1. ¿Imatá ruwasunman Jehovata kusichinapaj?

 KAYPI piensarina: May munakuywan pimanpis uj sumaj regalota, necesitasqan regalota jaywarisunman. Paytaj chay regalasqanchejta jallchʼarpanman, qonqapunmantaj. ¿Maytacharí llakikusunman chayta ruwajtin? Jinapis maytachá kusikusunman agradecekusqanrayku chay regalota apaykachajtin. ¿Imatá chay kikinchaymanta yachakusunman? Jehovaqa Wawanta noqanchejrayku qorqa. Payqa maytachá kusikun Wawanta kachamusqanmanta, mayta munakuwasqanchejmantapis agradecekojtinchej (Juan 3:16; Rom. 5:7, 8).

2. ¿Imatá kay yachaqanapi yachakusun?

² Watas pasasqanman jina ichapis Jesuspa wañuyninta manaña uj sumaj regalota jinañachu qhawasunman. Chay regalota japʼisqanchejmanta may kusisqa kaspapis jallchʼarpasunman jina kanman, qonqarpasunman jinataj kanman. Agradecekusqanchej mana ajinata pisiyananpajqa imatachus Jehovapis Jesuspis noqanchejrayku ruwasqankupi tʼukurinallapuni. Chaypaj kay yachaqana yanapawasun. Yachakusun imaynatachus Jesuspa wañuynin kay tiempopiña yanapawasqanchejta, aswan qhepamanpis imaynatachus yanapanawanchejta. Yachakullasuntaj imaynatachus Jehovaj munakuyninmanta agradecekunanchejta, astawanraj Jesuspa wañuyninta yuyarinapaj tiempopi.

 ¿IMAYNATÁ KAY TIEMPOPI YANAPAWANCHEJ?

3. ¿Imaynatá kay tiempopi Jesuspa wañuynin yanapashawanchej?

³ Cristoj wañuynenqa yanapashawanchejña. Jesús wañusqanrayku Jehovaqa juchasninchejta perdonawanchej. Jinapis mana obligasqa jinachu perdonawanchej, manaqa perdonayta munawasqanchejrayku. Davidqa mayta agradecekuspa takerqa: “Jehová Diosníy, qanmin kʼacha kanki, perdonanapajpis wakichisqa kashanki”, nispa (Sal. 86:5; 103:3, 10-13).

4. ¿Pikunapajtaj Jehová Wawanta qorqa? (Lucas 5:32; 1 Timoteo 1:15).

⁴ Wakenqa yuyanku Jehová mana perdonananpaj jina kasqankuta. Ama qonqanachu, tukuyninchejpis mana perdonanapaj jinachu kanchej. Apóstol Pablo nerqa: “Manataj apóstol nisqa kanaypaj jinachu kani”, nispa. Chantá nillarqataj: “Diospa jatun khuyakuyninrayku apóstol kani”, nispa (1 Cor. 15:9, 10). Juchasninchejmanta pesachikojtinchej Jehová perdonawanchej. ¿Imajtin? Mana perdonanapaj jina kasqanchejraykuchu, manachayqa munakuwasqanchejrayku. Chayrayku Jehová mana perdonanawanchejpaj jina kasqanchejta yuyaspaqa, yuyarikuna Jehovaqa Wawanta qosqanta juchasapa runaspaj, juchasninkumanta arrepientekojkunapaj, manataj mana pantaj runaspajchu (Lucas 5:32; 1 Timoteo 1:15 leey).

5. ¿Imaraykutaj ni pi ninmanchu Jehová khuyakunanpaj jina kasqanta?

⁵ Ashkha watastaña Jehovata sirvispapis mana yuyananchejchu tiyan kallpachakusqanchejrayku khuyakuwasqanchejta. Jehovaqa jatunpajpuni qhawan payrayku imastachus ruwasqanchejta (Heb. 6:10). Jinapis payqa regalota jina Wawanta qowanchej, manataj sirvisqanchejmanta pagota jinachu. Sichus nisunman kallpachakusqanchejrayku khuyakuwasqanchejta chayri allinpaj qhawawasqanchejta chayqa, waj parlaypi nishasunman mana Cristoj wañuyninta necesitasqanchejta (Gálatas 2:21, kikinchay).

6. ¿Imajtín Pablo Jehovata sirvinanpaj mayta kallpachakorqa?

⁶ Pabloqa yacharqa mana kallpachakusqanraykuchu Jehová perdonananta. Jina kajtin, ¿imajtintaj mayta kallpachakorqa Jehovata sirvinanpaj? Payqa Jehovaj jatun khuyakuyninmanta agradecekuyta munarqa (Efe. 3:7). Noqanchejpis tukuy sonqo Jehovata sirvishallanchejpuni mana khuyakunawanchejraykuchu, manachayqa khuyakuwasqanchejmanta agradecekuyta munasqanchejrayku.

7. ¿Imaynatá Jesuspa wañuynin kay tiempopi yanapallawanchejtaj? (Romanos 5:1; Santiago 2:23).

⁷ Jesuspa wañuyninrayku kay tiempopiña Jehovawan sumaj amigos kayta atinchej. a Ñaupaj yachaqanapi yachakorqanchej jina nacekushaspaqa manaraj Jehovaj amigosninchu kanchej. Jinapis Jesuspa wañuyninrayku ‘Dioswan allinpi kayta’ atinchej, paymantaj qayllaykuyta atinchej (Romanos 5:1; Santiago 2:23 leey).

8. ¿Imaraykú Jehovaman agradecekunanchej tiyan orakuyta atisqanchejmanta?

⁸ Jehovaj amigosnin kasqanchejrayku payman orakuyta atinchej. Chaytaj uj sumaj regalo. Payqa mana tantakuypi ruwakusqan mañakuykunallatachu uyarin, manachayqa sapa ujninchejpa mañakuyninchejtapis. Mañakojtinchejqa sonqonchej tiyaykun, phaj nirintaj. Jinapis orakoyqa mana chayllapajchu yanapawanchej, astawanqa yanapawanchej Jehovawan aswan sumaj amigos kananchejpaj (Sal. 65:2; Sant. 4:8; 1 Juan 5:14). Jesusqa kay  jallpʼapi kashaspa orakullajpuni Jehová uyarishasqanta yachasqanrayku, sumaj amigosllapunitaj kanankupaj yanapasqanrayku (Luc. 5:16). Mayta agradecekunchej Jesuspa wañuyninrayku Jehovawan amigos kayta atisqanchejmanta, payman orakuyta atisqanchejmantapis.

¿IMAYNATÁ ASWAN QHEPAMAN YANAPAWASUN?

9. Jehovaj kasukoj kamachisninta, ¿imaynatá Jesuspa wañuynin aswan qhepaman yanapanqa?

⁹ ¿Imaynatá Jesuspa wañuynin Diospa kasukoj kamachisninta aswan qhepaman yanapanqa? Jehová wiñay kausayta paykunaman qonqa. Ashkha runasqa yuyanku manapuni wiñaypaj kausakuyta atisqanchejta, runas chay chhika unayña wañusqanchejrayku. Chaywanpis Jehovaqa runasta wiñaypaj kausakunanchejpaj ruwawarqanchej. Wiñay kausay kay tiempopi tʼukunapaj jina kajtinpis, wiñay kausayta qonawanchejpaj Jehová Wawanta qosqanqa tʼukunapaj jinallataj (Rom. 8:32).

10. ¿Imatataj mayta suyakushanku ajllasqa cristianos, waj ovejasmanta kajkunapis?

¹⁰ Wiñay kausayta qhepamanraj japʼinanchej kajtinpis, Jehovaqa munan chayta suyakuspa kausakunanchejta. Ajllasqa cristianosqa maytapuni suyakushanku Cristowan khuska cielomantapacha kay jallpʼata kamachimuyta (Apo. 20:6). Waj ovejasmanta kajkunataj maytapuni suyakushanku kay jallpʼa paraisoman tukojtin chaypi tiyakuyta. Chaypeqa manaña kanqachu ni nanaypis, ni ñakʼariypis (Apo. 21:3, 4). ¿Kay jallpʼapi wiñaypaj kausakuytachu suyakushanki? Chayqa mana aswan pisi valorniyoj regalochu. Runasqa jallpʼapipuni wiñaypaj kausakunanchejpaj ruwasqa karqanchej. Chayrayku kay jallpʼapi wiñaypaj kausakuspaqa maytapuni kusikusun.

11, 12. ¿Ima bendicionestataj paraisopi mayta japʼiyta munashanchej? (Dibujostawan qhawariy).

¹¹ Tʼukuriy imaynatachus paraisopi kausakunaykipi. Manaña onqonaykimanta, ni wañunaykimantapis llakikunkichu (Isa. 25:8; 33:24). Jehovaqa tukuy ima allin munasqaykita  qosonqa. ¿Imastá yachakuyta munawaj? ¿Mana rejsisqayki animalesmantachu, uj tocanata tocaytachu, dibujaytachu? Paraisopeqa necesitakonqa arquitectos, albañiles, tarpojkuna, waykʼojkuna, jardineros, herramientasta ruwajkuna, arreglajkuna, waj imaspi yanapakojkunapis (Isa. 35:1; 65:21). Wiñaypaj kausakuspaqa tukuy ima munasqaykita yachakuyta atinki.

¹² Kausarimojkunawan tinkukoyqa may kusiypuni kanqa (Hech. 24:15). May kusiyllataj kanqa Jehovamanta astawan yachakuy, tukuy ima ruwasqanmantapis (Sal. 104:24; Isa. 11:9). Aswan sumajtaj kanqa mana juchallikuspa Jehovata sirviy. Chay bendicionesta, ¿manacharí pierdeyta munasunmanchu “uj tiempollata kusikuspa juchapi” purispa? (Heb. 11:25). Chay jina sumaj kausayqa kay mundopi imata tarisqanchejmantapis aswan sumajpuni kanqa. Paraisopeqa manaña suyakusunchu chay imas kananta, rikusunpuni. Manachus Jehová mayta munakuwasunman karqa, Wawantapis mana noqanchejrayku qonmanchu karqa chayqa, mana chay imasta japʼiyta atisunmanchu.

MAYTA AGRADECEKUNA JEHOVAJ MUNAKUYNINMANTA

13. ¿Imaynatá Jehovaj munakuyninmanta agradecekusunman? (2 Corintios 6:1).

¹³ ¿Imaynatá Jehovaman agradecekusunman Wawanta noqanchejrayku qosqanmanta? Payta sirviyta kausayninchejpi ñaupajman churaspa (Mat. 6:33). Jesús wañorqa “kausajkunaqa, manaña paykunapajchu kausanankupaj. Astawanqa pichus paykunarayku wañorqa, kausarinporqataj chaypaj kausanankupaj” (2 Cor. 5:15). Ni imarayku qonqapuyta munanchejchu Jehovaj jatun khuyakuyninmanta (2 Corintios 6:1 leey).

14. ¿Imaynatá rikuchinchej Jehovaj nisqanpi atienekusqanchejta?

¹⁴ Jehovaj munakuyninmanta agradecekullasunmantaj paypi atienekuspa, niwasqanchejtataj kasukuspa. ¿Imaynatá chayta ruwasunman? Imallatapis ajllashaspa imatachus Jehová ruwananchejta munasqanman jina ajllaspa. Chaytaj kanman may chhikatachus estudiananchejta chayri ima trabajomanchus yaykunanchejta ajllashajtinchej (1 Cor. 10:31; 2 Cor. 5:7). Creesqanchej ruwasqanchejpi sutʼi rikukojtenqa creeyninchej sinchʼiyan, Jehovawanpis aswan sumaj amigos kanchej. Wiñay kausayta japʼiytapis aswan kusiywan suyakunchej (Rom. 5:3-5; Sant. 2:21, 22).

15. ¿Imaynatá agradecekusunman Jesuspa wañuyninta yuyarinapaj tiempopi?

¹⁵ Wawanta qosqanmanta, munakuyninmantapis Jehovaman agradecekullasunmantaj Jesuspa wañuyninta yuyarinapaj tiempopi astawan llankʼarispa. Chay tantakuyman rinapaj wakichikuna, wajkunatapis invitarina (1 Tim. 2:4). Invitarishaspaqa sutʼincharina imaschus chay sumaj tantakuypi ruwakunanta. Jw.org  nisqamanta ¿Imapajtaj Jesús wañorqa? Chantá Jesuspa wañuyninta yuyarina nisqa videosta qhawarichisunman. Ancianosqa manaña tantakuyman jamoj hermanosta invitanankupaj kallpachakunanku tiyan. Jehovaj chinkasqa ovejitasninmanta wakillanpis llajtanman kutinpuyta munajtinku, may kusiypuni kanqa cielopi, kay jallpʼapipis (Luc. 15:4-7). Jesuspa Wañuyninta Yuyarinapaj tantakuypeqa mana noqanchejpurallachu saludanakuna, astawanqa saludarina mosojkunata, unayña mana tantakuyman jamojkunatapis. Tukuy jamojkunata walejta jamusqankuta nina (Rom. 12:13).

16. ¿Imaraykutaj Jesuspa wañuyninta yuyarinapaj tiempopi astawan willanapaj wakichikusunman?

¹⁶ ¿Atisunmanchu Jesuspa wañuyninta yuyarinapaj tiempopi astawan willariyta? Chayta ruwaspaqa Jehovata, Jesustapis noqanchejrayku tukuy ima ruwasqankumanta agradecekusunman. Astawan willaspaqa Jehovaj yanapayninta astawan reparasun, paypitaj astawan atienekusun (1 Cor. 3:9). Chantapis Jesuspa wañuyninta yuyarinapaj tiempopi, sapa diapaj ajllasqa textosta leerina. Chay textosqa rikhurin Diospa Palabranta sapa día estudiana folletopi, Cristiano Kausayninchej folletopipis. Atispataj chay textosta astawan estudiarisunman.

17. ¿Imataj Jehovata astawan kusichin? (“ Kay imasta ruwasunman Jehovaj munakuyninmanta agradecekunapaj” nisqa recuadrotawan qhawariy).

¹⁷ Kay yachaqanapi yuyaychakusqan imasta mana tukuyninta ruwayta atinchejchu chayqa, ama llakikunachu. Jehovaqa imatachus ruwasqanchejta mana wajkunaj ruwasqankuwan kikinchanchu. Payqa yachan may jinatachus sonqonchejpi munakusqanchejta. Jehovaqa reparan Wawanta regalota jina qowasqanchejmanta mayta agradecekusqanchejta. Chayrayku mayta kusikun (1 Sam. 16:7; Mar. 12:41-44).

18. ¿Imaraykú Jehovata, Jesustapis mayta agradecekunchej?

¹⁸ Jesús kausayninta qosqanraykulla juchasninchejmanta perdonasqa kayta atinchej, Jehovaj amigosnin kayta atinchej, wiñay kausaytataj suyakuyta atinchej. Jehovaqa mayta munakuwasqanchejrayku chay tukuy imasta qowanchej, chaymantataj mayta agradecekunallapuni (1 Juan 4:19). Jesustapis mayta agradecekunallataj. Payqa mayta munakuwasqanchejrayku kausayninta noqanchejrayku qorqa (Juan 15:13).