1, 2. ¿Imaraykutaj sapa wata Jesuspa Wañuyninta Yuyarinapaj tantakuyman rinchej?

 CASI 2.000 watas ñaupajta Jesusqa noqanchejrayku kausayninta qorqa, chayraykutaj wiñaypaj kausakuyta atinchej. Jesusqa wañupunan ñaupaj chʼisita uj cenata ruwarqa tʼantitawan vinitullawan. Discipulosninmantaj kamacherqa chayta ruwanallankutapuni, munakuwasqanchejrayku kausayninta qosqanta yuyarikunankupaj (1 Cor. 11:23-26).

² Cristianosqa Jesusta mayta munakusqanchejrayku chay kamachiwasqanchejta kasukunchej (Juan 14:15). Jesuspa Wañuyninta Yuyarinapaj tantakuy ñaupaj semanasta, chay pasaytapis wañuyninta may jatunpaj qhawasqanchejta rikuchinchej. ¿Imaynamanta? Tiempochakunchej orakunapaj, Jesuspa wañuynin may valorniyoj kasqanpitaj tʼukurinapaj. Chantapis predicanapaj may kusiywan astawan tiempochakunchej. Ajinamanta chay sumaj tantakuyman tukuy atisqanchejta runasta invitarinapaj. Astawanpis ni ima jarkʼanawanchejta munanchejchu Jesuspa Wañuyninta Yuyarinapaj tantakuyman rinanchejpaj.

3. ¿Imatá kay yachaqanapi qhawarisun?

³ Jehovaj kamachisnenqa mayta kallpachakunchej Jesuspa Wañuyninta Yuyarinapaj tantakuyta ruwanapaj. Kay yachaqanapi qhawarisun chaypaj kinsa imasta ruwasqanchejta: 1) Jesús nisqanman jina chay tantakuyta ruwanchej, 2) wajkunata wajyarinchej chay tantakuyman jamunankupaj, 3) ima jarkʼay kajtinpis chay tantakuyta ruwanchejpuni.

4. 1) ¿Ima cheqa yachachiykunatataj Jesuspa Wañuyninta Yuyarinapaj tantakuypi sapa wata sutʼinchakun? (Lucas 22:19, 20). 2) ¿Imaraykutaj chay yachachiykunata entiendey may sumajpuni?

⁴ Sapa wata Jesuspa Wañuyninta Yuyarinapaj tantakuyman rejtinchej, Bibliamanta orqhosqa uj discursota uyarinchej. Chaypitaj wakin tapuykunaman sutʼisituta kutichikun. Yachakunchej imaraykuchus kacharichisqa kayta necesitasqanchejta, imaynatatajchus uj runaj wañuyninnejllata ashkha runaspa juchasninku perdonasqa kayta atisqanta. Chaypeqa yuyarichillawanchejtaj pikunachus tʼantata mikhusqankuta, vinotapis ujyasqankuta. Chantá imawanchus chaykuna ninakusqantapis (Lucas 22:19, 20 leey). Chay discursota uyarishaspaqa tʼukurinchej kay jallpʼapi kausakuyta suyakojkuna ima bendicionestachus japʼinankupi (Isa. 35:5, 6; 65:17, 21-23). Chay cheqa yachachiykunata entiendesqanchejqa may sumajpuni. May chhika runasqa mana chay yachachiykunata entiendenkuchu, nitaj yachankuchu Jesuspa wañuynin may valorniyojpuni kasqanta. Chantapis mana Jesuspa nisqanman jinachu wañuyninta yuyarikunku. ¿Imarayku?

5. Jesuspa casi tukuynin apostolesnin wañupusqankutawan, ¿imaynatataj runas Jesuspa wañuyninta yuyariyta qallarerqanku?

⁵ Jesuspa casi tukuynin apostolesnin wañupusqankumanta pisi tiemponman, llulla cristianos congregacionman yaykuykuyta qallarerqanku (Mat. 13:24-27, 37-39). Chay runastaj ‘cheqa kajta qʼewej kanku creejkunata paykunaj qhepankuta pusanankupaj’ (Hech. 20:29, 30). Tiemponmanqa yachachiyta qallarerqanku Jesusqa mana ‘uj kutillatachu wiñaypaj jaywasqa kasqanta, ashkha runaspa juchasninkuta apananpaj’. Chaytaj cheqa kajta qʼewispa yachachisqankumanta ujnin karqa. Paykunaqa yachachej kanku Cristoqa kutin kutita wañunan kasqanta, Bibliataj mana chaytachu yachachin (Heb. 9:27, 28). Kunanpis allin sonqoyoj ashkha runasqa chay llulla yachachiypi creellankutaj. Paykunaqa sapa semana, wakin kutitaj sapa día iglesiaman rinku Jesuspa wañuyninta yuyarinankupaj. Chay tantakuyta catolicosqa sutichanku el sacrificio de la misa nispa. b Wakin religionestajrí maypi jinalla Jesuspa wañuyninta yuyarikunku. Jinapis chay iglesiasman rejkunamanta ashkhasqa, mana sutʼita entiendenkuchu imayna valorniyojpunichus Jesuspa wañuynin kasqanta. Ichapis wakenqa tapukunkuman: “¿Ciertopunichu Jesuspa wañuyninrayku juchasniy perdonasqa kanman?”, nispa. Wakenqa ajinata tapukuyta yachanku Jesuspa wañuynenqa juchasninchej perdonasqa kananpaj mana sirvisqanta runas creeykuchisqankurayku. Cristota qhatejkunarí, ¿ajinallatatajchu ruwanku?

6. ¿Imatataj 1872 watapi uj qotu Bibliamanta yachaqajkuna entienderqanku?

⁶ Uj qotu Bibliamanta yachaqajkunaqa, 1870 watapi Diospa Palabranta sumajta ukhunchayta qallarerqanku. Paykunamanta umataj Charles Russell karqa. Paykunaqa sumajta entiendeyta munarqanku imayna valorniyojpunichus Jesuspa wañuynin kasqanta, imaynatachus chay wañuyninta yuyarikunankutapis. Paykunaqa 1872 watapi, Bibliaj yanapayninwan entienderqanku Jesusqa tukuy runasta kacharichinanpaj wañusqanta. Chay entiendesqankutataj mana pakaykorqankuchu. Manaqa librosnejta, periodicosnejta, revistasnejta tukuy yachanankupaj sutʼincharqanku. Pisi tiemponmantaj, Jesuspa Wañuyninta Yuyarinapaj tantakuytaqa watapi uj kutillata ruwayta qallarerqanku ñaupa tiempo cristianos jina.

7. Bibliamanta yachaqajkuna sumajta ukhunchasqanku, ¿imaynatá noqanchejta yanapawanchej?

⁷ Jaqay wataspi chay cristianos sumajta  ukhuncharisqanku, ¿imaynatá noqanchejta yanapawanchej? Jehovaqa chay kallpachakusqankuta bendicerqa. Chayrayku kunanqa sutʼita entiendenchej imayna valorniyojpunichus Jesuspa wañuynin kasqanta, imaschus wañusqanrayku ruwakunantapis (1 Juan 2:1, 2). Chantapis yachakullanchejtaj Bibliaqa Diosta kasukoj runaspaj iskay suyakuykunamanta parlasqanta. Wakenqa cieloman ripuspa mana jaykʼaj wañoj cuerpoyoj kayta suyakushanku. May chhika runastaj kay jallpʼapi wiñaypaj kausakuyta suyakushanku. Jehová mayta munakuwasqanchejpi piensarispa, Jesuspa wañuynin imaynatapunichus sapa ujninchejta yanapawasqanchejpi piensarispa ima Jehovaman astawan qayllaykunchej (1 Ped. 3:18; 1 Juan 4:9). Chayrayku ñaupa tiempomanta hermanosninchej jinallataj, waj runasta wajyarinchej Jesuspa Wañuyninta Yuyarinapaj tantakuyman jamunankupaj. Chay tantakuytaqa ruwanchej Jesús nisqanman jinapuni.

8. ¿Imatataj Jehovaj kamachisnin ruwanku runasta Señorpa Cenanman invitanankupaj? (Fotosta qhawariy).

⁸ Jehovaj kamachisnenqa may chhika watastaña runasta invitarinchej Jesuspa Wañuyninta Yuyarinapaj tantakuyman jamunankupaj. Kay Torremanta Qhawaj revistataj, 1881 watapi Estados Unidospi tiyakoj hermanosta invitarqa Alleghenypi (Pensilvaniapi) uj hermanoj wasinpi chay tantakuy ruwakunan karqa chayman rinankupaj. Chaymantataj sapa congregacionpiñataj Jesuspa Wañuyninta Yuyarinapaj tantakuyta ruwayta qallarerqanku. 1940 watapitaj marzo killapi, publicadoresta nikorqa tiyakunku chay lugarmanta mayqen runallatapis Bibliamanta yachakuyta munajtin invitariyta atisqankuta. 1960 watapitaj, primera vez Betelmantapacha congregacionesman invitacionesta apachikorqa. Chay kutimantapacha, Jehovaj testigosnenqa may chhika invitacionestaña runasman  jaywanchej. ¿Imaraykutaj tiempochakunchej, maytataj kallpachakunchej runasta chay tantakuyman invitanapaj?

9, 10. ¿Pikunatataj yanapallantaj Señorpa Cenanman invitarinapaj kallpachakusqanchej? (Juan 3:16).

⁹ ¿Imaraykutaj runasta Jesuspa Wañuyninta Yuyarinapaj tantakuyman invitarinchej? Munanchej yachanankuta imatachus Jehovawan Jesuswan tukuy runasrayku ruwasqankuta (Juan 3:16 leey). Imatachus chay chʼisi primera vez rikusqanku, uyarisqankupis sonqonkuta aysananta munanchej Jehovata astawan rejsinankupaj, kamachisnintaj kayta munanankupaj. Jinapis chay invitasqanchejqa mana paykunallatachu yanapan.

¹⁰ Invitallanchejtaj chiriyapoj hermanostapis. Paykunataqa invitarinchej Diosninchej paykunata munakullasqantapuni yuyarichinapaj. Maytataj kusikunchej paykunamanta ashkhas jamojtinku. Chay tantakuypi kaspaqa yuyarikunku Jehovata sirvishaspa imayna kusisqachus karqanku chayta. Monicamanta parlarina. c Payqa coronavirus onqoy kashajtin watejmanta predicayta qallarerqa. 2021 watapitaj Jesuspa Wañuyninta Yuyarinapaj tantakuyman riytawan nerqa: “Kay watapi Jesuspa Wañuyninta Yuyarinapaj tantakoyqa may sumajpuni noqapaj karqa. 20 watasmanta primera vez runasman predicarqani, Jesuspa Wañuyninta Yuyarinapaj tantakuymantaj invitarerqani. Chaytaqa tukuy sonqo ruwarqani. Chayllawanpis imatachus Jehovawan Jesuswan noqarayku ruwasqankumanta agradecekunaypaj”, nispa (Sal. 103:1-4). Invitajtinchej runas jamojtinkupis manapis, tukuy atisqanchejta kallpachakunchej invitarinapaj. Noqanchejqa yachanchej Jehovaqa chay kallpachakusqanchejta may sumajpaj qhawasqanta.

11. ¿Imaynatataj Jehová bendecin Jesuspa Wañuyninta Yuyarinapaj tantakuyman runasta invitarinapaj kallpachakusqanchejta? (Ageo 2:7).

¹¹ Jehovaqa Jesuspa Wañuyninta Yuyarinapaj tantakuyman runasta invitarinapaj kallpachakusqanchejta mayta bendecin. Coronavirus onqoy kasqanrayku mana tantakuyta atejtinchejpis, 2021 watapeqa 21.367.603 runas chay tantakuyta uyarerqanku. Jehovaj testigosnenqa mundo enteropi chaymanta ni khuskanpis kanchejchu. Jinapis Jehovapajqa mana ashkha runas jamusqankuchu aswan importante, manachayqa runas (Luc. 15:7; 1 Tim. 2:3, 4). Kayta sutʼita yachanchej: Jehovaqa wajkunata chay tantakuyman invitarejtinchej, yanapashawanchej allin sonqoyoj runasta tarinapaj (Ageo 2:7 leey).

12. ¿Ima jarkʼaykunataj kanman Jesuspa Wañuyninta Yuyarinapaj tantakuyman mana rinanchejpaj? (Fotota qhawariy).

¹² Jesusqa nerqaña kay qhepa pʼunchaykunapi imaymana problemasniyoj kananchejta: familianchej churanakunawanchejta, qhatiykachasqas kananchejta, guerras kananta, wañuchej onqoykuna kanantapis (Mat. 10:36; Mar. 13:9; Luc. 21:10, 11). Chay imasqa jarkʼaykuna kanman Jesuspa Wañuyninta Yuyarinapaj tantakuyta ruwananchejpaj. ¿Imatá hermanosninchej ruwarqanku chay jarkʼaykuna kajtinpis, chanta imaynatá Jehová paykunata yanaparqa?

13. Artiom Señorpa Cenanta mana manchachikuspa ruwaytapuni munasqanta, ¿imaynatá Jehová bendicerqa?

¹³ Carcelpi kashajtinchej. Creeyninkurayku carcelpi kaj hermanosqa tukuy atisqankuta kallpachakunku Cristoj wañuyninta yuyarikunankupaj. Artiommanta parlarina. Payqa 2020 watapi Jesuspa Wañuyninta Yuyarinapaj tantakuyta ruwana semanaspi, carcelpi wisqʼasqa kasharqa. Kasharqa chay cuartitotaj 17 metros cuadradosniyoj karqa, chaymantaj phishqa presosta wisqʼaykoj kanku. Jinapis payqa wakin imasta consiguerqa tʼantawan vinowan ninakunanpaj, wakichikorqataj pay kikinpaj discursakunanpaj. Chaywanpis uj chʼampay karqa. Paywan  khuska wisqʼasqa compañerosnenqa cigarrota pitaj kanku, diantintataj millay palabrasta parlaspa kaj kanku. ¿Imatá pay ruwarqa? Rogarikorqa uj horallatapis ama chay millay palabrasta parlanankupaj, nitaj pitanankupaj. Tʼukunapaj jinataj “ya” nerqanku. Artiom nin: “Imachus Señorpa Cenanpi ruwakusqanta sutʼincharinayta nerqani”, nispa. Mana yachayta munasqankuta nejtinkupis, Señorpa Cenanta ruwayta tukojtenqa astawan sutʼincharinanta nerqanku.

14. ¿Imatataj Jehovaj llajtan ruwarqa coronavirus onqoy kajtinpis Señorpa Cenanta ruwananpaj?

¹⁴ Coronavirus onqoy kashajtin. Chay onqoy kasqanrayku Jehovaj llajtanqa Jesuspa Wañuyninta Yuyarinapaj tantakuyta mana Tantakuna Wasispi ruwayta aterqanchejchu. Jinapis ruwarqanchejpuni. d Internetniyoj kaj congregacionesqa, videonejta conectakuspa chay tantakuyta ruwarqanku. Mana Internetniyoj kaj may chhika hermanosrí, ¿imatá ruwarqanku? Wakin suyuspeqa Señorpa Cenanmanta discursota telenejta chayri radionejta uyaricherqanku. Chantapis sucursalesqa 500 kuraj parlaykunapi chay discursota grabarqanku. Ajinamanta aswan karupi tiyakoj hermanospis, Jesuspa Wañuyninta Yuyarinapaj tantakuyta ruwayta atinallankupajtaj.  Wakin hermanostaj karupi tiyakoj hermanosman chay grabasqasta aparqanku.

15. ¿Imatataj Suemanta yachakunchej?

¹⁵ Familianchej churanakuwajtinchej. Wakenqa familianku churanakusqankurayku, mana Señorpa Cenanta ruwayta atillarqankuchu. Chayqa paykunapaj aswan jatun jarkʼay karqa. Bibliamanta yachakoj Sue ajinapi rikukorqa. 2021 watapi Jesuspa Wañuyninta Yuyarinapaj tantakuy ruwakunanpaj uj día faltashajtin, Sueqa Bibliamanta yachachejninman nerqa familian churanakusqanrayku mana chay tantakuyta ruwayta atinanta. Chay hermanataj Lucas 22:44 versiculota leeriporqa. Sutʼincharerqataj problemasniyoj kaspaqa, aswan allin kasqanta Jesús jina ruway, Jehovamantataj mañakuy yanapanawanchejmanta mana iskayrayaspa. Qʼayantintaj Sueqa tʼantatawan vinotawan wakicherqa, jw.org nisqapitaj uyarerqa Jesuspa Wañuyninta Yuyarinapaj pʼunchaypaj Betelpi sapa paqarin Bibliamanta sutʼinchakusqanta. Chʼisintaj cuartonpi wisqʼaykukuytawan Jesuspa Wañuyninta Yuyarinapaj tantakuyta telefononejta uyarerqa. Chaymantataj Bibliamanta yachachisharqa chay hermanaman kayta qhelqarqa: “Qaynaqa sumajtapuni kallpachariwarqanki. Tukuy atisqayta kallpachakorqani Jesuspa Wañuyninta Yuyarinapaj tantakuyta uyarinaypaj, Jehovataj yanapawarqa. Yachawajchus, may kusisqapuni kashani, may agradecesqataj”, nispa. Qanpis Sue jinallataj rikukushanki chay, ¿Jehová yanapasunkimanchu?

16. ¿Imaraykutaj nisunman Jehová Señorpa Cenanman rinapaj kallpachakusqanchejta bendecinantapuni? (Romanos 8:31, 32).

¹⁶ Jehovaqa Wawanpa wañuyninta yuyarikunapaj kallpachakusqanchejta may sumajpaj qhawan. Imatachus pay noqanchejrayku ruwasqanmanta agradecekusqanchejta rikuchejtinchejqa bendeciwasunpuni (Romanos 8:31, 32 leey). Kay wata Jesuspa Wañuyninta Yuyarinapaj tantakuyman riytapuni munanchej. Chantapis chay tantakuy ñaupaj semanasta qhepan semanastapis Jehovapaj astawan llankʼana.