1. ¿Imapitaj runas astawan yuyanku?

 ICHAPIS repararqanchej may chhika runasqa paykunallapi astawan yuyasqankuta. Wakenqa tukuy imata redes socialesman churanku, runas paykunata, ruwasqankutapis qhawanankupaj. Jinapis may pisi runaslla Jehovata jatunchanku. Kay yachaqanapi parlarisun imachus niyta munasqanta Jehovata jatunchay, imaraykuchus jatunchananchejtapis. Chantapis qhawarillasuntaj imaynatachus Diosta jatunchananchejta, sutin jatunchanapaj jina kasqanrayku, tumpamantawantaj payllataj sutinta jatunchanantapis.

¿IMA NIYTÁ MUNAN JEHOVATA JATUNCHAY?

2. ¿Imaynatataj Jehová Sinaí orqopi jatun kayninta rikucherqa? (Tapapi dibujotawan qhawariy).

² Bibliapeqa jatunchay palabrata oqharikun imachus pitapis tʼukunaman tukuchisqanta ninanpaj. Jehovaqa israelitasta Egiptomanta kacharichisqantawan jatun kayninta paykunaman rikucherqa. Chaypachaqa may chhika israelitas Sinaí orqo pampapi kasharqanku, Diospa nisqanta uyarinankupaj. Chay orqotaqa yanayarishaj phuyu pʼampaykorqa, jallpʼaqa manchayta kharkatirerqa, orqotaj qʼoshñirerqa, lliuj lliuj nishaj relámpagos rikhurimorqa, qhorurun qhorurun nispa sonarimorqa, pututoj waqaynintaj sinchʼita uyarikorqa (Éxo. 19:16-18; 24:17; Sal. 68:8). Chay imasta ruwaspa Jehová jatun kayninta rikuchejtin israelitasqa tʼukullachá kasharqanku.

3. ¿Ima niytá munan Jehovata jatunchay?

³ Noqanchejrí, ¿Jehovata jatunchayta atisunmanchu? Arí. Paytaqa jatunchasunman runasman tʼukuna atiyninmanta  parlarispa, kʼacha kaykunasninmantapis. Chantapis Jehovata jatunchallasunmantaj imata ruwanapajpis pay kallpata qowasqanchejmanta agradecekuspa (Isa. 26:12). Rey Davidqa tukuypa ñaupaqenpi Jehovata jatuncharqa kay jinata mañakuspa: “Jehová Diosníy, qanllamin kanki may jina jatun, manchay atiyniyoj, kʼacha sonqoyoj, manchayta lliphipej, jatunpaj qhawasqataj. Cielopi, jallpʼa patapi tukuy ima kajpis qanpata”. Mañakuyta tukojtintaj tukuynin tantasqa israelitasqa Jehovata “jatuncharqanku” (1 Cró. 29:11, 20).

4. ¿Imata ruwaspataj Jesús Jehovata jatuncharqa?

⁴ Jesusqa kay jallpʼapi kashaspa ashkha imaynasmanta Tatanta jatuncharqa. Milagrosta ruwaspaqa Jehovaj atiyninwanpuni ruwasqanta sutʼinchaj (Mar. 5:18-20). Tatanta jatunchallajtaj paymanta allinta parlaspa, runaswanpis kʼacha kaspa. Uj kuti Jesús sinagogapi yachachishajtin, runas chaupipi uj warmi kasharqa. Paytaqa uj supay 18 watastaña onqoykuchisqa. Chayraykutaj kʼumpusqallaña purej, nitaj cheqanchakuyta atejchu. Chayqa may llakiypunichá karqa. Jesustaj paymanta khuyakuspa munakuywan nerqa: “Onqoyniykimanta kacharichisqaña kanki”, nispa. Makisninta payman churaykusqantawantaj, chay warmeqa cheqanyakorqa, “Diostataj jatuncharqa” (Luc. 13:10-13). Chay warmeqa sanoyapusqanrayku Jehovata jatuncharqa. Noqanchejpis ashkha imasrayku Jehovata jatunchanallanchejtaj tiyan.

¿IMARAYKUTAJ JEHOVATA JATUNCHANCHEJ?

5. ¿Imaraykutaj Jehovata jatunpaj qhawanchej?

⁵ Jehovata jatunchanchej may jatunpaj qhawasqanchejrayku. Paytaqa ashkha imasrayku jatunpaj qhawanchej. Jehovaqa tukuy atiyniyoj, nitaj jaykʼajpis saykʼunchu (Sal. 96:4-7). May yachayniyoj kasqanqa tukuy ima ruwasqanpi rikukun. Pay kausayta qowanchej, kausananchejpajpis tukuy ima necesitasqanchejta qowanchej (Apo. 4:11). Payqa atienekunapaj jina (Apo. 15:4). Tukuy ima ruwasqanpi allinpuni rin, tukuy ima nisqantataj ruwanpuni (Jos. 23:14). Chayraykuchá profeta Jeremías Jehovata nerqa: “Tukuy nacionesmanta yachayniyoj runas ukhupi, chay nacionespa tukuy jallpʼasninkupipis, mana kanchu pipis qan jinaqa”, nispa (Jer. 10:6, 7). Arí, Tatanchej Jehovataqa ashkha imasrayku jatunpaj qhawanchej. Jinapis paytaqa mana jatunllapajchu qhawanchej, astawanqa mayta munakunchej.

6. ¿Imaraykutaj Jehovata munakunchej?

⁶ Jehovata jatunchanchej tukuy sonqonchejwan munakusqanchejrayku. Paytaqa munakunchej ashkha kʼacha kaykunasniyoj kasqanrayku. Jehovaqa khuyakuyniyoj, kʼacha sonqoyojtaj (Sal. 103:13; Isa. 49:15). Payqa noqanchejpaj sonqoyoj kasqanrayku, sufrejtinchej sonqonpis nanallantaj (Zac. 2:8). Payman qayllaykunanchejpaj, amigosnintaj kananchejpaj yanapawanchej (Sal. 25:14; Hech. 17:27). Chantapis kʼumuykukoj sonqo kasqanrayku, “payqa kʼumuykamuspa cielotawan jallpʼatawan qhawarimun, pobre runata pampamanta sayarichinanpaj” (Sal. 113:6, 7). ¿Pitaj chay jina kʼacha Diosta mana jatunchanmanchu? (Sal. 86:12).

7. ¿Imatataj ruwayta atinchej?

⁷ Jehovata jatunchanchej runas rejsinankuta munasqanchejrayku. Ashkha runasqa Diosmanta pantasqata yuyanku. ¿Imajtin? Satanasqa imaymana llullasta Diosmanta rikhurichin, chaywantaj runaspa yuyayninkuta laqhayachin (2 Cor. 4:4). Payqa runasta  creechin Jehovaqa castigawasqanchejta, noqanchejmanta mana llakikusqanta, casi tukuy ñakʼariykunamantataj pay juchayoj kasqanta. Noqanchejtaj yachanchej chayqa llulla kasqanta. Atinchejtaj runa masinchejman willariyta imaynapunichus Diosninchej kasqanta, ajinamantataj payta jatunchanchej (Isa. 43:10). Kunanqa 96 Salmomanta wakin versiculosta ukhuncharisun. Chaypeqa parlashan Jehovata jatunchanamanta. Chayta ukhuncharispa reparasun imaynasmantachus Diosninchejta jatunchayta atisqanchejta jatunchanapaj jina kasqanrayku.

¿IMAYNATÁ JEHOVATA JATUNCHASUNMAN?

8. ¿Imata ruwaspataj Jehovata jatunchanchej? (Salmo 96:1-3).

⁸ (Salmo 96:1-3 leey). Jehovata jatunchanchej paymanta allinta parlaspa. Chay versiculospi Diospa kamachisninta nishawanchej Jehová Diospaj ‘takiripunanchejta’, ‘sutinta jatunchananchejta’, “salvasqanmanta sumaj willaykunata” willananchejta, “naciones ukhupitaj jatun kayninmanta” willananchejta. Chay imasta ruwaspa Tatanchej Jehovata jatunchanchej. Kasukoj judiospis, ñaupa tiempomanta cristianospis imaynachus Jehová kasqanmanta, allin imasta paykunapaj ruwapusqanmantapis tukuy atisqankuta parlaj kanku (Dan. 3:16-18; Hech. 4:29). ¿Imaynatá paykuna jina ruwasunman?

9, 10. ¿Imatá Angelinamanta yachakunki? (Fototawan qhawariy).

⁹ Estados Unidospi tiyakoj Angelina a sutiyoj hermananchejmanta parlarina. Payqa mana manchikuspa trabajonpi Jehovamanta parlarisqa. Payqa chay kutillaraj chay trabajoman yaykusqa. Chaypitaj uj tantakuyta ruwanankuta nisqanku, tukuy mosoj trabajadores paykuna kikinkumanta parlarinankupaj, ajinamanta wajkuna rejsinankupaj. Hermananchej Angelinaqa Jehovaj testigon kaspa may kusisqa kasqanta rikuchinanpaj “fotosta rikuchisaj” nisqa. Niraj parlashajtintaj ñaupajtaqa uj compañeronraj parlasqa. Paytaj nisqa testigo familiapi uywakusqanta, jinapis testigospa creenciasninkumanta burlakusqa. Angelina nin: “Yawarniy tʼimpuriwarqa. Tʼukurerqanitaj: ‘¿Uyarillasajchu Jehovamanta llullasta parlananta? Ni chʼinlla kaymanchu’, nispa”.

 ¹⁰ Compañeron parlayta tukusqantawan Angelinaqa chʼinsitullamanta Jehovamanta mañakusqa, chantá kʼachallamanta nisqa: “Noqapis qan jinallataj testigo familiapi uywasqa karqani, kunankamataj testigollapuni kani”, nispa. Phiñakunanpaj jina kajtinpis Angelinaqa mana phiñakusqachu. Ñaupajtaqa Jehovata sirvisqanmanta kʼachitu fotostaraj rikuchisqa. Chaymantataj tukuyta jatunpaj qhawaspa creenciasninmanta parlarisqa (1 Ped. 3:15). Parlayta tukojtintaj chay compañeronqa niña phiñasqachu kashasqa, nisqataj paypis testigo tatasninwan tiyakusqanmanta kʼachitu imasta yuyarikusqanta. Angelina nin: “Jehovaqa munan paymanta llullasta parlajtinku cheqanta parlaspa sutʼinchananchejta. Chayta ruwaytaj may sumajpuni”, nispa. Noqanchejpis Jehovamanta mana allin imasta parlajtinku jatunchallasunmantaj. Chayta ruwaytaj may sumajpuni noqanchejpaj.

11. ¿Imaynatá ñaupa tiempomantapacha Diospa kamachisnin Salmo 96:8 nisqanman jina ruwanku?

¹¹ (Salmo 96:8 leey). Kapuyninchejwan Jehovata jatunchasunman. Diospa kamachisnenqa kapuyninkuwanpuni Jehovata jatunchayta yachanku (Pro. 3:9). Israelitasqa templo ruwakunanpaj, allinchakunanpajpis kapuyninkuwan yanapakorqanku (2 Rey. 12:4, 5; 1 Cró. 29:3-9). Cristoj discipulosninpis “kapuyninkuwan yanapaj kanku” payta, apostolesnintawan (Luc. 8:1-3). Ñaupa tiempomanta cristianospis hermanosninku pisichikushajtinku yanapata apacherqanku (Hech. 11:27-29). Noqanchejpis Jehovata jatunchasunman kapuyninchejmanta churaspa.

12. ¿Imaynatá kapuyninchejwan Jehovata jatunchanchej? (Fototawan qhawariy).

¹² Qhawarina imaynatachus kapuyninchejmanta churaspa Jehovata jatunchasqanchejta. 2020 watapi Zimbabue suyupi unayta mana parasqanrayku, may chhika runaspaj mana mikhuna karqachu. Prisca sutiyoj hermananchejpis ajinallapitaj rikukorqa. Ajinapis sapa miercolesta, sapa viernestawan predicaj rejpuni, llankʼana tiempo chayamojtinpis. Chay qayllapi tiyakojkunataj mana llankʼaspa predicajta rikuspa nej kanku: “Yarqhaymanta wañunki”, nispa. Hermananchejtaj yacharqa Jehová cuidanantapuni, chayrayku kutichej: “Jehovaqa ni  jaykʼaj kamachisninta qonqakunchu”, nispa. Pisi tiemponmantaj kapuyninchejwan yanapakusqanchejrayku, Diospa llajtanqa yanapata payman chayacherqa. Wakin vecinosnintaj tʼukulla nerqanku: “Diosqa ni jaykʼaj qonqakusunkichu. Paymanta astawan yachayta munayku”, nispa. Ajinamanta qanchispuni tantakuykunasninchejman riyta qallarerqanku.

13. Salmo 96:9 nisqanman jina, ¿imatá ruwananchej tiyan Jehovata jatunchananchejpaj?

¹³ (Salmo 96:9 leey). Jehovata jatunchasunman imaynatachus kausasqanchejwan. Jehovaj sacerdotesnenqa Diosta yupaychana toldopi, templopipis sirvinankupaj llimphitus kananku karqa (Éxo. 40:30-32). Noqanchejpis llimphitus kanapaj mayta kallpachakunchej, astawanraj Diospa ñaupaqenpi llimphu kausayniyoj kanapaj (Sal. 24:3, 4; 1 Ped. 1:15, 16). Mayta kallpachakunanchej tiyan ‘ñaupa kausayninchejta’ saqepunapaj, “mosoj kausaywantaj” pʼachallikunapaj. Nisunman mana allin yuyaykunata, millay ruwaykunatapis qonqaspa Jehovaj kʼacha kaykunasninman jina yuyayta, ruwayta ima yachakunanchej tiyan (Col. 3:9, 10). Diospa yanapayninwanqa aswan millay kausayniyoj runaspis, may machu machu runaspis cambianku, mosoj kausaywantaj pʼachallikunku.

14. ¿Imatá Jackmanta yachakunki? (Fototawan qhawariy).

¹⁴ Jackmanta parlarina. Payqa may phiña runa, maqanakoj runa karqa, Supay nispataj sutichaj kanku. Millay imastapuni ruwasqanrayku wañuchisqa kananpaj sentenciarqanku. Wañuchisqa kanan pʼunchay niraj chayamushajtintaj, carcelman predicaj rej hermanowan Bibliamanta yachakuyta qallarerqa. Millay imasta ñaupajta ruwajtinpis Jackqa cambiarqa, tiemponmantaj Jehovaj testigon jina bautizakorqa. Tʼukunapaj jina cambiasqanrayku, wañuchinanku diaqa wakin guardias waqaspa paymanta despedikorqanku. Chaypi trabajaj sargento nerqa: “Ñaupajta Jackqa tukuy presosmanta aswan millay runapuni karqa, kunantaj aswan kʼacha”, nispa. Jackta wañuchisqankumanta qhepan semanantaj, hermanosqa carcelman rillarqankutaj tantakuyta ruwaj. Chay tantakuymantaj uj preso jamusqa, payqa niraj ujtapis tantakuyman jamusqarajchu. ¿Imajtín chay tantakuyman jamorqa? Payqa mayta  tʼukorqa Jack cambiasqanmanta, yachaytataj munarqa imatachus ruwananta Jehovata yupaychananpaj. Chaypi sutʼita rikunchej imaynatachus kausasqanchejwan Tatanchej Jehovata jatunchayta atisqanchejta (1 Ped. 2:12).

¿IMAYNATÁ JEHOVÁ TUMPAMANTAWAN SUTINTA JATUNCHANQA?

15. ¿Imatá Jehová tumpamantawan ruwanqa sutinta llimphuchayta tukuchananpaj? (Salmo 96:10-13).

¹⁵ (Salmo 96:10-13 leey). 96 Salmoj tukukuyninpi nin Jehovaqa justiciawan juzgaj Rey kasqanta. ¿Imaynatá Jehová tumpamantawan sutinta jatunchanqa? Justiciata ruwaspa. Tumpamantawan Jatun Babiloniata chinkachenqa santo sutinta chʼichichasqanrayku (Apo. 17:5, 16; 19:1, 2). Llulla religiones chinkachisqa kasqankuta rikojkunamanta wakenqa ichapis noqanchejwan khuska Jehovata yupaychayta munanqanku. Chaymantataj Armagedonpi Jehovaqa Satanaspa rikhurichisqan imasta chinkachenqa. Pikunachus payta chejnikunku, sutintapis chʼichichanku chaykunata chinkachenqa. Payta munakojkunata, kasukojkunata, sutintataj jatunchayta munajkunata salvanqa (Mar. 8:38; 2 Tes. 1:6-10). Cristo waranqa watasta kamachisqantawan, qhepa kaj prueba tukukusqantawan, Jehovaqa sutinta llimphuchayta tukuchanqa (Apo. 20:7-10). Chaypachataj “jallpʼaqa Jehová Diospa jatun kayninta rejsiywan juntʼa kanqa, imaynatachus mar qochaman yaku juntʼaykun ajinata” (Hab. 2:14).

16. ¿Imatá astawan ruwayta munanki? (Dibujotawan qhawariy).

¹⁶ May sumajpuni kanqa tukuypis Jehovallata jatunchajtinku, sutin jatunchanapaj jina kasqanrayku. Chay pʼunchay chayamunankamataj tukuy atisqanchejta ruwana Diosninchejta jatunchanapaj. Chayta ruwananchejpuni kasqanta reparachinawanchejpaj, Diospa Llajtanta Kamachejkunaqa 2025 watapaj Salmo 96:8 versiculota ajllanku. Chaypi nin: “Jehová Diosta jatunchaychej sutin jatunchanapaj jina kasqanrayku”.