1. ¿Imatataj tukuy ruwananchejpuni tiyan?

 SAPA día ajllananchej tiyan imatachus ruwananchejta. Wakin imasta ajllayqa atikullan. Mana maytarajchu piensanchej tiyan imatachus desayunananchejta yachananchejpaj chayri ima horastachus puñukapunanchejta yachananchejpaj. Chaywanpis wakin imasta ajllanapajqa sumajtaraj piensarinanchej tiyan. Chay ajllasqanchejqa yanapawasunman chayri perjudicawasunman saludninchejpi, kusisqa kananchejpi, familianchejpi, Jehovata yupaychayninchejpipis. Tukuypis munanchej imatachus ajllasqanchejqa noqanchejpaj, familianchejpajpis allin kananta, astawanqa munanchej Jehovata kusichinanta (Rom. 12:1, 2).

2. ¿Ima kinsa imastaj yanapawasun imatapis sumajta ajllanapaj?

² Kay yachaqanapeqa imatapis sumajta ajllanapaj kinsa imasta ruwana kasqanta qhawarisun: 1) tukuy imataraj allinta yachanata, 2) imatachus Jehová yuyasqanta reparanata, 3) mayqenchus allin kasqanta sumajta tantearinata. Chantapis qhawarillasuntaj imatachus ruwasunman sumajta tanteariyta yachanapaj (Pro. 2:11).

TUKUY IMATARAJ ALLINTA YACHANA

3. Uj kikinchaywan sutʼinchariy imajtinchus tukuy imataraj allinta qhawaykurina kasqanta allinta ajllanapaj.

³ Allin yuyaywan imallatapis ajllanapajqa, ñaupajta tukuy imataraj allinta yachananchej tiyan. ¿Imajtin? Uj sinchʼi onqoyniyoj runa doctorman rejtin, ¿mana allinta qhawaykurispallachu, mana allinta tapurispallachu doctor jampista jaywaykullanman? Mana, ¿icharí? Noqanchejpis allin yuyaywan ajllanapajqa, ñaupajta  tukuy imata allintaraj qhawaykurinanchej tiyan. ¿Imaynatá chayta ruwasunman?

4. Proverbios 18:13 nisqanman jina, ¿imatá ruwawaj tukuy imata allinta yachanaykipaj? (Fototawan qhawariy).

⁴ Tukuy imata allinta yachanapajqa tapurikunanchejpuni tiyan. Uj fiestitaman wajyarisojtinku, ¿rillawajchu? Chay fiestitata ruwachejta mana allinta rejsejtiyki chayri imatachus chaypi ruwachinanta mana yachajtiyki, kay imasta tapuriy: “¿Maypitaj, chanta maykʼajtaj ruwakonqa? ¿Mashkha runastaj renqanku? ¿Pitaj cargoyoj kanqa? ¿Pikuná renqanku? ¿Imastaj chay fiestitapi ruwakonqa? ¿Machana ujyanas kanqachu?”. Chay imasta yachayqa allinta ajllanaykipaj yanapasonqa (Proverbios 18:13 leey).

5. Tukuy imata allinta yachaspaña, ¿imatá ruwanayki tiyan?

⁵ Tukuy imata allinta yachaspaña sumajta tanteariy. Sichus yachanki chay fiestitaman Jehovata mana kasukojkuna rinankuta, chayri machanasta ujyanata ni pi controlananta chayqa, ¿chay fiestita ‘millay fiestamanchu’ tukunman? (1 Ped. 4:3). Chayri, ¿imatá ruwawaj uj fiestitaman rinaykirayku tantakuyman chayri predicacionman mana rinaykita yachaspa? Chay tukuy imasta tanteareyqa allinta ajllanaykipaj yanapasonqa. Pero mana chayllatachu ruwanayki tiyan. Chay fiestitamanta imatachus yuyasqaykita yachaspañapis, ¿yachankichu imaynatachus Jehová chayta qhawasqanta? (Pro. 2:6).

 IMATACHUS JEHOVÁ YUYASQANTA REPARANA

6. Santiago 1:5 nisqanman jina, ¿imajtintaj Jehovamanta yanapata mañakunanchej tiyan?

⁶ Jehovamanta mañakuna imatachus yuyasqanta reparayta atinanchejpaj. Payqa yachayta “tukuyman mana michʼakuspa qon, mana rimaspallataj” (Santiago 1:5 leey). Chay qowasqanchej yachaytaj yanapawasun reparanapaj imallatapis ajllajtinchej kusichinantachus manachus.

7. ¿Imaynatá yachawaj imatachus Jehová yuyasqanta? Uj kikinchaywan sutʼinchariy.

⁷ Jehovamanta yanapata mañakuytawan sumajta reparana imaynatachus yanapawasqanchejta. Maymanpis viajashaspa chinkarpajtinchej, chaypi tiyakojkunata tapurikuytapuni yachanchej. Chanta, ¿tapurikuytawanpachachu ripunchej? Mana, ¿icharí? Sumajtaraj uyarisunman maynintachus rinanchejta indicawasqanchejta. Kikillantaj Jehová Dioswanpis, yachayninta mañakuytawanqa sumajta uyarina. Nisunman, imapajchus yachayta mañakusqanchejmanta kamachiykunasninta, yuyaychaykunasnintapis maskʼarina. Watejmanta parlarina fiestitaman wajyariwasqanchejmanta. Rinanchejtachus manachus ñapis ajllashaspaqa yuyarikunanchej kanman imatachus Biblia nin millay fiestasmanta, mana allin amigosmanta, Diospa Gobiernontapis munayninchejmanta nisqa ñaupajman churanamanta (Mat. 6:33; Rom. 13:13; 1 Cor. 15:33).

8. ¿Imatá ruwasunman necesitasqanchej yachachiykunata tarinanchejpaj? (Fototawan qhawariy).

 ⁸ Wakin kuteqa maskʼashasqanchej yachachiykunata tarinapaj yanapata necesitasunman. Sumajta yachaj hermano chayri hermana yanapariwasunman. Jinapis noqanchejpuni chay necesitasqanchej yachachiykunata maskʼananchej tiyan. Ashkha yachachiykunata tarisunman Jehovaj testigosnin yachaqanasta maskʼanankupaj nisqapi, Diospa Palabranwan yanapachikuna libropi, waj imaspiwan. Chay imasqa yanapawasun Jehová Diosta kusichinapaj jina imallatapis ajllananchejpaj.

9. ¿Imaynapí yachasunman ajllasqanchej Jehová Diosta kusichinantachus manachus? (Efesios 5:17).

⁹ ¿Imaynapí yachasunman ajllasqanchej Jehová Diosta kusichinantachus manachus? Ñaupajtaqa sumajtaraj Diosta rejsinanchej tiyan. Proverbios 9:10 nin: “Aswan Santo Diosmanta yachakuspaqa allin yuyayta japʼinkichej”. Allin yachayta japʼinapajqa yachananchej tiyan imaynachus Jehová kasqanta, munayninta, imatachus munakusqanta, imatachus chejnikusqantapis. Tapurikuna: “Jehovata rejsisqayman jina, ¿ima ajllasqaytaj payta kusichinman?”, nispa (Efesios 5:17 leey).

10. Familianchejpa, llajtanchejpa costumbresninkumanta nisqa, ¿imajtintaj Bibliaj yuyaychaykunasnintapuni valechinchej?

¹⁰ Wakin kutisqa Jehovata kusichiyta munasqanchejrayku, mana ruwasunchu familianchejpa nisqanta, nitaj amigosninchejpa nisqankutapis. Tatasqa ichapis warmi wawankuta obligankuman uj qhapaj hermanowan casarananpaj chayri wawankuta entregasqankumanta ashkha imasta japʼiyta munaspalla, chay hermano kausayninpi Jehovata mana ñaupajman churajtinpis. Tatasqa munankupuni warmi wawanku casarajtin ni imamanta pisichikunanta. Jinapis, ¿pitaj wawankuta yanapanman Jehovaman astawan kʼaskaykunanpaj? ¿Imatá Jehová chaymanta yuyanman? Mateo 6:33 tukuy cristianosman sutʼita nin: “Ñaupajtaqa Diospa Gobiernonta […] maskʼallaychejpuni”, nispa. Tatasninchejta, runa masistapis respetanchej, jinapis Jehovatapuni kusichiyta munanchej.

MAYQENCHUS ALLIN KASQANTA SUMAJTA TANTEARINA

11. Filipenses 1:9, 10 nisqanman jina, ¿imataj yanapawasun imatachus ajllananchejta tanteanapaj?

¹¹ Bibliaj yuyaychaykunasninta qhawaykuriytawan allinta tantearina imatachus ajllananchejta (Filipenses 1:9, 10 leey). ¿Imaynatá chayta ruwasunman? “Kayta ruwajtiy, kay kanman. Kaytañataj ruwajtiy, kayñataj kanman” nispa sumajta piensarispa reparana. Wakin kuteqa ujllapi ajllarqonchej, wakin kutitaj mana reparayta atillasunmanchu mayqenchus aswan allin kasqanta. Sumajta reparayta yachasun chayqa, chay kutispipis sumajta ajllayta atisun.

12, 13. Uj trabajota ajllananchejpaj, ¿imaynatá yanapawasunman sumajta reparayta yachay?

¹² Trabajoman yaykuyta munashajtinchej iskay trabajos rikhuriwasunman. ¿Imaynapí yachasunman mayqen trabajomanchus yaykunata? Sumajta yachananchej tiyan imaynachus chay trabajos kasqanta, ima horariospichus, maypichus kasqanta, waj imastawan. Iskaynin trabajosqa mana Bibliaj kamachiykunasninta pʼakinchu. Ichapis ujninta ajllakuyta munasunman gustawasqanchejrayku, chayri astawan pagasqankurayku. Chaywanpis niraj ujninta ajllakushaspaqa waj imaspiraj tʼukurinanchej tiyan.

¹³ Ujnin trabajoman yaykojtinchej, ¿atillasunchu tukuynin tantakuykunaman riyta? ¿Tiemponchej kallanqachu familianchejwan kananchejpaj, paykunaman Jehovamanta  yachachinanchejpajpis? Chay jina tapuykunaqa aswan importante imasta ñaupajman churananchejpaj yanapawasun: Jehová Diosta yupaychayninchejta, familianchejpa necesitasqanta, manataj qolqellatachu. Ajinamantataj sumajta ajllasunchej, Jehovataj bendeciwasun.

14. ¿Imaynatá sumajta reparayta yachay, munakuypis yanapawasun mana wajkunata urmachinapaj?

¹⁴ Sumajta reparayta yachayqa yanapallawasuntaj ajllasqanchejmanta imatachus wajkuna yuyasqankupi piensanapaj, ajinamanta mana imatapis ruwasunchu ‘wajkunata urmachinanpaj jinaqa’ (Fili. 1:10). Chay imaspi piensarinanchejpuni tiyan ropanchejta, imaynatachus kʼachanchakusqanchejtapis ajllashaspa. Imachus gustawasqanchejqa ichapis hermanosman chayri jawamanta runa masisman mana allinchu rijchʼanman chayri phiñachinman. Sumajta reparayta yachayqa yanapawasun  paykunaj yuyasqankuta respetanapaj. Munakuytaj yanapawasun paykunaj ‘allinninkuta’ maskʼanapaj, yuyasqankuta jatunpaj qhawanapajtaj (1 Cor. 10:23, 24, 32; 1 Tim. 2:9, 10). Ajinamanta ajllasqanchejwan wajkunata munakusqanchejta, respetasqanchejtapis rikuchisun.

15. ¿Imapí piensarinanchej tiyan manaraj jatun imasta ajllashaspa?

¹⁵ Aswan jatun imasta ajllananchej kajtin, piensarinanchej tiyan imaschus necesitakusqanta chay ajllasqanchejta ruwanapaj. Jesusqa nerqa ñaupajta sumajtaraj ‘qhawarikunata’ (Luc. 14:28). Chayrayku piensarinanchej tiyan chay ajllasqanchejta ruwanapaj mashkha tiempochus necesitakusqanta, mashkha qolqechus, chantá atisunchus ruwayta manachus chayta. Wakin kuteqa familianchejwan parlarinanchej kanqa, imaynatachus chay ajllasqanchejpi yanapanawanchejta sapa ujninku yachanankupaj. ¿Imajtín chay imasta ruwana tiyan? Chaypi reparasunman ichapis wakin imasta allinchanaraj kasqanta, chayri uj jinanmanta ruwana kasqanta. Chantapis familianchejta tapurejtinchej, yuyasqankutapis sumajta uyarejtinchej paykunaqa yanapayta atillawasun chay ajllasqanchej allin llojsinanpaj (Pro. 15:22).

ALLIN LLOJSINAWANCHEJPAJ ALLINTA AJLLANA

16. ¿Imastá ruwananchej tiyan ajllasqanchej allin llojsinanpaj? (“ ¿Imatá ruwasunman allinta ajllanapaj?” nisqa recuadrotawan qhawariy).

¹⁶ Tukuy chay imasta ruwasun chayqa, allin yuyaywanpuni ajllayta atisun. Chay ajllayta munasqanchejmanta tukuy imataña yachaspa, Jehovata kusichinanpajtaj yuyaychaykunasninta sumajtaña qhawaykurispa, ¿imatawán ruwana tiyan? Jehovamanta yanapata mañakuna tukuy ima allin llojsinawanchejpaj.

17. ¿Imatá ruwananchej tiyan allinta ajllanapaj?

¹⁷ Ichapis kunankama ashkha ajllasqanchej imaspi allin riwarqanchej. Jinapis allinta ajllanapajqa mana yachaynillanchejpichu, nitaj ñaupajta allin riwasqallanchejpichu atienekunanchej tiyan, manaqa Jehovaj yachayninpi. Jehovalla qowasun yachayta, entiendeyta, allinta reparaytapis. Chaywantaj sumaj yachayniyoj kasunchej (Pro. 2:1-5). Arí, Jehovaqa yanapawasun payta kusichisqan imasta ajllananchejpaj (Sal. 23:2, 3).