1. ¿Imajtintaj Jesuspa wañuyninta yuyarikuy watantinmanta aswan jatun pʼunchay? (Lucas 22:19, 20).

 ¿IMATAJ Jehovaj testigosninpaj watapi aswan jatun pʼunchay? Jesuspa wañuyninta yuyarikuy. Jesusqa chayllata yuyarikunanchejta kamachiwarqanchej (Lucas 22:19, 20 leey). Ashkha imasrayku chay día chayamunallantaña mayta suyakushanchej. Qhawarina wakinta.

2. ¿Imasraykutaj Señorpa Cenan chayamunallantaña munashanchej?

² Señorpa Cenanqa Jesuspa wañuynin may valorniyoj kasqanta yuyarichiwanchej. Chay tantakoyqa yuyarichiwanchej Jesuspa wañuyninmanta imaynasmantachus agradecekuyta atisqanchejta (2 Cor. 5:14, 15). Chantapis yanapallawanchejtaj hermanosninchejwan khuska karikunapaj, purajmantataj kallpachanakunapaj (Rom. 1:12). Sapa wata ashkha chiriyapoj hermanos Señorpa Cenanman jamunku. Chay tantakuypi hermanos paykunata kʼachamanta japʼikusqankuraykutaj, wakenqa Jehovaj llajtanman watejmanta kutinpunku. Ashkha runastaj chay tantakuypi imatachus rikusqankumanta, uyarisqankumantapis tʼukunku. Chayraykutaj Bibliamanta yachakuyta qallarinku. Tukuy chay imasrayku Señorpa Cenanqa may sumajpuni noqanchejpaj.

3. ¿Imajtintaj Señorpa Cenan Jehovaj llajtan ujchasqa kasqanta reparanapaj yanapawanchej? (Fotostawan qhawariy).

³ Chay diaqa Jehovaj llajtan imayna ujchasqachus kasqanta rikusunchej. Chayrayku suyakullanchejtaj chay día chayamunallantaña. Mundontinpi Jehovaj testigosnenqa chay tantakuyta ruwanchej inti yaykupusqantawan. Kacharichisqa kasqanchej imaraykuchus may importante kasqanmanta uj discursota uyarinchej, iskay takiykunata takinchej, tʼantatawan vinotawan pasachinchej, tawa oracionespitaj sonqomantapacha  “amén” nispa ninchej. Chaytaqa 24 horasllapi mundo enteropi tukuynin congregaciones ruwasunchej. Jehovawan Jesuswanqa maytapunichá kusikunku tukuynin kamachisnin mundo enteropi jatunchasqanchejmanta.

4. ¿Imatá kay yachaqanapi yachakusun?

⁴ Kay yachaqanapeqa kay tapuykunaman kutichisun: ¿Imaynatá Señorpa Cenanpaj sonqonchejta wakichisunman? ¿Imaynatá wajkunata yanapasunman Señorpa Cenanwan yanapachikunankupaj? ¿Imaynatá chiriyapoj hermanosta yanapasunman? Chaykunata ukhunchareyqa yanapawasun chay jatun pʼunchaypaj wakichisqa kanapaj.

¿IMAYNATÁ SEÑORPA CENANPAJ SONQONCHEJTA WAKICHISUNMAN?

5. 1) ¿Imajtintaj kacharichisqa kasqanchejpi tʼukurinanchej tiyan? (Salmo 49:7, 8). 2) ¿Imapajtaj Jesús wañorqa? nisqa videomanta, ¿imastá yachakunki?

⁵ Señorpa Cenanpaj sonqonchejta astawan wakichinchej Jesucristoj wañuynin imayna valorniyojpunichus kasqanpi tʼukurispa. Sapallanchejmantaqa juchamantawan wañuymantawan ni jaykʼaj kacharichikuyta atisunmanchu karqa (Salmo 49:7, 8 leey; ¿Imapajtaj Jesús wañorqa? nisqa videotawan qhawariy). a Chayrayku Jehovaqa munasqa Wawanta kachamorqa kausayninta noqanchejrayku qonanpaj, ajinamanta iskayninku uj jatun preciota pagarqanku (Rom. 6:23). Jehovawan Jesuswan noqanchejrayku imatachus ruwasqankupi astawan tʼukurispaqa, juchamanta kacharichisqa kasqanchejta aswan valorniyojpaj qhawasun. Kunantaj qhawarina Jehovawan Jesuswan imastachus noqanchejrayku ruwasqankuta. Pero ñaupajtaqa parlarisun kacharichiy imachus niyta munasqanmanta.

6. ¿Imataj kacharichiy niyta munan?

⁶ Pillatapis kacharicheyqa niyta munan watejmanta rantikapunapaj mashkhachus valesqan preciota pagay. Diosqa ñaupaj kaj runa Adanta mana pantayniyojta ruwarqa. Jinapis juchallikusqantawan manaña wiñaypaj kausakuyta aterqachu, nillataj wawasninpis. Jesustaj imatachus Adán pierderqa chayta watejmanta japʼinanchejpaj mana pantayniyoj kausayninta qorqa. Jesusqa kay jallpʼapi kashajtin “mana ima juchatapis ruwarqachu, nitaj siminpi ima llullakuypis karqachu” (1 Ped. 2:22). Pay wañupushajtintaj mana pantayniyoj karqa. Chayrayku kausaynenqa Adán pierderqa chay jina valornillayojtaj karqa (1 Cor. 15:45; 1 Tim. 2:6).

7. ¿Imaspitaj Jesús rikukorqa?

⁷ Jesusqa kay jallpʼapi kashaspa imaymana pruebaspi rikukuspapis, Tatan Jehovata tukuy imapi kasukorqa. Jesusqa wawitallaraj kashaspa tatasninta kasukorqa paykuna pantaj runas kajtinkupis (Luc. 2:51). Jovencito kashajtintaj, wajkunaqa tanqarqankuchá niña tatasninta kasukunanpaj, chayri Jehovata wasanchananpaj. Wiñay tukusqaña kashajtintaj, Satanasqa juchaman urmachiyta munarqa, Jehovamanta karunchachiytapis (Mat. 4:1-11). Satanasqa Jesusta juchallichiytapuni munarqa, juchamanta mana kacharichiyta atinawanchejpaj.

8. ¿Ima pruebastawantaj Jesús aguantarqa?

⁸ Jesús kay jallpʼapi willashajtin, waj pruebastawan aguantarqa. Paytaqa enemigosnin qhatiykacharqanku, wañuchinankutataj nerqanku (Luc. 4:28, 29; 13:31). Discipulosnin imaspichus pantasqankutapis aguantanan karqa (Mar. 9:33, 34). Payta wañuchinankupaj juzgashajtinkutaj maytapuni ñakʼaricherqanku, burlakorqankutaj. Chaymantataj payta suwata jina wañucherqanku, maytataj sufricherqanku  (Heb. 12:1-3). Wañupunanpajña kashajtintaj, Jehovaqa niña payta jarkʼarqachu. Chayrayku sapallanña nanayninta aguantanan karqa (Mat. 27:46). b

9. Jesuspa ruwasqanpi piensarispa, ¿imata ruwanapajtaj sonqonchej aysawanchej? (1 Pedro 1:8).

⁹ Sutʼita reparanchej Jesusqa kacharichinawanchejpaj jatun preciotapuni pagasqanta. Jesús noqanchejrayku imatachus ruwasqanpi piensarispaqa, astawan payta munakunchej (1 Pedro 1:8 leey).

10. ¿Imatá Jehová ruwarqa juchamanta, wañuymantawan kacharichinawanchejpaj?

¹⁰ ¿Imatataj Jehová ruwarqa Jesús juchamanta kacharichinawanchejpaj? Yachanchej jina, Jehovaqa Wawanta maytapuni munakorqa, Wawanpis payta mayta munakullarqataj (Pro. 8:30). Chayrayku piensarina Jehová Wawanta kay jallpʼapi pruebasta aguantashajta rikuspa, imaynachus sientekusqanpi. Jehovaj sonqonqa maytachá nanarqa Wawanta ñakʼarichisqankuta, pisipaj qhawasqankuta, maytataj sufrichisqankuta rikuspa.

11. ¿Imaynataj Jehová sientekushanman karqa Wawanta wañuchejtinku?

¹¹ Uj tatalla yachan wawan wañupojtin imayna llakiychus kasqanta. Kausarimuy kananpi sinchʼita creejtinchejpis, pinillanchejpis wañupojtenqa llakikunchejpuni. Ajinachá Jehovapis sientekorqa 33 watapi Wawanta wañuchejtinku. Munasqa Wawantaqa mayta sufrichispa wañucherqanku (Mat. 3:17). c

12. ¿Imatá ruwasunman Jesuspa Wañuyninta Yuyarinapaj tantakuy chayamunankama?

¹² Señorpa Cenan chayamunankama, ¿imatá ruwasunman? Jesús kacharichiwasqanchejmanta astawan estudiasunman sapallanchejpi Bibliata estudiashaspa, chayri familiapi Diosta yupaychashaspa. Chaypajqa Jehovaj testigosnin yachaqanasta maskʼanankupaj nisqa publicacionwan, chayri waj publicacioneswan astawan ukhunchanapaj yanapachikusunman. d Chantapis Cristiano Kausayninchej tantakuypaj folletopi Señorpa Cenanmanta Bibliata leenapaj textos rikhurin chayta leerisunman. Amataj qonqanachu Jesuspa wañuyninta yuyarinapaj pʼunchaypaj Betelpi Bibliamanta sutʼinchakusqan videota qhawariyta. Jesuspa wañuyninta yuyarinapaj sonqonchejta wakichisun chayqa, wajkunatapis yanapasun chaywan yanapachikunankupaj (Esd. 7:10).

 WAJKUNATA YANAPANA

13. Wajkuna Señorpa Cenanwan yanapachikunankupaj, ¿imatataj ñaupajta ruwana tiyan?

¹³ ¿Imatá ruwasunman wajkuna Señorpa Cenanwan yanapachikunankupaj? Ñaupajtaqa paykunata invitarina tiyan. Mana predicashaspallachu invitacionesta jaywarina, manaqa pikunatachus invitayta munanchej chaykunamanta uj listata ruwakusunman. Paykunaqa kankuman familiaresninchej, trabajomanta, escuelamanta compañerosninchej, waj rejsisqasninchejpis. Invitacionesninchej tukurpakojtintajrí, enlacepiñataj apachisunman. Ajinamanta ichapis may chhika chay tantakuyman jamonqanku (Ecl. 11:6).

14. ¿Imaraykutaj nisunman invitacionta jaywariy may sumajpuni kasqanta? Sutʼinchariy.

¹⁴ Amapuni yuyanachu qhasillata invitacionesta jaywasqanchejta. Uj hermana maytapuni tʼukorqa mana testigo qosan paywan Señorpa Cenanman rinanta nejtin. ¿Imajtín mayta tʼukorqa? Payqa ashkha kutispiña Señorpa Cenanman invitasqa, nitaj ni jaykʼaj risqachu. Chanta, ¿imajtintaj chay kutipi riyta munarqa? Qosanqa nerqa uj rejsisqan anciano paymanpuni uj invitacionta jaywarisqanta. Chayrayku mana chay watallachu Señorpa Cenanman rerqa, qhepan watasninpipis rillarqapuni.

15. Pillatapis Señorpa Cenanman invitaspa, ¿imatataj mana qonqanachu tiyan?

¹⁵ Kayta ama qonqanachu: Señorpa Cenanman invitasqanchej runasqa ichapis wakin imasta tapukushanku, astawanraj ni jaykʼaj reunionman rerqankuchu chayqa. Chayrayku piensarisunman imastachus tapukushasqankupi, imaynatachus kutichinanchejpipis (Col. 4:6). Ichapis kay imasta tapukushankuman: “¿Imatachus chay tantakuypi ruwakun í? ¿Mashkha unaytachus chay tantakuy ruwakun í? ¿Imayna ropayojchus rinay kanman í? ¿Chay tantakuyman yaykunaypaj paganaychu kanman? ¿Diezmota mañawankumanchu?”, nispa. Payta tapurina chayta yachanapaj, yachayta munasqantataj sutʼincharina. Chantapis Jesuspa wañuyninta yuyarina nisqa videota, ¿Imaynataj tantakuykunasniyku? nisqa videotapis rikuchisunman. Chantapis Wiñaypaj kusisqa  kausakuy libroj 28 leccionninpi wakin yuyaychaykuna tiyan, chay yuyaychaykunamanta invitadonchejwan parlarisunman.

16. ¿Imatawantaj invitadonchej yachayta munanman Señorpa Cenanman riytawan?

¹⁶ Invitadonchejqa Señorpa Cenanman riytawan, ichapis waj imastawan tapukonqa. Ichapis tapukonqa imaraykuchus ni pi (chayri casi ni pipuni) tʼantata mikhusqanta, vinotapis ujyasqanta. Ichapis tapukullanqataj sapa mashkha tiempochus chay tantakuyta ruwasqanchejta. Chantapis ichá yachayta munallanqataj sapa reunionesninchejpichus manachus ajinata ruwakusqanta. Señorpa Cenanpaj discursopi chaykuna sutʼinchakojtinpis, invitadonchejqa ichapis astawanraj sutʼincharinanchejta necesitanqa. Wakin tapuykunasninman kutichinapajqa, jw.org paginapi “¿Jehovaj testigosnin waj iglesias jinachu Señorpa Cenanta ruwanku?” nisqa yachaqanawan yanapachikusunman. “Allin sonqoyoj” runasta yanapayta munanchej, chay sumaj tantakuywan yanapachikunankupaj. Chaytataj tukuy atisqanchejta ruwayta munanchej chay tantakuy ñaupajta, chay tantakuypi kashajtinchej, chay tantakuy pasaytapis (Hech. 13:48).

CHIRIYAPOJ HERMANOSTA YANAPANA

17. ¿Imaynatá ancianos chiriyapoj hermanosta yanaparinkuman? (Ezequiel 34:12, 16).

¹⁷ Señorpa Cenanta yuyarinchej chay semanaspi, ¿imaynatá ancianos chiriyapoj hermanosta yanaparinkuman? Sutʼita reparachinanku tiyan paykunamanta llakikusqankuta, munakusqankutataj (Ezequiel 34:12, 16 leey). Ancianos, niraj Jesuspa Wañuyninta Yuyarinapaj tantakuyta ruwashajtinchej, tukuy chiriyapoj hermanoswan parlarinaykichejpaj kallpachakuychej. Niychej paykunamanta llakikusqaykichejta, tukuy atisqaykichejtataj yanapariyta munasqaykichejta. Señorpa Cenanman invitariychej, jamojtinkutaj munakuywan japʼikuychej. Señorpa Cenan pasajtintaj chay munasqa hermanosmanta ama qonqakuychejchu, Jehovaman kutinpunankupajtaj tukuy atisqaykichejta yanapariychej (1 Ped. 2:25).

18. ¿Imaynatá chiriyapoj hermanosta tukuy yanapasunman? (Romanos 12:10).

 ¹⁸ Chiriyapoj hermanos Señorpa Cenanman jamojtinkoqa tukuy yanaparisunman. ¿Imaynamanta? Paykunata munakuywan, kʼachamanta, respetowantaj parlapayaspa (Romanos 12:10 leey). Paykunaqa Jehová Diospa munasqa ovejitasnin kanku, paykunapajtaj nichá facilchu karqa chay tantakuyman jamoyqa. Ichapis nikorqanku: “¿Ima niwanqankutaj hermanosri?”, nispa. e Chayrayku ama pʼenqachinapaj jina imatapis tapunachu, nitaj sonqonta nanachinapaj jina imatapis ninachu (1 Tes. 5:11). Paykunaqa munasqa hermanosnillanchejpuni kanku, maytataj kusikunchej paykunawan khuska Jehovata watejmanta yupaychaspa (Sal. 119:176; Hech. 20:35).

19. ¿Imaspitaj yanapawanchej Jesuspa wañuyninta yuyarikuy?

¹⁹ Chayraykuchá Jesusqa niwarqanchej wañuyninta sapa wata yuyarikunanchejta. Chayta ruwayqa noqanchejta, wajkunatapis ashkha imaynasmanta yanapawanchej (Isa. 48:17, 18). Jehovatawan Jesustawan astawan munakunchej. Paykuna noqanchejrayku imatachus ruwasqankumanta agradecekusqanchejta rikuchiyta atinchej, hermanosninchejmanpis astawan ujchaykuchiwanchej. Chantapis runasta yanapariyta atinchej Jesuspa wañuyninrayku ima bendicioneschus kanqa, chayta paykunapis japʼinankupaj. Chayrayku kunanmantaña tukuy atisqanchejta wakichikuna Jesuspa Wañuyninta Yuyarinapaj tantakuyman rinapaj, watantinmanta aswan jatun pʼunchay kasqanrayku.