1. ¿Imaynatá Jesuspa wañuyninta sapa wata yuyarikuy yanapawanchej?

 JESUSPA wañuynenqa aswan sumaj regalo (2 Cor. 9:15). Jesús kausayninta qosqanrayku Jehovaj sumaj amigon kayta atinchej, wiñay kausaytataj japʼiyta atisunman. Jehovaqa mayta munakuwasqanchejrayku Wawanta noqanchejrayku qorqa. Chaymanta maytapuni agradecekunchej (Rom. 5:8). May agradecesqallapuni kananchejpaj Jesusqa sapa wata wañuyninta yuyarikunanchejta kamachiwarqanchej (Luc. 22:19, 20).

2. ¿Imatá kay yachaqanapi yachakusun?

² Kay 2025 watapi Jesuspa Wañuyninta Yuyarinapaj Tantakuytaqa sábado 12 de abrilta ruwasunchej. Chaymanqa riytapuni munashanchej. Jesuspa wañuyninta yuyarinapaj tiempopeqa may allinpuni kanqa tiempitota orqhokunanchej imastachus Jehovawan Jesuswan noqanchejrayku ruwasqankupi tʼukurinapaj. a Kay yachaqanapi yachakusun imastachus Jesuspa wañuynin Jehovamanta, Jesusmantawan yachachiwasqanchejta. Qhepan yachaqanapitaj yachakusun imaynatachus Jesuspa wañuynin yanapawasqanchejta, chantá imaynasmantachus agradecekunanchejtapis.

 ¿IMATÁ JESUSPA WAÑUYNIN JEHOVAMANTA YACHACHIWANCHEJ?

3. ¿Imaynatá uj runaj wañuynillan may chhika runasta salvawanchej? (Dibujostawan qhawariy).

³ Jesuspa wañuynenqa yachachiwanchej Jehová cheqan kajta munakusqanta (Deu. 32:4). ¿Imajtín chayta ninchej? Adán Jehovata mana kasukusqanrayku tukuy miraynin juchata, wañuyta ima paymanta japʼinchej (Rom. 5:12). Jehovaqa Jesusta kachamorqa juchamanta, wañuymantawan kacharichinawanchejpaj. ¿Imaynatá uj mana pantayniyoj runaj kausaynillan may chhika runasta salvayta atinman karqa? Apóstol Pabloqa kay jinamanta chayta sutʼincharqa: “Imaynatachus uj runa [Adán] mana kasukusqanrayku ashkha runas juchayoj rikhurerqanku, ajinallatataj uj runa [Jesús] kasukusqanrayku ashkha runas cheqan runapaj qhawasqa kanqanku” (Rom. 5:19; 1 Tim. 2:6). Waj parlaypi nisunman uj mana pantayniyoj runalla Diosta mana kasukusqanrayku, tukuy runas juchaj esclavosninman tukuspa wañunchej. Chayraykutaj uj mana pantayniyoj runalla Diosta kasukusqanrayku chaymanta kacharichiwarqanchej.

4. ¿Imajtintaj Jehová Adanpa kasukoj wawasninta mana saqellanmanchu karqa wiñaypaj kausakunankuta?

⁴ ¿Jesús wañunanpunichu karqa salvanawanchejpaj? ¿Manachu Jehová Adanpa kasukoj wawasninta wiñaypaj kausakunankuta saqellanman karqa? Yuyasqanchejman jinaqa ichapis Jehová chayta ruwajtenqa noqanchejpaj allillan kanman karqa. Jinapis yuyarikuna Jehovaj cheqan kaynenqa mana pantayniyoj kasqanta. Chayrayku Jehovaqa Adán chay jinata pantaykusqanta mana qhawakullarqachu, manapis ni ima pasanmanchu karqa jinaqa.

5. ¿Imajtintaj nisunman Jehová cheqan kajman jinapuni ruwasqanta?

⁵ ¿Imataj kanman karqa sichus Jehová mana noqanchejrayku Wawanta qojtin, Adanpa pantaj wawasnintataj wiñaypaj kausakunankuta saqellajtin? Chayta Jehová ruwaspaqa mana justicianman jinachu ruwashanman karqa. Runasqa yuyankuman karqa Jehová waj imaspipis mana justicianman jinachu ruwananta. Ichapis tapukunkuman karqa: “¿Nisqanta juntʼanqapunichu?”, nispa. Jinapis mana chaymanta llakikunanchejchu tiyan. Imaraykuchus Jehovaqa tukuy imata justicianman jinapuni ruwarqa, may munasqa Wawantapis noqanchejrayku wañunanpaj kachamorqa. Chayrayku manapuni iskayrayanchejchu Jehová cheqan kajtapuni ruwananmanta.

6. ¿Imaynatá Jesuspa wañuynin rikuchiwanchej Jehová mayta munakuwasqanchejta? (1 Juan 4:9, 10).

⁶ Jehová Wawanta noqanchejrayku qosqanqa mana cheqan kasqallantachu rikuchin, astawanpis runasta mayta munakuwasqanchejta rikuchin (Juan 3:16; 1 Juan 4:9, 10 leey).  Jehovaqa Wawanta noqanchejrayku wañunanpaj kachamorqa, wiñaypaj kausakunanchejta munasqanrayku, familianmantataj kananchejta munasqanrayku. Kaypi piensarina: Adanqa juchallikusqanrayku manaña Jehovaj familianmantachu karqa. Chayrayku tukuypis mana Diospa familian ukhupichu nacekunchej. Jinapis Jesús kausayninta qosqanrayku Diospi creejtinchej, kasukojtinchejtaj Diospa familianmanta kayta atisunchej. Kay tiempopiña Jehovaqa juchasninchejmanta perdonayta atiwanchej, ajinamanta paywan sumaj amigos kananchejpaj, hermanosninchejwanpis. Chaypi reparasunman Jehovaqa mayta munakuwasqanchejta (Rom. 5:10, 11).

7. Jesuspa sufrisqanpi piensariy, ¿imaynatá yanapawanchej Jehová mashkhatachus munakuwasqanchejta entiendenapaj?

⁷ Jehová mayta munakuwasqanchejta entiendenapajqa piensarina Jehovaj sonqon mashkhatachus nanasqanta Wawanta wañuchinankupaj ñakʼarichishajtinku. Satanasqa nin llakiykunapi kashajtinchej Diosta mana tukuy sonqochu kasukunanchejta. Chay nisqan llulla kasqanta rikuchinanpajtaj Jehovaqa saqellarqa Jesusta niraj wañuchishajtinku ñakʼarichinankuta (Job 2:1-5; 1 Ped. 2:21). Runas Jesusmanta burlakushajtinku, soldados seqʼoshajtinku, rakhu kʼaspimantaj clavaykushajtinku, Jehovaqa chay tukuy imasta cielomantapacha qhawamusharqa. Chantapis munasqa Wawanta sonqo nanayta wañuchishasqankuta qhawamusharqa (Mat. 27:28-31, 39). Jehovaqa Wawanta ajinata ruwashajtinku jarkʼakuyta atinman karqa. “Sichus Dios yanapayta munan chayqa librachun ari” nispa runas nishajtinku, payqa jarkʼakuyta atinman karqa (Mat. 27:42, 43). Sichus jarkʼakunman karqa chayqa, mana Jesús runasrayku wañunmanchu karqa, nitaj ima suyakuyniyojpis kasunmanchu karqa. Chayrayku Jehovaqa saqellarqa Wawanta ñakʼarichispa wañuchinankuta.

8. ¿Imaynapí yachanchej Wawanta wañuchishajtinku Jehovaj sonqon nanasqanta? (Dibujotawan qhawariy).

⁸ Jehová may atiyniyoj kaspapis mana Wawanta sufrichishajtinku jarkʼakorqachu. Mana jarkʼakusqanrayku, ¿nisunmanchu rumi sonqo kasqanta? Mana. Jehovaqa mana rumi sonqostachu ruwawarqanchej. Payman rijchʼakojta ruwawasqanchejraykutaj, reparanchej paypis mana rumi sonqochu kasqanta. Biblia nisqanman jina wakin runasqa Diospa “sonqonta nanacherqanku” (Sal. 78:40, 41). Abrahanmanta, Isaacmantawan parlarina. Jehovaqa Abrahanman nerqa wawan Isaacta uj jaywanata jina payman qonanta (Gén. 22:9-12; Heb. 11:17-19). Abrahán wawanta wañuchinanpaj wakichikushajtin, maytachá sonqon nanarqa. Jehovarí, ¿imayná sientekunman karqa Wawanta mayta ñakʼarichispa wañuchishajtinku? Mana yachayta atisunmanchu may  jinatapunichus llakiywan sonqon nanasqanta (jw.org nisqapi Creeyninkumanta yachakunachej: Abrahán (2 kaj) videota qhawariy).

9. ¿Imatá Romanos 8:32, 38, 39 yachachisunki Jehová munakususqanmanta, chanta tukuy kamachisninta munakusqanmantapis?

⁹ Jesuspa wañuynenqa yachachiwanchej ni pi Jehová jina munakuwasqanchejta, ni may sumaj amigonchejpis, ni aswan qaylla familianchejpis (Romanos 8:32, 38, 39 leey). Noqanchej kikinchejta munakusqanchejmantapis Jehovaqa astawanraj munakuwanchej. Kaypi tʼukuriy: ¿Wiñaypaj kausakuyta munankichu? Jehovaqa astawanraj munan wiñaypaj kausakunaykita. ¿Munankichu juchasniykimanta perdonasqa kayta? Jehovaqa astawanraj munan juchasniykita perdonasuyta. Chaypajtaj kayllata ruwananchejta munan: Wawanpa wañuyninmanta agradecekunanchejta, paypi creenanchejta, kasukunanchejtataj. Jehovaqa Wawanta kachamusqanpi sutʼita rikuchiwanchej mayta munakuwasqanchejta. Paraisopitaj astawanraj Jehovaj munakuyninmanta yachakusunchej (Ecl. 3:11).

¿IMATÁ JESUSPA WAÑUYNIN YACHACHIWANCHEJ PAYMANTA?

10. 1) ¿Imataj Jesusta llakicherqa niraj wañuchishajtinku? 2) ¿Imaynasmantataj Jesús Jehovaj sutinta jatuncharqa? (“ Jesusqa tukuy sonqo kasukuspa Jehovaj sutinta jatuncharqa” nisqa recuadrotawan qhawariy).

¹⁰ Jesusqa astawan llakikun Tatanta allinpaj qhawachinanmanta (Juan 14:31). Payqa mana munarqachu tumpanankuta “Diospa contranta parlan, Diospa contranta oqharikun” nispa. Chay imasmanta tumpaspa wañuchejtinku Tatanta pisipaj qhawachinanmanta llakikorqa. Chayrayku Tatanta nerqa: “Tatáy, atikojtenqa kay copata noqamanta karunchay”, nispa (Mat. 26:39). Jesús wañupunankama tukuy sonqo kasukusqanqa sutʼita rikucherqa Satanás Tatanmanta llullakuspa parlasqanta.

11. ¿Imaynatá Jesús rikucherqa runasta mayta munakusqanta? (Juan 13:1).

 ¹¹ Jesuspa wañuynenqa yachachiwanchej runasmanta mayta llakikusqanta, astawanraj discipulosninmanta (Pro. 8:31; Juan 13:1 leey). Jesusqa yacharqa kay jallpʼapi kashaspa ashkha llakiykunapi rikukunanta, may llakiyta wañuchinankutapis. Jinapis mana kamachisqa jinallachu kay jallpʼaman jamorqa, manaqa tukuy sonqo willarqa, yachacherqa, yanaparqataj. Wañuchinanku chay diataj apostolesninpa chakisninkuta mayllananpaj, kallpachananpaj, yachachinanpaj ima tiempochakorqa (Juan 13:12-15). Kʼaspipi clavasqaña kashajtintaj ladonpi kaj suwa runaman nerqa paraisopi kananta, Juanmantaj encargakorqa maman Mariata cuidananpaj (Luc. 23:42, 43; Juan 19:26, 27). Jesusqa runasta mayta munakusqanta rikucherqa tukuy ima ruwasqanpi, kausaynintapis paykunarayku qosqanpi.

12. ¿Imastataj Jesús noqanchejrayku ruwashallanpuni?

¹² Jesusqa “uj kutillata wañorqa wiñaypaj”. Jinapis ashkha imasta noqanchejrayku ruwashallanpuni (Rom. 6:10). Wañuyninrayku ashkha allin imasta qonawanchejpaj sinchʼita trabajashallanpuni. Rey jina, Kuraj kaj Sacerdote jina, congregacionpa uman jina ashkha imasta ruwashallanpuni (1 Cor. 15:25; Efe. 5:23; Heb. 2:17). Jesusqa ajllasqa cristianosta, may chhika runastapis tantashan, tantaytataj tukonqa manaraj manchay ñakʼariy tiempo tukukushajtin (Mat. 25:32; Mar. 13:27). b Chantapis allin kamachi yuyayniyojnejta ashkha yachachiykunata mikhunata jina qowanchej Jehovata yupaychanallanchejpajpuni (Mat. 24:45). Waranqa watasta kamachishajtintaj yanapanawanchejpaj siga trabajallanqapuni. Reparanchej jina, Jehovaqa Wawanta kachamorqa mana kausayninta noqanchejrayku qonallanpajchu, manachayqa noqanchejrayku ashkha imasta ruwananpajpis.

SIGA YACHAKUNALLAPUNI

13. ¿Imata yachakunanchejpajtaj tʼukuriy yanapawasunman?

¹³ Jehovapis Jesuspis munakuwasqanchejmanta waj imasta yachakunanchejpajqa tʼukurinanchej tiyan. Jesuspa wañuyninta yuyarinapaj tiempopeqa uj evangeliota chayri iskay evangeliosta leerisunman. Mana ujllapi ashkhata leerpanachu, manaqa allillanwan leerispa reparana imasraykuchus Jehovata, Jesustapis  astawan munakunanchejta. Imastachus yachakusqanchejtataj wajkunaman willarinapuni.

14. Salmo 119:97, sutʼinchayninpis nisqanman jina, ¿imatataj ruwananchej tiyan siga yachakunanchejpaj Jesuspa wañuyninmanta, waj yachachiykunamantapis? (Fototawan qhawariy).

¹⁴ Unayña testigo kaspapis, ¿mosoj imasta yachakullawajpunichu Jehovaj cheqan kayninmanta, munakuyninmanta, Wawanta noqanchejrayku kachamusqanmanta ima? Arí. Chay imasmanta yachakuytaqa ni jaykʼaj tukusunchu. ¿Imatá ruwasunman siga yachakunallapajpuni? Publicacionesninchejta estudianallapuni. Uj textota mana entiendespaqa imachus niyta munasqanta maskʼana. Diantintaj tʼukurina imatachus yachakusqanchejpi Jehovamanta, Wawanmanta, paykuna munakuwasqanchejmantapis (Salmo 119:97, sutʼinchaynintawan leey).

15. ¿Imajtintaj Bibliapi sumaj yachachiykunata maskʼanallanchejpuni tiyan?

¹⁵ Wakin kutis Bibliata leeshaspa chayri estudiashaspa mosoj imasta, tʼukuna imasta mana yachakunchejchu chayqa, ama llakikunachu. Bibliata estudiayqa kikinchakunman orota maskʼaywan. Ashkha runasqa horasta, diasta kanku orota maskʼaspa. Mayta pacienciakuspa, mana saykʼuspataj maskʼallankupuni, may chhikitan orota tarejtinkupis paykunapaj may valorniyoj kasqanrayku. Bibliapi sumaj yachachiykunata tarisqanchejqa oromanta nisqa aswan valorniyojraj (Sal. 119:127; Pro. 8:10). Chayrayku pacienciakuspa Bibliata leenallapuni, estudianallapunitaj (Sal. 1:2).

16. ¿Imaynatá Jehová jina, Jesús jina ruwasunman?

¹⁶ Estudiashaspaqa piensarina imaynasmantachus chay yachakusqanchejta ruwanapi. Jehová jina cheqan kajta ruwasunman tukuyta uj rejllata qhawaspa. Jesús jina Tatanta, runastapis munakusqanchejrayku Jehovaj nisqanta ruwana, wajkunatapis yanapana mana atinanchejpaj jina kajtinpis. Jesús jina ruwallasunmantaj wajkunaman predicaspa, jinamanta wañuyninwan yanapachikunankupaj.

17. ¿Imatá qhepan yachaqanapi yachakusunchej?

¹⁷ Jesuspa wañuyninta aswan sumajta entiendespa, jatunpajtaj qhawaspaqa Jehovata, Jesustawan astawan munakusunchej. Paykunapis noqanchejta astawan munakullawasuntaj (Juan 14:21; Sant. 4:8). Chayrayku Jehová yanapasta qowasqanchejwan yanapachikunallapuni Wawanpa wañuyninmanta yachakunapaj. Qhepan yachaqanapitaj yachakusun imaynatachus Jesuspa wañuynin yanapawasqanchejta, chantá imaynatachus chaymanta agradecekunatapis.