy sonqo agradecesqa kashasqanchejta rikuchinapi. Amapuni kaymanta iskayrayanachu: Jesusqa may sumajpaj qhawanqa Señorpa Cenanta ruwanapaj semanaspi, paymanta yuyarikunapaj tukuy ima ruwasqanchejta (Apo. 2:19).