1, 2. ¿Ima llakiykunapitaj Jehovaj kamachisnin rikukusunman?

 IMAPIS pasajtin, kausayninchej ujllata cambianman. Wakin hermanosninchejmanta parlarina. Uj día uj doctor hermanonchej Luisman nerqa mana rejsisqa cancerniyoj kasqanta, chayraykutaj uj mashkha killasllataña kausananta. a Monikaqa qosanwan khuska Jehovata tukuy atisqankuta sirvisharqanku, qosanqa anciano karqa. Chayllapitaj yacharqa qosanqa unayña mana allintachu purishasqanta. Soltera hermananchej Oliviataj sinchʼi muyoj wayra jamushasqanta yachaspa wasinmanta ayqekorqa. Wasinman kutipuspataj wasintaqa qʼala thuñisqallataña tariparqa. Chay hermanospa kausayninkoqa kaymanta jinalla ujllata cambiarqa. ¿Noqanchejpis maykʼajllapis ajinapi rikukorqanchejchu?

² Jehovaj kamachisnenqa tukuy runas jinallataj llakiykunapi rikukunchej, onqonchejtaj. Pero mana chayllachu, wakin runasqa Jehovaj llajtanta chejnikunku. Noqanchejtaj paykuna churanakuwasqanchejta, qhatiykachawasqanchejtapis aguantananchej tiyan. Jehovaqa chay imas pasanawanchejmanta mana jarkʼawanchejchu, jinapis chay imaspi rikukushajtinchej yanapanawanchejta niwanchej (Isa. 41:10). Jehovaj yanapanwanqa kusisqallapuni kayta atisunman, allin kajta ajllasunman, sinchʼi llakiypi kashaspataj paypa ladollanpipuni kasunman. Kay yachaqanapi qhawarisun Jehovaqa llakiykunata aguantanapaj tawa imasnejta yanapawasqanchejta. Qhawarillasuntaj chaywan imaynatachus yanapachikunata.

 JEHOVÁ JARKʼAWASUN

3. ¿Imatataj mana ruwayta atillanchejchu sinchʼi llakiykunapi rikukojtinchej?

³ ¿Imaraykú mana atikullanchu? Llakiypi kashanchej chayqa, ichapis mana allinta piensariyta, nitaj imatapis allinta ajllayta atillasunmanchu. ¿Imarayku? Ichapis sonqonchej nanasqa kasqanrayku, may llakiypitaj kashasqanchejrayku yuyay chinkasqa jina kasunman, nitaj yachasunmanchu imatachus ruwananchejta. Ajinapi rikukorqanku ñaupaj parrafopi parlarerqanchej chay iskay hermanasninchej. Olivia nin: “Sinchʼi muyoj wayra wasiyta apakapusqanta rikuspa maytapuni llakikorqani, nitaj yacharqanichu imatachus ruwanayta”, nispa. Monikataj qosan wasanchasqanmanta nin: “Nipuni niyta atiymanchu imayna sonqo pʼakisqachus kashasqayta. Sonqoytapis cuchillowan tʼojsiykuwankuman jina sientekorqani, sapa día ruwanasniytapis mana ruwayta atejchu kani. Ni jaykʼaj yuyarqanichu ajinapi rikukunayta”, nispa. Jehová, ¿imaynata yanapanawanchejtataj niwanchej ajina llakiypi rikukojtinchej?

4. ¿Imatá Jehová niwanchej Filipenses 4:6, 7 versiculospi?

⁴ ¿Imatá Jehová ruwan? Payqa niwanchej “sonqo tiyaykuyta” qonawanchejta (Filipenses 4:6, 7 leey). ¿Imataj chay sonqo tiyaykuy? Sonqonchej phaj nirisqan, nitaj llakiywan atipachikuy. Chaytataj tarinchej Jehovaj amigosnin kasqanchejrayku. Chay sonqo tiyaykuytaj may sumaj, chaytataj “runas mana entiendeyta atinkuchu”. ¿Maykʼajllapis sonqo ukhumantapacha maytapuni Jehovamanta mañakorqanchejchu, repararqanchejtajchu sonqonchej phaj nirisqanta? Chay ‘sonqo tiyaykuytaqa’ Dioslla qowanchej.

5. ¿Imaynatá Dios “sonqo tiyaykuyta” qowasqanchej yuyayninchejta, sonqonchejtapis jarkʼan?

⁵ Dios “sonqo tiyaykuyta” qonawanchejmanta parlaspa, Filipenses 4:7 nillantaj ‘sonqonchejta, yuyayninchejtawan waqaychasqanta’. Griego parlaypi ‘waqaychay’ palabrata oqharikun uj llajtata jarkʼaj soldadosmanta parlanapaj, ajinamanta ni pi yaykuykunanpaj. Chayrayku chay llajtapi tiyakojkunaqa gusto puñurikuyta atillaj kanku, soldados chay llajtata jarkʼasqankurayku. Ajinallatataj Dios “sonqo tiyaykuyta” qowasqanchejqa sonqonchejta, yuyayninchejtawan jarkʼan. Chayraykutaj ni imata manchachikunchejchu, sonqo tiyasqataj kanchej (Sal. 4:8). Llakiyninchej mana chay ratochu allinchakojtinpis, Anajta jina sonqonchej tumpallatapis tiyaykunman (1 Sam. 1:16-18). Ajinamanta sumajta piensariyta atillasun, sumajtataj imatapis ajllasun.

6. ¿Imatá ruwasunman Dios sonqo tiyaykuyta qonawanchejpaj? (Fototawan qhawariy).

⁶ ¿Imatá noqanchej ruwananchej tiyan? Imaynatachus uj llajtapi runas uj qhawaj  soldadota nej kanku jarkʼananta, ajinallatataj noqanchejpis Jehovamanta mañakusunman jarkʼanawanchejta. Paymantaqa mañakuna “sonqo tiyaykuyta” qonawanchejkama (Luc. 11:9; 1 Tes. 5:17). Luista doctor pisi killasllataña kausananta nejtin, paywan Anawanqa chayta ruwarqanku. Luis nin: “Ajina llakiypi kajtinchejqa, mana atillanchejchu ima tratamientotachus ajllayta, imatachus ruwaytapis. Jinapis Jehovamanta mañakorqayku, chaytaj yanapawarqayku chay tiempopi sonqo tiyasqalla kanaykupaj”, nispa. Paykuna nerqanku kutin kutita Jehovamanta maytapuni mañakusqankuta, sonqo tiyaykuyta qonanpaj, sonqonkuta jarkʼananpaj, sumajta ajllanankupajtaj allin yuyayta qonanta. Repararqankutaj Jehovaqa mañakusqankuman jina ruwasqanta. Noqanchejpis ajina llakiypi kashanchej chayqa, Jehovamanta mañakunallapuni. Reparasuntaj imaynatachus Jehová sonqo tiyaykuyta qowasqanchejta, sonqonchejta, yuyayninchejtapis jarkʼasqanta (Rom. 12:12).

JEHOVÁ SINCHʼITA SAYACHIWASUN

7. ¿Imaynataj sientekusunman sinchʼi llakiypi kashaspa?

⁷ ¿Imaraykú mana atikullanchu? Sinchʼi llakiypi kashaspaqa mana sinchʼita sayayta atillasunmanchu, nitaj allinta piensarikuyta, chayri imatapis allinta ruwayta atillasunmanchu, waj kutispi jinaqa. Ichapis chinkasqa jina sientekusunman, imaynatachus uj barcota yakoj qhollchoqeyasqan kayman jaqayman apaykachan ajinata. Ajinapi rikukorqa Ana qosan Luis wañupojtin. Pay nerqa: “Wakin kuteqa ni piniyoj jina sientekorqani, ‘¿imajtintaj noqapuni kay jinapi rikukunay karqari?’ nispataj nej kani. Wakin kutistaj phiñakoj kani Luis manaña noqawan kashasqanmanta”, nispa. Wakin diastaj payqa sapallan sientekoj. Qosan imastachus ñaupajta ruwaj chaykunata payñataj ruwanan kasqanrayku, mana atisqanta yuyaj. Paypajqa mar chaupipi sinchʼi loco parapipis kashanman jina karqa. ¿Imaynatá Jehová yanapawasunman llakiyninchej atipanawanchejpajña kashajtin, manataj llakiywan atipachikunapaj?

8. ¿Imatá Jehová niwanchej Isaías 33:6 versiculopi?

⁸ ¿Imatá Jehová ruwan? Pay niwanchej allin kausayta qonawanchejta, nisunman sinchʼita sayachinawanchejta (Isaías 33:6 leey). Sinchʼi loco wayraqa barcota kayman jaqayman manchayta kuyuykachachiyta qallarinman, mana ajina kananpajqa ashkha barcospata aletitas jina kapun. Chayrayku wayraqa mana sinchʼita kuyuykachachillanchu. Barcoj pasajerosnintaj mana manchachikunkuchu, tranquilosllataj viajanku. Chay aletitasnenqa barco purejtinpuni aswan sumajta funcionanku. Ajinallatataj noqanchejpis ruwananchej tiyan sinchʼi llakiypi kashaspa. Jehová sinchʼita sayachinawanchejta munanchej chayqa, ñaupajllamanpuni  rinanchej tiyan, nisunman payta tukuy sonqo sirvinallanchejpuni tiyan.

9. Jehovaj llajtan qowanchej chay yanapas, ¿imaynatá yanapawanchej sinchʼita sayanallapajpuni? (Fototawan qhawariy).

⁹ ¿Imatá noqanchej ruwananchej tiyan? Sinchʼi llakiypi kashanchej chayqa, tukuy imata ruwana Jehová Diosman orakunallapajpuni, reunionesman, predicacionmanpis mana faltakunapaj. Ichapis mana ñaupajta jinañachu ruwayta atisun. Pero Jehovaqa mana mañawanchejchu mana atisqanchejtaqa (Lucas 21:1-4, kikinchay). Tiempochakunapuni sapallanchejpi Bibliata estudianapaj, tʼukurinapaj ima. Jehová Diosqa llajtannejta qowanchej yachaqanasta, sumaj videostapis. Chaykunataj sinchʼita sayanapaj yanapawasunman. Mayqentachus necesitasqanchejta tarinapajqa, maskʼasunman JW Library^® nisqa aplicacionpi, Índice de las publicaciones Watch Tower nisqapi, Jehovaj testigosnin yachaqanasta maskʼanankupaj publicacionpipis. Monikaqa llakiynin astawan yapakunanpaj jina kashajtin, chay publicacioneswan yanapachikoj. Wakin kutisqa maskʼaj phiñakuymanta, wasanchaymanta, tukuy sonqo kasukuymantapis. Chaykunatataj leej allillanña sientekunankama. Pay nin: “Sonqoy mayta nanawajtinpis chaykunata maskʼajpuni kani. Chaymanta sonqoyqa phaj nirej. Jehovapis abrazaykuwanman jina sientekoj kani. Leeshasqayman jina reparaj kani Jehovaqa imaynachus sintekusqayta sumajta entiendesqanta, yanapashawasqantataj”, nispa. Jehovaqa noqanchejtapis yanapallawasuntaj sonqonchej tiyaykunankama, ajinamanta llakiyninchejwan mana atipachikusunchu (Sal. 119:143, 144).

JEHOVÁ YANAPAWASUN

10. Ima llakiypis qhatiriwajtinchej, ¿imayná sientekusunman?

¹⁰ ¿Imaraykú mana atikullanchu? Ima llakiypis qhatiriwajtinchej ichapis wakin diasqa may saykʼusqa sientekusunchej, may sonqo nanasqataj. Ichapis uj corredor jina rikukusunman, pichus ñaupajta sumajta correj, kunantaj imata ruwarpakusqanrayku cojoykachashan. Facilta ruwaj kanchej chay imastapis niña ruwayta atillasunmanchu, ñaupajta gustawarqanchej chay ruwanastapis niña ruwayta munasunmanchu. Elías jina ichapis puñullaytaña munasunman (1 Rey. 19:5-7). Ajina llakiypi kashajtinchej, ¿imata ruwanantataj Jehová niwanchej?

11. ¿Imatawantaj Jehová ruwan yanapanawanchejpaj? (Salmo 94:18).

¹¹ ¿Imatá Jehová ruwan? Pay niwanchej yanapanawanchejta (Salmo 94:18 leey). Imaynatachus uj corredor runa imanarpakuspa purinanpaj yanapata necesitan, ajinallatataj  noqanchejpis yanapata necesitasunman Jehová Diosta sirvinallapajpuni. Chay kutispi Jehová niwanchej: “Noqa Jehová Diosniykeqa paña makiykimanta japʼishayki. Noqaqa niyki: ‘Ama manchachikuychu. Noqa yanapasqayki’”, nispa (Isa. 41:13). Rey Davidqa imaymana llakiykunapi rikukuspa, enemigosnintaj qhatiykachajtinku, repararqa Jehová Diosqa ladonpipuni kashasqanta. Chayraykutaj pay nerqa: “Qanmin paña makiykiwan japʼiwanki”, nispa (Sal. 18:35). Pero, ¿imaynatá Jehová yanapawanchej?

12. May llakisqa kashajtinchej, ¿piwantaj Jehová yanapachiwasunman?

¹² Ashkha kutispi Jehovaqa wajkunaj sonqonkuta aysan yanaparinawanchejpaj. Uj kutipi Davidqa may desanimasqa kasharqa. Amigon Jonatantaj kallpacharejtaj sonqocharejtaj rerqa (1 Sam. 23:16, 17). Eliastataj Jehovaqa Eliseowan yanapacherqa (1 Rey. 19:16, 21; 2 Rey. 2:2). Noqanchejtapis Jehovaqa yanapachiwasunman familianchejwan, amigosninchejwan chayri ichapis ancianosninchejwan. May llakisqa kashasqanchejrayku ichapis wakin kutisqa sapallanchej kayta munanchej. Chaytaj ajinapuni kayta yachan. Jinapis, ¿imatá ruwananchej tiyan Jehovawan yanapachikunapaj?

13. ¿Imatá ruwananchej tiyan Jehovaj yanapanta japʼikunapaj? (Fototawan qhawariy).

¹³ ¿Imatá noqanchej ruwananchej tiyan? Ama wajkunamanta karunchakunachu, chayta ruwayta munajtinchejpis. Wajkunamanta karunchakuspaqa noqallanchejpi, problemasnillanchejpitaj anchata yuyasunman. Chayraykutaj imatapis mana allintachu ajllasunman (Pro. 18:1). Llakiypi kashaspaqa sapallanchejpuni astawan kayta munanchej, astawanraj uj sinchʼi llakiy qhatiriwajtinchej. Jinapis sapallanchej tukuy tiempo kayta munaspaqa, Jehovaj yanapanta qhesachashasunman, yanapantapuni chay kutispi necesitashajtinchejpis. Chayrayku mana atinapaj jinallachu kajtinpis, yanapachikuna familianchejwan, amigosninchejwan, ancianoswanpis. Paykunataqa qhawana Jehovaj kachamusqan yanapata jina (Pro. 17:17; Isa. 32:1, 2).

JEHOVÁ SONQOCHAWASUN

14. ¿Imastaj manchachiwasunman?

¹⁴ ¿Imaraykú mana atikullanchu? Ichapis wakin kutisqa may mancharisqas kashasunman. Bibliaqa willawanchej Jehovaj wakin kamachisnenqa manchikuywan maytapuni kharkatisqankuta enemigosninkurayku, chayri waj sinchʼi problemasrayku (Sal. 18:4; 55:1, 5). Noqanchejmanrí, ¿churanakushawanchejchu escuelamanta,  trabajomanta compañerosninchej, chayri familiaresninchej, gobierno partemanta autoridadespis? Sinchʼi onqosqa kasqanchejrayku, ¿wañuy patapichu kashanchej? Ajina llakiykunapi kaspa, ichapis mana piniyoj wawita jina sientekusunman. ¿Imatá Jehová ruwan yanapanawanchejpaj?

15. Salmo 94:19 nisqanman jina, ¿imata ruwanantataj Jehová niwanchej?

¹⁵ ¿Imatá Jehová ruwan? Payqa sonqochawanchej, sonqonchejtataj tiyaykuchin (Salmo 94:19 leey). Tʼukurina uj imillitapi. Payqa may mancharisqa kashan, nitaj puñukuyta atinchu sinchʼita parashasqanrayku, rayostaj urmamushasqanrayku. Tatantaj rispa abrazaykun mana manchachikuspa puñukapunankama. Paraqa sinchʼita paramushallanpuni, jinapis imillitaqa tatanpa makinpi kasqanrayku niña manchachikunchu. Kikillantaj kanman noqanchejwanpis manchariywan kharkatishanchej chayqa. Ichapis necesitasunman Tatanchej Jehová abrazaykunawanchejta aswan sumaj sientekunanchejkama. ¿Imatá ruwananchej tiyan Jehová sonqochanawanchejpaj?

16. Jehová sonqochanawanchejta munanchej chay, ¿imatá ruwananchej tiyan? (Fototawan qhawariy).

¹⁶ ¿Imatá noqanchej ruwananchej tiyan? Tiempochakunanchejpuni tiyan Jehovawan parlarinapaj, Palabrantapis leerinapaj (Sal. 77:1, 12-14). Ajinamanta uj sinchʼi llakiypi kashajtinchej, Tatanchej Jehovaj yanapantarajpuni ñaupajta maskʼasun. Payman willarina imachus llakichiwasqanchejta, imachus manchachiwasqanchejtapis. Saqenataj Jehová kutichinawanchejta, Palabranwantaj sonqochanawanchejta (Sal. 119:28). Bibliamanta wakin partes llakiypi kashajtinchej maytapuni sonqochawasunman. Wakenqa kanku Job libro, Salmos libro, Proverbios libro, imatachus Jesús Mateo 6 capitulopi nisqanpis. Sichus Jehovaman orakusun, Palabrantataj leesun chayqa, reparasun imaynatachus sonqochawasqanchejta.

17. ¿Imatataj yuyarikunanchejpuni tiyan?

¹⁷ Kaykunata yuyarikunapuni: Aswan sinchʼi llakiypi kashajtinchejpis, Jehovaqa chaypipuni kanqa yanapanawanchejpaj, ni jaykʼaj sapanchejta saqerpariwasunchu (Sal. 23:4; 94:14). Payqa niwanchej jarkʼanawanchejta, sinchʼita sayachinawanchejta, yanapanawanchejta, sonqochanawanchejta ima. Isaías Jehovaman nerqa: “Qanpi tukuy sonqo atienekojkunata jarkʼanki, sonqo tiyaykuyta paykunaman qonki, qanpi atienekusqankurayku”, nispa (Isa. 26:3). Chayrayku Jehovapi atienekuna, ima yanapastachus qowasqanchejwantaj yanapachikuna. Chayta ruwasun chayqa, aswan sinchʼi llakiyta aguantanapajpis kallpanchej kallanqa.